حبها قوي واتجوز واحده غيرها واتصلت بيه
بعد جوازها وجوازه من جارته
حمد ربنا انه مجوزهاش كان زمانها
بتخونه مع اللي عرفتهم كولهم
________________
عاش طول عمره يحلم بعيل من مراته
وهو مش مصدق ان العيب منه هو وكل خناقه
معاها يعايرها بانها عقيمه
ماتت فجأه وادرك انه عاش طول عمره
ظالم لواحده عمرها مافضحته
مات من الحسره
________________
عاندت حبيبها ومحستش بقيمته الا اما اتخطبت لغيره
وهو خطب وشافته في اشاره مرور في عربيته
مع خطيبته طايرين من الفرحه
بصت لخطيبها وافتكرت انها هي اللي باعت حبيبها
كرهت نفسها وفسخت خطوبتها
بس كان حبيبها أتجوز من اللي شافتها معاه
_________________
طول عمره سيره الناس في بقه لبانه هارتي
وفي مره راجع من شغله سمع الناس
بتقول عليه كلام وحش اتضايق جدا
وعاهد ربنا انه ميجبش سيره حد خالص بعد كده
_________________
كان فاكر نفسه فالنتيينو نام مع نص زوجات صحابه
وفي يوم كان راجع من شغله بدري
دخل لقي مراته نايمه مع ابن اخته
دخل المطبخ دبح نفسه
_______________
حكمه اليوم من الاستاذ العلامه الجامد وحيد عصره وقرنه
الست اللي متشيلش جوزها في عنيها متستهلش يلبسها في رجله
.jfif)
30 Comments:
اول تعليق عندي
والله العظيم وحشاني قوي مدونتي
بس الايام اللي فاتت كانت صعبه عليا شوييتين انما دلوقتي
قررت اني اتوكل علي الله واللي ربنا عايزه هيكون
وانا راضي بقدره
يارب انت حنين وكريم قوي
نفسي اعبدك حق عبادتك
ادعولي
ليدو حبيبى
ايه المفاجأت الحلوة دى
والبوستات الأجمل
عارف اوقات ناس تقعد تكلم كتير
وممكن تألف كتاب فى واحدة من قصصك
وفى الاخر بعد قراءة الكتاب
الواحد يرجع يجيب اول صفحة يمكن تتربط بأخر صفحة
متلقيش غير ان صمغ الطباعة هوه اللى رابط الموضوع كله
وحشنى يا راااجل
حبيب قلبي سيد بيه
يا راجل والله العظيم واحشني جدا
ونفسي اشوفك انت ومنعم
والله يا عمنا انا لا بكتب قصص ولا بتاع ده انا غلبان
بس بحب اكتب وخلاص اهي هوايه
وذنبكم بقي اني اخليكم تقروا كلامي
لأ وايه وكمان بتجاملني
ربنا يباركلك في ابن يا شيخ
واحضر فرحه
والله يا سيد نفسي اشوفك جدا
والراجل اللي مايشيلش مراته في عينه ... تخلعه :)
حلوه الحكم دي
تحياتي
فتاه من الصعيد
انا معاكي
الراجل اي راجل ومراته
والست أي ست وجوزها
لازم يبقي بينهم كلمه جميله قوي قالها اخويا شكسبير
honey lets start a fresh... pray you now...to forget and Forgive
ساعتها هيبقي في حياه بمعني الكلمه
مش نكد وارف وانت عملتلي وانتي فاكره لما غلطتي في امي ودوستي علي خيالها من اسبوع
لازم الاتنين يبقى قلبهم على بعض مش واحد والتانى لا
الدنيا عايزه يبقى الطرفين مراعيين بعض و بعد ما ده يحصل نبقى نتكلم و نحاسب
صح الكلام؟
علي قد مهي قصيرة... علي قد مهي معبرة...
"يا بن ادم افعل ما شئت فكما تدين تدان"
تحياتي... وصباح الفل..
وليد ...
دي مش قصص قصيرة
دي مواقف قصيرة
و الدروس اللي فيها اكيد مستفادة و اكيد بتحصل في كل بيت و كل مكان
لكن اعذرني على الحكمة بتاعتك حسيت فيها بالانانية شوية
يعني حسستني ان الراجل ملاك و الست هي اللي دايما وحشة
في المواقف وضحت الاخطاء من الطرفين
لكن في الحكمة قلبت الطربيزة كلها
عموما شكرا على النصايح
و اما الاوقات الصعبة اللي مريت فاتمنى بجد انك ترتاح و تنسى بقى
و ما تتعبش نفسك بالرجوع لورا تاني
لان ساعتها هيبقى التعب كبير بعدها
خالص تحياتي و تقديري
وليييد...فينك من زمان... ده أنا كنت كاتبة بوست عندى وسألتك فيه سؤال ولا جاوبت يا عم ولا عبرتنى..ماشى ليك سارة يترد عليها
هههههههههههههه
حلوة القصص الواقعية دى... بس ليه قلبت التربيزة فى الآخر على الستات كدة..ومين الأستاذ العلامة ده؟؟؟!!!! ده مش علامة خالص
(اللى متشيلش جوزها فى عينيها متستهلش يلبسها فى رجله)
هوه يرضى حد يقول كدة على والدته حتى لو كان الحد ده أبوه
يرجع مرجوعنا لموضوعنا... مهما كان فيه مشاكل اوعى تستسلم ليها دى نصيحة أختك الكبيرة شيماء فلازم تقول حاضر وطيب يا أختى من غير نقاش
ايه الرغى الكتيير ده يا ساتر عليا
المهم سلم كتيييير على سارة ومتغيبش تانى
بداية سأعلق على اول تعليق لك واقول لك الحياة حلاوتها في ظروفها وفي مواقفها نعيش الصعب لنعرف قيمة السهل وسعيدة من اجلك لانك توصلت لهذه القناعة "قررت اني اتوكل علي الله واللي ربنا عايزه هيكون" فبها ستواجه كل مصاعب الحياة بتباث
نجي بأه للتدوينة ونفصصها واحدة واحدة
الاولى: صح هي غلطت انها اتصلت بيه بعد زواجها وطبيعي انه يأخذ الانطباع اللي خاذه عنها
التانية: تعرف اني واحد من عيلتي بس زمان مش دلوقت اتزوج 17 مرة عشان الخلفة من غير ما يفكر في مرة ان العيب ممكن يكون منه وعجبي
الثالثة: زعلت عليها لانها في النهاية لاطالت بلح الشام ولا عنب اليمن
الرابعة: لازم اللي نكرهوا لنفسنا نكرهوا للناس كمان
الخامسة:هو المثل بيقول كما تدين تدان
بالنسبة للعلامة هو قلناش الراجل اللي ميشلش مراته في عينيه يستاهل ايه وبكدده يكون عادل مش في صف الراجل بس
وليد
اين كنت من فتره طويله هو لازم ننادى عليك يعنى علشان تظهر من تانى
ربنا يفرج همك
ربنا يفرح قلبك
ربنا يسعد ايامك
ربنا يبارك لك ويبارك فيك
بص بقى بالنسبه للبوست بتاعك
الحياه ما هى غير قصص قصيره
يعنى كل واحد فينا حياته هى قصص قصيره ورا بعضها نحيا فيها وبها وفى النهايه تكتمل هذه القصص القصيره لتصنع منها حياتنا
حلوه القصص عجبتنى جدا جدا
ممكن اختك كلامى بايه من القران هى رساله لك وليا ولكل الناس
" ومن يتوكل على الله فهم حسبه "
دمت بكل خير وسعاده
زهراء
د/علا
فعلا الطرفين لو مكنش عندهم نظره الصفح والتسامح والاستقواء بالأخر وليس ضده
تبقي مش حياه تبقي
اي حاجه تانيه
بس فعلا عتاب المحب وحطي تحت المحب مليون خط
بيكون سبب في ري شجره العلاقه
وليس قطعها من جذورها
ابو علي (سمع هص))
حكمتك حلوه يا كبير
تحياتي ليك
وصباح الجمال
مها
العلامه الجامد ده
مش صاحب فكر ذكور ي خالص
لان حكمته اللي بعدها
علطول بتقول
الراجل اللي ميشلش مراته فوق راسه
يستاهل الضرب بمداسه
هنمسك في بعض ولا ايه يا مها
ده عقلاني لاخر مكرم عبيد
باذن الله هرتاح قريب والدنيا تتظبط
شكرا يا مها ليكي
واخوكي رااااااااجل متخفيش عليه
تحياتي ليكي
شيماء
والله يا شيماء
كان عندي شويه حاجات كده
تعبتني شويه
انما فقت الحمد لله
والله ما شفت اصلا البوست ده
الا اما قريت تعليقك
نزيهه جايه جايه هتروح فين
وبخصوص العلامه
بلاش التحامل عليه
هو يقصد ان اللي عنده استعداد يريح مراته ويشيلها فوق راسه
اقله تشيلو في عنيها
عطاء متبادل يعني
وبخصوص الاستسلام
خليها علي الله
انا مش كده خاااااااااااااااااالص
انا برج الحمل
وان شاء الله مش هغيب
واكيد سلامك وصل
نورتي يا كبيره
شكلك على اخرك يا وليد
مالك بس
سيبها على الله
خواطر شابه
اولا هابي بيرس داي تو يو
وربنا يجعل عمرك كله مليان خير وايمان وسعاده
انا بقي عايز اعرف قريبك اللي اتجوز 17 مره
لسه عايش
ده بطل قومي
قدر يستحمل 17 واحده
ده واحده منكم عندها قدره
تكرهه في النوع كله
الرااااااااااااااجل ده
اسطوره
اتصوري معاه
ومش بعيد يدخل موسوعه جيينز وياخد
كاس الصبر الدولي
كل سنه وانتي طيبه
لولا وزهراء
كنت في مشوار نفسي ورجعت
امين لدعائك يارب يتتحقق
فعلا حياه كل منا ماهي الا قصه قصيره
تنتهي دائما في وقت غير معلوم
ولكن اسال الله لي ولكي ولجميع المسلمين
ان تكون نهايه قصص حياتنا
نهايه ترضيه عنا سبحانه وتعالي
شكرا قوي لاهتمامك
ربنا يوفقكم ويبارك فيكم
مش عارفه بس الحاله فعلا فى البوستين متشابهه شويه
لان يظهر المود واحد
معرفش مالها الكومنتات بس فيه ناس علقت
وليد ازيك ؟
انت فين من فترة ؟
ومالك ياوليد شكلك في حاجة
البوست حلو اوى اوى
بس الحكمة اللى في الاخر دى ناقصها جزء
اللى ينطبق على الست ينطبق على الراجل ولا ايه رأيك ؟
ربنا يكرمك يا وليد ويسعدك ويروق بالك
ازيك وليد اخبارك اية
حمد الله على السلامة
--
قصص قصيرة بس رائع وكلها تدخل فى جملة الانسان لايعرف قيمة الشىء الذى معة الا بعد فقدانة
مع خالص تحياتى
ازيك ياوليد..
يارب تكون بخير
حلوه المواقف دى
بس بصراحه مش عارفه المواقف كان فيها غلط من الطرفين وحكمتك الاخيره اتهمت فيها طرف واحد وسبت التانى
واكيد كل واحد بيعمل حاجه بياخد جزاؤه في الاول والاخر لان ربنا ما بيسبش حق حد وكما تدين تدان
والي عمل حاجه في حد اكيد هيجى اليوم الي تتعمل فيه
ربنا موجود
ربنا يكرمك يارب ويوفقك في حياتك
جميلة اوي وفيها معاني كتير
تسلم ايديك
وسيبها علي الله
واللي ربنا عايزه هايكون
( من يتق الله يجعل له مخرجا ويرزقه من حيث لا يحتسب ) صدق الله العظيم
تحياتي
الاولى خاينه
والتانى غبى وزباله
والتالته اقولها العند يورث الكفر
والرابع فى الوش مرايه وفى القفا سلايه ومن قلتله قال عليك
والخامس داين تدان والديان لايموت
برافوا ياوليد
بس ممكن تطمنا عليك
ريم
انا الحمد لله كويس ومش عارف هو انا اسلوبي كئيب شويه ولا ايه
بس الجزء التاني من الحكمه بيقول برده ان الراجل لازم يشيل مراته فوق دماغه طول ما هي زي الفل معاه
__________
اميره
ربنا يتقبل دعاءك احسبك من المؤمنين والله حسيبك
دي مواقف فعلا بتمر بينا كل يوم
بس ما ب يحش الشخص بيها
واللي كان السبب فيها اللي بعد فوات الاوان
ربنا يبارك فيكي ويوفقك
_________
تامر نبيل
والله العظيم يا اخي انت بتقول كلام
جامد
وبتجيب من الاخر
ما ملكته الايدي زهدته النفس يا تامر باشا
تحياتي ليك من قلبي والله
_____________
مانو
والله العظيم سايبها علي الله في كل اموري
هو احنا لينا غيره ولا ايه يا مانو
نورتني وكرر الزياره البيت بيتك
_________________
سكره (( بنت من ليبا))
انا الحمد لله كويس جدا وعايش
بس موووود الاكتئاب لما بيجي لحد بيضحك كتير بيطول معاه منتي فقريه وعارفه
ربنا يوفقك ونفرح بيكي يارب قريب
حمدالله ع السلامه رجوعك للمدونه ومنورها دايما
وبعدين يعني لما ترجع تقلب الدنيا ع الحريم ولا ايه؟
تصدق كده ماينفعش ......
كفايه كده
هيييييييييييه هي الدنيا كدة
يوم ويوم
واهي ماشية وماشية الناس
تحياتي
عجبتنى الفكره بتاعة القصص القصيره جدااااااااا .
و أجملهم الأولى و الأخيره .
معاك حق فيهم .. إستمر و فى انتظار جديدك
Post a Comment