كل سنه وأنا طيب وانتصف العمر


طبعا كلكم هتقولو مين القمر العسل ده وربنا اللي في الصوره
ده يبقي انا ودي اول صوره ليه في حياتي وبما ان زي النهارده
من تلاتين سنه اتولدت يوم جمعه ساعه ادان العشا
في بيتناعلي ايد دايه اسمها أم حسن
وشفت الدنيا ساعتها علطول
قالولي وبيقولولي في البيت من يومك فقري
أول ما نزلت وشفت الدنيا عملت حمام في وش الدايه وخالتك قعدت تعتذرلها
والدايه كتر خيرها قالتلهم هيطلع شقي ولمض وانا مكدبتش خبر
بصراحه مش مصدق اني بقيت ابلغ من العمر ثلاثون عاما
معقول حسب حديث النبي عليه الصلاه والسلام
عمر امتي ما بين الستين والسبعين
كده انا انتصف العمر عندي طبعا الله اعلم بالباقي لحد يقولي انت يعني
تعرف الغيب!!!
في خلال العمر اللي عدي ده عرفت ناس كتير واشتغلت كذا شغلانه غريبه
مكنتش ولازالت بحب التعليم
والصحيان بدري واستاذ قاسم بتاع الرياضه في تانيه اعدادي
ابويا في التلاتين سنه دول من احن الناس اللي قابلتهم في حياتي
أمي ست بيت طيبه وحنينه بس عقلها يكسب قلبها كتير
حبيت في عمري تلات مرات حب حقيقي اه وربنا حقيقي قلبي كبير
أكثرهم عقلا كانت نسرين الله يمسيها بالخير
أخفهم دما كانت زينب واقربهم انها تكون زوجه كان الارتباط الأخير
في التلاتين سنه دول صاحبت ناس كتير
وأنا من النوع اللي صحابي تزيد ونادر لما تنقص
ومبخسرش حد الا لو كان بجد مينفعش اكمل علاقه صداقه معاه أو للضروره
سواء لظروف حياه وزحمتها أو بسبب قله أصل منه
عيوبي ورغم اني عارفها زي ما هي وكل ما احاول اغيرها لاني من النوع الصريح
معايا يحصل انها ترجع تاني
بحب حاجات معينه بشكل ثابت زي فيروز الحب الحقيقي في حياتي
والأنثي المثاليه في خيالي
الوحيده من التلاته اللي حبتهم شاركتني حبها كانت نسرين
من 8 سنين كنت علي التوالي بحتفل بعيد ميلادي
وانا مرتبط مرورا بنسرين وزينب والارتباط الاخير
الثلاثه كانت بينهم حاجات قدريه غريبه اولها انهم مواليد برج العقرب
دمهم خفيف وعصبيين وعنديين وعندهم القولون العصبي
من اجمل ايام حياتي كانت ايام تجاره عين شمس كنت مقضيها
والله يسامحني ياما اشتغلت ابويا في فلوس الانتساب والكتب الله يسامحني
من أجمل حاجات حصلتلي بردو انا مجموعه صحابي تكاد تكون ثابته والعلاقه تكاد
تكون اخويه اكتر منها صداقه
ومن الحاجات الحلوه اني عملت المدونه دي
واللي عرفتني علي ناس حبتهم واحترمتهم جدا
واتشرفت برؤيه بعضهم علي المستوي الشخصي
بتمني في العمر الباقي اللي معرفش هو اد ايه
اني اكون اقرب لربنا من عمري اللي عدي
بتنمي أن امي وابويا ربنا يبارك فيهم
ويحسن ختامهم بعد طول عمر وحسن عمل
بتمني اشوف مريم وانس ولاد اخويا احسن مني ميت مره
بتمني ربنا يرزقني الزوجه الصالحه اللي تسعدني دنيا وتشاركني بعقلها ودينها
اننا نكون من اصحاب الجنه بعفو ربنا وفضله وثم تقانا له
كل سنه وانا اقرب لربنا من اللي قبلها
كل سنه وانا بعامل اهلي بما يرضي الله ويقربني اليه
نفسي فعلا بعد منتصف العمر أوصل لمرحله من النضج
تسمحلي اني اتعامل بموضعويه وتروّي
وأختار اللي يناسبني في كل امور حياتي واخرتي
وأحقق طموحي وأقدر اعيش في المستوي الديني والمعنوي والفكري والمادي
اللي يحققلي الستر والرضا
وربنا يجمعنا واياكم بعد نهايه العمر في جنه عرضها السموات والارض
ويحققلي ويحققلكم كل اللي بنتمناه
وأخر كلامي
اللهم أختر لي الأفضل في كل امور حياتي ثم ارضني باختيارك
وكل سنه وانت طيب يا لولو
أنا يعني في مانع؟؟؟؟

65 Comments:

كيــــــــــــارا said...

كوووووووووووووووول سنة وانت طييييييييب :)

كيــــــــــــارا said...

يلا بداية جديده يارب يارب تكون فيها اقرب لربنا وتحقق احلامك كلها وكل اللي بتسعى اليه مدام في الخير

ويبعد عنك شوشو ويباعد بينك وبين اي حاجه تغضب ربنا

وكوووووووووووووووووووول سنة وانت طيب بئا

اهلا بيك في بداية يوم جديد:)

هي وظروفها said...

كياااااااااااااااارا

وانتي طيبه يا مني ودايما كده ذوق واخلاق

ربنا يحققلك كا احلامك وبجد ربنا يخليكي علي كلامك وذوقك واحترامك

وكل سنه وانا طيب

Sad Angel said...

كل سنة وانت دايما بخير
ويارب تحقق كل اللى تتمناه

هي وظروفها said...

sad angel

وانتي طيبه
وربنا يحققلك انتي كمان كل احلامك

لولا وزهراء said...

وليدوووووووووووووووووو
دى كده تهنئه سريعه مريعه
كل ثانيه وانت بخير
يارب مية سنه فى سعاده وهنا

زهراء

لولا وزهراء said...

وليدوووووووووووووووو

رجعت لك من تانى
اتفضل ده فيديو والله انا اللى عملته هو فعلا تم انجازه من فتره لكن برضه ينفع لك

http://www.youtube.com/watch?v=XiNRXMwszi0


بجد كلامك وصراحتك حلوه اوى وده شئ معهود فيك
لازم تفكر تكتب سيناريو او قصص قصيره عندك طريقه حلوه اوى فى السرد

ان شاء الله عيد ميلادك القادم تكون معاك زوجه هديه من ربنا تكون افضل زوجه فى الدنيا كلها وربنا يزقك بالذريه الصالحه .....
لغاية هنا وانتهيت تهنئى

زهراء



*******************

التهنئه دى من لــــولا وهى جايه على الموبايل لانها عندها مشكله فى النت وان شاء الله ابعت لك فاتورة الموبايل تدفعها لى

لولا بتقولك

كل سنه وحضرتك بخير وان شاء الله ربنا يكتب لك الخير والسعاده
ان شاء الله تحقق كل احلامك وامنياتك

لـــــــولا

------------------****

كل سنه وانت بخير يا وليد

لـــولا وزهراء

سمع هوص (Abo 3li) said...

كل سنة وانت طيب ياوييييلز...
ربنا يسعدك ويبعتلك بنت الحلاال..

هي وظروفها said...

زهراء
ههههههههههههههههههههههههههههههههههههههههههههه

موتيني من الضحك علي فاتوره التليفون
ههههههههههههههههههه

وانتي طيبه وانا والله يا زهرا مش عارف اقولك علي دعوتك واحب من موقعي هذا اقول لولا اد ايه انتي انسانه عسل ووانتي طيبه يا لولا علي فكره اسم هبه من اسامي االبنات الجميله

السنه الجايه ان شاء الله تكوني انتي ولولا يا زهرا في بيوتكم

هي وظروفها said...

زهرا

الفيديو جميل جدا جدا جدا

انتي وربنا عسل

هي وظروفها said...

ابو علي

وانت طيب يا محمد وربنا يديم الخير والحب بينا يا كبير

ستيتة حسب الله الحمش said...

كل سنة وانت طيب يا وليد
وربنا يجعل السنة دي عليك أحلى من كل اللي فات يارب
وتبقى الرابعة تابتة
عارف الفيلم بتاع يارب ولد
لما امين المخزن قال لفريد شوقي الجاي ولد ان شاء الله
انا امي جابتني بعد تلات بنات
اهو من نفس الباب الرابعة تابتة
ربنا يجعل وشنا عليك سعد وتكون السنة دي سنة بشرى ليك
تحياتي وهات حتة من التورتة

هي وظروفها said...

د/ ستيته

يسمع من بقك ربنا واللي يجيب ستيته بعد اللاته

يرزق العبد لله بواحده في عقل وادب ودين د/ستيته

وباذن الله وشكم هيكون زي الفل وقريب قوي هسمعك خبر حلو عني

ربنا يخليكي وتملي تفرحينا بتعليقك

كــركــبــة دمـــاغ said...

كل لحظه وحضرتك بالف خير وصحة وسعاده ، ويارب اللي جاي احسن من اللي فات وتحقق كل اللي نفسك فيه وبتتمناه ، وعقبال سبعتلاف سنه كله في فرح وهنا يارب

ربنا يسعدك ويريح بالك ويطمن قلبك

تحيــاتي جداً

فراشة said...

كل سنة وانت طيب ولربنا اقرب وتبقى سنة حلوة وجميلة ومليانه بالاحداث المفرحه ليك يارب

وربنا يرضى عنك ويرضيك ويهديك للصح ويرضيك بيه

هي وظروفها said...

كركبه دماغ

وانتي طيبه ومبسوط جدا بتعليقك الجميل واللي اكيد صاحبته اجمل منه

وانتي بالف صحه وسلامه

هي وظروفها said...

فراشه

امين يارب دعائك الجميل ده باذن الله ربنا يتقبله منك ليا وليكي وربنا يوفقك لكل خير

نورتيني في اول زياره

P A S H A said...

كل سنة وأنت طيب يا وليد

كل سنة وأنت أجدع وأرجل وأطيب وأحسن أخ وصاحب

كل
سنة وأنت أنت

عشان
أنت ما فيش منك اتنين

بحبك
قووووووووووي ياد

مش
هافرح بيك بقى ؟؟

ربنا
يكرمك ويوفقك ويوسع رزقك ويهديك ويرزقك الزوجة الصالحة اللي تعرف قيمتك وتتقي الله
فيك ويرزقكم بالذرية الصالحة إن شاء الله

أخوك / شريف

هي وظروفها said...

شريف

حبيبي وابن حبيبي

وانت طيب وبالف صحه وخير وسلامه

وبجد انت من الناس اللي عرفتهم وصاحبتهم وغلاوتهم تتزرع في القلب

عن قريب يا معلم باذن الله بس شويه امور اظبطها في حياتي
واد يا شريف لو فاضي بكره ما تبقي تعدي عليا انا اجازه بكره الظهر كده هديك تليفون قشطه

البنفسج الحزين said...

كل سنه وانت طيب يا وليد ...
وكل عام وانت الي الله أقرب...
ان شاء الله التلاتين السنه الجايين كلهم حب.. وسعادة... وفرحه... ونضوج...وزوجه جميله حنينه...
وبيبيهات قمر يسعدوا قلبك...
وتطبيق للي اتعلمته من الصدمات والمشاكل اللي قابلتها في التلاتين سنه اللي فاتوا...
وتوطيد للصداقات اللي عملتها فيهم...
ربنا يسعد قلبك ....

صيدلانيه طالعه نازله said...

كل سنه و انت طيب يا وليد
ربنا يجعل ايامك كلها اعياد
و ايام سعيده ان شاء الله

و ميرسى على التورته الجميله
و نردهالك فى الافراح

reem said...

كل سنة وانت طيب يا وليد

ويارب السنة دى يكون وشها حلو عليك وتلاقي بنوتة عسوله ونفرح بيك يارب

ربنا يخلي لك مامتك وباباك وكل اللى بتحبهم يارب وتشوفهم دايما احسن واحسن

سنة سعيدة عليك يارب وتكون فيها الى الله اقرب وتحقق فيها كل ما تتمناه يارب

سبايدرمان said...

كل سنه وا نت طيب
و عقبال 100 سنه

مهموهـــــــة said...

كل سنة و انت طيب يا وليد يا رب
و عقبال مية مليون سنة يا رب
و عقبال بقى السنة اللي جاية كده نقولك كل سنة و انت طيب بس ساعتها تكون مع الزوجة الصالحة اللي كتبهالك رب العالمين
و تكون عايش في سعادة و هناء دايما يا رب
بجد فرحت اوي علشانك
ربنا يهنيك دايما يا رب

خالص تحياتي و تقديري

هي وظروفها said...

البنفسج الحزين

وانتي طيبه وانتي اقرب لربنا

يااااااااه بيبيهات مره واحده طب بيبيهين يا دوبك
شكرا اوي علي تعليقك ودعواتك الحلوه

هي وظروفها said...

صيدلانيه

علا


وانتي طيبه وزي ما قولتلك هناك خديها عشان مبحبش الشيكولاته مش كرم ولا جدعنه

وانتي طيبه يا علا انتي واشرف

هي وظروفها said...

ريم

ياااااااااارب يا ريم يكون وشها حلو بجد بتمني كده

كل سنه وانتي بقي اللي طيبه وبخير وسلمي علي كنزي

نورتيني يا ريم

هي وظروفها said...

سبايدر مان

وانت طيب يا صديقي

ياااااااااااااه ميت سنه

نورتني يا سبايدر

هي وظروفها said...

مها

وانتي طيبه يا مها وفي حب وسعاده وستر

ان شاء الله دعوتك تتحقق وباذن الله تيجي السنه الجايه ومعايا بنت الحلال اللي هتتدبس في العبد لله
وربنا يتولاها برحمته اصل انا ابتلاء

مها مش عارف اقولك ايه

اقولك وانتي طيبه واحمد طيب والسنه الجايه تشيلوا ابنكم وتلعبوا وتفرحو بيه

نورتيني كالعاده فوق الفظيع يا مها

صوت من مصر said...

فين الحاجه الساقعه الجاتوه الشسيكولاته
كل سنة وانت طيب وبخير وسلام
جارك وحبيبك كيمو

sony2000 said...

كل سنه وانت طيب
ويارب الايام اللي جايه تكون احسن من راحت..وانا كلها كام يوم وعيد ميلادي قرب انا كمان:)
شفت الصودف
ربنا يارب تكون فأحسن واسعد حال
اللهم امين:)

موناليزا said...

كل سنة وانت طيب
وعقبال110 سنة وانت فى صحة وسعادة وهنا

خواطر شابة said...

سنة حلوة ياجميل
سنة حلوة ياجميل سنة حلوة سنة حلوة سنة حلوة ياجميل
كل سنة وانت طيب وبخير وان شاء الله تحقق كل احلامك فالعمر امامك وبالعزيمة تتحقق كل الاحلام
تحياتي وودي

فتاه من الصعيد said...

كل سنه وانت طيب يا استاذ وليد وعقبال مليون سنه

كل عام وانت الى الله اقرب

تحياتي

wasf_elahsas said...

كل سنة وانت طيب
وكل سنة تبقي احلي من ال قبلها
وكل ال تتمناه تحققه السنة دي
ويارب يصلح حالك ويريح بالك

romansy said...

اهلا اهلا اهلا
هابى بيرث داى تو وليد
هابى بيرث داى تو يووووو

كل سنه وانت شفى سنه عن سنه

كل سنه وانت اقرب لربنا
كل سنه وانت محقق احلامك
ويحليلك ايامك

http://images.aljayyash.net/files/file/islam/54.jpg

هي وظروفها said...

كيمو

وانتي طيب يا محمد

واديك تليفون ونقضيها من ابو محرم

انت جيت في جمل

منور يا كبير

هي وظروفها said...

sony 2000

امين يارب وانتي طيبه وفي نعمه وفضل وستر

وكل سنه وانتي طيبه مقدما وربنا يخليكي

نورتي يا سوني

هي وظروفها said...

موناليزا

وانتي طيبه يا مونا وبصحه وسعاده

نورتي يا مونا

هي وظروفها said...

نوجاااااااااااااا

وانتي طيبه يا نوجا
وان شاء الله نحقق كل احلانا يا يا قمر

تحياتي ليكي ولكل اهل المغرب

هي وظروفها said...

فتاه من الصعيد

وانتي طيبه وربنا يخليكي ويحققلك كل احلامك بخير
.

نورتي

هي وظروفها said...

وصف الاحساس


وانتي طيبه ومبسوطه وسعيده وفرحانه ومحققه احلامك يا وصف

ونورتيني

هي وظروفها said...

احمد الرومانسي

يا معلنم يا معلم الله اكبر صوره جميله جدا شكرا يا احمد علي ذوقك

وربنا يخليك ونشوفك تملي في اسعد واطيب حال وراحه بال

والصوره للمره التانيه اجمل بكتير من اي كلام اقولهولك عنها والف الف شكرا عليها يا صاحبي

мαησηα said...

ههههههههههههه

انا صدقت ان دى صورتك حرام عليك بجد

تشتغلنى كده هههههه لا بس انت جبته شبهك اوى كده منين

كل سنة وانت طيب يا لولو ويارب عقبال مانباركلك على النص التانى من عمرك كله يارب

وربنا يباركلك ف ماتبقى منه اللى لايعلمه الا هو

ويحققلك كل امنياتك واحلامك وتبقى السنة دى فاتحة خير عليك باذن الله

انا جاية اخد نصيبى من الجاتوووووووووه على فكرة ههههههه

صفــــــاء said...

كل سنه وانت طيب يا وليد

وايه الصور العسل دى بس

يا عم دى يا دووب 30 سنه امال اللى عداها أقول ايه
دى ايام ... ايام مابتتحسبش ولا لها عدد

ربنا يديك الصحه وطوله العمر وتفرح بكل ساعه فيهم

وتعيش قدهم مرتين كمان

ghada mOhsen said...

كــــــــــل :)
سنـــــــــه :)
وإنــــــــت :)
طيـــــــــب :)
وليــــــــد :)
باشــــــــا :)

معلش على الغيبه وتأخير التهنئه بس أنا كنت في غيبوبه صغننه كده ...

ربنا يباركلك في أيامك يارب .. بجد إنت تستاهل كل خير ...
ربنا يجعل كل أيامك وكل سنواتك إللي جايه خير في خير وحب في حب وتقرب إلى الله أكتر وأكتر ...

يوم جديد وحياه جديده وروح جديده تبشر بالخير بإذن الله ...

... ;) ,,, ;) ...

أبو حميد said...

باشا... معلش بعلق متأخر
كان المفروض نجيلك بالتورتة ونغنيلك (هاذى باذى يو يو)
إن شاء الله السنة دى تحقق فيها كل اللى فى نفسك وتلاقى الحب الرابع اللى يملى عليك حياتك وتكون إن شاء الله زوجة صالحة لك
تحياتى وكل سنة وإنت طيب

هي وظروفها said...

منونه
وربنا يا مني صورتي ايه مش شكلي دلوقتي احلي ولا ايه

ههههههههههههههههههه

وانتي طيبه ويااااااااااااارب تتقبل دعوتك نفسي اتجوز والله يا بنتي
وعقبال منفرح بيكي عن قريب يارب بواحد بن حلال يستاهل اجمل منونه

هي وظروفها said...

صفاء

وانتي طيبه

وبخصوص الصوره فمبحبش اتكلم عن نفسي خااالص

ربنا يبارك فيكي واحب اعرفك جدي ميت قريب عنده ميه وتمانيه سنه عيله معملره معمره يعني

نورتني يا صفاء

هي وظروفها said...

غاااااااااااااااااااااده

وانتي طيبه ونفرح بيكي انتي ورانيا قريب باذن الله

وانتي تعليقك في اي وقت ليه جماله وذوقه يا غاده

ربنا يخليكي وايه الكلام الكبير ده يكونش تقصدي حد تاني

هي وظروفها said...

ابو حميد

ايه النور ده يا ناس علق في اي وقت يا باشا

ومجيتك لوحدها كفايه تنور المدونه وبلوجر كله

ربنا يخليك ويااارب الرابعه تكون هي االأخيره عشان اخلص الف شكر علي دعوتك يا احمد وربنا يبارلكلك في ولادك ويخلهملك

Lady E said...

happy birthday to you

كل سنة وانت طيب وبخير وصحة وسعادة يا وليد

ربنا يبارك في عمرك والصورة بجد زي القمر غيرك خالص :)))

ربنا يبارك في عمرك يارب ويحقق لك كل أحلامك الجميلة

ربنا يسعدك ويحلي أيامك

هي وظروفها said...

ايناس

وانتي طيبه

كلامك ده مدح في صوره ذم ولا ذم في صوره مدح

يا بنتي انا طول عمري عسل بس اكيد انتي اللي مش واخده بالك

مجرد بنت said...

كل سنننننننننننننننة وحضرتك طيب
ولو ان دى اول زيارة ليا هنا
بس بردو انا عااااااااااااااااوزة تورتة وجاتو وبيبسى وحاجة ساقعة وعاوزة اتعشى لو امكن
بس الصورة ماشاء الله عسسسسسسسسسسسسسسسسسسسسسسسسسسسسسسسسسسسسسسسسسسسل
شكله هيطلع ابنك فى الاخر

مجرد بنت said...

http://www.youtube.com/watch?v=4dfiW5xqTJI


اتفضل هدية حضرتك اهى

الجواز و سنينه said...

كل سنه و انت طيب يا وليد
و ان شاء الله السنه الجايه تكون معاك العروسه
اللى تستاهلك و تسعدك و تسعدها
و تكون مسك الختام

هي وظروفها said...

مجرد بنت

نورتي وكل سنه وانتي بقي اللي طيبه

وده مش ابني ده انا

ونورتيني في اول زياره والف شكر علي اللينك وتحياتي ليكي
وميرسي لذوقك يا قمر

هي وظروفها said...

الجواز وسنينه

وانتي طيبه

ويااااااارب علي السنه الجايه اكون متجوز وتكون مسك الختام

الف شكر علي تعليقك وذوقك ودعوتك

نورتيني

beautiful mind said...

كل سنه وانت طيب يا استاذ وليد
ويارب الباقي من عمرك يكون كله طاعه
والجاي احسن ان شاء الله

هي وظروفها said...

ابراهيم بيوتفل مايند

وانت طيب يا هيما وياارب الجاي عندي وعندك يبقي اجمل

sweet angel said...

كل سنة وحضرتك بألف خير
ويارب الي جاي يبقا أحسن من كل الي فات
ربنا يرضى عنك و يزكي نفسك و يرزقك السعاده

هي وظروفها said...

sweet angel

وانتي طيبه وبخير وربنا يبارلك في حياتك

نورتي

re7ab.sale7 said...

صباحك ورد يا وليد
الاول مش هقول كل سنة وانت طيب خليني اقول كل وقت وانت طيب سنين وايام وشهور وساعات ودقايق وكل لحظة ويارب يجعل السعادة اكتر ف حياتك والحب اكتر والصداقة اكتر واكتر , انت كتبت باحساس صادق واتكلمت عن الحب بحق , بس اللي انا استغربته فعلا انك ثلاثين سنة ....!!! مش واضح علي فكرة خالص خالص عليك انك ثلاثين سنة بس بتمني تعيش اكتر وتحب وتفرح وتحقق كل اللي تتمناه او جزء حتي منه

هي وظروفها said...

رحاب

وانتي طيبه وكل لحظه وانتي احلي واجمل والذ وأبسط من اللي قبلها

تخيلي اللي شوفتيه ده تم التلاتين ايه معجزه ولا شكلي 18 سنه

كل لحظه وانتي زي القمر

نورتي يا ريحاب

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل