صرخه

مصر مهياش أرض ونيل
وهرم وقناه!!
مصر بيجري دمها فينا
يضخ حياه
مصر المعني..... المضمون
مصر ف عيني بكل الكون
مصر عظيمه ..عليها القيمه
مصر حياه
انتبه للجاي يا جدو
ركزي ف الجاي يا هانم
مش هنسمح يسلخونا
احنا مش قطعان بهايم
يللي مهموم بالقضيه
قوم معانا
شعبنا ياما عاش ضحيه
دي الحياه مستنيانا
مش هنسمح يدبحونا
مش هنسمح يدهسونا
مش هنسمح يركبو
دهورنا يسوقونا
مش هنسمح
يقتلوا الحب اللي فينا
مش هنسمح للجناه
مش هنسمح للجناه

مش هيأس

وصل التفائل
بين ضلوعي لمنتهاه
هزم البكي..... قتل الملل
حسسني ايه طعم الحياه
قدر الشجن
يغلبني يوم واتنين
بيتني دامع ع المخده
ببكي طين
قوم لما فوقت
لقيتني باصص
للنضال.
وعرفت كيف
يبقي الأمل
سر النجاه.:)

اهداء لاجمل من قرأت له شعرتدويني ( شريف حسن) مدونه هجايص

زي ما تيجي

غريب قوي انا علي رغم الضحك هو اهم سمه شخصيه فيا حتي في اصعب الظروف
علي اد لما بتخنق بحس اني عايز اكسر اي حاجه
مش انطوائي خالص وليا صحاب كتير صحيح بصدع من حكاياتهم ورغيهم ومشاكلهم
اللي بتنسيني مشاكلي بس بلاقيني ساعات مردش علي كلب منهم وابقي حابب اقعد لوحدي
حتي البنت اللي بحبها علي رغم انها بحبها بعقلي وده اهم ما في الموضوع لان قلبي لو حبها
كان زماني سايبها من تاني شهرعلي اد ما بحب اكلمها بلاقيني اتصل ازيك انتي كويسه طب فل شدي دلوقت
زي دلوقت كنت متفائل وحابب الحياه ومره واحده اتبضنت كده
مش مريض نفسي ولا عمري حسيت بكده بس ساعات بتطلب معايا امارس دور السيكو والاقييني اقف ادام المرايه واكلمني وافضفضلي
اشتمني بقي ازعقلي قوم ياض من هنا الغريبه اني بسمع كلامي واقوم امشي
مهتم قوي وشاغل دماغي بحال البلد ولو اخر جنيه ف جيبي لازم اروح التحرير والاقيني حاسس ان لو مرحتش
المظاهره مش هتنجح مع اني رحوت او مرحتش مش هتفرق ..وهتفرق ف ايه واحدمن ضمن كتير او قليل غيرهم
بيقولوا عليهم عالم بتخرب ف البلد
يا ولاد الاحبه بلد ايه اللي بنخرب فيها ..احنا اللي بنحلم لينا وليكووبنصرف ونمشي ونهلل باعلي صوتنا
كمان مش عاجبكوا طب العبوا ف حواجبكوا
من زمان قوي الاقيني شاطر ف حاجات كتير بس المشكله ان كل ما امشي ف حاجه واكون دارسها كويس
حاجه تانيه تشدني صحيح مبرجعش ورا والحمد لله بس هوب اروح شمال او يمين ليه معرفش
مبعرفش اندم علي اي حاجه ضاعت زعلي وقتي وبيروح واقول لنفسي وايه اخره الزعل طز كبيره للحياه
لما بفتكر اول بنت حبيتها لو شفتها بالصدفه بلاقي مناخيرها كبيره قوي واقول احمد ربنا انك متجوزتهاش
انت ودنك كبيره وهي مناخيرها كبيره والعيال كانت هتطلع مشوهه
لما بكون ف فرح اخت اي واحد صاحبي ونروح نوصلها لبيتها اهرج واقوله توصل اختك لواحد ينام معاها وكمان تجيبلوا عفش واكل
اخص علي كده مع اني لو ليا اخت كنت جيبت لعريسها يوم الدخله حته حشيش عشان يعيش اللحظه
وانا بكتب دلوقت ومعرفش بكتب ليه يمكن الكتابه وحشتني ويمكن احوال البلد قرفتني يمكن زحمتها خنقتني معرفش
الصوره دي بتاعتي وانا ف نيل المنيل عامل فيها محمد ثروت مع ان صوتي وحش بس علي طول
بغني لحبيبتي ف الموبايل واصدعها والبنت ياعيني تسمعني وهي متضرره وتقول الله من تحت ضرسها
وانا رخم مش ابطل لا بزيط واغني
نفسي امشي م البلد دي وف نفس الوقت بسمع اغنيه اسيبك لمين الاقيني بعيط علي مصر اللي دمها بيتفرق ما بين ناس مش عارفه قيمتها..
عارف ان ثلاث مهلكات منهم اعجاب المرء بنفسه وف نفس الوقت مغرور بدماغي واكني اينتشين مع اني مش  حافظ جدول الضرب
ساعات بيكون عندي قلب وحنين وساعات لو واحد مات قدامي وحصلت ف حادثه اشيله اكنه كيس مخده
جبان وشجاع كريم وبخيل يا احب قوي يا اكره قوي مفيش وسط ويمكن ده اللي مخليني ما احبش عصام سلطان
بحب الزمالك بس اتمنيت حرس الحدود يكسبه ليه متسألنيش رخامه
نفسي مصر تتحكم بالشريعه الاسلاميه رغم اني ممكن ساعتها اجلد صحيح مش هترجم بس نفسي نشوف واحد يتقي الله فينا
زمان كنت بالف اغاني وجتلي كذا فرصه اني ابقي مؤلف وقولت حرام
لااله الا الله بتألف اغاني ليه لما هي حرام ... بحب جدا اشرب شاي سكر زياده ف الوقت اللي بعشق فيه الفسيخ
يا عم ارسالك علي حل يا كده يا كده
نفسي اعيش ف حته هاديه قوي الفرافره مثلا ومعايا مراتي وكاسيت وشرايط فيروز و3 معزات وكام فرخه وتبقي قشطه
عارف ان مصر حكامها ولاد وسخه وهيفضلوا ولاد وسخه وبردوبحبها اصلها طيبه وملهاش ذنب
اقولكوا اقوم انام احسن ..

محدش هارش حاجه

بعد ان قام قاض محاكمه القرن باستدعاء المشير للشهاده  انقسمت اراء الناس
ما بين منحرف ومحترف ومحلل استراتيجي ومحلللي البول كل يدلو بدلوه
هل يصبح  يوم الحادي عشر من سبتمبر الذي قسّم التاريخ يوم ان ضربت امريكا ف عقر دارها
منذ عشر سنوات  هو ذاته بنفس التاريخ هو حل اللغز المصري
يوم الأحد القادم سيذهب المشير طنطاوي ليدلي بشهاده امام الله ثم التاريخ عن ما يعرفه
بصفته احد صانعي القرار ...من اعطي اوامر قتل المصريين
تنحصر الاحتمالات من وجهه نظري الضعيفه الي ثلاثه احتمالات
الاول/سينقسم تاريخ مصر الي قبل الشهاده وبعدها سواء نفي او اثبت
الثاني/هيبيع مبارك ويشتري نفسه(تقولي ازاي)اقولك هيعترف عليه وبالشكل ده هيكسب العامه
في صفه ويترشح رئيس عسكري بدعم من المجلس
التالت/هيطلّع مبارك حمامه سلام والبلد ساعتها ممكن تولّع
عن نفسي مش قادر احدد او استنتج هو هيعمل ايه او هيقول ايه
علي الجانب الاخر اثارالمجلس الاعلي غضب مجموعه من المثقفين باعلانه
عن الاحتفال بعيد الفلاح يوم الجمعه ليلفت نظر الغالبيه العظمي من المصريين
واتوقع صدور بيان
علي نغمات الدي جي وليد الحريري وعلي نغمه يا حلوه يا شايله البلاص
نحتفل جميعا بالفلاح ولكن الا يعلم اولي الامر ان الفلاحين ف عموم مصر
لا يجدوا ف كثيرا من الاحيان مياه صالحه للري ويقومو بري ارضهم بمياه الصرف
وان وجدوا السماد فهذا من المستحيلات العشر اه زادوا متحطش ف بالك
علي جانب تاني خالص
الاخوان هل يعقدون صفقه مع المجلس وهل قابل الشاطر اعضاء من المجلس
هل هناك خلافات بين التيار الاخواني والتيار السلفي ولمن لا يعرف هناك اختلافات بين الفريقين
هل اليبراليين لهم تواجد ف الشارع باعداد (مظنش)
هل العلمانيين ليهم تواجد(لو حد جمع وشاف ميت الف منهم يقولي)
هل حد يعرف الانتخابات البرلمانيه امتي
هل حد يعرف الانتخابات الرئاسيه امتي
هل يتواجد عصام شرف بيننا ولا بياخد دش ومش فاضي
هل الناس اللي مش لاقيه تاكل والمجلس بيلعب علي انضمامهم ليه  هيفضلوا كده
هل علاء مبارك وجمال مش متهمين عشان يتكلبشوا
هل الثوره نائمه لعن المجلس من ايقظها
هل ينحاز الشارع لالاخوان ام السلفيين ام ام ام ام ام ام
هل حكومه الثوره هي حكومه ثوره أم تعاني مما تعاني منه الانثي ايام الدوره(صداع ومغص ومش فاضيه)لحد يفهم غلط يا غجر
هل وهل وهل وهل
وكتاب الله العبد لله ما بقي عارف فيه مين بيروح فين وازاي وعشان ايه اه تهت
كل اللي اعرفه هو لما سال مش عارف مين
يا جدعاااااان انا عايز اعرف مصر رايحه علي فين ...قاله كنت اسأل قبل ما تركب
 نازل يا وليد يوم الجمعه اه ان شاء الله (كويس طلعت عارف حاجه مش بلاص يعني)
بس مش نازل امام وحده عسكريه ولا امانه وزاره الدفاع انا رايح التحرير
هعترض بسلميه معايا شالي وشنطتي وميتي وسجايري
تسألني حبيب قلبي وتقولي رايح ليه اقولك ملكش فيه ......
تسالني اكتر وتقولي مصر رايحه علي فين ......اقولك اخر مره روحت بور سعيد من 4 تيام كانت ومازالت بور فؤاد
امتع مدينه بحبها ....ليييييييييييييييييه بردو ملكش فيه
تقولي بعد ما قريت الهتش اللي فوق ده عايز تقول ايه .اقولك انا عن نفسي مش عارف اهي تخاريف كي بورد
يلا طير ونتقابل الجمعه عند المجمع بعد الصلاه ولو موتنا وصيتك العيال