حدث في مثل هذا اليوم

زي انهارده من سنه بالظبط عملت المدونه دي كنت متابع التدوين قبليها بحوالي سنه
بس لالامانه مكنتش عارف اعمل مدونه لاني من أمهر المخلوقات الأرضيه ف التكنولوجيا
وبما ان الحاجات دي بتتنظر فمبحبش اتلكم عن نفسي كتير.. وعملهالي جار ف تانيه اعدادي..
مش هعمل فيها احسان عبد القدوس ولا صلاح جاهين وازيط واقول كنت لأ اجد متنفس لما اكتب
وجو الفذلكه ده لأني اساسا مقتنع اني من أقل المدونين مهاره سواء كشعر أو او كسرد قصصي
أو مقال ساخر ومش بقول كده عشان حد يقولي ابوس ايد الغاليه متمثلش..
بالصدفه وانا بعمل سيرش علي جوجل من حوالي سنتين دخلت مدونه بنت خيخه واي كلام
وحبيت اسلوبها ومن خلالها بقيت ادخل مدونات وكانت عجباني جدا ساعتها مدونه الشعب
لابد له من حكومه تشكمه للساخره صاحبه الأسلوب الجميل من غير تكلف البسيط من اخلال اختنا شيماء
التي تركت التدوين واحب اقولها لو لسه بتدخل المدونه ربنا يباركلك ف جوازك وربنا يوفق لما تحبيه
دنيا واخره وفعلا اسلوبك كان من اجمل الاساليب وانتي فعلا موهوبه وبتكتبي حلو قوي وبتمنالك كل خير.
استفدت من من خلال قرائتي لمدونات كتير واتعلمت من اصحابها ازاي تكون الكتابه بشكل شبه احترافي
دي وجهه نظري الشخصيه ومحدش له فيه..
ف السنه دي اكتبست علاقات جديده بناس ف الغالب محترمين وعندهم فكر جميل
واسلوب حلو ودماغ احترمتها وبحترمها وطبعا فيه الجانب التاني..
طبعا فيه مدونين بيكتبوا كويس وناس تانيه شايفها ملهاش اساسا ف اي بطاطا بس اهو خدونو معاكوا لأموت نفسي
حبيت المدونه بتاعتي لما عملتها لأني اكيد كنت حابب الناس تقرا اسلوبي لاني مش بكتب لنفسي
لان اي حد حاسس انه بيعرف يعمل حاجه التشجيع او الكلمه الحلوه بتديه دفعه لالامام
فيه اللي الدفعه دي بتوقعه من المقطم واهو خد الشر وراح وفيه العاقل اللي بيعرف ان الدفعه دي مش اكترمن
زق عربيه عطلانه والبطاريه بتاعتها تعبانه لكن مسافه ما درات الدفه ف ايدك يا تسوق يا تلبس وانت وشطارتك..
اخترت اسم المدونه علي اسم قصيده كنت كاتبها لأجمل قصه حب ف حياتي علي الأطلاق ومنشرتش
القصيده دي فيها لسبب يخصني فقط...
من الناس اللي شجعتني كانت مها احمد وهي صاحبه اول تعليق عندي واخت غاليه عليا واتمنالها كل توفيق ف حياتها..
كان من أجمل من اكتسبت من المدونه غير معرفه الاساليب المتنوعه ف الكتابه مدون اصبح أخ وصديق
هو شريف حسن صاحب مدونه باااااشا وهو من الناس اللي تخبط فيها ف حياتك صدفه وأحب اٌقوله لو مجتش يوم
الجمعه هتموت يا شريف.. طبعا مش شريف بس فيه ناس تانيه جميله كتيربقت صحاب ع المستوي الشخصي
بس شريف اقربهم لعقلي وقلبي بس كمان شريف علي المستوي الكتابي كشاعر من الناس الموهوبه بتمكن ومعلمه..
ومن اجمل ما ف التدوين انه عامل زي البيوت ليك جيران جار سو وجار طيب جار قليل الأدب ومليان نفسنه
وجار عامل زي النسمه جيرته تفرح مع كامل اعتذاري لنسمه طبعا..
من المجتمع النسائي تفضل الدكتوره ستيته من اجمل اصحاب العقول المفكره اللي عرفتها داخل مجتمع التدوين..
احب اقول ل هي وظروفها بجد نفسي تبقي في يوم من الايام جرنال محترم طبعا ولكن نفسي
فعلا اكون ف يوم من الايام صاحب جريده انشرفيها فكر شايف اني معتنقه وبحبه وليه اسلوب مميزأتمني..
من أخف البوستات دما لقلبي ابوست حلوان اتضربت يا جدعاان ومن أجمل التعليقات اللي جاتلي كان تعليقين
تعليق للدكتوره ستيته ف بوست مش فاكر اسمه وتعليق شريف باشا علي بوست حلوان اتضربت..
اذا ربنا أراد وقدرت انزل الكتابين اللي خلصت منهم واحد والتاني ف الطريق هتفضل بردو هي وظروفها
من اجمل الحاجات اللي حبتها بشكل شخصي كمتنفس قدرت فيه اشارك مجموعه من اصحاب الفكر بقرائتي ليهم
وباني اتعلمت واستفدت من كلام كتير كتبوه وافضل واقرب الجمل اللي قرأتها ف التدوين كانت لاختي الكبيره دكتور ستيته
هناك من الناس من يستحث أجمل ما فيك علي الظهور وهناك من البشر من يستحث أسوأ ما فيك علي الظهور..
وبعد كل الرغي ده كله احب اقولكم تقعدوا بالعافيه

21 Comments:

مصري جدا said...

طيب

بمناسبة انها هتبقى جريده نجيب لك دوايه حبر وورقتين مسطرين بئا

كل سنه وعليكم السلام وعقبال متين سنه وأنا على قلبك هتروح مني فييييييييييين

البنفسج الحزين said...

كل سنه وانت ومدونتك
الجميله ام دم خفيف دي
طيبين يا وليد..
انا علي فكرة
دايما بتابع بوستاتك
بس مش دايما بسيب تعليق ...

ستيتة حسب الله الحمش said...

كل سنة وانت والمدونة بخير
وفرحانة انك شغال في كتاب
جداااااااااااااااا

ولو المدونة دي بقت جريدة علي النعمة اقفلها لو مخدتش باب حر محدش يمنعني فيه اقول اللي في بالي بلا خجل ولا حياء
لأن اللي يتكسف من مبارك ميجبش منه مرتبات :)

P A S H A said...

والله العظيم أنت اللي أجمل يا وليد بجد وأكبر من أي كلام أقدر أقوله بادعيلك بظهر الغيب بالهداية والرزق الحلال والزوجة الصالحة إن شاء الله . اللهم آمين
فاكر الظروف اللي اتعرفنا على بعض فيها؟
كانت تيت تيت تيت بس أحلى حاجة فيها إننا طلعنا منها ببعض .
باحبك في الله يا أخويا

هي وظروفها said...

مصري جدا

لالالالا هو انا قولتلك اني هنافس محمد علي واعمل الوقائع المصريه
ده زمن ولا ولن يعود :))
نورتني يا بشمهندس وكل سنه وانت بخير

هي وظروفها said...

البنفسج الحزين

ربنا يخليكي دمها خفيف مره واحده شكلك هتديني دفعه من النوع اللي يوقع م المقطم :))))))))) تملي بتورنيني

هي وظروفها said...

دكتوره ستيته

انتي ساتها هسيبلك صفحه التحقيقات تهبدي كام مقال عن الاسره الحاكمه تحبسيني انا وشريف وحلال عليكي المرتب ورئاسه التحرير

بجد انا قلت عيكي اقل بكتير من اللي تستحقيه كاحت وست جدعه بالبلدي كده وربنا يكرمك يارب

هي وظروفها said...

شريف
وايه لازمه الشرده دي الله يسترك دنا قايل بقين حلوين ف حقك تقوم تسيحلنا
كل اما اقرا تعليقك طب واللي مجوز اتنين ياخد قرطاس قاله يدوبك يعرف يبوس:)))))))))))

مش هقولك معزتك انت عارفها صحيح ياذ رقمك الجديد رنلي منه نسيت اسجله
ربنا تم جوازتك علي خير عشان نخلص منك وعقبالي اشوفك الجمعه باذن الله

أبو حميد said...

إزيك ياوليد
عقبال يا باشا ماتبقى المدونة دى عندها خمسين سنة وإنت تبقى كاتب مشهور وتطلع فى التليفزيون وتتنطط علينا
ربنا يباركلك ويكرمك
وخلى بالك لما تنزل الكتاب حاخد نسخة ببلاش ممضية
أشوفك الجمعة إن شاء الله

القدر و انا said...

وليد
كل سنه وانت ومدونتك بالف خير
بس للاسف اصحاب الفكر الناضج المتمسكين بالمبادئ لازم ولا بد تتشمع جريدتهم قبل ان تحبو ..
ربنا يسعدك ويوفقك دائما

sony2000 said...

اخيييييييييييييييييييرا
كل سنه وانت طيب
يرادل ياطيب
ومدونتك كمان وعقبال الاحتفال رقم567567676474
بس:)))))

همس الاحباب said...

كل سنة وانت طيب
وعقبال مليون سنة تدوين
على الاقل نكون احنا اتكلنا وسيبنالك البلد تخربها براحتك

نشوفك على الخير يوم الجمعة ان شاءالله
تحياتى

م. حجاز said...

كل سنة ومدونتك جميلة ومليانة بوستات يا وليد
ويارب يارب تبقى زى ما انتى بتقول جرنان محترم بس أكيد هاتخلينى أكتب عندك ولا اي النظام؟

ghada mOhsen said...

كل سنة ومدونتك في شموخ
:)

وإن شاءالله تحقق أحلامك بالخير

بجد الواحد متشرف بمعرفة أحلى ناس من أحلى مدونات

تحياتي الملونه لروحك الطيبه
^_^

خواطر شابة said...

كل سنة وانت طيب كل سنة ومدونتك من نجاح الى نجاح ان شاء الله
سعيدة بمشروع الكتابين واتمنى لك من كل قلبي دوام النجاح وتحقيق الامنيات
دمت بكل الود

همسات وبحــ الحياه ــر said...

كل عام وانتم الي الله اقرب هذا عام جديد وعلى عملك شهيد فبادر بالسعى والتجديد .......اللهم اجعله عاااام يعز فيه الاسلام والمسلمييييييين ......ولا تنسوا احب الصيام الي الله بعد رمضان صيام شهر محرم ولا تنسونا من صالح دعائكم اللهم احسن خاتمنتنا

بعتذر عن تقصيرى معاكم

richardCatheart said...

كل سنه وانت ومدونتك بالف خير يا وليد

وعقبال السنه المليون وانت بخير يارب وربنا يحققلك احلامك

ليس فقيرا من يحب said...

كل سنه وانت طيب يا بابا

وعقبال يااااااارب ما تحتفل بالمئويه

وانت فى وسطنا

هي وظروفها said...

ابو حميد

انت يا معلم اللي هتقص الشريط قال امضيلك قال عنيا هو انا هلاقي اعز منك
اشوفك بكره يا معلم بس هاجي متأخر شويه

هي وظروفها said...

القدر وانا

مش مباديء قوي يعني ثم لو هيوؤدها يبقي بلاش نتعبو ونعملوها
وانتي طيبه
نورتيني

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل