حدش شاف توفيق

جمعتني القعده انهارده مع واحد من أخف صحابي دما وعقلا
وراح مفجأني بسؤال خرم دماغي
الا ليه ياد يا بوب رغم انك بتفهم وعقلك حلو وراشق في اي مصلحه
عمري ماشوفتلك شوطه في المقص الشمال
قولتله يا عمنا معلش بيخوني التوفيق
قالي يااااااه توفيق بتاع البيره اللي في الزيتون
قلتله لأ يا عم توفيق البقال يا روح امك
قالي يا عم سهله ندور علي توفيق وهو ايه يعني ناس كتير دورت عليه
واتكعبلت فيه قولتله توفيق بتاعي انا دورت عليه كتير بس الظاهر انه قرفان مني
زعلان مني بقي معرفش بس هيروح فين وديني لما اقفشه ما هسيبه
شويه وجو القعده ورياحها جابت اتنين افقر منه
ولقيت واحد بيقول لصاحبنا ده
انت ياد مش هتتغير هتفضل طول عمرك مقضيها ولا في الدماغ ومفسي ام دماغك
ولا ايه ظروفك
قلتلهم يا جدعان الواد ده رغم انه بيفهم وعقله حلو وراشق في اي مصلحه
الا اني عمري ما شوفتله شوطه في المقص الشمال
ضحك وضحكنا وعديناها
شويه وصاحبنا اللي قاعدين عنده في المحل عنده قال بقول يا رجاله
ما تيجو نهبأ و نضربلنا يومين عين سخنه وليد و وابو الضيق
يدورا علي توفيق واحنا نشوفلنا موزتين ونتقابل في قبل النهائي
علي ازازتين من الواد توفيق بتاع الزيتون
قولتله انت هارش يا معلم توفيق بتاعي مش في المووود وشكله في مارينا
واخوك داخل علي حوارجواز ومش هلف وراه هي وظروفها قابلني صدفه
يا اهلا بيه مقبلنيش اديني عايش ومش هستناه
شويه ودخلت زبونه عند صاحبنا تشتري حاجه
خرجوا كلهم وانا فضلت قاعد بنت ايه تشوفها الشيخه ناديه

منظرها وهيأتها ولبسها وملامحها ودخلتها تغر الواحد فيها

وتخللي الواحد يخاف يعاكسها ليلوث برائتها
وحياه كتاب الله الواحد يشك في امه وما يشك فيها
وتروح مطلعه حته حشيش من شنطتها
وتقوله صباح الفل يا معلم ملصتها من جوزي عارفه دماغك
مشيت الشيخه ناديه وانا يا ولاد الكلب وتقولولي دور علي توفيق
توفيق مين يا جدعان توفيق هج من البلد وبلاويها واللي بيجرا فيها
مين دي ياد قالي دي زبونه من شهر ابتدت تجيلي كنت فاكرها حسب المظهر
اخلاق اخلاق اخلاق
قولتلو ما هي اخلاق يلا بس انت اللي مكنتش واخد بالك
وتلاقيها من اخلاقها شافتك مش لاقي حشيش فصعبت عليها
انا قايم ماشي يا معرفه واطيه وانتو اللي يعرفكم يجيب شوطه في المقص ولا يقابل
توفيق وربنا اخرتها معاكم لنتحبس لتتمسكوا في قضيه يخونكو فيها التوفيق

الحب في القلب زي عضه الكلب

المره دي مش هكتب خاطره عن الحنين وان اللي عايز ينسي سهل انه ينسي نفسه

لانه كلام مش واقعي وبيبقي كلام فضفضه وطبطبه ومدد علي الشيزلونج
لأني اكتشفت ان الحنين مش زرار ومفيش حد عنده اوبشن
يدوس بيه علي الزرار ده ينسي ايام عاشها وحاجات حلوه شافها ولمسها
بس هل يا تري زي ما علقت عند نورا وهعيد تعليقي هنا بتصرف
ايه هو الأفضل ؟؟؟؟
ان الانسان اللي يمشي من حياه الواحد فجأه يمشي باسلوب يخليه يفتكره
بخير علطول
ولا يفارق باسلوب وحش عشان يسيب للي هيفارقه الوقت واللعن والمساحه
الي تخليه يكره او مش هقول يكره لأن اللي حب بجد ممكن ياخد قرار البعد
انما قرار الكره لو قالو يبقي ادعاء رجوله مش في محلها
مشكله الواحد سواء ولد او بنت انه لو حب بجد من جوه جواه مبيقدرش يكره
ساعات بيبقي الواحد نفسه يكره بس مبيقدرش
كتير ممكن كشباب او بنات يقولك يولع يتحرق وانا منهم
انما لما الواحد يقعد مع نفسه صعب انه يتخيل رغم اي شكل للنهايه
اذا كان حب بجد غير ان الطرف التاني يكون في اسعد حال

ويتمناله انه يكون سعيد
هو ده اسلوب اي حد ينفع يلقّب باسم انسان 0000
مهما روحنا او عرفنا انا مش مع ان الانسان ينهي نهايه وحشه وخصوصا
لو كان اللي معاه مكنش وحش لمالا نهايه لانه في النهايه اكيد كان بينهم
لحظات كتير حلوه 00سفر 00رحلات00خيالات احلام حتي لو فاق واكتشف
انه كان عايش في اوهام
يا تري الانسان مننا لما بيفتكر لحظات لحد ويضحك بيبقي بيضحك حزن وبيداري دموعه
في الضحكه ولا بيكون اناني ويضحك عشان يكمّل حياته ولا بيضحك لانه نسي 00
عارف انه فيه ناس متساتهلش البكا عليها من اساسه
بس ورغم انه في حد داخل حياتي بقوه اليومين دول الا اني مش علطول ببقي مركز معاه
رغم مرور 3 شهور علي انتهاء قصه شخصيه تخصني
بس القلب ده عجيب يا اخونّا لا يخضع لاي مباديء علي الاقل بالنسبه للناس اللي زي حالاتي
هو مش بيبقي حنين علي اد ما بيكون احساس غريب كده مش عارف يتوصف ازاي
طبعا مع الايام بننسي00 قشطه بننسي بس اللي حب حب حقيقي يفضل فاكر شويه تفاصيل
خاصه بيه مع حبه القديم اسلوبه في الكلام مفرداته صفاته كلماته رودود افعاله في مواقف معينه
رغم ان الواحد ناضج بقدر يسمحله انه يوزن ايه الصح وايه الغلط
ولكن مش عارف او حاسس اني مازالت مش قادر اوصل هل الصح
ان اللي يفارق يفارق بشياكه ولا يفارق بدون سابق انذار وبلا اسباب تبدو معقوله او منطقيه
هل يا تري القلب ده اللي هو مش ملك حد واتحدي اللي يقولي انه يقدر بنسبه ميه في الميه
يتحكم في قلبه لما بيحب بينسي اي اساءات او تجاوزات ربما حدثت من حبيبه السابق
ولا هي مساله وقت طب اقولكم لو هي مساله وقت
ليه بعد مرور 4 سنين علي فراق اغلي حب في حياتي زينب لسه فاكرها وبستني تليفونها
كل عيد عشان اتطمن عليها رغم انها اتجوزت بس خفه دمها وقفشاتها
موجوده في الذاكره ولا تنسي
المصيبه ان الواحد عارف الصح من الغلط بس ساعه اي موضوع شخصي تلاقي الواحد
خارج حدود الحكم وخصوصا لو كان ترمومتر قلبه رخم وحنين زياده عن اللزوم

ولا اعمل فيها زي طارق الشيخ واقول دقيقه حداد والبس تشيرت اسود

علي قلبي ابن الجزمه اللي تعبني معاه بس مين وراه وراه لحد ما اخليه يجمّد

ويرسي ويتشبك مع حب نهائي والخص واتجوز وباذن الله ده هيكون قريب
صدق اللي قال الحب في القلب زي عضه الكلب

كل سنه وأنا طيب وانتصف العمر

طبعا كلكم هتقولو مين القمر العسل ده وربنا اللي في الصوره

ده يبقي انا ودي اول صوره ليه في حياتي وبما ان زي النهارده

من تلاتين سنه اتولدت يوم جمعه ساعه ادان العشا

في بيتناعلي ايد دايه اسمها أم حسن

وشفت الدنيا ساعتها علطول

قالولي وبيقولولي في البيت من يومك فقري

أول ما نزلت وشفت الدنيا عملت حمام في وش الدايه وخالتك قعدت تعتذرلها

والدايه كتر خيرها قالتلهم هيطلع شقي ولمض وانا مكدبتش خبر

بصراحه مش مصدق اني بقيت ابلغ من العمر ثلاثون عاما

معقول حسب حديث النبي عليه الصلاه والسلام

عمر امتي ما بين الستين والسبعين

كده انا انتصف العمر عندي طبعا الله اعلم بالباقي لحد يقولي انت يعني

تعرف الغيب!!!

في خلال العمر اللي عدي ده عرفت ناس كتير واشتغلت كذا شغلانه غريبه

مكنتش ولازالت بحب التعليم

والصحيان بدري واستاذ قاسم بتاع الرياضه في تانيه اعدادي

ابويا في التلاتين سنه دول من احن الناس اللي قابلتهم في حياتي

أمي ست بيت طيبه وحنينه بس عقلها يكسب قلبها كتير

حبيت في عمري تلات مرات حب حقيقي اه وربنا حقيقي قلبي كبير

أكثرهم عقلا كانت نسرين الله يمسيها بالخير

أخفهم دما كانت زينب واقربهم انها تكون زوجه كان الارتباط الأخير

في التلاتين سنه دول صاحبت ناس كتير

وأنا من النوع اللي صحابي تزيد ونادر لما تنقص

ومبخسرش حد الا لو كان بجد مينفعش اكمل علاقه صداقه معاه أو للضروره

سواء لظروف حياه وزحمتها أو بسبب قله أصل منه

عيوبي ورغم اني عارفها زي ما هي وكل ما احاول اغيرها لاني من النوع الصريح

معايا يحصل انها ترجع تاني

بحب حاجات معينه بشكل ثابت زي فيروز الحب الحقيقي في حياتي

والأنثي المثاليه في خيالي

الوحيده من التلاته اللي حبتهم شاركتني حبها كانت نسرين

من 8 سنين كنت علي التوالي بحتفل بعيد ميلادي

وانا مرتبط مرورا بنسرين وزينب والارتباط الاخير

الثلاثه كانت بينهم حاجات قدريه غريبه اولها انهم مواليد برج العقرب

دمهم خفيف وعصبيين وعنديين وعندهم القولون العصبي

من اجمل ايام حياتي كانت ايام تجاره عين شمس كنت مقضيها

والله يسامحني ياما اشتغلت ابويا في فلوس الانتساب والكتب الله يسامحني

من أجمل حاجات حصلتلي بردو انا مجموعه صحابي تكاد تكون ثابته والعلاقه تكاد

تكون اخويه اكتر منها صداقه

ومن الحاجات الحلوه اني عملت المدونه دي

واللي عرفتني علي ناس حبتهم واحترمتهم جدا

واتشرفت برؤيه بعضهم علي المستوي الشخصي

بتمني في العمر الباقي اللي معرفش هو اد ايه

اني اكون اقرب لربنا من عمري اللي عدي

بتنمي أن امي وابويا ربنا يبارك فيهم

ويحسن ختامهم بعد طول عمر وحسن عمل

بتمني اشوف مريم وانس ولاد اخويا احسن مني ميت مره

بتمني ربنا يرزقني الزوجه الصالحه اللي تسعدني دنيا وتشاركني بعقلها ودينها

اننا نكون من اصحاب الجنه بعفو ربنا وفضله وثم تقانا له

كل سنه وانا اقرب لربنا من اللي قبلها

كل سنه وانا بعامل اهلي بما يرضي الله ويقربني اليه

نفسي فعلا بعد منتصف العمر أوصل لمرحله من النضج

تسمحلي اني اتعامل بموضعويه وتروّي

وأختار اللي يناسبني في كل امور حياتي واخرتي

وأحقق طموحي وأقدر اعيش في المستوي الديني والمعنوي والفكري والمادي

اللي يحققلي الستر والرضا

وربنا يجمعنا واياكم بعد نهايه العمر في جنه عرضها السموات والارض

ويحققلي ويحققلكم كل اللي بنتمناه

وأخر كلامي

اللهم أختر لي الأفضل في كل امور حياتي ثم ارضني باختيارك

وكل سنه وانت طيب يا لولو

أنا يعني في مانع؟؟؟؟

مش شعر بس حاله من وحي بوست خيخه+تحدييييييييييييييييييييييييث

التحديث

برغم اني مكنتش كاتب البوست الاساسي الاوهو الخاطره

عن حاله تخصني شخصيا وما هو الا فكره عن بوست لنوران

الا اني بعد ما رديت علي التعليقات لقيتني كداب قدام نفسي

اه كداب وستين كداب

بعد ما صليت الفجر في الجامع ودخلت فتحت المدونه

اكتشفت اني بفتكر حاجات عن حد معين وبفتكر حاجات حلوه كتير

لينا كانت سوا ولقيتني بفتكر حاجات بتفاصيلها

وخروجات باماكانها وحودايتها وقفشاتي وقفشاتها

لقيتني بحن لايام زمان لقيتني ورغم اني عارف ان كلمه ياريت

مبترجعش ولا بتصلح ولا بتفيد في شيء انتهي ولا بترجع اللي كان

بس لقيتني وانا بسمع فيروز وهي بتقول أنا عندي حنين ما بعرف لمين

سرحان معايا ومعاها واكنها معايا

مش عارف ليه حسيت اني متناقض مع كلامي ومع نفسي

معرفش ليه لقيتني بضحك علي ضحكه ضحكناها وكلمه قولناها

ولقمه كنا قسمناها وغنوه حلوه غنناها وسمعناها

ومكان جمعنا وحلم حلمناه وخيال رسمناه

بس عارفين رغم اني قفشتني وانا بحن لالايام الخوالي

الا اني ضحكت وقولتلي يا واااد يا وليد ما كان لك لن يصل لغيرك

وما كان لغيرك لم يكن ليصل اليك

وكمان اللي يعيش ياما بيرتاح لناس ويقابل ناس يتونس بوجودهم في حياته

ويعشق انه يشاركوه حلمه وقلبه ونبضه

بس في الاخر كل شيء قسمه ونصيب

واكيد بكره جاااااي واكيد باذن الله هستني الخير من ربنا وهرضي بقضائه وقدره

وربنا يسعدكم جميعا ويحققلكم احلامكم

من غير مناقصه أو مزايده

بدون مكايده

وبمحايده

الحنين للي باع

من غير وداع

ملهش عند الحر صدقا

أي فايده

زي مرض البواسير

لو جالك هتحط

مرهم علي بقك

او لو يوم تعبت

اتخنقت

هتقف علي حافه جبل

وتنده حد يجي يزقك

شرط الحنين

انه يكون للي وفا

وسنين عشقناه

حسناه

وعرفنا بيه معني الصفا

مش للي غادر

يوم ما طيفه قال لعقله

يلا بينا

فأختفي......

برجاحه وموضوعيه

من غير تخلّي

أو تحلّي وبرويّه

الحنين للي باع

من غير وداع

في الدنيا ديّا

يبقي انكسار

واللي يحن يبقي

راضي يحط نفسه

في مقام اهانه

يشيل بقي

ذل ودونيّه

والله لسه الدنيا بخير

اللي جه لقاء انهارده لازم يكون شايف بعنيه أد ايه الخير موجود

لسه في ناس حلوه كتير تخللي الواحد بجد يلاقي نص في الكوبايه مليان

لسه في ناس بتحب تعمل خير

لسه في ناس بتحب وبتفرح لما تعمل اي شيء مفيد لحد محتاج او تعبان

جميل اوي ان حق المونيتور تم جمعه بفضل الله ثم بفضل ناس كتير شاركت

مش عارف اقول ان بجد كل مريض هيتعالج او الجهاز ده هيساعد في علاجه بطريقه

او باخري باذن الله هيكون في ميزان حسنات كل شخص تبرع بجزء لوجه الله

في تمنه كصدقه جاريه

وصلت انا متاخر اتصلت بشريف حسن مدونه هجايص

وكان معاه محمد ابو علي صاحب مدونه سمع هس

مش هتكلم عن شريف زي كل مره لان اللي عايز يعرف راجل في زمن انصاف الرجال

فاليكم شريف حسن مش هتكلم عن شريف كتير وهو عارف واي حد يعرفه انه جدع اوي اد ايه

وابو علي فيه من سمات المحترمين في الكام دقيه اللي اكلمتهم معاه ما يدعوك لاحترامه

طبعا دخلنا المستشفي بعد ما صلينا وضربنتلي سندوتشين كبده وكده

لقيت الناس متجمعه في مكتب مسئول العلاقات العامه بمستشفي ابو الريش مستر خالد

انا اول مره اقابله بس بجد ورب العزه وهقول وانا معرفوش من خلال حكمي عليه

لسه فيه ناس نضيفه فيكي يا مصر

طبعا تواجد عمنا وعمهم وعم الدنيا خالد ابو همس وكل مره يا جدعان اكتشف في الراجل ده

ميزه جديده ميزه تحلي مجتمع التدوين بوجود اللي زيه

نوران هانم خيخه واي كلام بجد ومن كل قلبي وهقولك يا نورا

انتي من الذ الناس اللي الواحد عرفهم عن طريق التدوين

يا نورا والله العظيم انتي بجد تستاهلي كل خير وربنا يحبب فيكي الناس

لانك شعله في الخير واجمل شمعه في عالم التدوين

وعلي فكره انا بعزمك من دلوقت علي مولد المطراوي ومولد العدرا

وهوريكي المعزه اللي بوش انسان والبقره ام خمس رجول

وتحط المبه علي ايدها تنور علي كتفها تنور علي اي حتي في جسمها

تنور انتي تؤمري بس زي ماقولتلك تسيبي فلوسك وجميع متعلقاتك الثمينه

في بيتك انا مضمنلكيش اكتر من خروجك سليمه بس شرط عدم وجود اي اشياء ثمينه

طبعا كان موجود مصطفي ريان وهو غني عن التعريف

مثقف مثقف وكاتب ومشروع لنجم في سماء الكتابه والادب العربي

محمد كما ل ودين النبي يا محمد مهنسالك البيعه بتاعتك

تقولي استني هنمشي سوا وتبيعني يا معلم قشطه

داليا قوس قزح هنا لا املك من الكلام ما يكفيها من وصف ل

كميات خير داخليه نابعه من ايمان بلله ثم معاونه الناس

اللي محتاجه ايدين تتمد لهم بالخير واحب اقولك يا داليا واوعدك

ان المره الجايه ليكي من سندوتش كبده اسكندراني

وكمان بالسلطه والمخلل ان شاء الله محد حوش

واحنا هنلاقي اغلي ولا اطيب منك نجيبله السندوتش

غاده محسن ورانيا محسن مش اول مره اشوفهم ولكن تفضل

غاده من البنات المحترمه هي ورانيا اللي لسه عايشين بينا

رحاب صالح صاحبه و

صديقه غاده بنوته هاديه وبتعمل دايت يا جدعان

اللي عايز عروسه وبنت لسه بتتكسف اهو موجود

وبعد ما نورا وفاتيما سلمو الفلوس وظبطو الدنيا

رحنا نقعد في نادي نقابه المحامين علي كورنيش المعادي

انا وفاتيما ولفيف من الاخوه السابق والتالي ذكرهم

يا سلام عليك يااد يا وليد وانت بتقول كلام كبير

حلوه لفيف دي معلم يا ابني والله انت خساره في البلد دي

وفاتيما يا جدعان ورب الكون كله

انسانه بمعني الكلمه تصدقوا انها افتكرت ان عيد ميلادي قرب

وجابتلي هديه عيد ميلادي انتي بني ادمه تستاهلي كل خير يا بطه

وبجد ومن كل قلب قلبي انتي بنت خالي اللي بتشرف بمعرفتها واخوتها

وربنا يديم المعروف بينا ويارب يوسف يكون معاكي ومعانا قريب

المهندس عبده من طرف اختنا واندا حضر كرسول لها واشهد انه كان طول اليوم

خير مبعوث من بنت من بناتنا اللي متغربين ليفيدوا بلدهم ونفسهم بعلمهم

ربنا يوفقك يا واندا وترجعي بكل امنياتك واحلامك متحققه

وبجد عرفتي تختاري الانسان المحترم ويكون رسول لحد اكيد كلنا بنحترمه واندا هانم

كيااااااااارا انا مش زعلان منك وانا لو عرفتيني كويس زعلي بعييييييييييد

وانتي اخت عزيزه بس انتي اللي حساسه زيادتين تلاته

كيكي عوووووووووووووو اوعي يا معلم وشك وشك

حبوبه وعشريه وربنا يوفقك لوجودك ومشاركتك وربنا يحقق كل احلامك وامالك بخير وسعاده

مين تاني ياد يا وليد يخرب بيتك اه

احمد سووووووووووووو توفيق الحكيم يا رجاله يبعث من جديد

كان معاه كتاب لشاعر اسمه ابو فراج والشعر الفكاهي

كتاب جميل جدا انصحكم تقروه هتستمعوا جدا عقبال منفرح بيك يا معلم

ريم رسائل بلا بريد الرقه يا جدعان ليها ناسها لهي تمثيل ولا تفعيل

سيبك انت وهو وهي وانا واي حد ابن الناس ابن ناس

اه صحيح ياد يا وليد عمرو صاحب مدونه واحد من الناس

نورنا انهارده بمشاركته وحضوره وذوقه واخلاقه

واحب اقولك اني اتبسطت من الشويه اللي قعدتهم معاك يا عمرو

صحيح يا خالد السندوتش الشيش طاووك اللي سرقته منك جابلي اسهال

يا تسامحني يا تاخد حقه الله يباركلك في عيالك قادر يا كريم

احمد عبد الحميد صاحب مدونه ابو حميد

اقسم بجلال الله اني اشهد بصدق رسول الله عندما قال

الارواح جنود مجنده ما تعارف منها ائئتلف وما تناكر منها اختلف

وانا والله يا احمد فرحااااااااااااااااااااان جدا اني كسبت اخ كبير ومحترم

وشرف ليا اني اعرفه وعلي الساعه اربعه ونص قام وصلني

احمد في طريقه لانه ساكن قريب مني ونزلني عند مشيخه الازهر عشان احضر

كتب كتاب صاحبي رامي واللي انتهي كما توقعت نهايه مؤلمه بعد كتب الكتاب

مش قولتلكم حماته ملالالالالالالالالالالاك بس من ورا من ناحيه باب اللوق

علي فكره انا مبشكرش في احمد عشان وصلني لحد يقول ده وصولي لالالا نووووووو

انا اعتصامي تقدمي متحملق ولكني لست وصوليا بوتيتن

بجد احب اقول لكل اللي شفتهم انهارده اني مبسوط اني كنت معاكم

وربنا يجمعنا علي كل خير وفي نهايه كلامي احب اقول ان كان نفسي الدكتوره ستيته تكون معانا

هي صحيح موجوده في قلوبنا كأنضج واجمل اخت واستاذه ولكن وجودها زي ما هقول كل مره

بيملي فراااغ لا يعوضه اي احد وبجد حاولي تكوني معانا اللقاء الجاي

كله سال عليكي وكله مجمع اجماع كبير علي حبك مترشحي نفسك

مكان البرادعي وشرفي تاخديها اكتساح ونعملك موقع علي الفيس بووك

نعم لستيته //// ستيته خير من يمثلكم وتبقي سيده البيت الميرغني

فكري واول ماتكرري اديني الاوكيه

وبجد من كل قلبي اتمني نشوفك قريب وبتمنالك كل الخير والرضا من ربنا

عليكي وعلي كل اسرتك وربنا يخليكي لينا

كان معكم من موقع الاحداث

اخوكم وليد الدوغري

والسلام عليكم ورحمه الله وبركاته

هو في ايه

كلام كتير اتقال وهيتقال عن الحياه

من فلاسفه وعلما وأطبه وحفاه

اللي بسّط أمرها واللي يلعن أمها

اللي ظالم واللي غاشم واللي تاه

ياخّونا دي راحت أو جت حياه

عشق الروح

بما اني صاحب صاحبي وانطلاقا من هذا الركن الركين

فانا بكتب هذا البوست لصديقي الصدوق حبيب قلبي

الذي ارتبط ببنت واحبها وخطبها واتجوزها كمان

ورغم ان انا كنت شايف في الاول

انه احلي منها بكتير انا وكل الغجرصحابنا

وانه رايي اني لازم اختار انثي تكمل معايا حياتي

تكون حلوه لاني مش هصطبح الصبح واقول لروحها احضري

وشغل مدينه الاشباح وادعكلي فانوسين تلاته

لحد ما يحضرلي عفريت واقوله اتصرف انت بقي يا معلم

واخليه يتعامل مع عفريتي

العفريته الادميه اللي ادامي عفاريت مع بعض بقي والبقاء للاقوي

ورغم كل هذا اقوله انت بعد جوازك اثبتلنا انه كان عندك بعد نظر

وان انت كنت صح واحنا كنا اقفاص جوافه

واثبت لكل واحد من صحابنا كانت لما تيجي سيرت خطيبه او حبيبه

اي واحد فيهم تبقي انت زبون الليله بالمتغطي وتتقفش تريأه

من بعيد لبعيد واحب اقول للغجر اللي كانو بيتريأو عليك

يا كلاب اديكم شوفته انه اسعد واحد مع الشبح اللي معاه

وانتو كنتوا عاملين رجاله اونطه وسلمولي علي الرجوله

ومن كل قلبي خايف لابقي زيكم مع ملكات جمال شققكم

واقول حاضر ونعم واوامرك واللي يرضيكي يا عمري

عن خوف مش عن حب لحد يقرا كلامي ويفهم غلط

وعارف اني بعد البوست ده

هتفهموا انا اقصد مين بالتلميح مش التصريح

وبما ان صحتي علي قدي زي منتو عارفين فمش هقول

واللي هيفكر يمد ايده هيزعل وانتو عارفين هشردكوا

كل اما افتكر يا معلم وهي بتسالك هو انت ارتبطت كام مره قبلي

يا فلان تقولها كتير حبيت مره واتنين وتلاته

وافتكر لما كنت اقولها ده معرفش في حياته غير امه

وكام خاله حتي عماته عندهم صرع وتوحد ونضحك

واحب في عيد جوازك التالت علي التوازي اهديلك انت وأم بنتك

كلمتين كتبتهملك ساعه رواقان خاليه من كل ما يعكر الصفو

واقولك كل عيد جواز وانت طيب ومش هقول اسمك بردو عشان

سر المهنه وانت عارف اخوك بير اسرار ولا اعظم طبيب نسا وولاده

واحب اهديلك كلمتين تقولهم لمراتك بس انت اللي تقولهم مش انا

كفايه انك صدعت امي بكلامك عن مميزاتها وقله عيوبها

واحب اقولك ربنا يديني ويرزقني ببنوته في اخلاق وطباع مراتك ولكن معلش

يا صديقي بما ان الجمال نسبي زي منت هارش

فمعلش سيبلي النسبيه وخد الكلمتين دول

مين اللي قال

ان الجمال

هو الدافع للحب

جمال الروح

جمال القلب

هواللي يتحب

جماك شيء مقبول

أما القلب مقدرش اقول

والخفه شيء مش معقول

دوقتيني معني الحب

اللي في قلبي من ناحيتك

ميقضهوش الكلام

اما الاحساس اللي مدفيني

فشيء فوق الغرام

زودني علي قلبي قلب

ياريت الناس

كل الناس

تعرف قصتي وياك

حب ووفا وكمان اخلاص

متحرمنيش من هواك

يا ابو قلب بالف قلب