من كام يوم الصبح بدري كنت رايح اعمل رخصه ف مرور القطاميه
ولان كوبري التونسي كان ممنوع ان الميكروباصات تطلعه وقفت مع
أمه لا اله الا الله الا اتجمعت ف ميدان السيده عيشه مستنيه اي ميكروباص
واذا باتوبيس نقل عام يقف ويقول قطاميه قطاميه قطاميه
ولاني متأخر نطيت زي البشر ف الاتوبيس وما هي لحظات قليله
واجد نفسي وانا محاط بكميه بشر ولحوم ادميه ع الصبح كده وحسيتني هتخنق
صحيح انا من طبقات الشعب الكادحه ومش جديد عليا ركوب اتوبيس
بس اخر مره ركبت فيها اتوبيس كان من حوالي 8 سنين 000000
الاتوبيس اتحرك وانا من الزخمه واقف علي نص رجل بالعافيه
وبدأت اركز مع البشر 000000
كل واحد مسك ودن اللي جمبه وهات يا يا رغي ولا الايه ار تي حكايات
واحد من اللي قاعدين دمه مش خفيف وبس لا ده هنيدي جمبه يختفي
بيكلم صاحبه اللي قاعد جمبه وهما من طريقتهم ف الكلام زمايل شغل واحد
قاله شوفت ياد الحكومه بنت الوسخه مفعله ( فيرب اخرس)) ومهتمين بيه
دونا عن كل الافعال والاوزان الباقيه
يقفلوا كوبري التونسي ويلغوا الميكروباصات عليه والاتوبيس يلف القطم من فوق
عشان يرجع الاوتستراد واحنا نلتزم ونرفع ادينا وننخرس اددينا بنتفسح
وكمل كلامه تصدق ياد بلدنا دي بتطبق فلسفه راسماليه الحراميه
بس احنا مالنا يا باشا البلد بلدهم واحنا كتر الف خيرهم
ده احنا كتيييييييييييييييييييييييييييييييييييير يا جدعان
مقدرتش امسك نفسي وضحكت000000
وبعدين يا جدعان اللي بيدفع اجره ملك اديني قاعد
وزي الباشا وجمب الشباك وبشم هوا ومرتاح ومش تاعب اعصابي
وبيوصلني لحد الشغل وكل ده بنص جنيه
انا كده ملك 00000
انما اللي بيكافح مع ملاكي ف خنقه الطريق وزحمته ورخامه وقله ادب السواقين
ويروح شغله دمه محروق مش بالزمه احنا احسن منه
كل اللي جمبنا وانا منهم موت ع نفسي من الضحك
وشويه وهو بيكلم من علي عرشه اقصد كرسيه عن ميزه المواصلات العامه وتميزها
عن العربيات الملاكي ومشاكل الملاكي ويروح الاتوبيس داخل ف عربيه فيات 28
مدمر جمبها اليمين
وهو ف نفس واحد مع اللي جمبه مش لسه كنا بنقول لا اله الا الله000000000
اديه هيدفعله اد خمسيت جنيه عشان يصلح الجمب بالرفرف 00
شويه ووالاتوبيس وقف يركب ناس معرفش فين بس اهو وقف
وصاحبنا ده يبص من الشباك يلاقي واحد صاحبه واقف ع المحطه
احدفلي ياد يا شوقي شنطتك حدفهالو من الشباك وراح الاتوبيس طالع
بص عليه يا ابني يا ابني وراح قايل شكله معرفش يركب من اللحم اللي ورا
وراح موجه كلامه لصاحبه والاتنين اللي واقفين جمبه اتريهم زمايل ف نفس الشغل
الواد شوقي انتو متعرفهوش واد فقري وابن حنت ومن الاخر كده ابن حلال قوي
بس فيه عيب بسيط كلب حريم واول ما يشوف مدام ناهد بتاعه الخزنه
تلاقيه تنحلها ولا اكنها اليسا بروح امه00000
ومره واحده ينطلق صوت شوقي ويطلع دماغه من تحت كتف بشري
ويقوله ياااااد يا واطي مش هتبطل تجيب سيره الناس وتلم لسان امك اللي عايز قطعه
قاله حبيبي فينك ده انا قلت انك جاي مع الملحق الثقافي لوزاره الري
تصدق ياد ان ربنا بيبحبك فاراد ع الصبح يكفر شويه من زنوبك
فالشيطان جالي وخلاني اجيب سيرتك
طلاق تلاته انت من الاحرار يا علي00000000000000
نزل المعلم في الطريق ومشي الاتوبيس
والاقي اللي جمبي فتح مع اللي جمبه قضيه التحرش وقتل خالد
وهما عمالين يتكلموا علي قله ادب الشباب
شويه ولقيت واحده بتقولي ممكن تعديني يا استاذ
يخرب بيت ملامحك هعديكي ازاي
شفطت نفسي وكنت قلقان لالاتوبيس يتهز واروح مرمي عليها
الاقي اللي جمبي بيقوليلي هو انت منهم
والاقي جزم شباب امه محمد كلها معلمه علي ضهري
وكله يدعي الفضيله00000000
بس بجد الاتوبيس ده عالم ومواقف حياتيه تبين شعبنا وصل خنقته من الحكومه
ان الناس كانت بتشتم ويكاد يكون ف اجماع ان الحكومه بتعتنا فاقده العذريه
وكلها ترزيه والبقاء لله ف الشعب وكله ضد توريث ابن الحج حكم الوسيه
.jfif)
22 Comments:
ههههههههه
نفس الى حصلي لما جيت اركب اتوبيس
و لأول مره في حياتي
أخدته من مصر الجديده من كليه البنات الى عبود
هههههههههههه
و كانت اول مره و آخر مره برضه ان شاء الله ههههههههههه
انا مش بيغظني في موضوع الأتوبيسات ده الى السواق الى شايف ان مفيش ولا مكان و ببرضه بيقف للناس يركبها
ازاي مش عارف ؟
سبايدر مان
يا راجل من مصر الجديده لكليه البنات
ده انت قلبك رمادي ده فيه مليون ميكروباص ليها
واخوك ركبه مرغم وعلي نن عينه مالها الميكروباصات بس منين يا معلم مكنش فيه
وفلسفه السواق ف الوقوف للركاب
يا اما بيقف لله عشان يراعي ضميره
يا اما بيق عشان موزه ويفتحلها الباب اللي ادام ويروش ويطري علي قلبه
يا اما عايز يخللي الناس تحس بتلاحم وتكافل وتراحم وتواصل
علل واختر ما بين الاقواس انت بقي يا معلم
كنت راكب مع انهي نوع بالظبط
نورت يا برنس
فعلا الاتوبيسات تخنق أوي
بس بصراحه كل المواصلات تخنق
والمترو كمان
بس علي فكره انت دمك زي العسل
اعجبني هذا المقطع "وشويه وهو بيكلم من علي عرشه اقصد كرسيه " بس تعرف والله الواحد لما بيكون راضي بيتقبل كل شئ بصدر رحب حتى المر بيتقبله ويتعايش معاه.
ايضا ضحكت من قلبي على حواره مع شوقي هذا هو ما نسميه كوميديا الموقف.
يسلم قلمك وليد بيه
وليدووووووووووووووووو
انت عارف ان اللى بيحصل ده مش فى المواصلات العامه وبس حتى التاكسى لو ركب معاك حد وفتح حوار مع السواق او لو ركبت لوحدك والسواق زهقان وحران وقرفان ....
من كام يوم كنت رايحه الكورس لسه بافتح الباب اركب التاكسى لاقيت السواق الدنيا حار اوى يا بنتى والله يا وليد كنت لسه باحط اول رجل بصيت للرجل قال هى الحكومه التييييييييييت مش ناويه تشوف لنا حل
ركبت وهو بدا يحكى عن حاله واسرته والحياه صعبه وانا ساكته وفى الاخر قالى هو رمضان جاى فى ميعاده او الحكومه هتاجله شويه هنا بصراحه مش قدرت امسك نفسة من الضحك بجد قولت له ان شاء الله جاى فى ميعاده وكل حاجه لها ميعاد واوان وخليها على الله وهنا كنت وصلت ونزلت وهو لسه شغال كلام وكانه مش هاين عليه يبطل كلام معايا
زهـــــــــراء
هي مصر عايشة ولسه مخدناش عزاها غير بالبني أدمين اللي شبه هنيدي الثاني عشر ده؟
لولا ناس تصنع من الفسيخ شربات
ومن المحن منح
ومن الزنقة نكتة
كنا كلنا خدمنا بعض ومسكنا جاز وولعنا في بعض
تحياتي
فين الميكروباصات دي
انا دخت عليها
يلا
هي كده كده انا مش راكب اتوبيسات تاني ابدا
على جثتي اركب اتوبيس تاني
ده انا امشيها احسن و الله
هههههههههههههههههههه انا متابعه مدونتك دايما الصراحه بس مكنتش بعلق خالص معرفش ليه بس البوست دا ضحكت فيه جامد خالص لاني سمعت حوارات من دي قبل كدا
بس عالم الاتوبيس فعلا عالم تاني خااااالص
ههههههههه
الحمد لله ان معندناش اتوبيسات هنا ..
بس خساره ان معندناش شاب زي ده في اي مواصله :)
تحياتي
الحمد لله أنا بحب المترو
والمشى مسافات طويلة
دا انا حتى حاصل على الالومبكيات
فى (الموتورجل)
هههههههههههههههههههههههههههههههه
حرام عليك قتلتنى من الضحك
ههههههههههههههههههههه
هو فعلا الواحد بيشوف كاركترات حكايه
اهو يوم زى دا يتعمل فيلم كل احداثه فى الاتوبوس
ههههههههههههههه
ماهو عارف كل حاجه وسامع لالالالالالالالا
بس عامل فيها عم العبيط
ودن من طين وودن من عجين
الله ينور يا دوغرى
ههههههههههههههههههههههههه
حلوة اوي الحوارات دي يا وليد
بجد شعب مصر الطيب ده لازم ياخد اكبر الجوايز العالمية
المفروض نوبل تعمل جايزة اسمها الصبر
وصدقني كل سنة مصصر هتاخدها
ههههههههههههههههههههههههههههه
بس بجد على قد ما الناس شايفة على قد ما هم بيخلقوا الضحكة بالعافية
ربنا يرحمنا ويسعدنا جميعا يا رب
ازيك يا وليد
بجد والله عاش من شافك
انا اسفة اوي اني مقصرة معاك بس غصب عني والله
بس والله لما بكلم زهراء بالصدفة بسألها عليك
حتى ابقى اسالها
عموما ربنا يهنيك ويسعدك يا رب
وان شاء الله نتكلم قريب
خالص تحياتي وتقديري
صباح الفل يا ليدو
وانا وصلت اهو خد بايدى بقى اصل نفسى اتقطع والسلم عندك عالى
جامد اوى بوست verb اخرس دا والشخصيه الكرتونيه دى اللى كانت بتشتغل فى البشريه المفروض تتعمل فيلم بحب الناس دول اوى ممكن تقعد تتفرج عليهم يوم كامل ما تزهقش
المهم يا حبى
دعبست فى المدونه وعاوز اسمع لك يا ريس
وعاوز اشوفك لو امكن
فيه تجمع يوم السبت فى راس البر
تفتكر؟؟
طيب لو مش تفتكر رايح الحسين قريب؟؟
لو رايح اجى معاك
وليد الدوغرى "الراجل الجدع"
لو دخلت أى مصلحة حكوميةهتسمع نفس الحوارات دى...زى ما يكونوا بيعاندوا الحكومة اللى فارضة عليهم verb اخرس فبيفضفضوا عن نفسهم.
بس عارف الكلمة الصعبة فى الحوار ده كله ايه يا وليد (بس احنا مالنا يا باشا البلد بلدهم واحنا كتر الف خيرهم
ده احنا كتيييييييييييييييييييييييييييييييييييير يا جدعان
البلد بلدهم ازاى هيه تكية ...ولا ورث البلد بلدنا احنا..
بالتوفيق يا وليد
ساسو
البلد كلها تخنق مش المواصلات بس
نورتي يا ساسو
نوجا
اه يا بنتي اصله كان بيذيع بيانات ثوره عرابيه الاداء
امال لو سمعتي بنفسك كنتي عملتي ايه
ده موتنا من الضحك
فقري ابن الذين
نورتي يا نوجا
زهرررررررررررراء
هو حاله الناس كلها ف مصر بقت كارفه علي هم
فمش هيفرق ايه نوعيه المواصله
بس التاكسي تركبيه من هنا ويبتدي السواق يشكطي ظروفه وامه اللي ماتت محروقه واخواته اللي باعو اخواتهم الصغيرين وهو اللي بيصرف عليهم
وفيلم عشان يهزك ف اجره زياده
تسول وهو ميعرفش ان اللي راكب زي حالاتي متسول عنه
فل عليكي يا زهرا
الغاليه ست الكل
اه الناس اللي زي الفقري ده بيخلقوا من الفسيخ شربات
ودمهم زي العسل بس سيبك المصري هيفضل فقري النيل رواه وخفه الدم وراه وراه
الحمد لله علي نعمه خفه الدم اللي عندنا
سبايدرمان
دوخت عليها اسال اخوك وخد رقمي وانا اقولك تركب ايه ومنين وبكام اخوك هارش ميكروباصات القاهره الكبري وضواحيها من البدرشين لقليوب بس انت تؤمر
نورت يا صحبي
هههههههههههه
هم يبكى وهم يضحك الناس لو مش ضحكت وعملت حياتها نكته هتموت من الغط
لازم تتشعبط عشان توصل
ان شالله لو ركبت على الاتوبيس من فوق
احنا بنعانى من دا كل يوم واحنا رايحين الجامعه بقوة الدفع بلاقى نفسى على جوه
اول زيارة ليا وان شاءا لله متكنش الاخيرة
تحياتى لك
هو انت صورتها بالموبيل طب ماهو طبعا لازم تقف على رجل ونصف وهو انت اللي كنت لبس البلوفر التكنيكلر ده (صورة معبرة على ان شعب مصر الوحيد اللي هيخل الجنة من غير حساب)
ومبروك على الرخصة لو كانت اتعملت
ce de la vie
كرما
Post a Comment