كل سنه وأنا طيب وانتصف العمر

طبعا كلكم هتقولو مين القمر العسل ده وربنا اللي في الصوره

ده يبقي انا ودي اول صوره ليه في حياتي وبما ان زي النهارده

من تلاتين سنه اتولدت يوم جمعه ساعه ادان العشا

في بيتناعلي ايد دايه اسمها أم حسن

وشفت الدنيا ساعتها علطول

قالولي وبيقولولي في البيت من يومك فقري

أول ما نزلت وشفت الدنيا عملت حمام في وش الدايه وخالتك قعدت تعتذرلها

والدايه كتر خيرها قالتلهم هيطلع شقي ولمض وانا مكدبتش خبر

بصراحه مش مصدق اني بقيت ابلغ من العمر ثلاثون عاما

معقول حسب حديث النبي عليه الصلاه والسلام

عمر امتي ما بين الستين والسبعين

كده انا انتصف العمر عندي طبعا الله اعلم بالباقي لحد يقولي انت يعني

تعرف الغيب!!!

في خلال العمر اللي عدي ده عرفت ناس كتير واشتغلت كذا شغلانه غريبه

مكنتش ولازالت بحب التعليم

والصحيان بدري واستاذ قاسم بتاع الرياضه في تانيه اعدادي

ابويا في التلاتين سنه دول من احن الناس اللي قابلتهم في حياتي

أمي ست بيت طيبه وحنينه بس عقلها يكسب قلبها كتير

حبيت في عمري تلات مرات حب حقيقي اه وربنا حقيقي قلبي كبير

أكثرهم عقلا كانت نسرين الله يمسيها بالخير

أخفهم دما كانت زينب واقربهم انها تكون زوجه كان الارتباط الأخير

في التلاتين سنه دول صاحبت ناس كتير

وأنا من النوع اللي صحابي تزيد ونادر لما تنقص

ومبخسرش حد الا لو كان بجد مينفعش اكمل علاقه صداقه معاه أو للضروره

سواء لظروف حياه وزحمتها أو بسبب قله أصل منه

عيوبي ورغم اني عارفها زي ما هي وكل ما احاول اغيرها لاني من النوع الصريح

معايا يحصل انها ترجع تاني

بحب حاجات معينه بشكل ثابت زي فيروز الحب الحقيقي في حياتي

والأنثي المثاليه في خيالي

الوحيده من التلاته اللي حبتهم شاركتني حبها كانت نسرين

من 8 سنين كنت علي التوالي بحتفل بعيد ميلادي

وانا مرتبط مرورا بنسرين وزينب والارتباط الاخير

الثلاثه كانت بينهم حاجات قدريه غريبه اولها انهم مواليد برج العقرب

دمهم خفيف وعصبيين وعنديين وعندهم القولون العصبي

من اجمل ايام حياتي كانت ايام تجاره عين شمس كنت مقضيها

والله يسامحني ياما اشتغلت ابويا في فلوس الانتساب والكتب الله يسامحني

من أجمل حاجات حصلتلي بردو انا مجموعه صحابي تكاد تكون ثابته والعلاقه تكاد

تكون اخويه اكتر منها صداقه

ومن الحاجات الحلوه اني عملت المدونه دي

واللي عرفتني علي ناس حبتهم واحترمتهم جدا

واتشرفت برؤيه بعضهم علي المستوي الشخصي

بتمني في العمر الباقي اللي معرفش هو اد ايه

اني اكون اقرب لربنا من عمري اللي عدي

بتنمي أن امي وابويا ربنا يبارك فيهم

ويحسن ختامهم بعد طول عمر وحسن عمل

بتمني اشوف مريم وانس ولاد اخويا احسن مني ميت مره

بتمني ربنا يرزقني الزوجه الصالحه اللي تسعدني دنيا وتشاركني بعقلها ودينها

اننا نكون من اصحاب الجنه بعفو ربنا وفضله وثم تقانا له

كل سنه وانا اقرب لربنا من اللي قبلها

كل سنه وانا بعامل اهلي بما يرضي الله ويقربني اليه

نفسي فعلا بعد منتصف العمر أوصل لمرحله من النضج

تسمحلي اني اتعامل بموضعويه وتروّي

وأختار اللي يناسبني في كل امور حياتي واخرتي

وأحقق طموحي وأقدر اعيش في المستوي الديني والمعنوي والفكري والمادي

اللي يحققلي الستر والرضا

وربنا يجمعنا واياكم بعد نهايه العمر في جنه عرضها السموات والارض

ويحققلي ويحققلكم كل اللي بنتمناه

وأخر كلامي

اللهم أختر لي الأفضل في كل امور حياتي ثم ارضني باختيارك

وكل سنه وانت طيب يا لولو

أنا يعني في مانع؟؟؟؟