انا بقي والمناطق الشعبيه

مميزات المناطق الشعبيه
1/مش محتاج تشتري منبه لأنك مش هتعرف تنام اساسا
(تساعد علي توفير اموالك))
2/لا مجال للخصوصيه خالص ((ليتقال عليك تنك))
وطبعا مناخير جيرانك طويله بشكل يجيب بواسير
3/العشم الخارق الحارق
((في أي وقت لازم تخدم أي حد ولاد بلد بقي))
4/كله بيتكلم علي كله
((من باب الأطمئنان طبعا))مش نميمه يعني
5/لو جايب فاكهه في شنطه لونها فاتح
((المنطقه كلها تسلم عليك وعينها ع الشنطه))
مش لحاجه هو لازم بس يعرف انت جايب ايه
((تقريبا لو كانت فاكهه اورجانيك بيدوقها لمصلحتك))
6/في اي وقت ممكن تدخل سينما ببلاش ولايف كمان
((وخصوصا فيلم الحرافيش ميت واحد بيتخانقوا مع ميت واحد
من حته تانيه
وسكان المنطقه المحايده يتفرجوا ببلاش ))
لا خالد يوسف بقي ولا علي ادريس ولا فيلم احساسيس
حصري واصلي وفصلي شعبيه وبس
7/ أسرع مكان يجيبلك هارت أتاك ولا شكه الدبوس
((ممكن تصحي في عز الليل علي صوت 60 واحده بتصوت
في نفس واحد تقريبا هارت اتاك ويمكن الناس دي حزب وطني
فالبمره عايزين يقطعوا خلفك))
8/تشم ريحه الحشيش مجانا لأ وايه ودليفري كمان
((لو صادفت ودخلت بيتك متأخر وحبيت تصلي العشا
تصلي وانت بتتسلطن))
بمناسبه دي
لينا جارفقد عقله وواقف انا واخويا وراح داخل علينا
ومتلغبط في اسامينا
بص يا شيخ ((اخويا طبعا متدين وكده))
انا كنت بشرب سيجارتين مع الحاج فلان والفجر ادن
فاخويا قاله اه
قاله دخلنا نصلي والشيخ بيقرا قران
وراح مكبر وساجد(( ميعرفش سجود التلاوه))
قال رحت باصص يمين وشمال وقلت للحاج فلان
أحا هما كانو بيشربوا معانا ولا ايه
وقعت علي الارض من الضحك ساعتها
9/ اللي ملوش ضهر ملوش بطن ولا قفه ولا عازه
وبيبقي فرصه لكل عيل طالع في المقدر جديد
ويتسيط علي حسه
10/كلها رجاله بتضرب ومعرفش مين اللي بيضرب
((مع ان الرجوله شبه انقرضت اصلا من مصر كلها))
11/ سهل جدا تتعلم فنون السرقه والنصب
((منها تتعلم اكل العيش ومنها تبقي فاهم الدنيا ماشيه ازاي
عشان محدش يعرف يسرقك))
سهل جدا تشوف حد بيسرق حاجه من عربيه حد لايف
ومتعرفش تتكلم ليستلمك انت بعد كده
((حصلت لصاحبي اول امبارح هو اللي شاف مش اتسرق))
12/تعودك علي النضافه والشياكه والأنتكه
وخصوصا اذا كانت منطقتك الشعبيه فيها سوق اسبوعي
افتكر كنت ضارب طقم ومتحددلي ميعاد وانتر فيو
ومعدي من عند سوق الخميس الاسبوعي
وواحده قاعده بتبيع بط وبتتدبح في الشارع
وتروح مسوحه الميه تلبس في بنطلوني
أنا /ايه يا غاليه مش تاخدي بالك ان في بشر
هي/لامؤاخذه ياخويا مقصدش والله معلش
أنا/طالما متقصديش ياأما يبقي معاكي عذرك!!
رحت كويت بنطلون ومشيت اتاخرت ورجعت بسبب ريش البط
بخفي حميد
13/تديك الخبره والقدره وتنمي مواهب التعامل مع كافه انواع البشر
((الكلفتي والمصلحجي والشلح والرميه والمتصابي والمنسون
واللي لا مؤاخذه ))
البوست اللي جاي احتمال يكون عن عيوب المناطق الشعبيه
وانا الحمد لله للي سال عليا انا حالتي النفسيه زي الفل

53 Comments:

P A S H A said...

يا وليييييييييييييييد يا جااااااامد

ههههههههه

موتتني من الضحك من موقف الراجل المتسلطن اللي عاوز يصلي الفجر .. جامد طحن بجد :))

وبعدين ده العشم برضه يا وليد ؟؟

تجاهر كده ع الملأ بمميظات المناتيء بتاعتنا يا صاحبي ؟؟ لأ وكل ميظة مكلبظة وغليظة ههههههه

طب مش خايف نتنش عين ؟؟

طب كنت حط المعوذتين ولا فردة صندل على البوست من فوق ولا حتى خرزة زرقا !!

إييييييييه يا معلم .. عشان بس بتوع المناتيء النضيفة يبطلوا انزحه ويعرفوا إنهم مش عايشين.

والنبي يا صاحبي عاوزك تكتر ف العيوب بقى على قد ما تقدر هه ؟؟

أه .. احنا مش ناقصين قر !!

................

ويلكم باك يا ريس

:))

تحياتي

سلام

هي وظروفها said...

شريف باشا

ههههههههههههههه

والله يا شريف يا اخويا

انا محبتش اكتر من المميزات

لأهل المناطك الراقيه يحسدونا

انا بس لمحت ببعض المميزات

انت هارش بقي ان الواحد لو فتح قلبه

علي الاخر هيقول كلام مش يتحذف في وصف مناطكنا وبس لا ده ممكن نتحبس

بجنايه سب وقذف مناطك

ربنا يخليك يا شريف

وتليفونك والله انت وكام حد

خلوني مبسوط وساعدوني علي اني ابقي احسن لاني
كنت متضايق شوييتين تلاته

واوعدك هحضر بوست العيوب قريبا

الف تحيه ليكي يا باشا

سمع هوص (Abo 3li) said...

هههههههههههههههههههه
فكرتني بأيام مكنت مأجر شقة في حدايق المعادي.. تخيل كل المميزات ال انت قلت عليها وضيف عليها انها شقة عزاب واغراب كمان.... وكانت شقة بحري وشرحة وبرحة وفاتحة علي اربع شقق... كنا بنحضر خنقات فلانة مدرسة الاعدادي يوميا مع جوزها.. كنا بنسلك من الشباك كمان... ولا البنت ال كانت بتطلع تسبلنا وهيا في تانية اعدادي... ولا الحاج سمير صاحب البيت ال مربي دقنه...
كان بينصب علينا نصب....

يلا الحمدلله... كانت ايام زي الفل الله لا يرجعها...


تحياتي ياباشا

ENG./ELSAYED,PMP said...

والله يا وليد هتفتح على نفسك فتوحة انت وشريف ... ومش بعيد تلاقى السهم الذهبى ومصر للسياحة واقفين على مدخل المنطقة ومعاهم افواج من مدينة نصر ومصر الجديدة ... وجايين يتفرجوا ... وممكن تلاقى اللى بتقولك ممكن اتعرف على عمو الماسطول ده يجنن ولا واحد يقولك هيه الخناقات هتبتدى إمته ... ياااس
ومش بعيد حد يطلب إعادة تصوير دبح البطة ... واحتمال يقولك والنبى يا وليد والنبى والنبى ... تانى ... تانى

وبعدين هتطمع العبد لله ف حجرين مش هقولك تمناية لانى دماغى خفيفة اوووى

بس نخليهم بعد العشاء
علشان نلحق نفوق قبل الفجر

سلام يا عسل

هي وظروفها said...

ابو علي

طب اقولك ومبكدبش

ليه واحد صاحبي وحبيبي

ساكن في منطقه 2/1

عشوائيه وشعبيه

بيقولي والله ياوليد

من ضيق المساحه

وليه جار نجار مسلح

كانت لقاءاته الحميمه

مع حرمه المصون

صاحبي بيسمعها وبدون تركيز بتمكن

ويكاد يكون أكنه معاهم

وعايز يقوله ياعم متقرفناش بقي معاك

استني لما الناس تنام

او شغل كاسيت وعللي صوته

بدل الالايف اليومي بتاع اهلك ده
وبخصوص البنت اللي كانت بتطلع تسيبلك

تلاقيك كنت بتشغل كاظم كتير

وخصوصا حبيبتي والمطر

انت اللي غلطان كنت شغل

مليش في النسا

ولا بحب الجيران المنسنسه

نورت يا ابو علي

والحمد لله انك نفدت بجلدك يا كبير

هي وظروفها said...

بشمهندس سيد

انا شكلي كده خرفت

وهساعد في تحويل مناطكنا

لمزار سياحي

بس لو ليكي في مناطكنا

فانت عارف ان مشكله العروض السينمائيه

انها ملهاش ميعاد

تقريبا حسب الجو

بس في الصيف بتبقي كتير
عشان طبعا اجازات والناس بتسهر..

المسطول ده يا سيد

ليه مواقف تنفع سيناريو لفيلم كوميدي يكسر الدنيا
واوعدك اني هنزلك فيديو يوتيوب لخناقه حريمي هيعجبك بجد

تحياتي ليك يا عمونا

و منك للسما نحول مناطكنا لمزرارت سياحيه

ساعتها هتبقي بهججه علي الاخر

صوت من مصر said...

انت بتغلط فى منطقتى
توصدق هزعل
بس عاوز اقولك ان سوق الخميس ده متعه لمن اراد انه يتسرق برضه " للغرب فقط " الجيران طبعا لا
وعموما يا معلم يالى انت جارى
كفاية اننا فيها وبتحبنا ونحبها

صوت من مصر said...

نسيت اقولك ماله الحشيش

star in the sky said...

هههههههههههههههههه

دى طلعت مفيدة للصحة المناطق الشعبية
الواحد ممكن يفكر يصيف فيها السنة دى

رهيب موقف الراجل اللى كان بيصلى

هي وظروفها said...

كيمو

هو انا قلتلك انا مبحبش منطقتي

انا من المطريه وافتخر بيها

ليه ذكريات اجمل ايام حياتي

فيها اتعلمت وكبرت

فيها اغلب صحابي

انا مليش صحاب انا ليه اخوات مش صحاب منهاانا بعشق تراب المطريه

انا يا كيمو فيها حبيت اول حب في حياتي

وفيها اتحبيت وليه اهل وعزوه وجيران زي العسل واكتر من اخوات

فيها لعبت وكبرت وصاحبت واتشقيت
واتسرقت كذا مره

وخصوصا في جوامعها

بس بصراحه زعلان قوي علي الشبشب الايطالي اللي اتسرق مني من 13 سنه
في جامع التوحيد عارفه

فيها اتحبيت وفيها اتخنت من اللي حبيتها وربنا عوضني خير في حب بعدها منها

المطريه اقسم بلله يا كيمو بحس فيها بلامان

المطريه يا كيمو ترابها علي دماغي

المطريه وفتلي وقت ما اتخانت

علمتني وقت الجهل

المطريه يا كيمو عمري اللي راح

ازاي انساه

انا يا كيمو ممكن يكون فيا صفات كتير وحشه

بس مش خاين لمنطقتي ولا غدار
يا كيمو انا بحب كل حته مني فيها

بحب شقتنا
بحب حتتنا
بحب ناسها
بحب هواها وشمسها

بحب ابله فاطمه مدرستي في اولي ابتدائي
وفاكر سمارها الجميل

وابله سلمي

بحب ابله نعيمه الناظره بتاعه ابتدائي الله يرحمها
طولت بس بحب المطريه قوي يا كيمو
والله يا كيمو بحبها

هي وظروفها said...

ستار ان ذا سكاي

يا ست الكل انتي تنوري

عايزه تصيفي

هتشوفي سينما مجانا بس سينما الحرافيش

لو بتخافي متجيش

وعندنا ترعه اسماعيليه
يلا يا ستي منها فسحه ومنها شط

بس بصراحه اخاف تيجي يوم الخميس تتسرق جزمتك

هههههههههههههههههههههههه

تصدقي بلله

التدوين ده جميل وكفايه اننا نضحك مع همومنا وعلي همومنا عشان همومنا تعدي
الله يبارك في اللي اخترع المدونات والله

reem said...

ازيك ياوليد

يارب يكون مودك احسن دلوقتى

بصراحة البوست تحفة يا وليد وضحكتنى بجد

تعرف انا بحب اوى المناطق الشعبية وكنت اتمنى اعيش فيها

بحس ان الناس فيها بتحب بعض وبتخاف على بعض وفي تواصل ومودة

ممكن تعزمنى عندكم ياوليد ؟

فتاه من الصعيد said...

هههههههههه

دي مناطق صعب العيش فيها

بس مسليه جداااااااا

تحياتي

Single Mummy said...

على فكرة ..فعلا البوست روووعة وضحكتنى جدا بس سؤال بأة ممكن تعزمنا عندك؟
تحياتى

لولا وزهراء said...

وليد
-**-*--
دى كوميديا ساخره يعنى او ايه الحكايه بالضبط

بجد ضحكتنى على الصبح كده
وحسيت انى باتفرج على الحاجات اللى انت كتبتها كانى باشوف فيلم سينمائى
تسلم الايادى


زهراء

جارة القمر said...

ههههههههههههه

بجد ضحكتنى يا وليد ايه المميزات الرهيبة دى انا هستنى العيوب الصراحة
لما نشوف بقى :):)

اه صحيح البوست اللى فات انت كتبت كلمتين جامدين اوى

"فعلا اللي بيحب حد ميقدرش يبعد عنه
ممكن يزهق شويه ويبعد شويه
بس لو بيحبه زي ما قال
مش هيقدر يكمل من غيره لانهم واحد"

احييييييييك جامد بجد و تصفيق حاد جدا جدا اللى بيحب حد مش بيقدر يعيش من غيره فعلا لانهم واحد

واضح من الكلام انك كنت غايب يارب تكون بخير حاليا وربنا يديك كل الفرحة و السعادة يارب

سلالالام

أميرة الأحلام said...

وليد ..
ضحكتني والله
كل دى مميزات
يانهار ابيض احنا على كده مش عارفين قيمه بلدنا لما يكون فيها اماكن زى دى
بتتوفر فيها كل المميزات دى
ده احنا على كده ظالمنها خالص
هههههههه
حلو البوست ده ياوليد وفي انتظار العيوب البوست الجاى

البنفسج الحزين said...

ههههههههههههه
بوست زي العسل...
انا بجد موت من الضحك
المناطق الشعبيه دي مدرسه..
وبعدين لما دي المميزات أمال العيوب هتبقي عامله ازاي ..مستنيين نعرف في البوست اللي جاي ...
تحياتي

Single Mummy said...

أستاذ وليد
معلش أنا شفت التعليق بتاعى مرة تانية حسيت انة بايخ وممكن يوصل افكار مش حلوة انا واللة قصدى ان البوست حلو ورائع ودمة خفيف وكلنا عارفين شكل الحياة اية فى المناطق دى احنا مش من المريخ ولا القمر احنا فى قلب الحدث ..مش مصدق تعال الفيوم وشوف
تحياتى

Single Mummy said...
أزال المؤلف هذا التعليق.
كيكى عوووووو said...

طب ياعم انت الواحد يعلق يقول ايه؟؟!!

كيكى عوووووو said...

ههههههههههههههه

ستيته حسب الله الحمش said...

ايه يا عم الخريطة دي
انا معرفتش موقعك من خريطة جمهورية القاهرة الكبرى الا من ردك على كيمو
وسلام يا عم شحط محط للمطرية وعين شمس والمرج وخط المتروووووووووووووووووو وايه وايه وايه
حلو كده
بلا دقي بلا معادي بلا هبل

بس تصدق بالله يا وليد
كل ميسر لما خلق له
ده انا لما حد يسئلني في شيء شخصي ببقى غول وببقى اخر غتاتة
معقولة طالعة نازلة اكلة شاربة سارقة قاتلة ألاقي حد بيمد بوزه عندي
والله ماله عندي غير مطوة عادل
والضرب في الوش مفيهوش معلش

miroooo said...

السلام عليكم
الصراحه اول مرة ازور مدونتك اللذيذه دى والبوست طبعا تحفه
بس كل دى مميزات امال فين العيوب
اه صح انت قلت انك هتعملها البوست الجاى انا هاستناها بما انك معتبر دى كلها مميزات هههههههههههه
ياريت اكون ضيفه خفيفه
تقبل مرورى
ميرو

sony2000 said...

ههههههههههه
بجد بوست جامد موت
ولو عاوذ انا ممكن اجبلك شويع قصص تنفع تتحط هنا بردك
وسعاتها هتبقي قعده حلوه اوي
ونفرج علينا الخلق
هههههه
تقبل مروري وتحياتي

صوت من مصر said...

يا نهار يا وليد
هو انا قولتلك مش بتحبها
هههههههههه
تكتبلى قصيدة
اظن اننا كلنا كده

الطيــر العاشـق said...

وليـــد

ازيك ان شاالله تكووون تماام وبعدين البوووست الرائع ده بجد حلو قوي كلامك وان كان فيه تنبيه لحاجات كتير المفروض تغيرها في نفسها حتي علشان ترتاح ..... من حاجات كتير جداا

وان كان ع المناطق الشعبيه في المدن فده تقريبا اشبه بالقري اللي انا من واحده منهم وبجد بموووووووت فيها بالرغم من كل عيوبها ....

وتقريبا نفس العيوب كله عارف كله بيعرف كل حاجه عن التاني صوت الشباب الزباله وأرفهم وحركاتهم ووجودهم المستمر في الشارع حاجات كتير جدااااااا علي أد مابكره فيها حاجات علي أد ما بموووت فيها وبتمني أشوفها وأشوف ناسها والله

تسلم يا وليد علي كلامك وطبعا مستنيين البوست اللي هوه النقيض يعني
كل التقدير والاحترام

هي وظروفها said...

ريم

الحمد لله يا ريم ومودي ودودي زي الفل

وبيسلمو عليكي

كت فتره صعبه اللي فاتت شويين لكام سبب كده

بس فوقت ورجعت الحمد لله و بقيت زي الاول واحسن
واكتشفت حاجات كتير منها اني لازم اسعد زابسط نفسي واللي حواليا واخرج من كام حاجه كده

وبخصوص المناطق الشعبيه فيها اللي انتي بتقولي عليه

بس فيها حاجات كتير رخمه

زيها زي الدنيا بالظبط


انا مش اعزمك وبس انتي تنوري

وباذن الله هبقي اعزمك في فرحي واخليكي تشوفي مناطكنا الشعبيه

سلامي لكنزي

هي وظروفها said...

فتاه من الصعيد

بلدياتي الغاليه

بعد التحيه

مش صعبه العيشه قوي يعني

دحنا بالصلاه علي النبي نعاشر العفاريت

متقلقيش علينا

سلامي للصعيد والأبر ايجبت تما

هي وظروفها said...

سنجل مامي

اعزمك وتنوريني وتنوري الدنيا كلها

بس تعاي من غير فاكهه ولو مصره

ابويا بيحب التفاح التركي

ومتقلقيش اخوكي بيفهم وفهم كلامك

ربنا يبارك فيكي وفي ذوقك

نورتي مدونتي الصغيره

هي وظروفها said...

لولا وزهراء

دي كوميديا سودا بعيد عنك

وبجد طالما قدرت اضحكك يبقي ده كفايه
لان بجد الضحك غالي قوي

وبعتبرني لو قدرت اضحك حد
اني مبسوط جدا لانبساطه

ربنا يبارك فيكي

ونسمع عنك كل خير يا زهرا انتي ولولا

هي وظروفها said...

جاره القمر


اجمل شيء اني ضحكتك سيبك انتي


متشكريش في تفكيري يا بنتي كتير لأتغر

هو انا اينعم مبدع ورائع وتملي بكتب روائع

بس يلا خليني متواضع

وبخصوص اللي ميقدرش حب حد ليه
ويشيله فوق دماغه

بكره يندم ويضرب نفسه بقباب النمرود

سيبك انتي اللي بيحب بيبقي بصدق
واخلاص قل جدا لدرجه انه بقي من المستحيلات التلاته في زمانا

ربنا يكرمك بلللي يصونك ويحافظ عليكي

وبموت انا في اسمك

لانه بيفكرني باعظم واجمل حب في حياتي

فيروز طبعا

هي وظروفها said...

اميره

اي خدمه يا ستي

عرفتك علي حاجات مفيده انتي تؤمري

وبعدين بلدنا دي زي الفل

وكفايا اننا من سكانها الاصليين

مش انتي اصلي بردو

ولا تايلندي؟؟؟؟؟؟؟؟

هي وظروفها said...

البنفسج الحزين

اي خدمه يا جدعان

انا مبحبش اتكلم عن نفسي خالص

استني بقي بوست العيوب

واوعدك بكره هكتب بوست عن عيوب

المناطق بتاعنا

بس محدش بيشتمني

هي وظروفها said...

كيكي عووووووووووو

متقوليش حاجه

او قولي اي حاجه

المهم تضحكي ومتضيقيش نفسك

هي وظروفها said...

د / ستيته

يا دين النبي يا جدعان

انا كده هعمل تمثال لنفسي

واحطه في ميدان القللي

مطريه مرج قبل الكمييييييييييييييييين


انا معاكي بس ساعات بيبقي فيه حاجات غصب عنك

لازم تمايني وتشخللي عشان تعدي

زي اخونا عادل امام كده

يابج السيبج عشان يعدي

وبخصوص مطوه عادل بلاش

فيه ناس عايزين التهور وحش

نورتيني والله بفرح بتعليقك جدا

ربنا يبارك فيكي وفي نوسه وعفروتو

هي وظروفها said...

ميرو


منوره يا غاليه

واول زياره دي

بتبقي بجد احساسها حلو وتعليقها اجمل

وانتي مش ضيفه

البيت بيتك

وتنوري في اي وقت

هي وظروفها said...

سوني 2000

هاتي القصص اللي عندك

انا مستعد يا كبير

انا هاوي قصص

مش بس قرايه لا تمثيل كمان

هتقبل بكل ترحاب يا باشا
وتنور في اي وقت

هي وظروفها said...

كيمو كيمو

منا عارف يا كيمو

بس حبيت اوضحلك اد ايه انا بحب المطريه

ياد يا كيمو المطريه دي في معزه امي

حد يغلط في امه

هي وظروفها said...

فريده هانم

انا مش بقول عشان انبه وبس

لأ انا بقول عشان نناقش عيوبنا يمكن نقدر نصلح خمسها

وطبعا يفضل التفاضل والتكامل وحساب المسدسات

اهم حاجه في علاقه اهل القري والمناطق الشعبيه

رياضه رياضه يعني

نورتي يا غاليه

He and She said...

Hahahaaay
Post mazag gamed

الوفية للأبـــد -- مها أحمد said...

وليـــــــد ..............
شكرا على المعلومات القيمة دي و فعلا المناطق الشعبية ليها مميزات و عيوب
و عارف اهم ميزة فيها ايه ؟؟؟
ان الناس بجد بتسال على بعضهم و بيخافوا على بعضهم و بيوقفوا مع بعضهم في الفرح و الحزن

شكرا على البوست الجميل ده و بجد ضحكتني علشان انا افتكرت لما كنت بكلمك قبل كده و سمعت الراجل بتاع الفراخ
هههههههههههههههههههههههههههه

خالص تحياتي و تقديري
و اتمنى تكون بخير يا رب

Wanda said...

نحب نستوضح
اين تقع فى الخرطاة منطتكتكوم :-))؟
على شمال منطقتنا ؟؟

سوق الخميس فى المطرية ؟ صح
اعتقد ده السوق الى عمتى خذتنى تفسحنى فيه :-)) مطلعتش منه الا بدبدوب فى الاخر :-))
بس قبل ما انزل من بيتها عملتلى كشف هيئة للبس و احلى و الشنط و احترازات محصلتش بس كان يوم
لسه مواعدانى بسوق الثلاثء و سوق الجمعة بس دول فى مناطق ثانية اعتقد منهم منشاة ناصر؟؟

المخم
هو الجى بى اس يجيب التفاصيل بتاعت المنطقة و لا الاقمار الصناعية ممنوعة من التصوير؟؟ و لا نشيل المرشد السياحى و لا الخريطة؟؟

ghada mOhsen said...

وليد باشاااااااااا ...

ايش اخبارك يارب تكون كويس ...

الواحد لما بيسمع
اسم المناطق الشعبيه
او اى شى يتعلق بحاجه اسمها شعبى ...
يتقرفوا ويخافوا وكل حاجه سلبيه ..
بس بجد هى فيها فعلا مميزات ( طبعا مش هاتيجى حاجه جنب المميزات اللى انت ذكرتها ) هههههههههههههه

وطبعا اكيد فيها عيوب .. وده طبيعى ( وربنا يستر من اللى هاتقوله من عيوب ) .. هى يمكن عايزلها انتباه اكتر ...

.......
فى بوست كتبته عجبنى كتير ( بوست غريب ) بجد كان إحساسه عاااالى جدا
وربنا يحققلك كل اللى انت عايزه ...

سلملى على ساره كتييييير ...
... ;) ,,, ;) ...

هي وظروفها said...

هو وهي

ربنا يبارك فيك

نورت يا باشا

هي وظروفها said...

مها


اكيد طبعا اهم ميزه ان الناس تكون جمب بعضها في الحزن والفرح

وبخصوص بتاع الفراخ

احب اقولك انه مبقاش ييجي
شكله عزل او الحكومه خدته

ربنا يبارك فيكي وفي احمد
ونشوف عيالكم زي القمر

هي وظروفها said...

واندا هانم


تقع المطريه في شرق القاهره

ومظنش ان الجي بي اس ولا اي قمر صناعي

عنده القدره علي اختراق

سوق الخميس

ذلك الموسوعه التي لا يحتويها قمر ولا نايل سات

وعمتك انا بحييها بس شكلها اتسرقت عندنا قبل كده

واحب اقولك ان المطريه ترحب بالزوار وخصوصا الصيادله
قشطه يا دكتور

هي وظروفها said...

غاده محسن

انا بفضل الله زي الفل

وحلتي النفسيه عاليه

ورايح يوم الجمعه التبرع بتاع خيخه

والجمعه اللي بعدها رايح بورسعيد

ولو فاضيه يا ريت نشوفك

سلميلي علي رانيا كتير

وبخصوص ساره

لو لسه بتدخل هنا هتشوف سلامك
مكنش يبقي اي ملاك هيوصل سلامك ليها
فكري في لقاء بورسعيد وردي عليا؟؟؟؟؟؟؟؟؟؟؟
او لقاء التبرع بالدم متخفيش لو عايزه تيجي من غير تبرع ده اختياري
وبما انك زي حالاتي تخينه فده اختياري يلا سلام

صوت من مصر said...

وليد
شكلنا هنقفل على بعض

Guevara said...

مالها المناتك الشعبيه يا نجم لا مؤاخذه ؟

إحنا هنخبط فى بعض ؟؟ لأ حاسب و عندك واقف انتباه ..

بس تصدق معاك حق .. بس انت نسيت ميزه مهمه .

إنك سهل هناك تبقى إله من آلهة الرومان .

و دا لمجرد انهم يلاحظوا إنك أنضف شويه من سكان الحى .. بتلبس بدل مثلا لا قدر الله .. و لا بترش سكلابشر مثلا و العياذ بالله .. و واخدلك جنب كده بإذن الله

خد عندك نتايج بقى و أهمها إنك هتبقى فشى التاته الأول فى المنطقه و البنات كلها بتسبلك فى الرايحه و الجايه (بصرف النظر عن أشكال البنات اللى مش ولا بد يعنى فالحلاوه حلاوة الروح)

زائد إنك هتلاقى الناس بتحشرك فى مشاكلها عشان تحلها كإنك انت مثلا السيد رئيس ديوان رئيس الجمهوريه و دا لمجرد انهم توسموا فيك النضافه و الفهم.

دا غير ان صعب حد يتخانق معاك لإن الكل هيقف ضده عشان يجاملك حتى لو كنت انت عمرك ماوقفتلهم فى خناقه .

لأ يا معلم مناتكنا الشعبيه كل مزز قصدى مزايا و احنا اللى ظالمنها .

و دمتم و تقبل كومنتى بصدر رحب .. و لا متتقبلوش .. المهم ماتشدش وراه السيفون .. عشان المجارى فى مناتكنا و جايز فى مناتكك طافحه حاليا .

مهيار الفرح said...

مساء الخير
حضرتك ما بتعرفني وتعليقي ماهو إلا بلاغ بخصوص من تدعي أنها مدونة /مها أحمد صاحبة مدونة الوفية للأبد
حيث أكتشفت اليوم أنها قامت بسرقة مدونتي همسات قلب http://rtoosh.com/blogs/mhyarelfarah/ ونسبت مافيها من خواطر لنفسها..وهذه سرقه وعندما واجههتها وكتبت قامت بألغاء الشات بوكس اللذي حمل عنوان مدونتي وحضرت نشر التعليقات مالم توافق عليها
وأخر بوست قامت بأدراجه تحت عنوان سر لهفتي روعة محبتي ماهو الا قصيدة قمت بأدراجها في مدونتي سابقة الذكر بتاريخ 25 نوفمبر2008 وهذا غيض من فيض ونتيجة لعدم أعترافها قررت أسفة وحفاضا على حقوقي تبليغ كل من يزور مدونتها وذلك أحقاقا للحق فقط لاغير
أرجو ألا أكون أزعجتك
مهيار الفرح...

مهيار الفرح said...

مساالورد
صدقوني انا كل اللي مزعلني لسه اصرارها على الإنكار رغم ردها واعتذارها المزعوم...وكنت سامحت من قلبي لو حسيت انها صادقة والا تفسري بإيه....
أحتفاظها بالبوست
موقف تذكرته .. و عشق أحببته
وهي تعلم أنها نقلاه ..سارقة أحساس وذكرى تخص قلبي أنا والإنسان اللي بحبه...
بوست
لم أجـد عنــــــوان إلا ... أحبك
برضه منسوخ من مدونتي
بوست
آآآه يا قلـــــــب
مسروق من مدونتي
بوست
معـــك و بــــك أحـــــيا
مسروق من مدونتي
بوست
عــد حبيــــبي
مسروق من مدونتي
وبوست
و تبقــــى أمنيــــة واحــــدة ....
مسروق من مدونتي
ولم تتكرم بالإشارة انها منقولة
وفي اعتذارها المزعوم اساءت لي بقولها انني قد أسأت لها بالفظ وشتمت على حد قولها شتائم خارجة والفاظ خارجة لم تستطع ان تجرح بها زوار المدونة ويعلم الله انه لم يحصل.. ولو كانت صادقة فلتظهر دليلها أنا عندما كتبت لم أخف ولكنها هي من خاف ولغى التعليقات وعندما علمت انني قمت بنقل مافعلته لزوار المدونة كتبت ماكتبت واكرر يعلم الله اني لم أسيء لها وان الشتائم وغيره ليست من طبعي ابدا وهذا يعلمه عني من تعامل معي ومن لم يفعل..
فهي هنا لم تعتذر بقدر ما اساءت لي بقولها وكلماتها واظهرت نغفسها الغلبانة المظلومة

كل ماقلته انها سرقت كلماتي وكتبت في بوكس الشات ان المدونة هذه مسروقة
وهذا من حقي بعدما اكتشفت انها نسبت كل ماكتبته لنفسها حتى قصيدة نموت وتحيا فلسطين اللتي ادعت انها كتبتها تعاطفا منها مع شعبنا اللذي تكرهه من كل قلبها كما قالت هي
سيدي انا لم اسيء لها ويعلم الله
كل ما طلبته هو حقي في مشاعر تخص قلبي نثرتها على الورق
واثار غضبي منذ لحظات ردها عليك في بوست آه ياقلب المسروق من مدونتي قولها

هي و ظروفها ......
وليد منورني و الله يا باشا

و الف سلامة على قلبك
و ان شاء الله ربنا يرزقك ببنت الحلال اللي تقدر تصون قلبك يا رب

و معلش بقى اني وجعت قلبك انتي عارفني

بت نكد
ههههههههههههههههههههههه

بس على فكرة انا بحضر لخاطرة لفلسطين ان شاء الله هتعجبك علشان عارفة انك بتحبهم اوي
و انا و الله بحب اللي يستاهلوا منهم و بس
نسيت ايضا ان تقول وهي بتحضر لسرقتها انها سرقت القصيده من مدونتي

وشكرا

مهيار الفرح وليس مهيار الحب
وعلى فكرة انا اسمي فرح

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل