رساله عاجله خالص


بسم الله الرحمن الرحيم
الأخوه الشرفاء الأتقياء العزاز اللذاذ المغاوير
1/ محمد ابراهيم سليمان الشريف
2/ ممدوح بيه اسماعيل الخفيف
3/رامي بيه لكح الجميل
4/ صلاح بيه اللاجيء(اعمال حره)) تاجر حشيش وجاري
5/الحاج حباجه((تاجر بودره)) جاري بقي وشقيقي
تحيه طيبه وبعد ........
أنا شاب مصري حاسس بالفقر والقهر
والخنقه والضيق واتخنق من حياه الرقيق
كان عندي حلم اكبر واشتغل بدخل كويس
واعيش واجوز في بلدي مصر
كنت فاكرها سهله وسبهلله..
هتم شهر اربعه اللي جاي 30 سنه
ولسه مجوزتش ولا جبت شقه ولاحاسس بالامان
وخايف احلم من أصله.. وخايف من بكره قوي
ايوه انا أخوكم وخايف من بكره لأصحي ملقيش مصر
والاقي نفسي واقف في ميدان القللي عريان ملط
والناس تشاور عليا وتقول العبيط اههو اهو
يرضيكم .....
ممكن لو سمحتم تعملوا فيا ثواب ويقعدلكو في عيالكم
قادر يا كريم ..زكوا عن علمكم وزكاه العلم أخراجه
وعلموني ازاي أقتل وأسرق وأنهب ..
واطلع منها زي الشعره في العجين والحلاوه في السكين
أنا ذكي ولماح وحرك ومدقدق وافهمها وهي طايره
بس علموني ازاي ابتدي.......
وهحاول علي قد ما أقدر أكون تلميذ نبيه
وأنافق وأرافق وأضرب تحت الحزام
وأصاحب وأهلّب وأقلّب واستّف الكلام
وهخللي كل الناس تشاورلي باحترام
وفي الخباثه هكون شيطان في التمام
من الأخر كده مش هتعبكم خالص
وانا برده ابن بلدكم واخوكم في اللأنسانيه
واوعدكم لو جيتلكم اوروبا
ومعايا كام مليون مش هنساكم برده وليكم عمولتكم
أنا وفي وصاحب صاحبي
رجاءا اللألتفات لطلبي
ولكم مني جزيل الشكر
أخوكم
شريف ذكي الشريف
وان خف جسمي كفايه اسمي
والسلام عليكم ورحمه الله وبركاته

70 Comments:

بنجاواتى said...

السلام عليكم

شرف ليا انى اكون اول تعليق ليا فى المدونة من تعليقات الصدارة

انا عايز اقول ان فى ناس كتير حلموا نفس حلمك فى التخرج والعمل وكان نصيبه صفر كبير

وفى ناس تانيين حلموا حلمك فى انهم يلتحقوا بالسادة المغاوير لكنهم برضه فشلم لانهم فى الاصل ناس طيبين من حيث الفطرة والمنشأ

انا لا انكر احتمال النجاح فى اى من الحلمين ولكن اعتقد ان اللبيب يعرف اى الحلمين يرضى ربنا وحسبنا الله ونعم الوكيل

تحياتى

P A S H A said...

معلم يا وليد والله

سيبها على الله يا صاحبي .. وإن شاء الله بكره هاتروق وتحلى وتبقى زي الفل .. بس ده ما يمنعش إني باعلق عندك للمصلحة نياهاهاها .. يمكن الناس الحلوة دي تشوف اسمي ويعرفوا إني صاحبك (أنا كنت في اللقاء معاه والله) ويشدوني معاك !!
وساعتها نبقى نعمل لقاء للسادة المدونين الأفاضل في سويسرا !!

على فكرة أنت من الناس اللي زعلت بجد إني ما اتكلمتش معاها كفاية في اللقاء .. بس بإذن الله تتعوض قريب .

ربنا يوفقك إن شاء الله يا ريس وييسر لك الحال ونحضر فرحك قريب بإذن الله .

** ويا ريت لو حد اتصل بيك تلاغيني يا شقيق !!

قشطة ؟؟

سلام

:)) 

رز وملوخيه şóŁó said...

ربك ميز كل واحد منننا بحاجة فالناس تفضل لبعض دايما محتاجه
ده كلام عمو احمد مكى

تحياتى ومودتى

ستيته حسب الله الحمش said...

ياريتك كنت تنفع
يا خسارة
صفاتك من صفات اللي ربنا ان شاء الله راضي عنهم
ولا نزكيك على الله
ولكن احكم بما ارى

عاوز تكون تلميذ نجيب لازم تديهم أمارة
1- طلع قلبك من مكانه
2- غير اسمك
3- غير روحك
4- اعملهم بعد ده اي عملية كده صغننة اثبات لسوء النية .. تهليبة على قدها كده
وبعد كل ده


مش ها يرضوا برضه
لأنهم اندااااااااااااااااااال

خواطر شابة said...

تعرف ان النجاح والفلوس الان اصحت تأتي يا بالنغم يا بالقدم ده طبعا لو ماانفعش موضوع الاحتراف في عالم الاجرام ولو مجاتاكش العروض اللي انت مستنيها فكر في الحلين دول يا النغم اعمل لك كام كليب كده بس من بتوع جاد شويري او كون حريف زي جدو غير كده على رأي جورج وسوف ارضى بالنصيب

( فريــــــــــــــــــــــدة ) said...

يعني أنا بقالي ساعتين عماله أحشي لحد ماطلع عيني واتخنقت وزهقت قلت ادخل يمكن ألاقي حاجه منها أضحك وأتسلي شويه

إنما وجع القلب في كل مكان الله يسامحك يا عم وليد والله وجعت قلبي وليه بس كم التشاؤم ده وارمي حمووولك علي الله مش علي نااااس واكلينها بالحراااام الله يعينك يا عم وليد وبعدين يعني بتكبر في نفسك ٌقوي كده ليه لسه بدري وان شاء الله يارب يغنيك ويغنينا ويغني كل الناس بالحلال

وازاي يعني تقدر علي حاجه هيا أصلا مش في طبعك أكيد مش هتعمر فيها ..... ولا ايه رأيك هههههههه وبعدين مش كفايه ان معاك حد زي القمراية سارة الله يوفقكم ويارب دايما كل الخير ليكم

أستأذن بقي بقيت رخمه في الجواب ده كله
سلام

هي وظروفها said...

بنجاواتي

ازيك يا دكتور والله منور بجد مش مجامله

ده مش حلم فرد ده حلم أمه يا دكتور

واكيد طبعا الطريق الصح هو الأصح

انا بس حسيت اني محتاج اكلم الناس اعملي قرشين واتوب

emymony said...

حزينه بجد على حال الناس
اللى خلاص بقت عديمه الاحساس
واستسهلوا طريق فيه الشريف ينداس
وان يكون الايمان هو الاساس
بجد شىء محزن على شباب بيفقد الامل واحساس بالفشل حتى فى محاوله
واكيد هو عنده شىء يميزة ممكن يقدمه ويدفعه لحياة على الاقل مستورة
ربنا كريم بعباده لا بيغفل ولا بينام وقادر على كل شىء

هي وظروفها said...

شريف pasha

هههههههههههههههههههه

والله العظيم ضحكتني وانا مش طايقني

تصدق بقي انا مكنتش اعرف انك بتاع مصلحتك

اخص عليك يا شريف

بقي عايز تركب ورايا في المصلحه مش اما اظبط لنفسي الاول
بلاش ار يا شريف يا اخويا للمصلحه تبوز الله يخليك

بس فكره لو رحت انا وانت سويسرا ونبعت بقي فيزا دعوه لستيته وخيخا وفاتيما وشيما وريم وغاده ومصطفي ريان يفكه من الكتب هو واحمد الصباغ
وقوس قزح وايمي والرومانسي وخالد ابو همس وكووووووووووووول حبايبنا وتبقي هيصه
....
ان شاء الله يا شريف اللقاء الجاي نتكلم براحتنا ولو دخلت عند فاتيما خد رقمي من بوست اللقاء ورنلي ونتكلم يا غالي

هي وظروفها said...

soloرز وملوخيه

تصدق مع اني معرفش مين عمو احمد مكي بس باين عليه معلم

تحياتي ليك ونورتني يا باشا

هي وظروفها said...

ستيته هانم حسب الله الحمش

الله يبارك واللهم اما اجعلني كما تظنون واساله ان يغفر لي ما لاتعلمون


علي فكره شروطك صعبه قوي اقضيها انا وجيلي فقر ارحم

وبعدين الناس دي برده بتقدر الكفاءات

اسأليني انا

هي وظروفها said...

خواطر شابه

تصدقي فعلا مشكلتي تتمثل في كلامك اني مبعرفش اغني ولا ارقص كمان

جدو مش حريف جدو وكل لعيبه منتخب مصر الفرخه باضتلهم في رغيف كل علطوووووووووول يا جدو

انا بقي بحسد جدو وستو وخالو كمان

اقولك الحمد لله علي كل شيء برده جورج البت ساره بتحبه

emymony said...

اه رجعت تانى هههههههههه ايه طابع الحزن والنبى انا ناقصه وجع قلب مش كفايه اللى كنت فيه وقال مين ينكد ولا يدايق ويخنق وليد باشا لازم يتعلق حتى لو كانوا .......... اللهم اما احفظنا هههههههه
طول ماالامل فى ربنا موجود مفيش خوف من اللى جاى
سلام بقا لاحسن انا خلاص بقيت لزقه وهاقعد اعلق

هي وظروفها said...

فريده

يا شيخه حد يعمل محشي في الوقت ده

اوعي يكون ورق عنب ساعتها اخد تاكس واجيلكم فورا اعترفي؟؟؟؟؟؟؟؟؟؟؟

ثم لالالا انا فلاتي وحرامي من زمان انتي بس متعرفنيش

هعمر وهدمر وهتعامل وابقي برنس بس الفرصه فين!!!!!!

وبعدين دي بيتك ومطرحك اتكلمي براحتك بس والله ما كنت اقصد اضايق حد انا حسيت بشويه احباط فقلت ابعت للرجاله يمكن حد منهم يطلع عند اهله نظر ويبعتلي الطريقه

هي وظروفها said...

ايمان هانم زينه بنات الزقازيق

همو حسسونا بحاجات كتير اهمها ان احنا اغبيه ومبنعرفش نتعامل زيهم مع اننا شعب اديله الفرصه وهتلقيه بقي برنس ده احنا فرعنه ابا عن ست ولا ايه؟؟؟؟

اهدي يا ايمي شايلنك لعوزه هدي اعصابك انتي خارجه من معترك وصحتك لسه معملتش ريفرش صلي علي النبي وانا هوريهم الكلاب

كلهم كلاب يا ايمي

تعالي براحتك ده كووووول زياره بتديني دافع اني اشتم في الناس دي

تعالي كتير عشان انا عايز اشتم بصراحه عليهم اقولك تعالي تاني

الوفية للأبـــد -- مها أحمد said...

انت انسان عظيم يا وليد
دول هبيشة و فاكرين عمرهم مديد
ليهم يوم و يروحوا في حديد
و نخلص منهم و تعيش سعيد
و خدها مني نصيحة و يا رب تفيد
خليك صاحي و للفقر عنيد
و ضد الظلم قوي و شديد
و خد من الدنيا الغالي و الفريد
تعيش معاه في الهنا سعيد
و من الآخر صحصح كده يا وليد
و ما تبقاش خايب و بليد



بجد رسالة رائعة اوي منك بس سيبك منهم بجد دول ليهم رب اكبر مني و منك و منهم
( و إن ربـك لبالمرصاد )

مع خالص تحياتي و تقديري

هي وظروفها said...

مها

روحي يا شيخه الله يباركلك

هسمع كووول حاجه بتقوليها
((وش باصص لالارض)) سمعا وطاعه

انما ايه مواهب الشعر المتدفقه يكونش انتي بتكتبي لما تشوفيني اتم بسرعه عشان تزدي حالتي رفاهيه

عارفك يا مها اطلعي من دول اعترفي؟؟

الا فريد مين صحيح يقرب لفريده اختنا

emymony said...

ياعم ياعم قال يعنى بتعرف تشتم واضح واضح كله بيظهر والقلب ماليان بحاجات مايعلم بيها الا ربنا سواء من خير او شر واللى قلبه طيب ربنا بيجازيه وانت اكيد من النوع ده ..ومتخافش على الصحه بووووومب هههههههههههبس والنبى بلاش بظرة التشاؤم دى خاصه منك لانى باحس انك تقدر تجيب حقك وبالاحترام

الشعب لابد له من حكومه تشكمه said...
أزال المؤلف هذا التعليق.
الشعب لابد له من حكومه تشكمه said...

حتى الكومنت كتبته وطلعت نص الحروف غلط ومكنتش هتفهم حاجه,شوفت كلامك عمل ايه؟

المهم نقول تانى:

كما قال عادل امام:
اللى يشوف البلد دى من فوق مش زى اللى بيشوفها من تحت

وكما قالت فيفى عبده:
الاجانب بيجو مصر علشان 3 حجات الاهرامات وابو الهول وانا...

نطلع من ده باييييييييييييييه,
انك علشان تعيش لازم تكون حاجه من الاتنين:

ياحزب وطنى يافنان وزود عليهم لعيب كوره.
مطلعتش لعيب كوره لييييييييييييييييه اهو شوف المكافات نازله زى المطره.

اللى اقدر اقوله مش انت لوحدك اللى كده ياوليد دا حال شباب مصر كلهم كده,,

وكما قالت هند صبرى:
مصر بأت اسيه قوى على ناسها ياباشا.

ربك يفرجها ويحلها ويريح قلبك وبالك.

mohamed ghalia said...

ياوليد دى العمليه سهلة خالص
الوصفة سهلة الإنحراف سهل بس الراجل الى يحافظ على نفسه الموضوع مش صعب ركز وانت توصل هههههه

فتاه من الصعيد said...

ابقا خدنا معاك نتعلم :)

تحياتي

Appy said...

هى الناس دى بتقرا لك طيب دى حاجه حلوة خالص بجد
طيب عندهم اكونت على الفيس بوك
بص يا وليد انا دايما بقول ميحسش بتعبك غير نفسك مهما الناس عملت وقالت وراحت وجت محدش بيحس بكلام حد

فاتيما said...

الله على أسلوبك يا وليد

انت دماغ كبيرة قوى و انا مش واخدة بالى

بقى عاوز تنضم للفريق اللبش دا
اللى مصيتنا براوواكل وشنا ؟؟؟


هزعل منك كدا قوى

الا لو شوفت اختك فاتيما بحاجة

منا عاوزة اجوز يوسف و لا هوه مش هيبقى شاب من ضمن الشوباب ؟!!


عادل ؟
لااا .. عادل مضرب عن الجواز للأسف
و الا كان كتب جواب زى بتاعك


بجد و من غير هزار
عارف لما سمعت بخبر جواز نظيف
مضيقنيش غير حاجة واحدة بس ...
ان ملايين الشباب من الجنسين فى البلد دى مش عارفين يدخلوا دنيا للمرة الاولى بينما هوه بيفرح بشبابه
للمرة التانية
و يا ريت من حد قريب من سنه
دا للأسف هيتجوز واحدة كانت ممكن تكون عروسة لواحد تانى قدها
بس مقدرش يتقدملها
عشان الظروف الهباب بتاعة الأيام دى


ربنا يكرمك يا وليد
و يفتحها عليك يا بنى بالحلال
عشان يدوم و يعمر
و ربنا يباركلك دنيا
و الاهم آخرة

انما الأسامى اللى قولت عليها
ربنا بيباركلهم من حرام ...
عشان بعدين انت عارف و مش محتاجة اقولك

احييك ع البوست دا
حلو جدا بجد

سلامى لست العرايس سارة
ربنا يجمعكم على خير و نحضر فرحكم عن قريب يااااا رب

Shaimaa said...

وليد...انت نسيت عمو /أحمد عز وأنكل هشام طلعت مصطفى ليه؟؟؟!!!
ده عمو أحمد عز شايف اننا مفتريين على الرخاء....عندنا عمى ومش شايفين ولا حاسين بمستوى المعيشة الشاهق اللى احنا عايشين فيه....احنا ناكريين للجميل برده مفيش فايدة

يااااااارب رسالتك توصل لحزب الصم والبكم اللى مليان أعضاء بالهبل دلوقتى

الطيــر العاشـق said...

يا عم و ليــد
أحب أعرفك كلمة دايما الناس بيقولوها
إن الطبع غلاااااب حتي لو في يوم حاولت انك تكون حاجه من اللي بتقول عليها في وقت من الأوقات هتتخنق وتحب ترجع لنفسك تاني

الله يهديك ويهدينا للخير وان كان ع المحشي للأسف مش ورق عنب وياريت والله حتي كنت أشوووف سارة ههههههههههه وبعدين يعني جايلي ضيوف ومش حابه حد يساعدني .........

كل التقدير والإحترام وسلامي لسارة

ঔღঔ نـــوارة ঔღঔ said...

ههههههههههههههه

بكره تروح وتحلى

المعيشة صعبة عالكل ربنا يعينكم

اقتباس :]
** مش هغير مبادئي ولا هأجر دماغي عشان أعجب حد . واللي مش عجبه يلعب في حواجبه**

يعني مش هتقدرررر :]

ربنا يوفقك ويسعدك يارررب

Wanda said...

ما تنفعش
:-)))))))))))))))))))
حيقولوهالك
ابعد يا واد يا شريف انت
متنفعش و بعدين تنحسنا :-))))

عندك واسطة؟؟؟ كارت ؟؟ طبعا معندكش :-)))

حتى الاجرام ياربى فى الزمن ده بنشحت عليه :-)))
يحنن
ايه الناس الى مش سايبة الناس تتمتع براحتها ديه
ادى قرك الى خلى الشريف الاول يقيلوه و يقبلوا استقالته و فى الاخر العجل وقع يا رجاله :-)
ابعد يابنى
و الله لا يلفولك تهمة قر على الناس الحلوة ديه لما الزمن بيقلب بيهم
---------------------------

سؤال جانبى الباشا له فى السياحة مش كده؟؟ يعنى تعرف ترد على السؤال الاول
http://lonlyme.blogspot.com/2010/02/blog-post.html
انا افتيت بمعرفتى بالامور السطحية لو ليك معرفه بالامور الباطنية للموضوع ادخل ادلى بدلوك
معلش ردى هناك مليان اخطاء املائية بس اعتقد حتفهمه

sun of free dom said...

مدونة رائعة بسم الله ما شاء الله

القدر و انا said...

وليد
شعرت بكل القهر لرسالتك رغم علمى المسبق بكل ما فيها
ليس عندى اى كلمات ترطب من الواقع المؤلم غير دعاء من قلب ينزف على كل من سرق الحلم والفرحة لشبابنا
على كل من هدم الامل فى غد افضل لاطفالنا
على كل من سرق الامان
منك يا مصر

re7ab.sale7 said...

اممممممممممممم انا كدة مكسوفة كتير عشان اول مرة اعلق وانا مش عارفة اكتب ازاي عشان تعرفني ما انت قلت تحدث حتي اعرفك يبقي انت كدة يعني ...قصدي يعني اني مش عارفة اقول اية اول مرة ازور المدونة مع اني بشوفها كتير عند صديقتي العزيزة غادة , قلت ارفه عن نفسي شوية بقي قبل الامتحان ونتقل بين المدونات ودخلت هنا لقيتني بضحك اوووي علي الكلام اللي بجد لذيذ خالص ومؤثر جدا جدا , كنت حابة اطوف واشوف اكثر بس اكيد مش هعرف لاني مشغولة , لكن اكيد لي جولة اخري هنا يا هي وظروفها وبتمني مكونش ضيفة ثقيلة وتحياتي

Tamer Nabil said...

ازيك وليد اخبارك اية

الف شكر على سؤالك عليا

وربنا يديم المحبة فى الله

----

فى ناس كتير نفسها تكون شريف وفى اللى بيقدر وبيكون وفى اللى مش بيقدر عشان عارف كويس ان فى ربنا وفى حساب وايمانة لسة قوى

ربنا يصلح الحال للجميع بالحلال

ربنا يوفقك ويكرمك

مع خالص تحياتى

أميرة الأحلام said...

حلوه الرساله دى اوى
بس انت سبت ناس كتير كان ممكن بردو تبعتهالهم ويفيدوك كمان
بس دول ناس ما بيعملوش ثواب في حد ولا بيحبوا حد يبقى زيهم ابدا
ههههههه
كفايه هما
ربنا يحقق لك احلامك بعيد عنهم يارب
تسلم ايدك ياوليد

sookra said...

يااستاذ وليد
لو حضرتك عرفت توصل لهم وكمان قبلوك فى مجموعتهم ودا اكيد موش هيحصل لانهم عاوزين يكون معاك واسطه كبيره جدا موش اقل من وزير مثلا
ساعتها ارجوك وبشده جدا ان تتصل بي وترشحنى عندهم وتزكينى جدا وتكون انت واسطتى
ولك جزيل الشكر والعرفان واخوه محمد كمان
تحياتى القلبيه لساره العسل

هي وظروفها said...

شيما


اول مره اعرف ان الغاليه فيفي عبده من معالم مصر زي ابو الهول اصل انا بشوف ناس حلمها انها تعمل زي الناس علي راس ابو الهول

هقولقهم علي فيفي واهو زي الناس بزي الناس

تبقي فيفي اولي مهي مشمن الناس دي اثااااااااااااااااار

هي وظروفها said...

محمد بيه غاليه

اديني شلوت بس يا محمد وهتعبره دفعه لالامام

مدد مدد مدد شدي حيلوكم واخربو البلد


ده شعارهم وانا معاااااااااااهم

هي وظروفها said...

فتاه من الصعيد


عنيا انتي تؤمري اعرف الطريقه وهشدكم ورايا عدل

هي وظروفها said...

appy

احدث عروسه في التدوين عندنا

احمدك يارب

افتكر اللكح عنده حساب هو والرجاله بس مش في الفيس بوك

في بوك تاني خالص

عندك حق طبعا في كلامك واللي ايده في الميه مش زي اللي ايده في الحله

هي وظروفها said...

فاتيما

بنت خالي هنا مش مصدق


عادل علي فكره بعتلهم بس في الخباثه اللكح رنلي وقالي بس متقولش لحد

واول ما اركب الموجه هديكي رنه واخلي يوسف يجيب جهازه من ايطاليا البلد
عنيا ده ابن اختي

وبخصوص النضيف والموزه

اللي معاه اكتر ياخد موزه اجمد

ده شعار المرحله والمقصله كمان

ولا انتي مش من هنا؟؟؟؟؟

هي وظروفها said...

شيماء

ملكيش دعوه بهشام بكره الحكم عليه وربنا يستر ويتعدم يلا اهو يبقي خلصنا من واحد وعقبال الباقي

هي وظروفها said...

فريده

ماشي يا فريده


طالما ملكيش في ورق العنب يبقي مش هينفع نعرف بعض تاني لانه بموت فيه


وبعدين انا نجيلك نخدمك بعنينا اقله يبقي كتينا من مصر

هي وظروفها said...

نواره
.

سيبك من شعاراتي

ساعه الجد تبيع صاحبك يا ابو نسمه قاله ده ابيع نسمه ذات نفسيها

نورتي يا ست الكل

هي وظروفها said...

wanda هانم


والله يا دكتور مفيش اكتر من التهم عند الناس دي بس تفتكري تهمه القر علي الحراميه عقوبتها اد ايه اكتر من عشرين جنيه مش دافع اتحبس وخلاص


علي فكره لو رحتي هتلاقيني معلق قبليكي علطول

هي وظروفها said...

شمس الحريه


ربنا يبارك فيك وتسلم علي ذوقك

هي وظروفها said...

القدر وانا


انا عارف ان كل شاب في مصر مقهور يا حسره قلب امه زي حلاتي من العالم دي

اللهي قادر يا كريم يموتو موت الكلب الاعور علي طريق زراعي الساعه 2 بليل

هي وظروفها said...

ريحاب صالح

لا تكسفي ولا حاجه

انت داخله كرمه بن هانيء

ده انا ولا عشر علي واحد من هانيء نفسه

اكلمي وقولي واكتبي كووووول اللي في نفسك
عبري عن نفسك

البيت بيتك

هي وظروفها said...

تامر بيه نبيل


لا شكر علي واجب احنا اخوات يا موووووووورا


اللي بتقوله ده عين العقل طبعا بس متنساش

اننا في الاخر بني ادمين والواحد من كتر مابيشوف البلد بتصرف اد ايه علي الهلس بيجيله احباط مش كده ولا ايه؟؟؟؟؟؟؟؟؟؟؟؟؟

هي وظروفها said...

اميره


ايه يا باشمهندسه

انتي جايه تبوزيلي المصلحه


في اسامي مكتوبه بالحبر السري

ولا انا لازم افضح كل حبايبي

ركزي شويه وانتي تشوفي

هي وظروفها said...

سكره (( بنت من ليبيا))

والله يا سها هانم ادعيلي وكلها كام سنه

ولو اتصلح الحال وزاد المال ابعتلكم ونعمل لقاء تدويني في سويسرا انا والواد شريف اللي اسمه طلع علي غير مسمي خالص

الواد بيقر عليا من اولها ينفع كده يا سكره يا اختي

أم .. بوبه said...

طلب جديد من نوعه .. وفعلا مهم ولازم يتنظر إليه

بس أنا بطالب بإنهم يأسسوا مدرسة علشان الكل يستفيد وبلاش تدخل فيها الكوسة لأن كل إللى محتاجينها مش معاهم حق الكوسة

فلازم يكون التعليم بالمجان لكل فئات الشعب ... ويكون فى طبعا دروس عمليه

أبقى أقدم للبت بوبة بقى وأحجزلها من دلوقتى


اكييييييييييد بهزر

بعد الشررررررر علينا كلنا ...

اللهم أكفنا بحلالك عن حرامك وأغننا بفضلك عمن سواك

ياااااااااااااارب

ebn roshd 777 said...

كلمات معبره بصدق عن احوال الملايين من الشباب
بجد مش عارف اقولك ايه؟؟
لا املك الا ان ادعوك وادعو كل الشباب للحفر في الصخر
وساضمن لك باذن الله مستقبلا عظيما
ان الله لا يضيع اجر من احسن عملا
حتي لو كانت عايش في مصر
اسلوبك بالكتابه فعلا مميز
وانا بشكر القدر وانا لانها وضعت الرابط بتاعك عندها
وياريت لو تعرف ايه السبب اني مش متاح ليه التعليق عند القدر وانا ولا حتي باسم مجهول تفيدني لو سمحت
تشرفت كثيرا بالمرور في مدونتك الجميله

شيرين فرغلى said...

لولو صديقى و اخويا العزيز

لولو انا قولتلك كتيييييير اوى انك انسان كويس جدا و فظيع و خسارة فالبلد دى وانك هتبقى حاجة كبيرة جدا بس محتاج حد يحطك ع اول الطريق بس مش الطريق ده اللى اقصدة اه هو اسهل واسرع بكتييييير بس الطريق ده صحراوى مش بتاعنا التانى اللى اقصده الزراعى يا معلم.
عارفة انك بتخرج اللى جواك وانك عمرك متفكر فالصحراوى يا لولو

هي وظروفها said...

ام بوبه

لالالالالالالا ولادنا هيتربو بفلوس حلال ان شاء الله


وربنا يارب يباركلك في حبيبه ويبقي مستقبلها هي وولادنا احسن من مستقبلنا وحياتهم احسن من حياتنا

هي وظروفها said...

ابن رشد 777

والله ده حال كل شباب مصر

الله ينقم من اللي كان السبب

كبرونا قبل الاوان وخلونا نشيب بدري

انت نورتني وبجد زيارتك كبيره عندي قوي


بخصوص القدر وانا انا بشكرها طبعا

بس معرفش فيه ايه عندها الصبح اجرب واقولك عشان جاي تعبان من بره تصبح علي خير يا باشا

هي وظروفها said...

شرين هانم


يا بنتي انا كبير ابيع بليله في البلد دي ايه يا شرين البلد دي مش بلدنا

بس هاخد الزراعي مع انه رخم بس هستحمل ويارب
نوصل ان شاء الله

بس وديني اللي هيقف في الطريق الزراعي لاقل ادبي عليه

هههههههههههههههههههه

انا عايز اعدي بالحلال وانتي اكتر حد فهماني بس الحلال في بلدنا صعب قوي

يارب يا شيرين افرح بيكي وربنا يرزقك بشاب ابن حلال

انتي تستاهلي كل خير

ربنا يخليكي ليه يا شرين يارب

د/عرفه said...

والله يا شريف مش لوحدك

الظاهر انه احنا كلنا كده



هقولك انا عندى لك مفاجأة
فيه واحد جارنا ممكن يعلمنا سوا حوارات النهب والنصب دى
من غير
لممدوح اسماعيل ولا رامى لكح
ولا غيرهم

ومن غير عمولة كمان
ههههههههههههههه

ENG./ELSAYED,PMP said...

ليدو حبيبى
صباح الصباح واللى جاى احسن م اللى راح

عارف انت فكرتنى بحكاية حصلت فى امريكا اللاتينية

بيقولك كان رئيس وزراء بيشكل حكومة
وبعدين عرض على الريس ( بتاع امريكا اللاتينية ) اسم احد الشخصيات

وفضل يا معلم بقى يشكر فى .. اخلاق الرجل... وشرف الرجل ... ونظافة يد الرجل ... وعلم الرجل... وعفافة الرجل ... وطهارة الرجل

عارف كان رد رئيس الدولة ايه




وسخهولى

هي وظروفها said...

د/ عرفه

اولا منور يا دكتور


ثانيا انا عندي جيرا احسن من جيرانك وكله بالحب

مبيخدوش عموله وبيعلموا لنصب والرسقه باحتراف في 24 ساعه

بس قولت ياد يا وليد احترف في الخارج منها تتفسح ومنها تهلس
احتراف خارجي يا دكتور مش اي كلام

هي وظروفها said...

سيد باشا

نهارك ابيض باكين لاسايبس ولا بوتمين

عامل ايه يا كبيرنا والله ليكي وحشه يا ابو السيد وان شاء الله اشوفك يوم لقاء بور سعيد

صحيح بقي قاله وسخهولي

تلاقي الرئيس ده

واخد كورس اداره تنميه هنا في مصر تحت يد كبار رجال النظام

ليهم شعار جميل

النضيف ملوش مكان وسطنا

ENG./ELSAYED,PMP said...

ليدو
وبتقولى مطقطق ... يا عم روووح

ده استسقاط

هوه رئيس دولة افريقية

بس والعيش والملح يل ليدو

متسألنيش اكتر من كده

عايز الحق اربى الواد منعم

هي وظروفها said...

سيد بيه

ههههههههههههههههههههههههههه

ربي الواد صحيح احسن

ربنا يبارك فيه ويبقي زمنه ومستقبله احسن مننا يارب

mostafa rayan said...

انا بردو بضم اسمي معاك في الرساله دي

هي وظروفها said...

مصطفي باشا ريان

رئيسنا السابق


ايه هتعتزل اتلرياسه وهتطالب بحقك في تعلم النصب لا خليك في الرياسه احسن

ربنا يوفقك وان شاء الله نجيلك ونفرح معاك وبيك في المعرض يا درش

Single Mummy said...

عزيزى وليد:

واللة مهما علموك الحاجات دى يا عزيزى جينات كرات دم نوع جديد بيجرى فى العروق سيبك انتة الحاجات دى ليها ناسها...أما إحنا فلن اللة واللى مع اللة عمرة ما يضيع

تحياتى

هي وظروفها said...

single mummy

والله ما حكايه كرات دم بيضا وحمرا وصفرا الناس دي اصلا معندهاش دم

نورتيني

تحياتي

عاشقة الفردوس said...

وبردو مفيش فايدة

: ))

هي وظروفها said...

عاشقه الفردوس

ربنا يخليكي

انتي تقربي لسعد زغلول ولا ايه

د/عرفه said...

معلش يا وليد

انا اتلخبطت بس

فى الاسم

ومصطفى بنجاواتى بيقول فى الاول شرف ليا
فبحسب شريف


المهم معذرة يا وليد مرة تانية
واتمنى انك تشوف ده بس
http://advsarab.blogspot.com/

هي وظروفها said...

د/عرفه

ولا يهمك شريف او وليد واحد

روحت يا باشا واتشرفت بدخول ملتقي المدونين وليا الشرف انك تختار رسالتي يمكن توصل

نورتني يا دكتور

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل