كالعاده استمتعت بلقاء حبايبنا

اخوكم في الله اللي هو انا صحي متاخر طبيعي يعني
ودي من مشاكلي مع الحياه اصل النوم سلطان ديكتاتوري
بس علي قلبي زي العسل واديني من كده كتير
نزلت محطه الزهراء ولسه هاخد تاكسي للنادي
لقيت البطل احمد عبدالحميد صاحب مدونه ابو حميد
وشريف حسن صاحب مدونه هجايص
بيتصلوا انت فين احنا دقيقتين وهنجيلك
استنانا قولت قشطه وفرت ياد يا وليد تلاته جنيه
وانا بخيل طبعا وقلت مصلحه
جم ركبت لقيتهم مستنين منونه قلت يا ولاد الايه مش
جاينلي مخصوص بس مش مشكله اديني وفرت وخلاص
احمد عبد الحميد انسان محترم وتحس وانت بتشوفه
وخصوصا لتاني مره انه انسان من عهد الرجال المحترمين مش قديم لأ
محترم ((الف سلامه لابنك وعيونه يا احمد وطمني عليه)))
شريف بقي عشره تدوينيه ومن كتر العشره بقينا صحاب واخوات
بس بردو ياد يا شريف قصيدتك لأنك جميله جميله جدا
يا جدعان ادخلوا اقروها عنده في البوستات القديمه هتعجبكم
جدا مع تحفظي علي لفظين فيها ((اكدب يعني ولا ايه)))
وصلت منونه الي ارض المحطه بسلام قادمه من بولاق
ومشينا 000000000
وصلنا النادي طبعا جريت اطلب اكل لاني كنت ميت
من الجوع ورغم اني مبكلش من اسبوع الا اللي يخليني اعيش بالعافيه
جبت الاكل وسبته مش افتري وربنا ابداااااا سده نفس غريبه
طبعا شوفت اول ما دخلت بنت عمتي الغاليه فاتيما
مش هقول اكتر من اي مره بقابلها فيها بعزها اكتر من اللي قبلها
بصراحه يا جماعه اي مدون مجاش لقاء فيه فاتيما
يبقي مشفش اخت من اطيب واجمل ما يكون
مش هتكلم كتير عن فاتيما لان معزتها لا يمكن اختصارها في كلمات
طبعا مصطفي ريااااااااااااااااااان يا نهار ابيض انت يا جدع طيب كده ليه
فيه براء غريبه الجدع ده
الدكتور اشرف والدكتوره علا صيدلانيه طالعه نازله
عارفين لما تشوفوا اتنين متجوزين شبه بعض قوي
وبنهم الله اكبر زي القمر مش بحسدكم يا علا نووووووووووو
انتي اختي حاشا وكلا البته
متكلمتش معاكي يا علا دقيقه بس اخلاقك واحترام وحضور الدكتور اشرف
فوق دماغنا وشرف لينا تواجد حد محترم زيكم وسطنا 0000000
ام بتول وبنتها ناس بالبلدي كده نضيفه من غير اي تكليف اقدر اقول لتاني مره اشوفهم
ناس محترمه وووجودهم نسمه هاديه في اللقاء انهارده
نورتي الدنيا يا بتول وعقبال ما تعزيمينا علي فرحك0000
كيااااااااااااااااااااارا ايه يا معلم اخبار الجزمه البني ايه الرومانسيه دي
قال شغل فيروز وبص للشجر والنيل وهتلاقيك سرحت
يا حاجه انا فيروز لو سمعتها في في وسط الغيطان وسط البراري
هستمتع دي فيروز بس بامانه مع النيل والخضره شيء تاني
ربنا يرزقك باين الحلال اللي يقدرك ويصونك ويشيلك
جوه جوه نن عنيه000 بس انتي متخزأيش عينه بالراحه الله يخليكي000
منونه تلك الفتاه المدونه اللي اتت من صحراء بولاق لتشارك في هذا اللقاء
وبصراحه وجودها اضاف روح خفيفه ونتمني نشوفك في الكوشه قريب يا مني000
احمد صاحب مدونه الارموطي ايه يا عم الهدوء ده لأ وايه كريم
ودفعلي في التاكس واحنا مروحين كده تبقي صاحبي وحبيبي وكفاءه
احمد سووووووووووووووتوفيق حكيم التدوين كل مره بحترمك واقدر دماغك
يا معلم كل اما اتكلم معاك اكتر ربنا يوفقك ونفرح فيك قريب
ريم يخرب بيت كده يا جدعان مصنع رقه ايه يا ريم انتي بتعقديناا برقتك
لو كنزي طلعالك انا حاجز من دلوقت قولتي ايه عريس لقطه واكون كونت نفسي00
وليد كنج توت وزوجته مدام هبه طبعا ناس تشارك في اي لقاء
تضيف عليه جو من الالفه والحميميه وربنا يبارك في ولادكم اظن ولد وبنت صح؟؟؟
رغده صاحبه مدونه طرطشه بالصلاه علي النبي شريف راح يدخلها
من الباب النادي لقاها ماسكه في سواق التكس هي دي البنات يا جدعان ولا بلاش
ظبطت الراجل قال ايه عايز خمسه جنيه ليه هي نهيبه
اهدي يا رغدا صحتك ثروتك الله يخليكي
خالد ابو همس واصريت اتكلم عنه في الاخر
عشان بجد يا خالد دي كذا مره اشوفك وانت عارف انت ايه بالنسبالي
والله العظيم تحسه كده اخوك ابن عمك شقيقك ابن خالتك
تحسه حاجات كتير كده في بعض والله يا خالد انتي مش عارف
اقولك ايه يا اخي ربنا يبارك فيك
روح يا شيخ ربنا ما يحكمك علي موزه معايا واي حته هعرف انك جاي فيها
مش هجيب حد معايا والحمد لله مكنش معايا حد انهارده
محدش يفهم غلط هو بس بسيحلي ويشردني ويقولها ده مقضيها ده كذا ده كذا بومه يا خالد
بس حبيبي وربنا

نيجي بقي للدكتوره ستيته
يا دكتوره يعني نشوفك ازاي مهو انا لو اقدر ارجع ثانويه عامه
وادخل علمي علوم واجيب مجموع كنت عملتها عشان ابقي تلميذ في مدرستك
بس المصيبه اني في اولي ثانوي كنت جايب ملحق فيرياء وكيميا
يبقي الحل انك تشرفينا بروحك وعقلك اللي منقدرش نستغني عنهم
وربنا وجودك فوق دماغي ودماغي عيالي ودماغ الناس كلها
ومتحرمناش من اننا نتشرف بوجودك يا ست الكل
يا ستي اقولك طب المره الجايه لو وجودي انا بيضايقك
عن نفسي هعمل نفسي انفزبل واشوفك بس تشرفينا
طبعا نورا خيخه واي كلام غيابها اكيد بيسيب اثر
لانها تملك من الروح وخفه الدم ما لا يستطيع احد انكاره
لعل المانع خير يا نورا وربنا يهيألك الخير والبركه
ليكي ولشريف

معذره لاي حد نسيت اكتب عنه ودي غلطه مني لظروف النسيان والسهر




23 Comments:

صوت من مصر said...

عمو وليد
والله كان نفسى اروح بس تعبان موت عندى شغل طحن وبعدها هبقى فى فترة صياعه وفاضى اكون مع اخويا وحبيبى قلبى واللى باركلى على الموزه وادانى النصايح

كيــــــــــــارا said...

والله كان يوم جميل

وبعدين انا مش رومانسيه خالث كلا البتا

اطلاقا اطلاقا ههههههههههه

وفضحتني بالجزمة البني هههههههه

بجد كنت سعيده باليوم جدااااااااا

وفيروز تسمعها في اي مكان لازم هتاخدك لكن لما تكون مظبط الجو كمان يبقي خراااااااافة بجد

ملهاش حل نوهاااااااااائى

صيدلانيه طالعه نازله said...

امبارح كان من الايام الحلوه فعلا

ربنا يارب دايما يجمعنا فى الخير و العمل الطيب

كان نفسلى بجد اتكلم معاك بس الوقت كان ضيق و انا كنت مسافره
بس ان شاء الله ملحوقه
و يا وليد كتير قوى الكلام اللى قلته فى حقى انا و الباشا الكبير
هههههههههههههههههه
انت مدلعنا قوى
و نردهالك اما نزورك فى بيتك ان شاء الله

MR.PRESIDENT said...

ربنا يكون في عونك يا شباب .. كويس انكوا استمتعتوا باليوم ,, وشحنتوه لطاقة الغد .. انا كان نفسي من زمان احضر لقاء للمدونين .. بس الظروف بتحكم ,. تحياتي لك

MR.PRESIDENT said...
أزال المؤلف هذا التعليق.
فتاه من الصعيد said...

لقاء مبارك :)) ..

كل لقاء وانتم فاعلين للخير

تحياتي

لولا وزهراء said...

وليدوووووووووووووو
والله كان نفسى اجى بس فيه شوية ظروف هى اللى منعتنى وان شاء الله فى انتظاركم فى اليكس عن قريب حيث البحر والجو المنعش وبعيد عن جو القاهره الجاف تعالوا اتفرجوا على الرطوبه معنا

ربنا يقدركم على فعل الخير بكل صراحه الواحد فرحان عن جد انه واحد من المدونين المحترمين

زهراء

wasf_elahsas said...

كل مرة اقرا عن اللقاءات دي ببقي نفسي احضر معاكو
بيعجبني اوي الترابط ده والاحساس الحلو
ربنا يديمها عليكو نعمة
تحياتي

ستيتة حسب الله الحمش said...

ندالة غصب عني
طب اسئل خالد صوتي عامل ازاي
انا منيضة يا عزيزي
ولكني مش من النوع البكاء حالة المنض :)
انا كمان عاوزة اقعد معاك وقعدة طويلة طول القطن طويل التيلة الله يرحمه

فرحانة انكم انبسطوا وربنا يتقبل منكم يارب

beautiful mind said...

ازيك يا استاذ وليد
لتاني مرة بعد ما علقت عند كيارا
بقول والله كان نفسي اكون معاكم بجد
بس للاسف معرفتش لا المكان ولا العنوان
وللاسف محاولاتي بائت بالفشل
معلش ملحوقة ان شاء الله المرة الجايه
اعرف اكون موجود
بس فيه طلب صغير
ياريت اي حد هيشارك في اللقاء يبقي يكتب في مدونته المكان والمعاد علشان نعرف نتواصل
تقبل تحياتي
وكل لقاء وانت بخير

فاتيما said...

,اد يا بن عمتى

اولاااااااا

كلك ذوق و شياكة
و جدعنة

ثانيا انا مرضتش اكتب بوست عندى عشان كنت هسيح لناس كتير و اولهم سيادتك و اقول انك خاسس و خاضضنا عليك خضة فحقلى مقلمة بالعريض ..

و ثالثاً
ربنا يكتر فى البؤج
و يجمعنا دايما ع الخير و بس

رابعا
ربنا يطمنى عليك
و اسمع اخبار حلوة عنك طول الوقت

خامسا
فكر ف اللى قولتهولك
و تأنى ى ى ى يا جدع قدر امكانك


سادساً
عقبال ما اشوفك دايما فى أى لقاء تدوينى دايما على خير

يا بن عمتى ى ى ى

كيكى عوووووو said...

الوحوش وحوش فى اى حته ياجدع

مهموهـــــــة said...

سعيدة اوي انكم انبسطوا مع بعض
و يا رب دايما متجمعين في الخير

و انا زعلانة بجد يا واد يا وليد

خليكم اتقابلوا كده و غيظني
و بعدين ما جبتش سيرتي ليه ؟؟؟؟؟

و انا مش قلتلك اي لقاء بينكم تسلملي على الناس ؟؟؟؟؟؟؟؟
يعني هو انا ذنبي ايه اني عايشة في الامارات يا ناس ؟؟؟
ها ؟؟؟؟؟؟؟؟
ذنبي ايه ؟؟؟؟؟؟؟؟؟؟؟؟؟؟؟؟؟؟


حد يرد عليا ؟؟؟؟؟
الو ؟؟؟
الووووووووووو

لقد نفذ رصيدكم
يرجى قفل السماعة و تبطلي رغي

طيب
سلام يا وليد

sweet angel said...

طيب والله اللقاءات دي حلوة ومفيده

امال ليه العقد ؟؟؟


منتظره تعليقك على البوست الي عندي في المدونه

mostafa rayan said...

باشا والله انا اللي فرحان اني شوفتك وشوفت كل الناس الحلوة اللي كانت موجودة ربنا يطمناعليك يا جميل ويصلحلك كل الاحوال

همس الاحباب said...

هههههههههه
بومه يا غراب
لا بجد انت واخد عنى فكرة غلط خالص
بس نصيحة بلاش تعزمنى يوم فرحك
ما اضمنش الظروف بصراحة
هههههههههه
ربنا يكرمك ويسعدك يا وليد لانك انسان تستاهل كل خير ونصيبك موجود باذن الله
وخلى بالك من نفسك شوية انا خايف المكرة الجاية تكون اختفيت يا جدع
سلامووزز

أبو حميد said...

وليد باشا ...إيه أخبارك؟
يارب دايما متجمعين فى الخير
وشكرا يا معلم على المجاملة الحلوة دى
أشوفك على خير
سلام

خواطر شابة said...

متجمعين في الخير دائما ان شاء الله وربي يجعله في ميزان حسناتكم ويقبله منكم يارب
مع ودي

мαησηα said...

ههههههههه اتت من صحراء بولاق يا نهار اسوح عليك ههههههههه انت بقالك قد ايه مارحتش هناك ؟؟
مابتعديش من على جامعة الدول العربية هههه وتشوف زحمة كده هناك انت مشكلة والله

تسلملى يا وليدده من زوقك والله انت بجد اللى حد عسول خالص وبجد دمك خفيف ولمض كده بتعمل جو حلو ف المكان

وغير الصورة بقه بتاعة الفيس خلى المزز تهل عليك ههههههههه

ربنا يفرحنا فيك انت الاول وازغرطلك يوم فرحك كده ويصلحلك الحال يارب ويريح بالك وقلبك اللهم امييييييييين

مبسوطة وسعيدة انى شوفتك واتشرفت جدا بمعرفتك

شفـقــة و إحســــان said...

ربنا يباركلكم يارب يا وليد ويجعله فى ميزان حسناتكم
دمت بكل خير

فتافيت said...

يعني اول مرة ادخل هنا.. وتشلني كده عااااااااااااااا

انتوا بتتفقوا امته ع اللقاءات يا مدونين مصر :(((.. خياااااااانة

كتير من اللي كانوا في اللقاء حبايبي .. طيب انا ماسمعتش ازاي عن اللقاء؟؟؟

سيبك اهم حاجة.. انك لاقيت اللي يحاسب على التاكسي وانت مروح.. كده انت اشتراوس الجنزبيل يا ريس :)

ابقى اجي يوم تاني.. بقى
بس بلاش تشلني والنبي تاني.. وحاسب ع التاكسي اللي انا جيت به ده.. آه ماليش دعوة P: .. انا واحدة عاطلة ويجعل بيوت المحسنين عمااااااار

هي وظروفها said...

تعليق عام

بجد انا مبسوط جدا
ان انا بتنمي لناس محترمه زيكم كلكم

ومبسوط اكتر بناس من العالم ده بتعسعي تغير من واقعنا السيء
وبتسعي في عمل الخير

وبجد الف شكر لكل اللي علق هنا علي الموضوع ده

وملقتش كلام اقوله لكل حد علي حده

فلذلك هقولكم كلكم

ربنا يجعلكم ويجعلنا من اسباب نشر الخير

وربنا يجمعنا في الدنيا علي خير

وفي الاخره في جنته ومستقر رحمته

يلا بقي كفايه عليكوا كده هتنهبوا ولا ايه

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل