انا بقي والمناطق الشعبيه

مميزات المناطق الشعبيه

1/مش محتاج تشتري منبه لأنك مش هتعرف تنام اساسا

(تساعد علي توفير اموالك))

2/لا مجال للخصوصيه خالص ((ليتقال عليك تنك))

وطبعا مناخير جيرانك طويله بشكل يجيب بواسير

3/العشم الخارق الحارق

((في أي وقت لازم تخدم أي حد ولاد بلد بقي))

4/كله بيتكلم علي كله

((من باب الأطمئنان طبعا))مش نميمه يعني

5/لو جايب فاكهه في شنطه لونها فاتح

((المنطقه كلها تسلم عليك وعينها ع الشنطه))

مش لحاجه هو لازم بس يعرف انت جايب ايه

((تقريبا لو كانت فاكهه اورجانيك بيدوقها لمصلحتك))

6/في اي وقت ممكن تدخل سينما ببلاش ولايف كمان

((وخصوصا فيلم الحرافيش ميت واحد بيتخانقوا مع ميت واحد

من حته تانيه

وسكان المنطقه المحايده يتفرجوا ببلاش ))

لا خالد يوسف بقي ولا علي ادريس ولا فيلم احساسيس

حصري واصلي وفصلي شعبيه وبس

7/ أسرع مكان يجيبلك هارت أتاك ولا شكه الدبوس

((ممكن تصحي في عز الليل علي صوت 60 واحده بتصوت

في نفس واحد تقريبا هارت اتاك ويمكن الناس دي حزب وطني

فالبمره عايزين يقطعوا خلفك))

8/تشم ريحه الحشيش مجانا لأ وايه ودليفري كمان

((لو صادفت ودخلت بيتك متأخر وحبيت تصلي العشا

تصلي وانت بتتسلطن))

بمناسبه دي

لينا جارفقد عقله وواقف انا واخويا وراح داخل علينا

ومتلغبط في اسامينا

بص يا شيخ ((اخويا طبعا متدين وكده))

انا كنت بشرب سيجارتين مع الحاج فلان والفجر ادن

فاخويا قاله اه

قاله دخلنا نصلي والشيخ بيقرا قران

وراح مكبر وساجد(( ميعرفش سجود التلاوه))

قال رحت باصص يمين وشمال وقلت للحاج فلان

أحا هما كانو بيشربوا معانا ولا ايه

وقعت علي الارض من الضحك ساعتها

9/ اللي ملوش ضهر ملوش بطن ولا قفه ولا عازه

وبيبقي فرصه لكل عيل طالع في المقدر جديد

ويتسيط علي حسه

10/كلها رجاله بتضرب ومعرفش مين اللي بيضرب

((مع ان الرجوله شبه انقرضت اصلا من مصر كلها))

11/ سهل جدا تتعلم فنون السرقه والنصب

((منها تتعلم اكل العيش ومنها تبقي فاهم الدنيا ماشيه ازاي

عشان محدش يعرف يسرقك))

سهل جدا تشوف حد بيسرق حاجه من عربيه حد لايف

ومتعرفش تتكلم ليستلمك انت بعد كده

((حصلت لصاحبي اول امبارح هو اللي شاف مش اتسرق))

12/تعودك علي النضافه والشياكه والأنتكه

وخصوصا اذا كانت منطقتك الشعبيه فيها سوق اسبوعي

افتكر كنت ضارب طقم ومتحددلي ميعاد وانتر فيو

ومعدي من عند سوق الخميس الاسبوعي

وواحده قاعده بتبيع بط وبتتدبح في الشارع

وتروح مسوحه الميه تلبس في بنطلوني

أنا /ايه يا غاليه مش تاخدي بالك ان في بشر

هي/لامؤاخذه ياخويا مقصدش والله معلش

أنا/طالما متقصديش ياأما يبقي معاكي عذرك!!

رحت كويت بنطلون ومشيت اتاخرت ورجعت بسبب ريش البط

بخفي حميد

13/تديك الخبره والقدره وتنمي مواهب التعامل مع كافه انواع البشر

((الكلفتي والمصلحجي والشلح والرميه والمتصابي والمنسون

واللي لا مؤاخذه ))

البوست اللي جاي احتمال يكون عن عيوب المناطق الشعبيه

وانا الحمد لله للي سال عليا انا حالتي النفسيه زي الفل

بوست غريب

انا انهارده كان يوم غريب بالنسبالي بجد المهم..
انا هنا بكلم نفسي وبفضفض مع نفسي
لان البوست اللي فات في حد لاداعي لذكر الأسماء
كان مش لذيذ تعليقه بالنسبالي وشلته يا جدعان
انا بفضفض مع نفسي اللي مش عايز يعلق ميعلقش
انا مش مستني افضفض مع نفسي وحد يحرقلي دمي
بكلام رخم وهو اكيد عارف نفسه
المهم بقي صحيت علي غير العاده بضحك والدنيا حلوه
سبحان الله استغربتني وقفت ادام المرايه
هو انت ياااد يا وليد اللي بتضحك اه والله أنا
عديتها عشان مأتمش علي نفسي
حكم علي اد ما بضحك ساعات بقف ادام المرايه
اشتمني واهزقني واقولي ينفع كده اخص عليك
ايه ياعم اللهباب اللي هببته كتك الأرف
وهوووووووووووب يلهووووووووو في ايه
لينا جار في البيت اللي في وشي خبط لزق مات
راجل كبير وملوش حد خالص
رحت غسلته انا واخويا وجارنا
وانا اصب ميه وحرك يمين وكده.......
دخل جار تاني وفضل يترعش
قلتله ايه ما تمسك نفسك قالي اصل دي اول مره احضر غسل
بس كان مرعوب جدا...قلتله اخرج ياعم طيب مش ناقصه قلق
شويه وخلصنا ولفينا الكفن ونسي يحط قطعه القطن في المحل
فكينا تاني الكفن ...قولتله يا راجل حرام عليك
ده الراجل مخدش معاه حاجه من الدنيا خالص
مستكتر عليه بعد فقرالعمر حته قطنه
خلصنا ودفنا والله يرحمه

_________________

رحت موضوع شغل كده وحصل فيه كام حاجه كده

وطلعت بعد المشوارعلي فرح اخت صاحبي

__________

اول ما العريس والعروسه دخلم القاعه
اتمنيت ان اكون عريس وساره عروستي
نسيت خالص المكان والفرح
واتمنيت ان يكون فرحي انا وهي
واشيلها واهرج
معرفش حسيت اني نفسي كنت ابقي العريس
بس تعرفوا كنت مبسوط جدا
وانا متخيلني عريس وكانت العروسه ساره
وقعدت احلم واقول احنا نخلص الفرح
ونصحي الصبح اضربلي اسبوع غردقه
علطول.....بس تخيلت اني في فرحي وكل صحابي
وحبايبي فرحانين ليه وبيا
علي ومصطفي وايمن ورامي واحمد الخولي وشريف ورضوان وتامر
وعمرو عاشور وخالد سمير واحمد سمير وعماد عامر
وحماده حسونه ومحمد منير احمد انور ومصطفي عبده ومصطفي محسن
وخالد ابو طالب وأحمد طلال
كنت مبسوط قوي وانا برقص معاهم وفرحان قوي
مكنتش الدنيا سيعاني وانا فرحان بساره وهي زي القمر في فستان الفرح
لأ وايه وكمان اقنعتها انها تلبس فستان محجبات رغم رفضها
وقولتلها انا صعيدي ودمي حامي ومش هستمتع بفرحي وانتي لابسه
فستان مبين شعرك وكده يعني
حلمت اني عريس عسل وبرقص ولذيذ
حلمت اني طاير من الفرحه بيها وان ده فرحنا وان الناس بتباركلي
اصل ساره واللي يعرفنا من خلال التدوين
دي حب تلات سنين بس اجمل حاجه حصلت في حياتي
هي اللي برمي حموله عليها وبتستحملني وبتستحمل عصبيتي
ولساني الطويل اصل انا بصراحه لساني طويل شوييتين تلاته
لا وايه وساره كمان كانت فرحانه في فرحنا امبارح قوي وعنيها مليانه حب وفرحه
بالدنيا كلها بالنسبالي
وغنتلها في الفرح تصدقو
اصل انا كاتب اغنيه ليه انا وهي بتقول للي محضرش حلمي قصدي فرحي
انا وساره
هقاسمك هشاركك
كل حياتك
دموعك همومك
غرامك اوقاتك
احنا الاتنين
علي بعض كده
بالدنيا بحالها قصادي
قلوبنا عيونا حسه كده
حبنا اساطير مش عادي
قوم بينا نتعاهد
لاخر العمر نتواعد
الموت افضل ما نتباعد
نسمه هواك
اجمل نسمه
وقلبي ليك
مكتوب قسمه
قلبك ده ماس
غير كل الناس
نفسك احساس
اقولك ايه تاني
ما وهبت روحي لحياتك
هاقسمك هشاركك
كل حياتك

يلا اهو حلم بس استمتعت بيه جدا ويارب كل احلامي
تتحقق

قصص قصيره جدا

حبها قوي واتجوز واحده غيرها واتصلت بيه

بعد جوازها وجوازه من جارته

حمد ربنا انه مجوزهاش كان زمانها

بتخونه مع اللي عرفتهم كولهم

________________

عاش طول عمره يحلم بعيل من مراته

وهو مش مصدق ان العيب منه هو وكل خناقه

معاها يعايرها بانها عقيمه

ماتت فجأه وادرك انه عاش طول عمره

ظالم لواحده عمرها مافضحته

مات من الحسره

________________

عاندت حبيبها ومحستش بقيمته الا اما اتخطبت لغيره

وهو خطب وشافته في اشاره مرور في عربيته

مع خطيبته طايرين من الفرحه

بصت لخطيبها وافتكرت انها هي اللي باعت حبيبها

كرهت نفسها وفسخت خطوبتها

بس كان حبيبها أتجوز من اللي شافتها معاه

_________________

طول عمره سيره الناس في بقه لبانه هارتي

وفي مره راجع من شغله سمع الناس

بتقول عليه كلام وحش اتضايق جدا

وعاهد ربنا انه ميجبش سيره حد خالص بعد كده

_________________

كان فاكر نفسه فالنتيينو نام مع نص زوجات صحابه

وفي يوم كان راجع من شغله بدري

دخل لقي مراته نايمه مع ابن اخته

دخل المطبخ دبح نفسه

_______________

حكمه اليوم من الاستاذ العلامه الجامد وحيد عصره وقرنه

الست اللي متشيلش جوزها في عنيها متستهلش يلبسها في رجله

فاكر يا مصطفي

مصطفي عبده ده بقي من اقرب اصحابي

مصطفي شاب كان زي القمر صحه وطول وعرض وخفه دم

الدنيا خدت كل واحد فينا في ناحيه

اتصلت بيك لانك وحشتني وروحت اشوفك

خدني الحنين ليكم غصب عني

اتصلت بمصطفي محسن وخالد وفعلا وانا في الطريق

ليكم كانت المرج وحشاني قوي يا مصطفي

بس اول ما شوفتك يا مصطفي كنت هعيط بس حبست دموعي

خفت عليك انت.....

مصطفي جاله كانسر وأستأصل 3 عضلات من جمبه اليمين
مع الورم وركب شبكه ومبقاش مصطفي خالص
الكيماوي هدك يا مصطفي خلاك رفييييييع قوي يا صحبي
فاكر يا مصطفي
لما كنا بنلف من اداب لحقوق لعلوم ميت مره في اليوم
فاكر يامصطفي
لما كنت لسه مخطبتش
وقولتلي رحاب زعلانه مني وهي بتعزك
عايزك تصالحنا
وعملت اللي انت عايزه وبعد كده اتجوزتها
فاكر كنت فرحان اد ايه
فاكر يا مصطفي لما كنا بنعقد عند عم سيد
بتاع الشاي ورا كده عند كليه علوم ونغني ونضحك
فاكر يا مصطفي
فاكر لما كنا عنده مره وجه استاذ طاهر الكفيف
اللي اول ما سمع صوتك وانت بتسلم عليه
قالك انت صوتك وجسمك حسيته زي ظباط الشرطه
فاكر يا مصطفي لما كنا بنلف في رمضان
نشوف اللي كانو بيفطروا وتاخد كارنيهتهم
فاكر يا مصطفي
مطعم عمك محمد والسندوتش ابو ربع جنيه
فاكر يا مصطفي
قعدتنا وضحكنا
وانا بكلمك يا مصطفي قولتلي سمعت يا وليد اغنيه احمد سعد
مش باقي مني جميله اوي يا لولو عارفها
عارفها يا مصطفي عارفها يا صحبي
لما شوفتك اتماسكت بس لما مشيت
بقالي3 تيام مش قادر يا مصطفي
الله ينتقم من اللي سمم الناس
وسرطن اكلهم وشربهم
معلش يا صحبي
ربنا يعوضك ويشفيك
ربنا يباركلك في بنتينك يا مصطفي
ربنا يديك العمر يا صحبي
ونحقق كل اللي كنا بنحلم بيه
ربنا يشفيك يا مصطفي

Message

to my past...

excuse me...forget me

i will try to learn from my previous mistakes with you

but please if you visit me

be light vistor...

give me the chance to come true what i want..

do not hurt me with your painful diseases &memories

عيد الحب

بمناسبه قدوم يوم من أعظم أيام المحروته يوم الأحد 14/2

الا وهوعيد الحب .. وغلو سعر الورد لحد بيخلي الواحد يعمل فيها ناسي
تلاقي كل سنه الناس ليها 5 وجهات نظر حواليه

المتدين يقولك اوعي تحتفل بيه ده يوم لتقديس اللي اسمه فالنتين وده كان

زير نساءواله الرومان وانت كده بتشارك الناس في الضلال ...يا ستير يارب

النوع التاني اللي فاهم ان اليوم ده خمر ونساء وغدا نبكي علي اطلال روما

النوع التالت الشاب اللي نفسه يفرح حبيبته ولو باي حاجه مهي عايشه وشايفه

الدنيا ولا يتقال عليه شاب شلح ومبيفهمش و الجنيه عنده براجل طبعا ميكلش

االنوع الرابع من الشباب تلاقيه يقولك يا عم دي عيال بتاخد مصروفها

من علي التلاجه مهو لو تعبان في القرش ده مش هيضيعه اونطه

((وهو من جواه نفسه حتي كلبه نتايا تعبره )) كان قطع شرايين ايده عليها

وناس تانيه من الشّقه والمرمطه كبيره يسمع لو كنت قابلتك من زمان

علي اذاعه الأغاني واتعشت يا معلم....

بس هل فعلا احنا بنحب بعض صح انامش شايف ويجوز اكون اتعميت !!!

مظاهر الأحتفال في اليوم ده اااااااااااااااااااايه الكورنيش حفلات جنس

جماعي تبص تلاقي الشاب والبنت ناقصهم سرير !!!!!

واقف خلاص هايم علي وجهه ايه يا عم في ايه.....

تمشي في عباس العقاد تلاقي اللي بيحضن ايه ياد ده....

هتعملي فيها اوربي الحاجه بتتعشي مسقعه ولا غيرت ؟؟

اللي بيفرسني ان أغلب اللي شفتهم في وضع جنسي

كانو محجبات واللي هيقولي يا راجل هقوله لو مشفتش

يبقي لمبتخرجش يا أنت بتمثل خليك في مسرحك مش طلباك

والظاهره الأغرب بنات صغيره كبيرها خمستاشر سنه

وشاب سبعتاشر اخره يااااد روح ذاكرلك كلمتين

ويستنفذوا مخزون العاطفه عندهم مع واحد واتنين وتلاته

وفي الأخر تبقيused

ومعندهاش حاجه تديها لجوزها.مهي استهلكت من المخزون كتير قوي.....

والشاب لما ييجي يتجوز يقولك أهم شرط تكون البنت بكيسها

ومرشتش دواخل و واكون اول مالك!!!!!!!!!

عايز بت فبريكه صح؟؟؟

واللي بيصلي الفجر حاضر هياخد مين ياخد صديقه الطلبه ولا ايه

عايز بت فبريكه خليك انت كمان فبريكه ...

يخرب بيتك يا درش هرشني طبعا

ده حتي الأقاليم الحب ولع في الذره والدنيا بقت في الكلتش خالص

انا مش بقول ان اللي يحتفل او ميحتفلش غلط او صح

مش دي القصه معايا

انا عايز اقول ان بجد الكلمه الحلوه في اي وقت

الأهتمام بالطرف التاني..مشاركته حلمه

الصبر عليه وقت ما يكون في ازمات او محتاج حضن يحتويه

انه يحس بجد ان حد مشاركه حياته واخده بعبله كده

هيقسمه دموعه وهمومه وغرامه وكل اوقاته

ده معني الحب الصح..

ليه واحد صاحبي الفالنتين اللي فات جاب بوكيه ورد وخد عربيه صحبه

واتصل بخطيبته جاااااااااااااااايلك استنيني

اول ماراح قالتله معطلني كل ده عشان بوكيه ورد ....

كسرته من جوه ..الكلمه الحلوه بتفتح طريق والكلمه الرخمه الواقفه

بتخللي الواحد حاسس انه بيحب كريازي

قالي ساعتها حسيت اني بحب بطيخه وكرهت اني حبيت افرّحها

وبعديها مقدرش يكمل وسابها ((طبعا لكام سبب اضافي))

وممكن بنت تانيه تقول لحبيبها او جوزها او خطيبها

انا هشيل الورده دي لحد ما تدبل وافركها واحطها في كتاب ولما توحشني

هطلع الكتاب واشمها واحس انك جمبي بقلبك وروحك مهي حاجه منك!!!!

سيبك انت وهو وهي اللي بيفهم بيفرق كتير ؟؟؟؟ وبالمناسبه دي احب

أقول لكل المدونين كل لحظه وانتم في حب وخير وسعاده وأمان

فاكر الغرام

خصامنا.....

كان خصام عادي

اشمعني جاي المرادي

عايزني انساك

قلبي اللي حبك

مش راضي

لسه الحنين ..

بيشدني معاه ناحيتك

لسه هواك

بياخدني تاني لسكتك

بهوي اعيش

أنا يا حبيبي في دنيتك

فاكر الكلام اللي قلناه

ولا كان كلام في كلام

فاكر الغرام اللي عشناه

ولا كان خيال احلام

هواك كان حلم خلاني

عايش علي حلم ليل ونهار

وبعدك عني خلاني

بكون في الجنه

وأبقي ف نار

اللي يجوز امي؟؟؟؟؟؟؟

كلب العمده مات الكل راح يعزي العمده نفسه مات
محدش راح يعزي....
المثل ده افتكرته امبارح وأنا قاعد مع نفسي بضرب
كوبايه شاي علي المغربيه....ايه اللي فكرني بيه أقولكم
ماشي انا وواحد حبيبي ولقيت عضو مجلس الشعب عن دايرتنا
واقف عند القهوه بتاعته ناس كتير حواليه

والف سلامه عليه يا حج والف بعد الشر عنه يا حج
ده اخوك غالي وجدع وكل الناس بتحبه
الله في ايه الفضول قتلني لازم افهم التيته
سألت صاحبي استني يابني اما اشوف ايه الليله دي
قالي هقولك المعلم اخوه عمل حادثه ورجله اتكسرت
قولته يااااااااااااااااااااااااااه كل البشريه اللي اكتر من الجراد
دي عشان رجل اخوه اتكسرت

راح صاحبي قايلي ده لو طاهر الكلب بتاع ابنه هيجوله يهنوه
ايه يا عم فيه ايه المصالح بتتصالح
قلتله تصدق اه...
قالتي انتي هتعملي فيها اجنبي
قولتله ل يا عم انا مصري وابويا مصري
وجه في دماغي طيب ياتري ياااد يا وليد
الراجل ده اول ما يسقط في الأنتخابات
قولو ان شاء الله لو هو نفسه مات حد هييجي يعزي
والله العظيم العضو اللي قبله مات محد عبره غير الناس
اللي قريبه واللي جيرانه علي كام واحد مش كتير من اللي
حواليه ساعه مكان عضو.........
أفتكرت دكتور حسن غلاب الله يرحمه كان بيديني في أولي
محاسبه تيرم تاني..وكان ساعتها رئيس جامعه عين شمس
كان محترم جدا الراجل ده....
يدخل من باب تجاره ووراه عربيه وادامه موتسكيل
وأمن الكليه اول ما ينزل يوسعله الطريق واللي يشيل شنطته
بس كان لالامانه قمه في التواضع وفي اخر السنه
ادانا 10 اسئله وقال 2 جايين انتساب و2 انتظام
مش بقولكم كان محترم
راحت الأيام وجت الأيام وبعد 3سنين كنت واقف ادام شجره كليه اداب
وبلعب اولي انا وبنت زميلتي (( ايام بقي))
وابص كده الاقيه ماشي وشايل شنطته مع نفسه
كان ساب رياسه الجامعه ولا في مخلوق معاه لا امن ولا موتسيكل
ولا عجله نصر حتي!!!!!!!!
جريت اسلم عليه بمنتهي الحب ..خدي يا نسرين تعالي سلمي
علي د/حسن....
قالي طالما تعرفني يبقي اكيد انت في تجاره متفضلش تلعب
هنا وتنسي محاضراتك ومشي...
قلت اّه يا بلد كان ايه والناس كانت بتجري منه وعليه
وفي لحظه ولا حد بقي بيعبره .....
أد كده في ناس بتمجد اصحاب الكراسي والنفوذ
الله يلعنها دنيه صحيح
تو ما اللي راكب علي الكرسي خد الرجل في منت
يبقي كان وسيبك منه هي ناقصاه!!!!
الناس دي كانت محتاجه شوال اقراص صراحه
من بتوع فؤاد المهندس كان نص الشعب هيمسك في بعضه
وكله هيبان علي حقيقته....أخص علي كده
بس لالامانه شويكار مراته كانت قمر

رساله عاجله خالص

بسم الله الرحمن الرحيم

الأخوه الشرفاء الأتقياء العزاز اللذاذ المغاوير

1/ محمد ابراهيم سليمان الشريف

2/ ممدوح بيه اسماعيل الخفيف

3/رامي بيه لكح الجميل

4/ صلاح بيه اللاجيء(اعمال حره)) تاجر حشيش وجاري

5/الحاج حباجه((تاجر بودره)) جاري بقي وشقيقي

تحيه طيبه وبعد ........

أنا شاب مصري حاسس بالفقر والقهر

والخنقه والضيق واتخنق من حياه الرقيق

كان عندي حلم اكبر واشتغل بدخل كويس

واعيش واجوز في بلدي مصر

كنت فاكرها سهله وسبهلله..

هتم شهر اربعه اللي جاي 30 سنه

ولسه مجوزتش ولا جبت شقه ولاحاسس بالامان

وخايف احلم من أصله.. وخايف من بكره قوي

ايوه انا أخوكم وخايف من بكره لأصحي ملقيش مصر

والاقي نفسي واقف في ميدان القللي عريان ملط

والناس تشاور عليا وتقول العبيط اههو اهو

يرضيكم .....

ممكن لو سمحتم تعملوا فيا ثواب ويقعدلكو في عيالكم

قادر يا كريم ..زكوا عن علمكم وزكاه العلم أخراجه

وعلموني ازاي أقتل وأسرق وأنهب ..

واطلع منها زي الشعره في العجين والحلاوه في السكين

أنا ذكي ولماح وحرك ومدقدق وافهمها وهي طايره

بس علموني ازاي ابتدي.......

وهحاول علي قد ما أقدر أكون تلميذ نبيه

وأنافق وأرافق وأضرب تحت الحزام

وأصاحب وأهلّب وأقلّب واستّف الكلام

وهخللي كل الناس تشاورلي باحترام

وفي الخباثه هكون شيطان في التمام

من الأخر كده مش هتعبكم خالص

وانا برده ابن بلدكم واخوكم في اللأنسانيه

واوعدكم لو جيتلكم اوروبا

ومعايا كام مليون مش هنساكم برده وليكم عمولتكم

أنا وفي وصاحب صاحبي

رجاءا اللألتفات لطلبي

ولكم مني جزيل الشكر

أخوكم

شريف ذكي الشريف

وان خف جسمي كفايه اسمي

والسلام عليكم ورحمه الله وبركاته

بياع البطاطا

قابلت بياع بطاطا
ودردشت معاه
قالي كلمه علي بلاطه
نفسي اخلص من الحياه
قلتله أحكي.. فضفضلي
اعتبرني زي ابنك
وياريتني مقولتله
قالي بص..
الناس اتغيرت يا ابني
ومبقتش ناس
لحد عاد حاسس بحد
والضحك زيه زي الجد
الوشوش وبتتلون
الخدوش بقت جروح
والقريب أصبح غريب
كله بياكل في بعضه
الا قولي يا ابني
هو أنا اللي غلط
ولا الناس هي الصح
أنا اللي لسه نضيف
ولا هما الأصح
ولا كله محصل بعضه
الثعبان بيبان غلبان
والشقيان كاره الدفيان
حتي الحال بقي غير يا ابني
..... .....
وشوش ماشيه بتتفرج
ووسط الجد بتهرج
بتدّاره في ضحكتها
وبتبالغ في فرحتها
لكن بتفوق تنوح يا ابني
ووقت الجد نخسر بعض
نفسي ارجع بلدي يا ابني
ناسها هناك طيبين
صحيح هما فقرا
وبياكلو في ضل شجره
لكن جواهم خير
ادعيلي ارجع لبلدي
ان مكنش في دنيتي
يبقي حتي في اخرتي
والقالي مطرح هناك
وسط ناسها الطيبين