حقّها ومش هناخد حقها بضاعه++++ تحديث مرتبط ضمنيا

التحديث
تم بحمد الله ولله الحمد في السراء والضراء سرقه شقه اخويا هذا المساء
الظاهر ان حد قرا البوست ده وحب يأكد ليا ان وجهه نظري ثاقبه فيما يخص
تدّني مستوي الأمن فقام موصي حد او قام بنفسه بكسر باب شقه اخويا
وسرق حاجات بسيطه الحمد لله ومنها جهاز كمبيوتر
لسه جديد ابن الجزمه والغريبه اننا ساكنين في منطقه ناسها مبتنامش تقريبا
ومن موقعي هذا احب اوجه رساله ثانيه لاخونا مسئول الداخليه
ايه اللي ناقص يا ريس عشان تتحرك
مفتكرش ان مستوي الامان ده يرضيك كده خالص
ومفتكرش بردو ان الاهتمام بالامن السياسي علي حساب امن المواطن
هيجيب خير للوطن او للمواطن الا شرذمه قليله من ابناء هذا الشعب
والغريبه ان امناء المباحث بيسالوني مين تفتكر اللي ممكن يعمل كده
وتتهم مين وتفتكر ان الحرامي ده جارك ولا من منطقه تانيه
قولتلو تلاقيه صاحبي
ايه يا عمنا امال اخويا راح بلغ ليه عشان احنا ندورلكوا ع الحرامي
ولا اتهم نفسي عشان اريحك واقولك انا اللي عملتها
وكنت قاصد اخضه
حاجه بنت كلب صحيح
معالي مسئول الداخليه حبيب الذل((العدل )) سابقا
نما الي علمي ان هناك حملات مروريه علي الطرق السريعه
والهاي واي والهدف منها هو معرفه السائق الذي يتعاطي المخدرات
من خلال اخذ عينه عشوائيه من دماء السائقين وذلك حقنا لدماء الساده المسافرين
علي هذه الطرق والعمل علي الاقلال من الحوادث التي تودي بحياه الالاف
الاشخاص سنويا وذلك من خلال حملات تشمل رجال من المرور
ودكاتره تحاليل ومن تظهر عينه دمه بوزتف بيتاخد وتعمله قضيه ويتنفخ علي 14
احب اشكر جناب معالي سيادتك واحييك واصقفلك علي الفكره البديعه الجميله 00
ومعاك يا كبير ومن ايدك دي لايدك دي والف شكر انك فكرت في كده او حد من رجالتك
فكّر في كده
ولتكون الصوره متكامله سياده الوزير لي رجاء من مواطن
من البلد دي وبصفتك مسئول الداخليه وكما تعلمت وتعلمنا
ان المسئول الذي يتولي منصب هام يكون مكلّف بعمل كل شيءلصالح
هذا المواطن والا يتواني في عمل ما يصلح من حال الوطن ويتفاني في خدمه اهل بلده
الرجاء
ارجو التكرم بعمل حملات تحليل دم مفاجئه علي ظباط وامناء اقسام الشرطه
ولتكن البدايه وانا هنا لا اتهم الجميع فما زال هناك رجال شرفاء انقياء
في رجالك ولا ابخسهم ولا استطيع من حقهم شيئا
ولكن لتعلم جناب معالي سيادتك ان الشعب يعرف ويعلم ان عددا ليس بالقليل
من رجال الامن وخصوصا في الاقسام والكمائن الثابته والمتحركه
مثلهم مثل باقي افراد الشعب
وسوف يتضح لمعاليك ان بعض من حاميها واقول البعض رأفه بما ستراه
من حاميها بيحشش زي حراميها
ولو كانت هناك نيه جاده لمثل هذا الفعل الجميل احب اقول وجهه نظر بسيطه
لتنفيذه وهي القيام بالأتفاق مع معمل تحاليل محايد خارج جهاز الشرطه
كالمختبر او البرج وقم بانزال حملات مفاجئه علي جميع اقسام شرطه
القاهره الكبري كبدايه في وقت واحد وبدون سابق اعلان
عشان محدش منهّم يزوّغ
اذا كات غلطه وتعاطي السائقين تضر بامن وسلامه وحياه المواطن
فالاولي ان يطبّق هذا القرار علي رجال الشرطه لسبب عظيم وهو
ان غلطه رجل الشرطه الفاسد وهم قله عشان متزعلش مهو مفيش ملايكه
.يا باشا ع الارض غلطتهم بتفسد ناس وتظلم ناس والرجل الحر واخد بالك
الحر موقن ان اهانه الانسان وظلمه اصعب عليه من الموت المحقق
ده اذا كان راجل واظن ان احنا كشعب الرجوله فيه لسه بخير00000
عندي بقي عتاب لمعاليك ومزعلني منك قوي يا كبير استني هقولك
امبارح كنت في العتبه لمشوار شخصي
المهم وقفت علي ناصيه شارع عادلي اولع سيجاره وامبارح كان الحد
والدنيا هاديه
المشهد بنت بتعدي الطريق ووراها شاب يبدو للوهله الاولي من طريقه اقترابه منها
انه معاها ولكن وما عرفش ركزت معاه ليه
قرب قرب قرب من البنت واللي للعلم كانت لابسه عادي ومحجبه
وراح بايسها علي شفايفها ايون مش غلطه املائيه
باسها علي شفايفها وجري والله زي ما بقولك كده
تفكيري اتشل سيادتك البنت وشها احمّر واصفّر وبصت عنيها
اتملت خوف ورعب
ومشيت تتلفت وراها وكأنها متهمه كونها خلقّت انثي
يرضي ربنا الكلام ده فين التواجد الأمني اللي يحمي الناس
الكلام ده كان ادام تمثال ابراهيم باشا
تعرف والله العظيم تخيلت ابراهيم باشا كان عايز ينزل ويعمل زي الناس
ويتبول علي الشعب اللي ده بقي حاله
مشيت وعلي بعد بالظبط اقل من خمسين متر في شارع عادلي
حيث جنودك المدججون باحدث انواع الاسلحه والسيارات وعساكر الامن
وذلك لحمايه المعبد اليهودي
يكش يولع علي دماغ ميتين ام اللي بناه هو احنا نحمي معبد لشويه اوساخ
ونسيب الامن الداخلي وامن المواطن
البنت اللي اتباست في وسط ميدان الاوبرا دي ايه شعورك لو كانت بنتك ولا اختك ولا مراتك
ايه شعورها هي وهي حاسه ان تهمتها كونها انثي
اهتمام جناب معالي سيادتك بالأمن السياسي زاد عن حده
علي قرب من نقابه المحامين في شارع الجلاء
قوات لو امرت بتحرير فلسطين يجيبولك نتنياهو متكتف في شوال الصبح
قوات الامن امام وبامتداد القصر العيني وشارع مجلس الشعب والشوري
كثافتها تدعوا الي حزن داخلي علي حالنا في مصر
حق البنت دي فين لانها مش روقه ومش هناخد حقها بضاعه
حق البنت دي وحق اي بنت كونها تمشي امنه مطمئنه علي عرضها وشرفها
حق اصيل من حقوق الانسان ده لو لسه شايفين اننا تخطينا تمنين مليون انسان
مش حيوان
خايف مع انتشار الفعل ده والافعال المماثله بالتحرش
ومن كتر الولع الجنسي والجوع اللي عند الشباب واللي لازم نعترف بيه
يبقي ده العادي والواحد يبقي ماشي مع مراته ويلاقي اللي يبوسها او يمسك اي منطقه ظاهره علويا
او تحتيا حسب ما ايده تطول بقي000
من شهر وعلي الكوبري الفاصل بين نادي القاهره وشيراتون القاهره
رايت بعيني شابين مصريين بيمسكوا بنتين يابانين من صدرهم وعلي بعد كام متر من كمين ثابت
ارجوك عيد ورجع نظره احترام المواطن لرجل الشرطه
من خلال تعليم رجال الشرطه حق الانسان الاصيل كانسان مش كلب
وعلموا الناس ان رجل الشرطه لخدمته واقف مش لخدمه النظام
النظام بالصوره دي هيقع هيقع الولع الجنسي وحرقه دم المواطن
اللي مش عارف هيلاقيها منين ولا منين
هتخللي اهتمام رجالتك بالامن السياسي ملوش عازه
هيخللي الدهاشنه تثور هيخللي الناس تكرهكم اكتر ما هي كرهاكم
هيخلي البنات تخاف تنزل الشارع
اللهم بلغت0000 اللهم ولّع في المتحكمين والظالمين ومعاوني الفاسدين

32 Comments:

همس الاحباب said...

حضرتك كنت مشيت شوية ناحية شارع محمد فريد عند بنك مصر الفرع الرئيسى وانت كنت شفت العجب العجاب من مظاهرات الشعب المهضوم حقه وكم قوات الامن المحاصرة ورجال الشرطة الاجلاء من اول العسكرى لحد مساعد الامن وكانك فى ثكنة عسكرية بالرغم من المتظاهرين شرذمة قليلة من البشر لا تحتاج لكل هذا ومظاهرة سلمية تطالب برواتبهم المتاخرة لعدة شهور
مع الاسف البلد اصبح بلد بوليس سياسى فقط
اما حماية المواطن وامنه فالبقاء لله
لان الشعب والشرطة فى خدمة الحاكم بامر الله
بعد ماكان الشرطة فى خدمة الشعب
وحسبنا الله ونعم الوكيل
تحياتى

خواطر شابة said...

تدوينتك اليوم توجع القلب لكن صراحة المشكلة التي تعرضت لها البنت لن تحل بمقاربة امنية لابد من تظافر عوامل عدة لحل هذه المشكلة لان ما حصل هو نتيجة لمشاكل عديدة لابد من ايجاد حلول لها انا هنا لاأدافع عن الشاب مطلقا هو جبان ويستحق الشنق على فعلته وانتهاكه حرمة بنات الناس لكن انا اؤمن ان الحل الامني لن يعالج المشكلة قد يخفف بعض مظاهرها لكنه لن يقضي عليها لابد من اصلاح اجتماعي واصلاح سياسي لتتغير الامور.

مهموهـــــــة said...

ههههههههههههههههههههههههههههه
حلوة حسب ما ايده تطول دي
ده انت كده طول عمرك كلامك رهيب
بس و الله الواحد ما عارف يضحك و لا يبكي على همومنا دي
فعلا الواحد بقى مخنوق خلاص
و فعلا و الله البنت دي و غيرها كتير لازم حقهم يرجع
و انا ما بقتش عارفة الشباب مالهم ؟؟
يا سيدي اللي عنده ولع جنسي يتجوز و يلم نفسه
ايوة هنقول مش لاقي ياكل
بس اهو يقعد في عشة هو ومراته
اكرم له هو و علشان يحترم نفسه شوية
اما عن موضوع التحاليل ده ؟؟
انا شايفة ان مالوش اي اهمية
و لا هيحصل
و اللي هيعرف يطنشه و اللي هيعرف يزوغ منه
ما هو لو تعرف
الخدمات دي كلها بتتعمل علشان الحكومة تاخد فلوس رشاوي من الناس و تعديها المرة دي و المرة اللي بعدها و اللي قبلها
هههههههههههههههههه
اه و الله
الناس في مصر بقى متاخيرين اوي بجد
احنا هنا الشوارع بقى فيها كل 100 كاميرات مراقبة للسيارت و اللي جواها
ههههههههههههههههههههههههههه
اه و الله يا وليد الواحد بقى قاعد محترم في السيارة
ههههههههههههههههههههههههههه
و الراجل يقعد بعيد عن مراته و حاجة تقرف
هههههههههههههههه

يللا ادي حال الدنيا

و الف مبروك تاني و تالت يا عريس

خالص تحياتي و تقديري

beautiful mind said...

يارب يا وليد رسالتك دي بجد توصله
والله متعرف شعوري وانا بقرا المواقف اللي بتحكيها
فعلا الدنيا معدتش امان بالمره
رساله تستحق القراءة والنشر
تسلم ايدك ياليدو
وتحياتي

Wanda said...

تحليل الدم صعب يتاخذ كده فى اى مكان و اى توقيت
تحليل الشارع بتبقى تحليل التنفس او اللعاب
حيطبقوها ازى

صحيح انا سمعت ان فى الافراح فى مناطق شعبية رجال الشرطة بتهادوى بالبانجو علشان ميغلسوش على اصحاب الفرح الى بيوزعوا على المهمين بيرة و بانجو

اعتقد من ساعة ما سمعت الكلام ده افتكرت عادل امام و هو مدمن فى الفيلم مع اثار الحكيم (من جاور الفران يتلسع)

ربنا يشفى المجتمع من كل ده

ليا سؤال لو ممكن جملتك
"المشهد بنت بتعدي الطريق ووراها شاب يبدو للوهله الاولي من طريقه اقترابه منها انه معاها"
غريب انك افتكرت انه معاها ليه؟؟

بس حقولك ليه سكتت و مصرختش
اصلى عاصرت قصادى حادثتين الانثى فيها احتجت بالكلام بصوت عالى و كل الرجالة الى حواليها ركبوا عليها العيب انها السبب و الاحسن تسكت

اعتقد المفروض مدام الطوارئ حتقد معانا لحد مامتتنا نطالب يبقى قانون للارهاب و للمخدرات و للتحرشات
بس لما رجل الشرطة اى كانت رتبه بيعاكس نعمل ايه ؟؟؟؟؟؟؟؟؟؟؟؟؟؟؟؟؟؟

هوبتي said...

لا تعليق بجد

حسبي الله ونعمه الوكيل وربنا يصبرها والله يكون في عونها ويرحمها برحمته

أسمعنى شكراًً said...

تناولت الموضوع فى منتهى الجمال والحرفة

وأتكلمت على العوامل الصحيحة
والتى هى السبب فى الفساد ربنا يوفقك


تحياتى شكرا

MONTY said...

يا اخى انا بدخلك وكل مره لازم رود فعلى تختلف ف نفس البوست


يعنى اسرح ف الكلام وفجأأأه اضحك وفجأأأأه اتصدم وفجأأأه والخخخخخ


احنا اصلا معندناش اى نظام امن وعلى رايك هما رايحين يحرسوا المعبد اليهودى (يكش يولع يارب)
وسايبين اللى البظرميط اللى ف الشوارع ده كمان فميدان فما بالك بقى باللى بيحصل ف الحوارى واحنا ماشاء الله شوارعنا معظمها ضلمه ويقتل فيها القتيل ويغتصبوا اى واحده مهما كان سنها ولا لبسها

وعلى فكره .. البت دى لو كانت عملت اى حاجه صدقنى كانوا مش بعيد يضروبها ويقولوا بتتبلى ع الواد

ياعزيزى الدوغرى احنا ف بلد مات فيه كل شيء محترم ولا يتبقى غير بقايا بقايا

وربنا يستر على ولايانا ومش عايزين بقى نجيب ف سيرة الناس زى اللى ميسماش بتاع الداخليه ده ربنا ياخده وهو واللى زيه ويجعل دعوتى من حده ومن نصيبه يالا اتمسى بالخير ةاعد بالعافيه

فتاه من الصعيد said...

فقدان الامن في الشوارع نتيجه تكريس المن لحمايه شويه الحراميه وضرب المتظاهرين

دول مقعين نص الظباط ع النت علشان خايفين

تحياتي

بنت وولد said...

و الله مش عارفه اقول لحضرتك ايه
بس فى الزمن اللى احنا فيه بقت الشرطه بتحمى الفنانين و البشوات الكبار و ذوى الحصانه
لكن الشعب اللى زى حالاتنا يولع بجاز
و ليه الجاز ده حتى بقى غالى و نادر
يولعوا بأى حاجه رخيصه
كلامك موجع قوى بس للاسف دى الحقيقه

мαησηα said...

وليد انا مذبهلة وانت عارف رائى

ف البوست

اصلا بجد مش متخيلة ان دى مصر

ربنا يسترها معانا دنيا واخرة يارب

وليد _ وش بيبرش _ هناك تااااج

ف انتظارك ف واحد شاى

اننى دبستك فيه معلش معلش

د. ياسر عمر عبد الفتاح said...

حاجو وسخة بجد

فاتيما said...

و الله يا وليد
ما عارفة اقولك ايه؟؟


اولا
ربنا يعوض على اخوك
مفيش حاجة هترجع طبعاااا
البلد اصله على سفيح ساخن و البوليس مش فاضى يا بنى



ثانيا
البنت دى مش روقة
لأ
دى تجسيد حى لمصر تمام
مصر بقت
البنت دى


ثالثا
انا منقمصة لأنك كنت ف شارع عدلى
يعنى جنبى يا واد و انا معرفشى
عشان نوجب معاك و نعمل منظر
بدل حرقة الدم اللى انتا شوفتها


رابعا
بصفتى من سكان المكان
عاوزة اقولك ان النيلة اليهودى دا وقف حال الشارؤع بحاله
و محلات كتير
خصوصا اللى مفتوحة قصاده
كل شوية حد يشترى المحل و يتقفل
و يتغير النشاط
و يرجع ينفتح و يتقفل
و مفيش فايدة
الشارع دا بليل ضلمة وكأنه خرابة ..
و تقريبا متأجرلهم مفروش
انا نفسى مبحبش أعدى منه
إلا للشديد القوى ..
لأنى بحس انه مش بتاعنا
دا بتاعهم
ربنا ينتقم منهم
و من اللى سايبهم



خامسا
انتا جاى انتا و سلمى اسكنكرية
و لا منفضلنا
و هتروح تدور عالحرامى ؟؟


سادسا
فدا اخوك و فداك
متزعلشى نفسك


سابعا
خالص ودى يا بن عمتى ى ى

ghada mOhsen said...

هلا وليد باشاااا ...

إيه البلاوي دي كلها بس ...

بجد أنا حسيت إنك بتحكي عن فيلم خيال علمي
بجد حاجات بقت بتحصل لايصدقها عقل ...

ياااارب كل كلمه كتبتها ياوليد يبقى ليها مفعول إيجابي ...

والله يعوض على أخوك يارب ...

سلامي ليك ولسلمى ...
... ;) ,,, ;) ...

هي وظروفها said...

خالد بيه

مهما مشيت في بر مصر

مش همنشي ع الاشواك

لان باذن الله مصر يا بلدنا
الفجر نوره باين

والشجر هيملي الجناين

والخير هيعم لازم لاننا طيبين

بنصحي ف الفجريه
بنسبح ربنا
وبندعي علي كل ظالم
وغريب مش مننا
والاتي الجي هيكون
كل خير عارف يا صاحبي ليه
ده ملك ربنا
رد ي عليك استرسلته وعملت فيها شاعر
نورت يا خالد واشوفك يوم السبت باذن الله

هي وظروفها said...

نوجااااااااااااا

طبعا علاج مشكله التحرش

جزء منها امني

جزءمنها سلوكي وجزء منها احتماعي تربوي وجزء منها تربيه دينيه
وجزء منها علاج للحاله الاقتصاديه

وجزء منها طريقه لبس البنت نفسها

وجزء منها المثيرات وكيفيه الاقلال منها علي قدر المستطاع اذا كانت مؤثرات اعلاميع اعلانيه او دعائيهترويجيه او خلاعه وميوعه واظهار ان جسد المرأه هو المبتغي والمرجو منها ولا شيء سوي ذلك
بس يفضل الجزء الامني وخصوصا في المرحله اللي احنا فيها من اهم اجزاء القضاء عليها وترتبيه اولي لاننا شعب بنخاف من العقاب الدنيوي ونعمله الف حساب
نورتيني يا نوجا

هي وظروفها said...

مهااا

مش كلامي رهيب ولا حاجه

ده اللي بيحصل ولو استمر المستوي في الانحدار هيحصل كتر من كلامي اللي انتي شايفاه رهيب

مش قصه اللي عايز يتجوز

اولا ضعف الحاله الماديه وغياب الناحيه التربويه
والخلل الاجتماعي والميوعه واظهار ما لا يري الا في البيت من المراه

عوامل كتير قوي يا مها بتشترك في النهايه انها تكون سبب للتحرش الجنسي باي انثي في الشارع

وبخصوص موضوع التحاليل لو تم بما يرضي الله واشك في كده
مش هيحصل زوغان خالص

هي وظروفها said...

ابرهيم

لا يا هيما مش معني كلامي انعدام الامان بصوره كامله

بس هي الحاله الامنيه فعلا بقت تخوف يا هيما والله اعلم الجاي شكله ايه

ربنا يستر يا هيما ويخرجنا من البلد دي او من الدنيا علي خير ايهما اقرب
بس افتكر الخروج من الدنيا اسهل يا صاحبي

هي وظروفها said...

واندا هانم

مفيش في مصر حاجه صعبه

انتي بس عشان بتدرسي في بلد نضيفه نسيت الوضع في مصر


افتكرت انه معاها لان مهما وصل بيا الخيال موصلش بيا اني اشوف حد لازق في بنت بالمستوي اللي شوفته غير انه يكون معاها ومحرم ليها او جوزها او اخوها
متخيلتش غير كده
هي سكتت من وجهه نظري لانها اتخضت واتصدمت واتفاجئت بللي حصل

واندا ربنا يسترها علينا لان بجد الحاله بقت استحاله خالص

هي وظروفها said...

هوبتي

مش عارف والله يا هوبتي هو فعلا الكلام علي اللي بيحصل ده
يجنن

احسن حاجه حسبي الله ونعم الوكيل في الظالمين والجاسمين علي رقاب العباد

نورتي يا هوبا

هي وظروفها said...

اسمعني شكرا

ربنا يخليكي والف شكر لذوقك

وربنا يوفقك الجميع ويهدينا انه ولي ذلك والقادر عليه

نورتيني

4xmisr said...

csmag.builder-eg.com
تم انشاء مجلة متخصصة فى المجتمع المدنى ,يكتب موضوعاتها أعضاء المنتدى
ibond.builder-eg.com
أقسامها المجتمع المدنى واقتصاد و تكنولوجيا اتصالات ومعلومات
ملف العدد,صفحة كاريكاتير
كما تم انشاء دليل للبرامج المفتوحة
foss.builder-eg.com
أغراض المنتدى
تجمع للمهتمين و المتطوعين فى العمل المدنى , رسالة أورمان الخ,
الاشتراك فى مجموعة أو مجموعات المنتدى لعمل كتب , ملفات فيديو للتنزيل أو على يوتيوب
عمل مكتبة تابعة للموقع من كتب الأعضاءفى موقع خاص بعد عمل عدد لا بأس به من الكتب, شرح شامل للرخص الحرة و الملكية الفكرية, ترجمة المشاريع المفتوحة المصدر ,تبادل الخبرات بين أعضاء المنتدى,الاستثمار و المشروعات الصغيرة و العمل من المنزل ,التسوق و التجارة الاليكترونية
بالاضافة لمواقع أخرى سيتم افتتاحها بعد نجاح هذا المشروع باذن الله
وهى مواقع ذات صلة بالمصادر المفتوحة وكيفية الاستفادة منها للجمعيات و الشركات و الأفراد الخ
يسعدنا انضمامكم للموقع بكتابة مقالات فيه بالتعاون مع من سيرغب فى ذلك أيضا
ملحوظة : بالطبع يستطيع صاحب المدونة مسح التعليق , و نأسف للازعاج

هي وظروفها said...

مونتي

ايه ده كل ده بيحصلك من بوست واحد عندي

انا رخم صحيح ازاي اضايقك واضحكك واصدمك وافاجئك

انا اسف للاربعه دول وليكي


لا حواري ايه


ده الحواري بتاعتنا دي لو وحدها مليانه بلاوي منا من حواري القاهره وحافظها
متقلقيش اخوكي شعبي النزعه
فكهاني الطابع
نباتي الميول

اجمل ما ورد في تعليقك كلمه بقايا بقايا

فكرتني بجد بحبيبي قلبي قاروق جويده

مش البنت لو اتكلمت من اساساه ده كلب خطف البوسه وجري

ربنا يستر انا عندي كان خطف السلسله احسن والله

هي وظروفها said...

فتاه من الصعيد

مرحب بيكي يا مروه اخبارك

مقعدين ظباط للتجسس علي النت

ليه هو احنا حراميه ولا مرتشي ولا متحرشين

انا من اشراف البلد دي مع ناس كتير بره التدوين

احنا نتمني لبلدنا كل خير

وكل امان وكل احترام ليها ولموطنيها

ربنا يرفع عنا الغلاء والوباء وشرزمه من الاسماء

هي وظروفها said...

بنت وولد

كلامي مش موجع

كلامي واقع ولالاسف بنشوفه بعينا يا ونتخنق

الظاهر ان الخنق سياسه جدسده لتقليل عدد المواطنين زوي الدم

بس مين انا هبيع دمي واعقدلهم علي تلها ويا انا يا خالتي قصدي يا هما

هي وظروفها said...

منووووووونه

عارف شكلك اتخضيتي

علي راي محمد سعد

عليا الطلاق اتخضيت

يارب فعلا ربنا يسترها علينا وعلي بناتنا وشبابنا دنيا واخره

حاضر بس كده يا ست الكل

انتي تؤمري عايزاني اتشرد واسيح لنفسي بالتاج عيني بس كده

ليس لددينا ما نخشي البوح به

بس وديني ما هدعيهالك يا مني
ماشي ماشي

هي وظروفها said...

د/ ياسر

حاجه بنت ستين وسخه مش وسخه بس يا صاحبي

ووضع بقي ولا اكننا في بلاد عبده النار والتحرش وزوات الانهيار

نورت يا ياسر

هي وظروفها said...

فاتيما


امين يارب ربنا يعوض عليه

وهو فعلا لانه من المؤمنين واحسبه كذلك والله حسيسبه

مبتلي وهو جميل ومعديها وقال الحمد لله انها مجتش في عيل من العيال

كنت مستني اشوف معاليكي هناك صدفه لان معاليكي هتدبس هتدبسي من ابو طارق
انا كده ليه طبقين من ابو طارق منك ومن يوسف

جاي باذن الله بس هاجي لوحدي وهحصلكم لان عندي مشوار بدري اشوفك بقي هناك علي خير باذن الله

خلللي بالك من نفسك يا بطوط يا بنت خالي

هي وظروفها said...

غااااااااااااااده

اختي الغاليه

فينك يا غيوده عامله ايه

لا ده مش فيلم دي كوميديا سوداء ولا اكننا في بلاد الواء واء

الله يخليكي وربنا بفض الله معوض عليه برضا وايمان جميل والحمد لله علي كل شيء

الله يسلمك

هي وظروفها said...

فور اكس مصر

لا طبعا ده شيء يشرفني وان شاء الله نتواصل قريب

نورت

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل

ebrahem faiez said...
أزال المؤلف هذا التعليق.