الحب في القلب زي عضه الكلب

المره دي مش هكتب خاطره عن الحنين وان اللي عايز ينسي سهل انه ينسي نفسه
لانه كلام مش واقعي وبيبقي كلام فضفضه وطبطبه ومدد علي الشيزلونج
لأني اكتشفت ان الحنين مش زرار ومفيش حد عنده اوبشن
يدوس بيه علي الزرار ده ينسي ايام عاشها وحاجات حلوه شافها ولمسها
بس هل يا تري زي ما علقت عند نورا وهعيد تعليقي هنا بتصرف
ايه هو الأفضل ؟؟؟؟
ان الانسان اللي يمشي من حياه الواحد فجأه يمشي باسلوب يخليه يفتكره
بخير علطول
ولا يفارق باسلوب وحش عشان يسيب للي هيفارقه الوقت واللعن والمساحه
الي تخليه يكره او مش هقول يكره لأن اللي حب بجد ممكن ياخد قرار البعد
انما قرار الكره لو قالو يبقي ادعاء رجوله مش في محلها
مشكله الواحد سواء ولد او بنت انه لو حب بجد من جوه جواه مبيقدرش يكره
ساعات بيبقي الواحد نفسه يكره بس مبيقدرش
كتير ممكن كشباب او بنات يقولك يولع يتحرق وانا منهم
انما لما الواحد يقعد مع نفسه صعب انه يتخيل رغم اي شكل للنهايه
اذا كان حب بجد غير ان الطرف التاني يكون في اسعد حال
ويتمناله انه يكون سعيد
هو ده اسلوب اي حد ينفع يلقّب باسم انسان 0000
مهما روحنا او عرفنا انا مش مع ان الانسان ينهي نهايه وحشه وخصوصا
لو كان اللي معاه مكنش وحش لمالا نهايه لانه في النهايه اكيد كان بينهم
لحظات كتير حلوه 00سفر 00رحلات00خيالات احلام حتي لو فاق واكتشف
انه كان عايش في اوهام
يا تري الانسان مننا لما بيفتكر لحظات لحد ويضحك بيبقي بيضحك حزن وبيداري دموعه
في الضحكه ولا بيكون اناني ويضحك عشان يكمّل حياته ولا بيضحك لانه نسي 00
عارف انه فيه ناس متساتهلش البكا عليها من اساسه
بس ورغم انه في حد داخل حياتي بقوه اليومين دول الا اني مش علطول ببقي مركز معاه
رغم مرور 3 شهور علي انتهاء قصه شخصيه تخصني
بس القلب ده عجيب يا اخونّا لا يخضع لاي مباديء علي الاقل بالنسبه للناس اللي زي حالاتي
هو مش بيبقي حنين علي اد ما بيكون احساس غريب كده مش عارف يتوصف ازاي
طبعا مع الايام بننسي00 قشطه بننسي بس اللي حب حب حقيقي يفضل فاكر شويه تفاصيل
خاصه بيه مع حبه القديم اسلوبه في الكلام مفرداته صفاته كلماته رودود افعاله في مواقف معينه
رغم ان الواحد ناضج بقدر يسمحله انه يوزن ايه الصح وايه الغلط
ولكن مش عارف او حاسس اني مازالت مش قادر اوصل هل الصح
ان اللي يفارق يفارق بشياكه ولا يفارق بدون سابق انذار وبلا اسباب تبدو معقوله او منطقيه
هل يا تري القلب ده اللي هو مش ملك حد واتحدي اللي يقولي انه يقدر بنسبه ميه في الميه
يتحكم في قلبه لما بيحب بينسي اي اساءات او تجاوزات ربما حدثت من حبيبه السابق
ولا هي مساله وقت طب اقولكم لو هي مساله وقت
ليه بعد مرور 4 سنين علي فراق اغلي حب في حياتي زينب لسه فاكرها وبستني تليفونها
كل عيد عشان اتطمن عليها رغم انها اتجوزت بس خفه دمها وقفشاتها
موجوده في الذاكره ولا تنسي
المصيبه ان الواحد عارف الصح من الغلط بس ساعه اي موضوع شخصي تلاقي الواحد
خارج حدود الحكم وخصوصا لو كان ترمومتر قلبه رخم وحنين زياده عن اللزوم
ولا اعمل فيها زي طارق الشيخ واقول دقيقه حداد والبس تشيرت اسود
علي قلبي ابن الجزمه اللي تعبني معاه بس مين وراه وراه لحد ما اخليه يجمّد
ويرسي ويتشبك مع حب نهائي والخص واتجوز وباذن الله ده هيكون قريب
صدق اللي قال الحب في القلب زي عضه الكلب

42 Comments:

صيدلانيه طالعه نازله said...

مبيبقاش بمزاجنا

حكايه انك تفتكر حب قديم عاديه جدا

لاننا بشر و الانسان لو نسى ماضيه مش حيبقى ليه حاضر
الانسان يا وليد هو الكائن الوحيد اللى عنده تاريخ

اللى بيوجع بقى انك تبقى فاكر حبك القديم بكل تفاصيله و ضحكاته و دموعه
و تجيلك الذكريات دى فى وقت انت موجوع فيه من حبك الجديد و تبدأ تقارن و تقول لو كنت معاه يا ترى كان حيحصل كده

مهموهـــــــة said...

وليد و الله معاك حق في كل كلمة قولتها و الله

فعلا الحنين للماضي و للي فات مش بايدينا خالص و لا هو زرار بندوس عليه

انا حاسة بحالتك دي بجد
انت بصراحة قلبك ده زمانه تعبك اوي اوي
ربنا يعينك يا رب

عارف حاسة اني عايزة اقولك كلام كتير حسيته من البوست ده لكن لساني ابن الايه مش مطاوعني
مش عارفة اقول ايه
بس كلمة حنين خليتني اسرح بجد
مش حنين لحب قديم لا بجد لان احمد هو اول و اخر حب في حياتي
لا بس حنين لذكريات قديمة مع اهلي و صحباتي و اخواتي
حنيني لماما حبيبتي في مصر اللي كل ثانية بتعدي من غير ما اكون جنبها بتعب اوي اوي
بس بقى يا وليد خليتني اعيط بجد

ربنا يوفقك يا رب و نسمع عنك كل خير
و مادام فيه مشروع جديد قريب يبقى ان شاء الله هنحضر فرحك قريب اوي

ربنا يسعدك يا رب

خالص حبي و تقديري

توفى said...

كلنا مهما سيبنا ناس و بيتهيألنا اننا نسيناهم بيجى علينا وقت نفتكرهم و نحن ليهم و نبتسم من جوانا و نقول كانت ايام حلوه

على راى عمرو دياب

واهو بكره نقول كانت ذكرى و عشنالنا يومين

خواطر شابة said...

تعرف انا مكنتش قرأت التحديث اللي انت عملته في تدوينة ردا على خاطرة نوران الا اليوم لاني وانا اقرأ استغربت تغير موقفك فمن كان رده على تعليقي في الموضوع السابق هو هذا "
البني ادم مننا لازم يكون عنده كوالفيكيشن مهم
الا وهو دليته الاشخاص غير المرغوب في تذكرهم من ذاكرته او علي الاقل انه لما يفتكرهم يفتكر الوحش بتاعهم عشان ميقعدش يضايق في نفسه في الوقت اللي الطرف التاني فيه ولا في دماغه
اذن يولع بقي يتحرق يغور في داهيه انما تفتكريه وهو مش من هنا يبقي انتي غاويه تتعبي اعصابك" يستغرب جدا ان تصدر منه تدوينة اليوم لكني بعد ان قرأت التحديث زال استغرابي وبدت الصورة واضحة امامي بس تعرف والله اللي قال المثل ده بيفهم "الحب في القلب زي عضة الكلب"
تحياتي وودي

لولا وزهراء said...

وليدووووووووووو

رغم ان عنوان البوست دمه خفيف لكن الكلام فيه كلام عميق اوى اوى اوى
احنا مش اجهزه يا وليد يعنى مثلا انا مش كمبيوتر لما يدخل لى فيرس اعمل سكان واشيله لو لما احب احذف ملف ادوس ديليت
احنا بشر لحم ودم ومشاعر واحاسيس
صعب اوى اوى ان اللى يحب بجد ينسى او يدوس على زرار ويرفع شعار النسيان
ع العموم كله بالوقت بيهون
مش عارفه ليه افتكرت اغنيه فضل شاكر نسيت انساك

من ليس له ماضى
ليس له اى حاضر

كلامك رساله من رسايل القدر بجد
نحيه لك على جمال اسلوبك
ومبروك على اول بوست بعد الثلاين عاما
ياااااااااارب عن قريب تكتب لنا بوست تقول فيه ان وليد فرحان ومبسوط
ربنا يعوض عليك بكل خير يا وليد لانك عن جد حد يستاهل كل خير

زهراء

كيكى عوووووو said...

مممممممممممم
هى مش كميا بس الحب الى بجد عمره طبعا مايتنسى
واكتر حاجة بتوجع الذكريات وتفاصيل كتير بتتحفر فى القلب
**صعب اى حد ينسها***
عارف تحس مهما الواحد حب بعد كدة واتجوز تحس فى علامة كدة فى قلبوا ميقدرش يمحيها
بس اهى علامة ذكرى على الى كان وخلااص
!!!!!!!
بس تفتكر عض الحب ينفعلها 21 حقنة وتخف بعديها!!!
كل سنة وانت طيب ياعمونا وعقبال كمان سنتان ونخلص بقى

мαησηα said...

بتفتكره بس بتضحك وتقول اييه كانت ايام

لكن لما تفتكر الحب اللى اتفاعل معاك

ف مواقف كتير اوى بتحس ان اللى معاك احلى ومختلف

وعلى راى لولى بتقولك بتفتكره لما بتكون موجوع من الجديد

يعنى طول ما التانى مظبطك ومرتاح انت ناسى القديم

بكرة ترتاح ان شاء الله بس انجز بقه عايزين نخلص ونفرح بقه

هههههههه ربنا يسرلك الامور يارب ويكرمك ويوفقك باذن الله

sweet angel said...

ههههههههههه

الحب في القلب زي عضه الكلب

طب والله كلامك مظبوط

النسياااااااااااان نعمه

وعندي طلب بسيط

لو سمحت لما تلاقي طريقه تجمد بيها قلبك
ابقا قولي عليها علشان انا نفسي اخليه يجمد كده
ومش يفرق معاه حد
يا اما هركب قلب صناعي

wasf_elahsas said...

الحب في القلب
طبعا معروف المثل المصري الشعبي الشهير
الحب في القلب زي عضة الكلب
فعلا هو ده تاثير الحب في القلب
بيكلبش عليك تحس انك مش قادر تتحرك
الا اما يكون هو معاك وراضي ومسترضي
في الاول تبدء تتعلق بيه واحدة بواحدة
ساعات بنقاوم ونستقوي
ساعات بنقول اننا فعلا اقوي
ساعات بنتوهم اننا مش بنتاثر بحاجة او انه محدش يقدر يتحكم فينا
بس ساعة ما بتيجي لحظة انك تحتاجة مش تلاقيه
او تستناه وما يجيش
تحس ببرد شديد حتي لو في عز الصيف
تحس انك مش قادر تشوف ولا تسمع ولا تحس
تحس ان جسمك بينكمش او ممكن بينحسر او ممكن بيتلاشي
تحس ان الوقت مش بيمر
وفعلا
تقيلة خطوة الزمن
وتقيلة دقة الساعات
كداب ال قال عض قلب ولا تعض رغيفي
كداب ال يكدب علي نفسه انه مش بيحب
كداب ال يقول انه مهما بعد عن حبيبه مش بيتاثر
لان الحب فعلا في القلب زي عضة الكلب
بيقولو ازاي تعرف انك عاشق
اما تبدء تتصرف عكس مصلحتك الشخصية
فممكن تصرف كتير
وتضيع كتير عشان ال بتحبه ولا تحس
ولا تحاسب
وترجع تفتكر تلاقي فجوة جوا القلب كبيرة
حاجة مسكاه بسنانها ومش قادر تخلصه منها
مش بتحس بقيمة اي حاجة تانية
ساعتها هتقول ياريت كله ييجي في الفلوس بس هو يفضل معايا
مش هتشوف ولا هتحب تشوف انه غلطان او انك مظلوم منه
وبكلمه منه واحدة تمحي كل حاجة حتي لو كبيرة
ومن غير حتي اسف ولا حقك عليا
تحس ان الكلام بيدبح جرح كبير جواك
تحس انك بس محتاج مش مهم متهان مش مهم تعبان
المهم انه ما يسيبكش
كدة تعرف انه بالتلاته ساب جواك عضة كلب
انه هو ده الحب ال بيخلي الانسان اضعف من اضعف مخلوق في لحظة
وفي لحظة تانة اقوي من اقوي مخلوق
كل ده بعضة كلب
وصف الاحساس
تحياتي

wasf_elahsas said...

الموضوع ده انا كتبته من شهرين في المدونة عندي
اما لقيت عندك عضة الكلب ده قلت لازم تشوفه

تحياتي

صمت المشاعر said...

هههههههههه هوا الحب مفيش غيره

اولا انت طرحت سؤال هل اما نجي نفاقر نفارق بشياكه او من غير سبب والا نكره اللي ادامنا فينا علشان ينسانا بسرعه بصراحه انا عاوزه اجابه للسؤال ده

بس علي فكره لو الانسان حب بجد صعب جدا ينسي الحب دا مهما مر عليه من سنين بيفضل دايما جواه او علي الاقل زكريات معينه محفوره في زاكرته

ربنا يوفقك دايما للخير

فتاه من الصعيد said...

موش عارفه بس يمكن الخداع بيولد الكره ويسهل النسيان ... ولان محدش من اللي حبيتهم خدعك فلسه فاكرهم بخير :)

ربنا يديم قلبك الرقيق :)

تحياتي

كيــــــــــــارا said...

لما يفتكر زكري ويبتسم بيقول ياااااااااه احلي ايام وبعدها بثانية بتفتكر انه خلاص انتهي فبتنزل دمعة حزينة علي النهاية يلا

اكيد لازم تفتكر ويكون في زكري لان انت انسان

ربنا يوفقك في حياتك الجايه وان شاء الله نفرح بيك قريبا جدا :)

سمع هوص (Abo 3li) said...

مش عارف اعلق..

طوبه فضه وطوبه دهب said...

انت صح جدا ان قلوبنا مش مجرد زراير ولا اجهزه نفصل عنها البور وقت ما نحب ونشغلها وقت من حب بالعكس القلوب دى حركات لا اراديه والذكريات بتكون اصعب شىء فيها وخصوصا لما تفتكر ذكرى سابت جواك اثر جامد بتنزل دموعك غصب عنك ما تعرفش زعل على شىء اتمنيته اوى وافتكرته كبير اوى وانتهى بلا شىء ولا على ناس ولا على حاجات لسه معششه فى قلبك اوى ومش قادر تنساها ولا ذكريات مليه كل اركان حياتك وبتحاول تهرب منها فبتكتشف انك بتقرب اكتر المهم ان دموعك بتنزل اوى وتسئل نفسك يا ترى كل اللى شاركك الذكريات دى لسه فاكر ذى ما انت فاكر كل التفاصيل ياترى فرقت معاه ذى مافرق معاه وبينتهى انك تمسح دموعك من غير اى اجابه لاسئلتك ربنا يكرمك وتقدر توازن وتفهم ان الحياه مش كلها ذكرى ولا هنفضل عمرنا كله نتندم صحيح ما بننساش فى يوم لكن مسيرنا ننسى

emymony said...

وليد
اولا ازيك ؟ يارب تكون بخير
بص بقا يااستاذ وليد
ربنا ادانا نعمه النسيان واكيد هو الانسان صعب ينسى سنين واحساسيس فضلت ملازمه وقت كبير
بس العقل اننا نجعلها مجرد ذكرى ليس الا
لاننا لو فضلنا حطاينها معيار ومقياس لاشخاص تانيه نعرفها
هتحط نفسك فى مقارنه بين القديم والجديد
وهتخسر انت فى الاخر لان الانسان دايما بيميل للى يعرفه وبيرهب من جديد فى حياته مهما كان حلو
اهم شىء اننا ننسى او نعمل نفسنا نسينا ومع الوقت كله شىء هيبقى ذكرى واللى جاى هيكون احسن واننا لازم نجرب ونتعلم ونتوجع ونتالم ونفرح بعد عذاب هى دى حلاوة الدنيا ومرارتها فى نفس الوقت
والحب فى القلب زى عضه الكلب بس ليه علاج 21 يوم هههههههههههههه
ربنا يوفقك يارب
تحياتى

MR.PRESIDENT said...

الشعور والعاطفة دي في القلب مش احنا اللي بنتحكم فيهم ..
انا احسن حاجة عندي الوداع مع ان كله بيكرهه بس انا بحبه ومش بحب الإستقبال

ماما أمولة said...

أنت رومانسي بشكل ههههههههه

إيه دا يابني عبرت عن حاجة ممكن تقابل أي انسان وتعدي عليه وهي حبه القديم
بس بطريقتك الجميلة هههههههههههههههه

ربنا يصلح حالك يارب وتتجوز بس على فكرة اللي بيكلبش مش بيروووح ابدا

ربنا يصلح حالك يارب

هي وظروفها said...

علا

هي لو كانت بالمزاج كانت بقت اسهل من شكه الدبوس

وجهه نظري ان فيه حب قديم اصلا بيعيش مع الواحد وبيفضل متواجد معاه في اي حته يروحها وخصوصا لو كان الحب ده كان ليه معاه ذكريات في اماكن كتير ومعتقدش ان اللي حب بجد يقدر ينسي أشك

يقدر يعيش ويتعايش بس مع اول شيء يذكره بيسرح وبيفتكر

هي وظروفها said...

مهاااااااااااااااااااااااااا

قلبي ده ملوش حل رغم انه حب 3 مرات بس غريب قوي ويساع من الحبايب الف

الف جملي مش عارف ولا ايه ظروفه

ويا سلام عليك يا حمااده يا جاااااااااامد مها بتعلن علي الملأانك الاول والاخير يا معلم

تعرفي يا مها ان الحنين ده من غيره ومن غير الماضي الحلو الواحد يبقي مش طبيعي

اصل اللي مش بيبقي ليه ماضي اي ماضي مش شرط عاطفي

مكاني زماني عائلي تعارفي صداقه زماله

امال هو كان عايش فين

في غابه مع كوكب القرود ولا ايه

اكيد يا مها الحنين ده شيء غريب

يارب مستبلك مع احمد يكون اكثر اشراقه وسعاده

هي وظروفها said...

توفي

اولا اسمك طعمه حلو

بما انك من عشاق عمر دياب احب اقولك وافكرك باغنيه طبع الحياه اسمعيها جميله قوي


زطبعا اي ذكري حلوه بتعيش طول العمر دي لو كانت اغنيه ليها ذكري بنفتكرها مبالك ببني ادم عشنا معاه وحبناه وكلنا معاه وخرجنا معاه وعرفناه واتفاعلنا وانفعلنا ودوبنا وغلبنا وزهقنا وضربناه كمان

ههههههههههههههههه

نورتي يا توفي

هي وظروفها said...

نوجاااااااااااااااااااا

لا متستغربيش يا نوجا

انا اوضح واحد في مشاعره ممكن تقابليه في حياتك

واللي في قلبي علي لساني ومبقلقش اني اقول اني غلطت او اني اتسرعت او اني اتغبيت حتي

وبخصوص الحب في القلب زي عضه الكلب ومش اي كلب ده كلب ابن كلب دوبر مان الماني متجنس لونج هير

هي وظروفها said...

زهرتي

اجهزه مين احنا يا زهرا احنا بشر من لحم ودم واللي بيبقي قلبه جااااااامد بيبقي معلم كان نفسي يبقي قلبي جاااااامد بس طالع حنين لابويا

مخدتش منه غير الحنيه وان الفلوس ملهاش لازمه

ابويااااااااا مضيعني ومبوظ مستقبلي يا وهرا ينفع كدا

وبخصوص اول بوست بعد التلاتين فاحب اقولك اني حاسس بعد ما قريته اني عندي عشرين سنه واني خبرتي محتاجه اب جريد

واو جريد نخل شغال المهم هي محتاجه اي حاجه وخلاص

نورتي يا زهرا

هي وظروفها said...

كيكي عووووووووووووو

فينك يا بتني

ياااااااااه حفّر القلب ولا المطبات الهوائيه في اي منطقه ضبابيه توقع اتخن طياره وتديها بالقاضيه القويه

لالالالالا ولا ينفع معاها مستشفي دار الفؤاد ولا الجبلي نفسه

دي محتاجه تسافر تعمل فتره نقاهه في المانيا هو الريس احسن مننا في ايه

كلنا ولاد تسعه وانا كمان جاي في الشهر العاش بيومين

طولت قولت اخد رااحتي في بطن امي قبل الزحمه

هي وظروفها said...

منونه

مني هانم بعد التحيه

تفاعل الحنين مع الذكريات ولا النبلم يا بنتي

بيولع في الذره

وعلا ددي مبتقلش كلام وخلاص دي بتشوط في المقص الشمال علي طول

ربنا يسهل وافرحك قريب بس بجد انا اللي محتاج حاجه تانيه خااااااالص تفرحني بس لالاسف بعيييييييييد قوي

ربنا يسهل يا مني

هي وظروفها said...

الملاك الحلو الجميل القمر


عنيا اول ما الاقي طريقه

هقولك علي طول هو انا اقدر اخبي عليكي

بس ده في المشمش يا ملاك

Sad Angel said...

مش عارفه ارد
وانا بقرا البوست افتكرت حاجات كتير اوووووووى

بس انت قولتها
مجرد حنين
وطالما انكتبت النهايه يبقى مجرد ذكرى وبس اياُ كانت الذكرى فهى ماضى لا اكثر ولا اقل

شمس النهار said...

ازيك يارب تكون بخير انت وعروستك اللي زي لقمر

الحب الصح الحقيقي مابيتنسيش صحيح
بس مع الوقت بيمشي من القلب لكن تظل التجربة في عقل الانسان ووجدانة مابيتسلخش منها بسهولة خالص

بس مع الايام بتمشي خالص
وخصوصا لما ربنا ينعم عليك بحب صح حقيقي مافيهوش منغصات
وربنا يتمها علي خير بالزواج
هنا بيبقا خلاص
كله تمام
مع الاحتفاظ ببعض الذكريات اللي مع الحب والزواج بتقل وتبعد الفترات الزمنيه لتذكرها
ربنا يكرمك
سلامي

هي وظروفها said...

وصف الاحساس


كلامك مكمل للبوست ويكاد يكون تفوق عليه

بس عارفه ايه احلي ما في الحب ما بعد ما ينتهي الحنين شيء كويس مش وحش اصل احنا لو حسينا بالحنين معني كده اننا كنا بنحب بجد مش شرط الطرف التني ساب او اتساب

الفكره هنا ولو انها ممكن تكوت انانيه بس ان الواحد بيفتكر عشان يذكّر نفسه بلحظه حلوه عاشها

ةطبعا بيتمني لحبيسبه القديم كل الخير وهو ده احساس الناس الراقيه في فكرها

وبحب الناس الرايقه اللي بتضحك علطول اما العالم المتضايقه انا لأمليش في دول

صباح الورد يا وصف

هي وظروفها said...

صمت المشاعر



افتكر ان دي زيارتك الاولي لبيتي الصغير منوره طبعا


ثانيا طبعا كلنا بيفضل جوانا ذكري لحظه حلوه اتعشت او كلمه حلوه اتسمعت بس اكيد بردو كل يوم بيبيجي بخير وحب من القدر

وبخصوص اجابه السؤال ده فنا علمي علمك

نورتيني يا قمر

هي وظروفها said...

فتاه من الصعيد

محدش من اللي حبتهم خدعني دي حقيقه

انا اللي خدعت نفسي كتتييييييييييييييير

ربنا يخليكي ويبارك في قلبك ويتملي حب وسعاده يا بلدياتي

هابي فالنتين القادم

هي وظروفها said...

كيااااااااااااارا


الحنين ده يا مني جميل قوي يا بنتي علي الاقل بيفكر الانسان انه مكنش عدم لا اثر واتأثر ولو في فتره في حد وحس معاه بمتعه معنويه ولحظه ورديه حلوه وجميله

اللله يخليكي وربنا يفرحنا بيكي

قشطه عليكي

هي وظروفها said...

ابو علي

بين تعليقك التلات كلامات

كلام كتير وكبير فهمته ويمكن انت اوجز وابلغ تعليق يا محمد

هي وظروفها said...

طوبه فضه وطوبه دهب

صدقيني ما تفرقش اذا كان فاكر ولا مش فاكر

الواحد بيفتكر لما تحصل حاجه ويبتسم ويضحك ويتمني الخير للي حبه ويكمل حياتهلانها حياه ومبتقفش بس لو حتي عيط دي حريه شخيه ومبيبقاش بيعيط عشان التاني بعد

بيدمع لانه كان نفسه يكمل الحلم الحلو او اللي كان حلو بس مكملش

نورتيني

صحيح اسمك الحقيقي ايه

هي وظروفها said...

ايمي موني

الحمد لله يا ايمان

لا يا ايمان علاج الحب ميكفيهوش 21 يوم بياخد وقت بس في الاخر كله بيعدي وبتفضل ذكريات حلوه وحنين لان اكيد ورغم اي شكل لاي نهايه ان بردو الواحد اكيد اكيد شاف من اللي حبه جزء ايجابي يفتكره بيه

تعليقك يتعب القلب يا ايمان بجد

يارب اللي جاي يكون احسن لينا وليكي

هي وظروفها said...

سياده الرئيس

اكيد يا باشا سعادتك كلامك صح وهو انا اقدر اعترض هتعتقلني علي طول

بس ياراجل في حد يحب الوداع ويكره الاستقبال بالزمه انت مقتنع يا كبير ولا بيتقول بتهريج كده؟؟؟؟؟؟؟؟؟؟

هي وظروفها said...

الغاليه ماما اموله

ابنك بقي ولازم يكون رومانسي منتي عارفاني حنين شويتين

يااااااااارب اتجوز وربنا يتقبل دعوتك

اللحب اللي بيكلبش ده بيقي عامل زي اللزقه المريكاني انتي هتقوليلي ده ابنك حقل تجارب

هههههههههههههههههههههههههههه

هي وظروفها said...

الملاك الحزين

فعلا مجرد حنين

والله العظيم يا ملاك تعليقك رغم قله حروفه الا انه عين العقل والقلب والفكر كمان

بتفهمي وبحييكي علي رايك الجميل اللي موافقك عليه بس ساعات كده الواحد قلبه بيدلع عليه شويه بقي نعمل ايه؟؟؟

هي وظروفها said...

شمس النهار

انا الحمد لله كويس

بس عروستي اللي حضرتك شوفتيها منيوم الدقي

محصلش نصيب وربنا يوفقها لكل خير ويسعدها

يارب ربنا يبعتلي حب حقيقي ونهائي تعبت يا شمس والله العظيم من الحب اللي بياخد وقت ويحصل انفصال سواء مني او من اللي حبتهم

كلامك مش محتاج غير اني اقولك كلام عقل وخبره من اخت كبيره

واكيد بما ليكي من خبره وفكر فاكيد كلامك هو الصح وياريت يحصلنا كلامك عشان نقدر نعيش وننسي ونكمل حياتنا بحب وسعاده

ربنا يبارك فيكي وفي حياتك وفي بناتك يا ام البنات

غروب said...

اول مره ازور المدونه

بس بجد عجبتنى جدا

الموضوع كمان عجبنى جدا

هي وظروفها said...

غروب

نورتي يا غروب هو بس تلاقي الموضوع عجبك عشان برج العقرب

هههههههههههههههه

نروتيني

حلمى البعيد said...

السلام عليكم
أخبارك إيه؟؟
تمام
تمام
إنت هتقولى علي الحب وخصوصا مخصوص
لما بيبقي نابع من القلب
والمشكله بقي لما بيكبر وبيجرى في الدم
ساعتها ولا أى شئ يقدر عليه
ربنا يسعدك
تحياتى