في البوست السابق اشرت الي مدي قدره شريف حسن شاعرنا المبدع
كتابه النص الشعري بتمكن وكيف يجعلك تتخيل ابطاله وان تقرأ له
فكتب هذه القصيده ليؤكد كلامي ومن جمالها اردت ان تشاركوني جمال ما قرأت
لو حلمك
كنتي حافظتي معايا عليا
كنتي فضلتي ماسكة إيديا
وما بعدتيش !
كنت باموت
حتى الأهة
كنت حابسها وأبان مبسوط
علشان بس ما تتغميش !
حبيتك
وما حبيتنيش !
إلا حتى ما حاولتيش !
متكلبشة رجليكي فِ خوفك
فشل الماضي ساكن جوفك
وانتي مكانك ما خرجتيش !
فالحة تقولي :
إنـِك ليا .. وماليش غيرك
ما تسيبنيش ؟
إزاااااااااي ؟
بتلاعبيني ؟
ولا إكمني كنت عليكي رايح جاي ؟
جايز طيب
بس الطيبة ما تعيبنيش !
بس !
خلاااااااااااص !
ما ترديش !
***
اتطمنتي إني حبيبك ؟
وإني فِ جيبك ؟
وإنك لو سيبتيني هاضيع
وابقى ما فيش !
دايماً فاكره إنك أذكى
وإنك مالكه
طب بالذمة ؟
حد يشد ولا يرخيش ؟
كوني صريحة فِ مرة وحيدة
وما تغشيش !
هل فعلاً
كنت أنا حلمك ؟
ابنك ؟ راجلك ؟ سندك ؟ كلك ؟
حضن لهمك ؟ قدر احتلك ؟
ولا ده كله جبر خواطر ؟
ما تجاوبيش !
ده مش إجباري
وما تعتذريش !
إذا كان قلبي
اتداس بالجزمه
وما وقفتيش !
***
الحُــب
عطــــاء
مش ضمة فِ ضلمة
ورسالة ناعمة
وشغل نفاق !
الحُــب
أرزاق
وأنا مش شحات
ولا غاوي إواء
وما باشكيش !
الحُــب
خِنـــــاق
فِ الروح
بيعلم
مش تهويش !
***
خلليـــــــــكي
غبية
عنيدة
تاخدي تمللي
ولا تديش !
خلليـــــــــكي
محلك سِر
بتنزفي عمر
وما بتمشيش !
ماشيه بضهرك
معجبه إنك
ما بتقعيش !
خلليـــــــــكي
تايهه ما بين أحلامك
ولا تصحيش !
خلليـــــــــكي
عايشه فِ كدبه كبيـــــرة
اسمها : انتي
وانتي ؟؟
ما فيش !
زي الأغنيـــــــــة
بكلام ثابت
بعد شوية
بيصبح بايت
ما بيغويش !
أغنيـــــــــة
مهمــــا كانت
حلوة
شجية
ما تشـَبعش
ولا ترويش !
أغنيـــــــــة
مهمــــا نحسها
مش بتحس !
تاخد مننا
ولا تنقصش !
وما بتسمعش ..
غير لشيطانها
وما بتهديش !
***
الله يسامحك
وأنا ....
لو كنت ظلمتك
سامحي ....
أو
ما تسامحيش !
دي حاجة تخصك وحدك
ما تفيدنيش !
أنا من غيرك بيكي هاعيش !
قلبي أنا واخد ع التلطيش !
عاااااااااااااااااااادي
ما تدقيش !
إفرحي ياللا ما تتكسفيش !
سيبي الحزن بحاله عليا
هايكفيني ما تهتميش !
هايغطيني فوقي وتحتي
وهاينحَر من دمي وراحتي
ما فيش حزن ما بيقضيش !
إمشــي بسررررررعة
ما تلتفتيش !
***
بكره الدنيا تفضى عليكي
واللي معاكي .. هايبقى عليكي
تشحتي حد يحن عليكي
ولا تلقيش !
ما أنت "نفسك" ما رحمتيش !
***
فاكره ؟
لما سألتك
- وأنا قدامك -
عايزه إيه ؟
وما عرفتيش ؟
أديني خلصتك مني يا ستي !
عرفتي الوقتي ؟؟
............
ما تبكيش !
***
- ملحوظة :
مهما تحاولي إنك تنسيني
ما هاتنسيش !
ملحوظه تانيه برافو يا شريف وقولتهالك ف وشك وبقولهالك دلوقت برافو يا شريف
.
.jfif)
12 Comments:
تصدق بالله ؟
كأني أول مرة أقراها يا أخويا
:)
قيمة أي كلام ف العين اللي تحسه والإحساس اللي يشوفه (شوفتني وأنا باتفذلك وعامل متواضع؟)
هههههههههههه
تسلم عينك ويسلم إحساسك يا فنان
ملحوظة : مكانها هنا أحلى بكتيييييير
:)
ملحوظة تانيه :
شكرا ع القهوة أم سبعة جنيه
بحبك ياض
الكلام معبر وحلو
بس أفضل
أن بين الأحبه العتاب واللوم وحتى الفراق يكون بينهم وبين بعض
وبس
عارف ليه
أحتراما
حتى وان كان للذي كان
شريف
لا ياواد متواضع شريف كلمه واحده هرد بيها عليك طز فيك:)))))))))
لا بجد يا معلم جميله واللي شفت مسودتها وقرتها الاولانيه جميله قوي يا شريف عبقري زي حالاتي يا ابني:)
ملحوظه عاشره
انا عايز السبعه جنيه:))))
مصري جدا
القصيده جميله فعلا وحلوه ومكتوبه حلو
بخصوص ردك انا معاك ف اللي بتقوله بس احنا ف البوست ده بنتكلم عن جمال نص مش بناقش حاله
بمعني ان كل علاقه وبدايتها ونهايتها بتكون ناتجه عن فكير كل طرفين علي حده وهما واسلوبهم ف الحياه بس طبعا الاسلوب اللي قلت انت عليه من اجمل الاساليب وارقاها تنفيذا طبعا:)
صباح الفل يا كبير
الللللللللللللللللله الللللللللللله
على الكلام الجميبل والله على الصدقه الروعه ربنا يديم الاتنين يارب
والله جميل اوى يا دوغرى انك تنزل القصده
وبصراحه ليكم كلكم حق كل اللى قابلته امبارح كلمنى عن قصيده شريف
هاااااااااااااايبله وتركيبه جميله ومكتوبه بمزاج
صباحك فل يا برنس وكل لقاء وانت طيب
لما اروح بقى اعلق عليها فى بيت شريف
دي خناقه دي مش اغنيه :)
هي جميله فعلا بجد
تحياتي
يا واد
على بابا برضو؟
عموما همشيهالك كدا
المره دي بس
أعجبتني الكلمات كثيرا رغم ان الموضوع فراق والم لكن الحس كان جميل وعالي
تعرف حسيت في القصيدة بروح شعر هشام الجخ ووأنا بقرأ كنت بأسمعها في أذني بطريقة القاءه
يسلم قلم كاتب الكلمات وتسلم يدك انك نقلتها لنا وأشركتنا في الاستمتاع بها
دمت بكل الود
جميله جدا
يسلم احساسك الرقيق
بااااااااااااااااااااشا
وهو فعلا بااااااااااااااااشا
************
هى فعلا جامده جداا بس
كلامها يانهاااااارى صعب اوى
********
ياخراشى على التواضع ياشريف
!!!!
الله
جميله جدا
رائعه جدا ياشريف باشا
وجميل اوي يا وليد بيه انك تنشر عندك ياجدع
اخبارك ايه ياريس؟
من زمان لم نلتق ..معلهش أصلي معدتش بدخل الفيس بوك
تقبل تحيتي
Post a Comment