تاج السته استرها من الفضايح يا كريم

بما ان اختنا في الله منونه هانم دبستني في تاج وهي متعرفش انها كده بتسيحلي

وانطلاقا من حرصي علي عدم زعلها وانطلاقا من حرصها علي تشريدي

هجاوب علي الست اسئله في التاج يا منونه عشان تعرفي اني مش قلقان من الشرده

ولست انا الرجل الذي يخشي التسييح ع المدونه

ايه هما الست حاجات اللي يشوفني لاول مره ميعرفش انهم من صفاتي

وطبيعه حياتي اقولك وربنا يسامحك

اولا

انا عصبي بصوره رخمه جدا جدا لدرجه رخمه وده ميبنش لللي يعرفني من اول مره

والغريب ان اللي يشوفني لاول مره ممكن يوصفني بالهدوء

وده لاني طبعا مش من المفروض اني مجنون واتعصب ع الفاضي والمليان

بس اكيد لو حصل حاجه تضايقني بتعصب في ثانيه

ثانيا

اللي يشوفني لاول مره وخصوصا لو متكلمتش كتير يقول عليا اتم

ودمي تقيل وردودي واقفه بس ده بيحصل غالبا مع الناس اللي انا اساسا مبحسش براحه

اول اما اشوفهم فبلاقيني اتحولت لكائن معرفوش واتوه مني واتصرف بعجرفه واتامه

واعمل فيها رزين بس ببان خنيق

ثالثا

بخاف من القطط بصوره هستيريه مرضيه لولبيه وده نتيجه لحادث

مع احد قطط مدخلنا في الصغر وطبعا كلنا عارفين ان خربشه القط للعيل

في الصغر بترعبه طول عمره حتي الكبر اي قطه تعدي بس من جمبي بترعب

ايون بترعب ومحدش يضحك الكلاب حبايبي وصحابي ودنيتهم بتشدني جدا

رابعا

اللي يشوفني لاول مره بيقول عليا تقريبا دايما اني جريء ومبتكسفش

وده مش حقيقي عني خالص لاني بتكسف جدا وبخاف اجرح احساس

اللي ادامي وبكون حريص اشد الحرص اني محرجوش ولو حصل

وبالصدفه اتحطيت في موقف محرج بحس اني وشي احمّر واخضّر واسفّر

ويبقي وشي لوحه الوان طبيعه والاقي ودني احمّرت قوي ليه معرفش

ياريت لو حد عنده تفسير طبي بس محترم يقوله دي ودني مش حته تانيه

اي لسان طويل هيزعل عشان نبقي هارشين

خامسا (( الله يسامحك يا منونه))

اللي يشوفني من اول وهله حلوه من اول وهله دي يقول عليا متدين جدا

ودي شيء نفسي اوصله واكون بجد كده بس الحقيقه ان بصراحه مش متدين بالصوره

اللي تخللي اللي يشوفني يقتكرني متدين بس الحقيقه

اني فعلا محافظ علي الصلاه ولكن ذنوبي هي ذنوب اي شاب عادي جدا

وان كانت تزيد (( الله يسامحك يا مني ))

سادسا واخيرا

اللي بيعاملني لاول مره يقول ده بيفهم ومدردح ولافف ويتهمني اني قلبي قاسي

وده عشان ردود افعالي اللي كتير تصدم اللي ميعرفنيش كويس

بس الحقيقه اني مش لافف ولا مدردح قوي ولا حتي بفهم قوي عادي يعني

زيي زي اي حد شعبي وساكن في حي شعبي اكتسب شويه خبرات

من شغله ومن حياته ومن معاملاته ومن صداقاته ومن علاقاته

ومن نزواته ومن اختلاطه بناس اكبر منه سننا وقيمه وعقل

وبصراحه بستفيد منهم كتير علي المستوي العقلي ومن اكتر الناس

اللي فعلا بتعلم منهم مصطفي امين وايمن الجوهري صحابي

لان عقلهم جميل وفكرهم تملي بيكون عقلاني

ارتحتي يا مني يا بنت الحاج درويش

طبعا المفروض اني اهدي التاج لحد

بس ده مش هيحصل لاني بصراحه الزنقه دي متمنهاش لحد بعزه خالص

عامله زي كرسي الاعتراف وكتير مننا هيتقضح لو قال او اتكلم عن نفسه

وانا اولكم واديني شردتني اهو وربنا يسامحك يا شيخه

والف مبروك علي كتاب اختك واختنا ساره زوجي ما زال حبيبي

ويارب يكون اول الابداعات ليها وليكي وميكنش اخرها