يوم جميل قوي وصحبه اجمل

بجد انا جاي من لقاء اسكندريه وانا لاول مره اتضايق اني محضرش لقاء

من اوله الجو في اسكندريه تحفه جدا تحفه بجد يا نهاري علي جماله

ومش هشكر حد من المدونين عشان محدش يقول انت كل الناس عندك حلوين

بس في نفس الوقت مش هقدر اقول غير شكرا للوقت الللي قضيناه معاكم

يا اهل ومدوني اسكندريه

مارو مدونه ريتشارد قلب القطه دودو عاشقه الرومانسيه

زهراء مدونه لولا وزهرا قمرايه بنات اسكندريه حنان الشافعي

انجي مدونه هات من الاخر

اسماء نسيت اسم مدونتها

مي مدونه رحيق الورد 0 احمد البطراوي

والله مافاكر كل الاسامي بس كل اللي عايز اقوله للناس دي بجد

كنتم سبب ان كل مدوني القاهره اللي جم يستمتعوا بيوم حلو قوي

بدأ معايا روحت الهايكستب بخلص ورق الاعفاه وخلص الحمد لله

بسهوله ويسر وركبت من رمسيس وروحت علي الساعه 3 العصر كده

علي كافيه الزعيم في بحري مكان ما كانو قاعدين

والله ما عارف اقول ايه لاني بجد استمتعت جدا بكل اللي كلمتهم

المهم عشان مطولش علي نفسي لاني جاي فاصل

قومنا انا وفاتيما وخالد وشريف وضياء واحمد علي والبطرواي ومروه قلب القطه

والحشد الكريم يخرب بيت فقرك يا مروه

وعزمتنا علي مركب

صحيح انا محبتش اركب مركب لاني بصراحه

في دماغي انا لما تكون معايا حبيبتي هركب مركب لاني حسيت

اني هستمتع بشيء هي مش هتشاركني فيه

وفضلت اخلي ركوب المركب ليوم تاني تكون معايا فيه

واحب اقولها من هنا بجد كان نفسي تكوني معايا كان اليوم هيبقي احلي بكتير

بس اكيد باذن الله وربنا يقرب البعيد هيحصل بعد الجواز اني هبهدلك مراكب مع اني بغرق

في شبر ميه بس انا عارف انك هتكوني مبسوطه وانتي معايا وانا هكون طاير من الفرحه

وانا معاكي واجيب معايا ام بي فور واسمعك اغنيه هاللو ليونيل ريتشي

وبعديها اروح ذقك في الميه وانهي بنفسي اجمل حدوته بنهايه دراميه

منها اتشهر وتنزل صورتي في جرنان الاخبار اللي محدش بيشتريها

ومنها تموتي شهيده مهو الغريق بيبيقي شهيد مش كده ولا ايه؟؟؟؟

شوفتي بقي حاببلك الخير دنيا واخره ازاي

المهم هما ركبوا وقعدت مع مي وحنان وزهره علي كورنيش القلعه

القعده عليه مش هوصفها لان اي كلام علي جمالها هيفقدها معناها وجمالها

وبعد ما خلصوا المركب روحنا كلنا

وهنا ليه ملحوظه كلبوظه

اولها اني مبتعلمش من اخطائي في اختيار اكلي في اي مدينه ساحليه بروحها

وانصح اي حد مياكلش بيتزا في اي مدينه ساحليه ويخليه في السمك

لان سبحان الله مكلتش بيتزا في اي مدينه ساحليه عليها الطلب

وبعد كده اتفق الجمع علي قرار مروه قلب القطه وكذلك الشقيقه دودو

علي الذهاب الي مراجيح مولد ابو العباس

وركبنا المرجيحه اللي ركبها اخونا في الله حليم في فيلم يوم من عمري

وكانت اول مره اعملها لاني مش من هواه المراجيح

وغنينا ضحك ولعب وجد وحب انا وفاتيما ومصطفي ودودو

وبعدينا حنان الشافعي ركبت مع دودو تاني عسل يا حنان والله

ربنا يوفقك وتخلصي امتحاناتك علي خير

طبعا في المراحل اللي بكتبها بسرعه دي

الوقت كان من جماله بيتسرق بصوره غريبه

لاول مره احس اني بجد مبسوط بخروجه ولو ان كان ينقصني حبيبي يبقي معايا

وروحنا ركبنا ووصلنا مصر علي الساعه اتناشر ونص

بس بجد يوم جميل جدا جدا جدا

وانا اتبسطت جدا

بشكر كال الناس الللي اتصلت بيا تتطمن ووكده واحب اشكر زهرا علي وجه التحديد هي وريم

لان ريم وزهره بصراحه كانوا متبعين في الذهاب ريم وفي العوده زهرا

خطواتي ولا اكني كريم ابن اختهم وكأني هتوه

واحب اقول ان اليوم كان ناقصه منونه وهي بجد من الناس اللي عندها

حضور وعقل وخفه دم تخلي شكل اي يوم تكون موجوده فيه كلقاء جميل ولذيذ

واتمني تكون معوقات عدم مجيك المره الجايه قد تم التعامل معها علي اكمل وجه.

وتكوني معانا المره الجايه

كيارا هانم مني سليم طبعا وجودها جميل وروحها حلوه وربنا يوفقك

ويتمم موضوعك اللي بتتمنيه

علي خير لانك محترمه وتستاهلي كل خير

دكتوره ستيته

مش هقول بجد ان من جمال اليوم كان نفسي تكوني موجوده عشان تستمتعي

بالصحبه الحلوه اللي كانت موجوده بس طبعا ظروف امتحانات ولادك منعتك من الحضور

بس والله فعلا افتقدنا وجودك بينا انهارده قوي

ناس كتير اكيد نسيتها كانت موجوده

ناس اكتر كنت اتمني تيجي معانا

زي اختنا غاده محسن ورانيا محسن

ونوران خيخه ومش اي كلام وداليا هانم قوس قزح كتير الاساميلو عديت مش هنام

اسف لكل اللي بجد مسعفتنيش ذاكرتي ان اكتب اسمه وده زهايمر

مني ولا يعني اي شيء اخر لان بجد كل الناس اللي كانت موجوده كانت روحها حلوه وجميله

احب اقولكم تصبحوا علي خير وبجد والله من جمال اليوم مكنش نفسي ارجع او ينتهي بسرعه

وبعتذر لاي حد انا كنت سخيف عليه او اتضايق مني ورغم ان ده محصلش

لاني لذيذ وشاب عسل ومليش مثيل وفي قمه التواضع

ونتقابل يارب دايما علي ود وخير ومحبه خاليه من اي لون من الوان المصلحه والانتفاع

يلا بقي وقتكوا انتهي ومش طلباكم اكتر من كده

مراسل قناه هي وظروفها

الجامد قوي وليد الدوغري

حد ليه فيه انا شايفني جامد

سلامو عليكو

تاج السته استرها من الفضايح يا كريم

بما ان اختنا في الله منونه هانم دبستني في تاج وهي متعرفش انها كده بتسيحلي

وانطلاقا من حرصي علي عدم زعلها وانطلاقا من حرصها علي تشريدي

هجاوب علي الست اسئله في التاج يا منونه عشان تعرفي اني مش قلقان من الشرده

ولست انا الرجل الذي يخشي التسييح ع المدونه

ايه هما الست حاجات اللي يشوفني لاول مره ميعرفش انهم من صفاتي

وطبيعه حياتي اقولك وربنا يسامحك

اولا

انا عصبي بصوره رخمه جدا جدا لدرجه رخمه وده ميبنش لللي يعرفني من اول مره

والغريب ان اللي يشوفني لاول مره ممكن يوصفني بالهدوء

وده لاني طبعا مش من المفروض اني مجنون واتعصب ع الفاضي والمليان

بس اكيد لو حصل حاجه تضايقني بتعصب في ثانيه

ثانيا

اللي يشوفني لاول مره وخصوصا لو متكلمتش كتير يقول عليا اتم

ودمي تقيل وردودي واقفه بس ده بيحصل غالبا مع الناس اللي انا اساسا مبحسش براحه

اول اما اشوفهم فبلاقيني اتحولت لكائن معرفوش واتوه مني واتصرف بعجرفه واتامه

واعمل فيها رزين بس ببان خنيق

ثالثا

بخاف من القطط بصوره هستيريه مرضيه لولبيه وده نتيجه لحادث

مع احد قطط مدخلنا في الصغر وطبعا كلنا عارفين ان خربشه القط للعيل

في الصغر بترعبه طول عمره حتي الكبر اي قطه تعدي بس من جمبي بترعب

ايون بترعب ومحدش يضحك الكلاب حبايبي وصحابي ودنيتهم بتشدني جدا

رابعا

اللي يشوفني لاول مره بيقول عليا تقريبا دايما اني جريء ومبتكسفش

وده مش حقيقي عني خالص لاني بتكسف جدا وبخاف اجرح احساس

اللي ادامي وبكون حريص اشد الحرص اني محرجوش ولو حصل

وبالصدفه اتحطيت في موقف محرج بحس اني وشي احمّر واخضّر واسفّر

ويبقي وشي لوحه الوان طبيعه والاقي ودني احمّرت قوي ليه معرفش

ياريت لو حد عنده تفسير طبي بس محترم يقوله دي ودني مش حته تانيه

اي لسان طويل هيزعل عشان نبقي هارشين

خامسا (( الله يسامحك يا منونه))

اللي يشوفني من اول وهله حلوه من اول وهله دي يقول عليا متدين جدا

ودي شيء نفسي اوصله واكون بجد كده بس الحقيقه ان بصراحه مش متدين بالصوره

اللي تخللي اللي يشوفني يقتكرني متدين بس الحقيقه

اني فعلا محافظ علي الصلاه ولكن ذنوبي هي ذنوب اي شاب عادي جدا

وان كانت تزيد (( الله يسامحك يا مني ))

سادسا واخيرا

اللي بيعاملني لاول مره يقول ده بيفهم ومدردح ولافف ويتهمني اني قلبي قاسي

وده عشان ردود افعالي اللي كتير تصدم اللي ميعرفنيش كويس

بس الحقيقه اني مش لافف ولا مدردح قوي ولا حتي بفهم قوي عادي يعني

زيي زي اي حد شعبي وساكن في حي شعبي اكتسب شويه خبرات

من شغله ومن حياته ومن معاملاته ومن صداقاته ومن علاقاته

ومن نزواته ومن اختلاطه بناس اكبر منه سننا وقيمه وعقل

وبصراحه بستفيد منهم كتير علي المستوي العقلي ومن اكتر الناس

اللي فعلا بتعلم منهم مصطفي امين وايمن الجوهري صحابي

لان عقلهم جميل وفكرهم تملي بيكون عقلاني

ارتحتي يا مني يا بنت الحاج درويش

طبعا المفروض اني اهدي التاج لحد

بس ده مش هيحصل لاني بصراحه الزنقه دي متمنهاش لحد بعزه خالص

عامله زي كرسي الاعتراف وكتير مننا هيتقضح لو قال او اتكلم عن نفسه

وانا اولكم واديني شردتني اهو وربنا يسامحك يا شيخه

والف مبروك علي كتاب اختك واختنا ساره زوجي ما زال حبيبي

ويارب يكون اول الابداعات ليها وليكي وميكنش اخرها

حقّها ومش هناخد حقها بضاعه++++ تحديث مرتبط ضمنيا

التحديث

تم بحمد الله ولله الحمد في السراء والضراء سرقه شقه اخويا هذا المساء

الظاهر ان حد قرا البوست ده وحب يأكد ليا ان وجهه نظري ثاقبه فيما يخص

تدّني مستوي الأمن فقام موصي حد او قام بنفسه بكسر باب شقه اخويا

وسرق حاجات بسيطه الحمد لله ومنها جهاز كمبيوتر

لسه جديد ابن الجزمه والغريبه اننا ساكنين في منطقه ناسها مبتنامش تقريبا

ومن موقعي هذا احب اوجه رساله ثانيه لاخونا مسئول الداخليه

ايه اللي ناقص يا ريس عشان تتحرك

مفتكرش ان مستوي الامان ده يرضيك كده خالص

ومفتكرش بردو ان الاهتمام بالامن السياسي علي حساب امن المواطن

هيجيب خير للوطن او للمواطن الا شرذمه قليله من ابناء هذا الشعب

والغريبه ان امناء المباحث بيسالوني مين تفتكر اللي ممكن يعمل كده

وتتهم مين وتفتكر ان الحرامي ده جارك ولا من منطقه تانيه

قولتلو تلاقيه صاحبي

ايه يا عمنا امال اخويا راح بلغ ليه عشان احنا ندورلكوا ع الحرامي

ولا اتهم نفسي عشان اريحك واقولك انا اللي عملتها

وكنت قاصد اخضه

حاجه بنت كلب صحيح

معالي مسئول الداخليه حبيب الذل((العدل )) سابقا
نما الي علمي ان هناك حملات مروريه علي الطرق السريعه
والهاي واي والهدف منها هو معرفه السائق الذي يتعاطي المخدرات
من خلال اخذ عينه عشوائيه من دماء السائقين وذلك حقنا لدماء الساده المسافرين
علي هذه الطرق والعمل علي الاقلال من الحوادث التي تودي بحياه الالاف
الاشخاص سنويا وذلك من خلال حملات تشمل رجال من المرور
ودكاتره تحاليل ومن تظهر عينه دمه بوزتف بيتاخد وتعمله قضيه ويتنفخ علي 14
احب اشكر جناب معالي سيادتك واحييك واصقفلك علي الفكره البديعه الجميله 00
ومعاك يا كبير ومن ايدك دي لايدك دي والف شكر انك فكرت في كده او حد من رجالتك
فكّر في كده
ولتكون الصوره متكامله سياده الوزير لي رجاء من مواطن
من البلد دي وبصفتك مسئول الداخليه وكما تعلمت وتعلمنا
ان المسئول الذي يتولي منصب هام يكون مكلّف بعمل كل شيءلصالح
هذا المواطن والا يتواني في عمل ما يصلح من حال الوطن ويتفاني في خدمه اهل بلده
الرجاء
ارجو التكرم بعمل حملات تحليل دم مفاجئه علي ظباط وامناء اقسام الشرطه
ولتكن البدايه وانا هنا لا اتهم الجميع فما زال هناك رجال شرفاء انقياء
في رجالك ولا ابخسهم ولا استطيع من حقهم شيئا
ولكن لتعلم جناب معالي سيادتك ان الشعب يعرف ويعلم ان عددا ليس بالقليل
من رجال الامن وخصوصا في الاقسام والكمائن الثابته والمتحركه
مثلهم مثل باقي افراد الشعب
وسوف يتضح لمعاليك ان بعض من حاميها واقول البعض رأفه بما ستراه
من حاميها بيحشش زي حراميها
ولو كانت هناك نيه جاده لمثل هذا الفعل الجميل احب اقول وجهه نظر بسيطه
لتنفيذه وهي القيام بالأتفاق مع معمل تحاليل محايد خارج جهاز الشرطه
كالمختبر او البرج وقم بانزال حملات مفاجئه علي جميع اقسام شرطه
القاهره الكبري كبدايه في وقت واحد وبدون سابق اعلان
عشان محدش منهّم يزوّغ
اذا كات غلطه وتعاطي السائقين تضر بامن وسلامه وحياه المواطن
فالاولي ان يطبّق هذا القرار علي رجال الشرطه لسبب عظيم وهو
ان غلطه رجل الشرطه الفاسد وهم قله عشان متزعلش مهو مفيش ملايكه
.يا باشا ع الارض غلطتهم بتفسد ناس وتظلم ناس والرجل الحر واخد بالك
الحر موقن ان اهانه الانسان وظلمه اصعب عليه من الموت المحقق
ده اذا كان راجل واظن ان احنا كشعب الرجوله فيه لسه بخير00000
عندي بقي عتاب لمعاليك ومزعلني منك قوي يا كبير استني هقولك
امبارح كنت في العتبه لمشوار شخصي
المهم وقفت علي ناصيه شارع عادلي اولع سيجاره وامبارح كان الحد
والدنيا هاديه
المشهد بنت بتعدي الطريق ووراها شاب يبدو للوهله الاولي من طريقه اقترابه منها
انه معاها ولكن وما عرفش ركزت معاه ليه
قرب قرب قرب من البنت واللي للعلم كانت لابسه عادي ومحجبه
وراح بايسها علي شفايفها ايون مش غلطه املائيه
باسها علي شفايفها وجري والله زي ما بقولك كده
تفكيري اتشل سيادتك البنت وشها احمّر واصفّر وبصت عنيها
اتملت خوف ورعب
ومشيت تتلفت وراها وكأنها متهمه كونها خلقّت انثي
يرضي ربنا الكلام ده فين التواجد الأمني اللي يحمي الناس
الكلام ده كان ادام تمثال ابراهيم باشا
تعرف والله العظيم تخيلت ابراهيم باشا كان عايز ينزل ويعمل زي الناس
ويتبول علي الشعب اللي ده بقي حاله
مشيت وعلي بعد بالظبط اقل من خمسين متر في شارع عادلي
حيث جنودك المدججون باحدث انواع الاسلحه والسيارات وعساكر الامن
وذلك لحمايه المعبد اليهودي
يكش يولع علي دماغ ميتين ام اللي بناه هو احنا نحمي معبد لشويه اوساخ
ونسيب الامن الداخلي وامن المواطن
البنت اللي اتباست في وسط ميدان الاوبرا دي ايه شعورك لو كانت بنتك ولا اختك ولا مراتك
ايه شعورها هي وهي حاسه ان تهمتها كونها انثي
اهتمام جناب معالي سيادتك بالأمن السياسي زاد عن حده
علي قرب من نقابه المحامين في شارع الجلاء
قوات لو امرت بتحرير فلسطين يجيبولك نتنياهو متكتف في شوال الصبح
قوات الامن امام وبامتداد القصر العيني وشارع مجلس الشعب والشوري
كثافتها تدعوا الي حزن داخلي علي حالنا في مصر
حق البنت دي فين لانها مش روقه ومش هناخد حقها بضاعه
حق البنت دي وحق اي بنت كونها تمشي امنه مطمئنه علي عرضها وشرفها
حق اصيل من حقوق الانسان ده لو لسه شايفين اننا تخطينا تمنين مليون انسان
مش حيوان
خايف مع انتشار الفعل ده والافعال المماثله بالتحرش
ومن كتر الولع الجنسي والجوع اللي عند الشباب واللي لازم نعترف بيه
يبقي ده العادي والواحد يبقي ماشي مع مراته ويلاقي اللي يبوسها او يمسك اي منطقه ظاهره علويا
او تحتيا حسب ما ايده تطول بقي000
من شهر وعلي الكوبري الفاصل بين نادي القاهره وشيراتون القاهره
رايت بعيني شابين مصريين بيمسكوا بنتين يابانين من صدرهم وعلي بعد كام متر من كمين ثابت
ارجوك عيد ورجع نظره احترام المواطن لرجل الشرطه
من خلال تعليم رجال الشرطه حق الانسان الاصيل كانسان مش كلب
وعلموا الناس ان رجل الشرطه لخدمته واقف مش لخدمه النظام
النظام بالصوره دي هيقع هيقع الولع الجنسي وحرقه دم المواطن
اللي مش عارف هيلاقيها منين ولا منين
هتخللي اهتمام رجالتك بالامن السياسي ملوش عازه
هيخللي الدهاشنه تثور هيخللي الناس تكرهكم اكتر ما هي كرهاكم
هيخلي البنات تخاف تنزل الشارع
اللهم بلغت0000 اللهم ولّع في المتحكمين والظالمين ومعاوني الفاسدين

حلواااااااااااااااااان اتضربت يا رجاله

اولا البوست ده جريء شويتين عشان لو مش عايز تقرا

فكك ومتكملش وترجع تقول ايه يا عم انت معندكش ادب والجو ده

حاجه مخوفاني بعض الشيء ايه هي هتفهموا بس اتقلوا0000

كنت قاعد مع واحد صاحبي متجوز جديد مكملش ست شهور

في محله ودخل علينا صاحب مشترك والاتنين ما شاء الله

لو دخلوا في حيطه يعدوا منها0000

شويه ودخل واحد تاني فل عليكوا ايه يا رجاله000000

انهارده هتدعولي معلش يا حاج وليد انت الوحيد اللي مش هتعرف تدعيلي

قولتله ليه يا عم هخّرس علي بليل ولا ايه قالي لأ يا زميلي

انت هتنام حاضن المخده انما احنا بنشقي

قولتله روح يا شيخ الله بشقّيك ويخللي مراتك تمسك فيك

وراح مطلع حاجه كده ايه ده ياد 00000

قالهم افيييييييييييييييييون انا عارفه مخدوتوش قبل كده صحيح

بس عارف شكله اتهافتوا ياخدوا منه

وابتدي يوصف ويتغزل في القوه الخارقه الحارقه

الناتجه عن سنه الافيون في العلاقه الزوجيه

وازاي انه بيخلي الراجل ولا الأسد في عرينه

طب ايه يا رجاله اعمل انا ايه دلوقت حدش يعرف مرات اسد سبعها هربان

ولا انام خفيف 0000000000

خت قعدتي وسالت نفسي سؤال هو انت ممكن وانت في عز شبابك

بعد الجواز متمارسش العلاقه الحميمه الا كده او بالمنشطات

احيييييييييييييييييه يا جدعان ده انا بقول لنفسي 0000

اغلب صحابي المتجوزين بيستخدموا منشطات جنسيه

كالترامادول والانفرانيل وكل ما يدعوا الي تأخير القذف

ايه يا جدعان هو انا مأجر عجله ولا جايب واحده من تحت كوبري النزهه

دي مراتي مش واحده جايه ريد نايت وهتقلب

مش بكلم من منظور ديني للحدوته بس ازاي وانا لسه

شاب يبقي المنشط اساس علاقتي بمراتي

امال لما اوصل للخمسين ده لو حصل يعني هعمل ايه

يا نهار اسود ده الواحد لو اتعود علي كده يوصل للخمسين او منتصف الاربعين

يتفضح لو ملقاش الترامادول او الفيجا او الانفرانيل فضيحه المطاهر

يوم طلوعه ع المعاش000000

صديق قالي قبل كده وهو في نفس عمري لسه بخيره يعني

قالي لو ملقتش الحبيتين دول مبلمسش مراتي

انت عايزها تقول عليا ايه 0000

يخرب بيت كده يعني ايه ؟؟

قالي والله مبقربلها لو مكنتش واخد احيييييييييييييييييه

افرض اتمنع قالي تف من بقك انت عايزني اتخان ولا ايه

قولتله لأ يا معلم وتتخان ليه وانا موجود الموجود يسد وانا وانت واحد!!!

ليه صديق صيدلي مبيعاته اغلبها وانا عنده يا فيجا يا انفرانيل

يا فاروفيجا 000000

مره كنت قاعد عنده لقيت واحد جارنا باعت ابنه عنده حوالي

10 سنين بورقه مكتوب فيها فارو فيجا المهم كان خلص من عند صاحبي

ما السحب شديد والقوه حديد

قاله خد دي يا ابني وقول لابوك يجربهاقاله لأ يا دكتور ابويا قالي

متجبش غير اللي في الورقه مبستريحش غير عليه

قاله اديله ده بس وهو هيستريح عليه بس خليه يستني اما تنزل

تلعب في الشارع انت واخوك عشان الدوا دوا بينرفز اللي ياخده00000

يمكن اغلب مبيعاته وخصوصا في الوقت اللي بقعد عنده فيه بليل

بيكون منشطات جنسيه واغلبها شباب

بس الغريب لما شوفت في مره وانا عنده

واحده بنوته جايه تاخد المنشط ده لجوزها

طب ما تعمليله اكله سمك تمام وتقوليله كلمتين حلوين

وهتلاقيه ولا الحصان في تراك السبق بس انتي لاحقي عليه

الاكل اتسمم وخيره قل والعصبيه والخنقه وقله الدخل ومشاكل الحياه

والضغوط النفسيه والفكر ووالايجار وبامبرز العيال وغلو المعيشه

اسباب او اعذار الرجاله اللي بيماسوا الحب بالمنشطات

احييييييييييييييييييييييه تاني طب وبعدين

واحد تاني يقولي سيبك سيجاره الحشيش وبعديها متقوليش

قولتله ساعتها ولا اقولك ولا تقولي مراتك في البيت يا عمهم

انا صاحبك مش زميلتك اللي بترمي عليها يا روح امك

طب هو انا بقول كده عشان مخضتش التجربه

وبدعي الرجوله ده انا يعني سالت نفسي

ولا اللي بيحصل ده مش طبيعي

ولا الحكومه قاصده تضرب الناس في مقتل

انا من هذا المزنق احب اقول للسيد الرئيس المبجل والحكومه

المافوره ابوس ايدكم كله الا ده بلاش تلعبوا في السيستم

بلاش الله يخليكم اللعب في المنطقه دي 0000

الغريب اننا كشعب لو ركزتم شويه وخصوصا الرجاله

اغلب قعادتنا الكلام بيحود فيها ناحيه الجنس وانه احتياج اولي

بس شكلنا في الاخر هنطلع بتوع كلام وبس

وكلام عادل امام الكبير مع يسرا كبيره كان في فيلم

والرجاله شويه وهتبطل كلام والحريم تعمل اعتصام

ادام مجلس الشعب وتنام في الشارع ادامه بلاسبوع

ولا حد يبصلهم حتي لو كانوا من الحر هيتخففوا ويدوبك جويا بالعافيه

ابوس ايدك يا نظيف وحياه مراتك الجديده يا شيخ

الشعب مش طمعان في كتير هي يدوبك لقمه نضيفه

وكلمه كل خميس حته بس تكون صافيه خاليه من كل ما يعطل النطق

ولو مكنش في دماغك احب اقولك اللهي يا شيخ ما تلاقي منشط وتبقي عامل

زي صاحبي

واحب احذرك انت بالذات ((اتقوا الشيبه فان الماء ينقطع والنار تندلع))

انا قولتلك وعملت اللي عليا!!!!!!!!!!

كل سنه وانت كويس يا بوطو((بطليموس التاسع)) يا غجر

زي انهارده من الاف السنين وبما اننا فراعنه ملاعين
كان فيه حاكم اسمه بطليموس التاسع
وكان يعيس في الارض فساد وبيخنق بعلمه او من غير علمه
شعبه واذا كان وقتها يعلم فتلك مصيبه وان كانم لا يعلم فالمصيبه اعظم
صاحبنا ده كان بيحتفل زي انهارده بعيد ميلاده
كان هناك قله منتفعه تهلل له وكثره مطحونه تدعوا عليه
بس المعلم مكنش لا ده في دماغه دولاهما ولا دوكهما شاغلين خياله
وقد عثر علي برديه قديمه وجدت في المتحف الكولمبي
بجوار نادي انبي تحت الارض بعشرين قدم
تحتوي هذه البرديه علي هجاء له وكان قد الفها معارض لبطليموس
ولكنه مات حتفا ودفنت معه الا ان جاء مكتشف اغريقي
افريقي شرق عين شمسي ووجدها ووجد وصيه معها مكتوبه
بللغه الفرعونيه القديمه ترجمها فوجده يطالب من يعثر عليها
بنشرها وانطلاقا من عثوري بالصدفه البحته وانا بحاول

افهم اي شيء عن الرياضه البحته لوثيقه اعطيت لي من احد انجال

هذا المكتشف في لحظه تجلي علي قهوه الشيمي

قولت ياد انشرهالو ينوبك ثواب
منت كده كده ليك اجل وهتتواري في التراب

وبما اني عارف ان لكل اجل كتاب ولا يذكر الزمان

اي من كلا من الظالم والغاشم والمرتاب الا بكل دنو

وارتقاء من هذا العلو اقول لهذا الشاعر

روح يا شيخ هتودينا في كلبوش بس يلا امانتك اهي اتنشرت

دعواتك لاخوك يا معلم ليتنشر هو كمان
محتوي الرساله

عدّل عدّل في الدستور

وانعم فيها وعيش ف قصور

والناس عايشه ف ضيقه وضنك

حتما يوم هيهدوا السور

بيع خصخص واجمع مال

قلّب عيشك وادي جمال

طيح في الشعب براحتك هيصه((عدلت طيح منعا لالاباحه))

شعب جبان ولا عادش رجال

لا اخترناك ولا بايعناك

ولا احنا معاك منك لله

بيغنولك وبيدعولك وينافقوك

زعيم اونطه وشغل حواه

احتلالنا منا فينا

قضيها عيشها علينا

بكره نشوف 0000 سيادتك((تم حذف كلمه ابيحه لا ترجمه لها سوي هي))

وانت ف كفنك يا حامينا

000000000000000

000000000000000

00000000000000

000000000000000

لم اجد ترجمه لالابيات السابقه حرصا مني علي الذوق العام

ففضلت ان اترك مكانها نقط ولكم الخيال لتكملو ابياتها

وبصراحه مليانه اباحه ولو اضمن ان محدش يقولي انت قليل الادب

كنت نقلتها حرفيا حرصا مني علي امانه الكلمه ونسبها لقائلها

والله يرحم الجميع وربنا يتولانا برحمته وستره

واللي عايز يعرفها يسيب اميله وربنا امر بالستر

كالعاده استمتعت بلقاء حبايبنا

اخوكم في الله اللي هو انا صحي متاخر طبيعي يعني
ودي من مشاكلي مع الحياه اصل النوم سلطان ديكتاتوري
بس علي قلبي زي العسل واديني من كده كتير
نزلت محطه الزهراء ولسه هاخد تاكسي للنادي
لقيت البطل احمد عبدالحميد صاحب مدونه ابو حميد
وشريف حسن صاحب مدونه هجايص
بيتصلوا انت فين احنا دقيقتين وهنجيلك
استنانا قولت قشطه وفرت ياد يا وليد تلاته جنيه
وانا بخيل طبعا وقلت مصلحه
جم ركبت لقيتهم مستنين منونه قلت يا ولاد الايه مش
جاينلي مخصوص بس مش مشكله اديني وفرت وخلاص
احمد عبد الحميد انسان محترم وتحس وانت بتشوفه
وخصوصا لتاني مره انه انسان من عهد الرجال المحترمين مش قديم لأ
محترم ((الف سلامه لابنك وعيونه يا احمد وطمني عليه)))
شريف بقي عشره تدوينيه ومن كتر العشره بقينا صحاب واخوات
بس بردو ياد يا شريف قصيدتك لأنك جميله جميله جدا
يا جدعان ادخلوا اقروها عنده في البوستات القديمه هتعجبكم
جدا مع تحفظي علي لفظين فيها ((اكدب يعني ولا ايه)))
وصلت منونه الي ارض المحطه بسلام قادمه من بولاق
ومشينا 000000000
وصلنا النادي طبعا جريت اطلب اكل لاني كنت ميت
من الجوع ورغم اني مبكلش من اسبوع الا اللي يخليني اعيش بالعافيه
جبت الاكل وسبته مش افتري وربنا ابداااااا سده نفس غريبه
طبعا شوفت اول ما دخلت بنت عمتي الغاليه فاتيما
مش هقول اكتر من اي مره بقابلها فيها بعزها اكتر من اللي قبلها
بصراحه يا جماعه اي مدون مجاش لقاء فيه فاتيما
يبقي مشفش اخت من اطيب واجمل ما يكون
مش هتكلم كتير عن فاتيما لان معزتها لا يمكن اختصارها في كلمات
طبعا مصطفي ريااااااااااااااااااان يا نهار ابيض انت يا جدع طيب كده ليه
فيه براء غريبه الجدع ده
الدكتور اشرف والدكتوره علا صيدلانيه طالعه نازله
عارفين لما تشوفوا اتنين متجوزين شبه بعض قوي
وبنهم الله اكبر زي القمر مش بحسدكم يا علا نووووووووووو
انتي اختي حاشا وكلا البته
متكلمتش معاكي يا علا دقيقه بس اخلاقك واحترام وحضور الدكتور اشرف
فوق دماغنا وشرف لينا تواجد حد محترم زيكم وسطنا 0000000
ام بتول وبنتها ناس بالبلدي كده نضيفه من غير اي تكليف اقدر اقول لتاني مره اشوفهم
ناس محترمه وووجودهم نسمه هاديه في اللقاء انهارده
نورتي الدنيا يا بتول وعقبال ما تعزيمينا علي فرحك0000
كيااااااااااااااااااااارا ايه يا معلم اخبار الجزمه البني ايه الرومانسيه دي
قال شغل فيروز وبص للشجر والنيل وهتلاقيك سرحت
يا حاجه انا فيروز لو سمعتها في في وسط الغيطان وسط البراري
هستمتع دي فيروز بس بامانه مع النيل والخضره شيء تاني
ربنا يرزقك باين الحلال اللي يقدرك ويصونك ويشيلك
جوه جوه نن عنيه000 بس انتي متخزأيش عينه بالراحه الله يخليكي000
منونه تلك الفتاه المدونه اللي اتت من صحراء بولاق لتشارك في هذا اللقاء
وبصراحه وجودها اضاف روح خفيفه ونتمني نشوفك في الكوشه قريب يا مني000
احمد صاحب مدونه الارموطي ايه يا عم الهدوء ده لأ وايه كريم
ودفعلي في التاكس واحنا مروحين كده تبقي صاحبي وحبيبي وكفاءه
احمد سووووووووووووووتوفيق حكيم التدوين كل مره بحترمك واقدر دماغك
يا معلم كل اما اتكلم معاك اكتر ربنا يوفقك ونفرح فيك قريب
ريم يخرب بيت كده يا جدعان مصنع رقه ايه يا ريم انتي بتعقديناا برقتك
لو كنزي طلعالك انا حاجز من دلوقت قولتي ايه عريس لقطه واكون كونت نفسي00
وليد كنج توت وزوجته مدام هبه طبعا ناس تشارك في اي لقاء
تضيف عليه جو من الالفه والحميميه وربنا يبارك في ولادكم اظن ولد وبنت صح؟؟؟
رغده صاحبه مدونه طرطشه بالصلاه علي النبي شريف راح يدخلها
من الباب النادي لقاها ماسكه في سواق التكس هي دي البنات يا جدعان ولا بلاش
ظبطت الراجل قال ايه عايز خمسه جنيه ليه هي نهيبه
اهدي يا رغدا صحتك ثروتك الله يخليكي
خالد ابو همس واصريت اتكلم عنه في الاخر
عشان بجد يا خالد دي كذا مره اشوفك وانت عارف انت ايه بالنسبالي
والله العظيم تحسه كده اخوك ابن عمك شقيقك ابن خالتك
تحسه حاجات كتير كده في بعض والله يا خالد انتي مش عارف

اقولك ايه يا اخي ربنا يبارك فيك
روح يا شيخ ربنا ما يحكمك علي موزه معايا واي حته هعرف انك جاي فيها
مش هجيب حد معايا والحمد لله مكنش معايا حد انهارده
محدش يفهم غلط هو بس بسيحلي ويشردني ويقولها ده مقضيها ده كذا ده كذا بومه يا خالد
بس حبيبي وربنا

نيجي بقي للدكتوره ستيته
يا دكتوره يعني نشوفك ازاي مهو انا لو اقدر ارجع ثانويه عامه
وادخل علمي علوم واجيب مجموع كنت عملتها عشان ابقي تلميذ في مدرستك
بس المصيبه اني في اولي ثانوي كنت جايب ملحق فيرياء وكيميا
يبقي الحل انك تشرفينا بروحك وعقلك اللي منقدرش نستغني عنهم
وربنا وجودك فوق دماغي ودماغي عيالي ودماغ الناس كلها
ومتحرمناش من اننا نتشرف بوجودك يا ست الكل
يا ستي اقولك طب المره الجايه لو وجودي انا بيضايقك
عن نفسي هعمل نفسي انفزبل واشوفك بس تشرفينا

طبعا نورا خيخه واي كلام غيابها اكيد بيسيب اثر

لانها تملك من الروح وخفه الدم ما لا يستطيع احد انكاره

لعل المانع خير يا نورا وربنا يهيألك الخير والبركه

ليكي ولشريف

معذره لاي حد نسيت اكتب عنه ودي غلطه مني لظروف النسيان والسهر