مكدبش خبر واكد كلامي شريف باشااااااا بجد انت باااااااااشا

في البوست السابق اشرت الي مدي قدره شريف حسن شاعرنا المبدع
كتابه النص الشعري بتمكن وكيف يجعلك تتخيل ابطاله وان تقرأ له
فكتب هذه القصيده ليؤكد كلامي ومن جمالها اردت ان تشاركوني جمال ما قرأت
لو حلمك
كنتي حافظتي معايا عليا
كنتي فضلتي ماسكة إيديا
وما بعدتيش !
كنت باموت
حتى الأهة
كنت حابسها وأبان مبسوط
علشان بس ما تتغميش !
حبيتك
وما حبيتنيش !
إلا حتى ما حاولتيش !
متكلبشة رجليكي فِ خوفك
فشل الماضي ساكن جوفك
وانتي مكانك ما خرجتيش !
فالحة تقولي :
إنـِك ليا .. وماليش غيرك
ما تسيبنيش ؟
إزاااااااااي ؟
بتلاعبيني ؟
ولا إكمني كنت عليكي رايح جاي ؟
جايز طيب
بس الطيبة ما تعيبنيش !
بس !
خلاااااااااااص !
ما ترديش !
***
اتطمنتي إني حبيبك ؟
وإني فِ جيبك ؟
وإنك لو سيبتيني هاضيع
وابقى ما فيش !
دايماً فاكره إنك أذكى
وإنك مالكه
طب بالذمة ؟
حد يشد ولا يرخيش ؟
كوني صريحة فِ مرة وحيدة
وما تغشيش !
هل فعلاً
كنت أنا حلمك ؟
ابنك ؟ راجلك ؟ سندك ؟ كلك ؟
حضن لهمك ؟ قدر احتلك ؟
ولا ده كله جبر خواطر ؟
ما تجاوبيش !
ده مش إجباري
وما تعتذريش !
إذا كان قلبي
اتداس بالجزمه
وما وقفتيش !
***
الحُــب
عطــــاء
مش ضمة فِ ضلمة
ورسالة ناعمة
وشغل نفاق !
الحُــب
أرزاق
وأنا مش شحات
ولا غاوي إواء
وما باشكيش !
الحُــب
خِنـــــاق
فِ الروح
بيعلم
مش تهويش !
***
خلليـــــــــكي
غبية
عنيدة
تاخدي تمللي
ولا تديش !
خلليـــــــــكي
محلك سِر
بتنزفي عمر
وما بتمشيش !
ماشيه بضهرك
معجبه إنك
ما بتقعيش !
خلليـــــــــكي
تايهه ما بين أحلامك
ولا تصحيش !
خلليـــــــــكي
عايشه فِ كدبه كبيـــــرة
اسمها : انتي
وانتي ؟؟
ما فيش !
زي الأغنيـــــــــة
بكلام ثابت
بعد شوية
بيصبح بايت
ما بيغويش !
أغنيـــــــــة
مهمــــا كانت
حلوة
شجية
ما تشـَبعش
ولا ترويش !
أغنيـــــــــة
مهمــــا نحسها
مش بتحس !
تاخد مننا
ولا تنقصش !
وما بتسمعش ..
غير لشيطانها
وما بتهديش !
***
الله يسامحك
وأنا ....
لو كنت ظلمتك
سامحي ....
أو
ما تسامحيش !
دي حاجة تخصك وحدك
ما تفيدنيش !
أنا من غيرك بيكي هاعيش !
قلبي أنا واخد ع التلطيش !
عاااااااااااااااااااادي
ما تدقيش !
إفرحي ياللا ما تتكسفيش !
سيبي الحزن بحاله عليا
هايكفيني ما تهتميش !
هايغطيني فوقي وتحتي
وهاينحَر من دمي وراحتي
ما فيش حزن ما بيقضيش !
إمشــي بسررررررعة
ما تلتفتيش !
***
بكره الدنيا تفضى عليكي
واللي معاكي .. هايبقى عليكي
تشحتي حد يحن عليكي
ولا تلقيش !
ما أنت "نفسك" ما رحمتيش !
***
فاكره ؟
لما سألتك
- وأنا قدامك -
عايزه إيه ؟
وما عرفتيش ؟
أديني خلصتك مني يا ستي !
عرفتي الوقتي ؟؟
............
ما تبكيش !
***
- ملحوظة :
مهما تحاولي إنك تنسيني
ما هاتنسيش !

ملحوظه تانيه برافو يا شريف وقولتهالك ف وشك وبقولهالك دلوقت برافو يا شريف

.

حدث في مثل هذا اليوم

زي انهارده من سنه بالظبط عملت المدونه دي كنت متابع التدوين قبليها بحوالي سنه

بس لالامانه مكنتش عارف اعمل مدونه لاني من أمهر المخلوقات الأرضيه ف التكنولوجيا

وبما ان الحاجات دي بتتنظر فمبحبش اتلكم عن نفسي كتير.. وعملهالي جار ف تانيه اعدادي..

مش هعمل فيها احسان عبد القدوس ولا صلاح جاهين وازيط واقول كنت لأ اجد متنفس لما اكتب

وجو الفذلكه ده لأني اساسا مقتنع اني من أقل المدونين مهاره سواء كشعر أو او كسرد قصصي

أو مقال ساخر ومش بقول كده عشان حد يقولي ابوس ايد الغاليه متمثلش..

بالصدفه وانا بعمل سيرش علي جوجل من حوالي سنتين دخلت مدونه بنت خيخه واي كلام

وحبيت اسلوبها ومن خلالها بقيت ادخل مدونات وكانت عجباني جدا ساعتها مدونه الشعب

لابد له من حكومه تشكمه للساخره صاحبه الأسلوب الجميل من غير تكلف البسيط من اخلال اختنا شيماء

التي تركت التدوين واحب اقولها لو لسه بتدخل المدونه ربنا يباركلك ف جوازك وربنا يوفق لما تحبيه

دنيا واخره وفعلا اسلوبك كان من اجمل الاساليب وانتي فعلا موهوبه وبتكتبي حلو قوي وبتمنالك كل خير.

استفدت من من خلال قرائتي لمدونات كتير واتعلمت من اصحابها ازاي تكون الكتابه بشكل شبه احترافي

دي وجهه نظري الشخصيه ومحدش له فيه..

ف السنه دي اكتبست علاقات جديده بناس ف الغالب محترمين وعندهم فكر جميل

واسلوب حلو ودماغ احترمتها وبحترمها وطبعا فيه الجانب التاني..

طبعا فيه مدونين بيكتبوا كويس وناس تانيه شايفها ملهاش اساسا ف اي بطاطا بس اهو خدونو معاكوا لأموت نفسي

حبيت المدونه بتاعتي لما عملتها لأني اكيد كنت حابب الناس تقرا اسلوبي لاني مش بكتب لنفسي

لان اي حد حاسس انه بيعرف يعمل حاجه التشجيع او الكلمه الحلوه بتديه دفعه لالامام

فيه اللي الدفعه دي بتوقعه من المقطم واهو خد الشر وراح وفيه العاقل اللي بيعرف ان الدفعه دي مش اكترمن

زق عربيه عطلانه والبطاريه بتاعتها تعبانه لكن مسافه ما درات الدفه ف ايدك يا تسوق يا تلبس وانت وشطارتك..

اخترت اسم المدونه علي اسم قصيده كنت كاتبها لأجمل قصه حب ف حياتي علي الأطلاق ومنشرتش

القصيده دي فيها لسبب يخصني فقط...

من الناس اللي شجعتني كانت مها احمد وهي صاحبه اول تعليق عندي واخت غاليه عليا واتمنالها كل توفيق ف حياتها..

كان من أجمل من اكتسبت من المدونه غير معرفه الاساليب المتنوعه ف الكتابه مدون اصبح أخ وصديق

هو شريف حسن صاحب مدونه باااااشا وهو من الناس اللي تخبط فيها ف حياتك صدفه وأحب اٌقوله لو مجتش يوم

الجمعه هتموت يا شريف.. طبعا مش شريف بس فيه ناس تانيه جميله كتيربقت صحاب ع المستوي الشخصي

بس شريف اقربهم لعقلي وقلبي بس كمان شريف علي المستوي الكتابي كشاعر من الناس الموهوبه بتمكن ومعلمه..

ومن اجمل ما ف التدوين انه عامل زي البيوت ليك جيران جار سو وجار طيب جار قليل الأدب ومليان نفسنه

وجار عامل زي النسمه جيرته تفرح مع كامل اعتذاري لنسمه طبعا..

من المجتمع النسائي تفضل الدكتوره ستيته من اجمل اصحاب العقول المفكره اللي عرفتها داخل مجتمع التدوين..

احب اقول ل هي وظروفها بجد نفسي تبقي في يوم من الايام جرنال محترم طبعا ولكن نفسي

فعلا اكون ف يوم من الايام صاحب جريده انشرفيها فكر شايف اني معتنقه وبحبه وليه اسلوب مميزأتمني..

من أخف البوستات دما لقلبي ابوست حلوان اتضربت يا جدعاان ومن أجمل التعليقات اللي جاتلي كان تعليقين

تعليق للدكتوره ستيته ف بوست مش فاكر اسمه وتعليق شريف باشا علي بوست حلوان اتضربت..

اذا ربنا أراد وقدرت انزل الكتابين اللي خلصت منهم واحد والتاني ف الطريق هتفضل بردو هي وظروفها

من اجمل الحاجات اللي حبتها بشكل شخصي كمتنفس قدرت فيه اشارك مجموعه من اصحاب الفكر بقرائتي ليهم

وباني اتعلمت واستفدت من كلام كتير كتبوه وافضل واقرب الجمل اللي قرأتها ف التدوين كانت لاختي الكبيره دكتور ستيته

هناك من الناس من يستحث أجمل ما فيك علي الظهور وهناك من البشر من يستحث أسوأ ما فيك علي الظهور..

وبعد كل الرغي ده كله احب اقولكم تقعدوا بالعافيه