عشق الروح

بما اني صاحب صاحبي وانطلاقا من هذا الركن الركين
فانا بكتب هذا البوست لصديقي الصدوق حبيب قلبي
الذي ارتبط ببنت واحبها وخطبها واتجوزها كمان
ورغم ان انا كنت شايف في الاول
انه احلي منها بكتير انا وكل الغجرصحابنا
وانه رايي اني لازم اختار انثي تكمل معايا حياتي
تكون حلوه لاني مش هصطبح الصبح واقول لروحها احضري
وشغل مدينه الاشباح وادعكلي فانوسين تلاته
لحد ما يحضرلي عفريت واقوله اتصرف انت بقي يا معلم
واخليه يتعامل مع عفريتي
العفريته الادميه اللي ادامي عفاريت مع بعض بقي والبقاء للاقوي
ورغم كل هذا اقوله انت بعد جوازك اثبتلنا انه كان عندك بعد نظر
وان انت كنت صح واحنا كنا اقفاص جوافه
واثبت لكل واحد من صحابنا كانت لما تيجي سيرت خطيبه او حبيبه
اي واحد فيهم تبقي انت زبون الليله بالمتغطي وتتقفش تريأه
من بعيد لبعيد واحب اقول للغجر اللي كانو بيتريأو عليك
يا كلاب اديكم شوفته انه اسعد واحد مع الشبح اللي معاه
وانتو كنتوا عاملين رجاله اونطه وسلمولي علي الرجوله
ومن كل قلبي خايف لابقي زيكم مع ملكات جمال شققكم
واقول حاضر ونعم واوامرك واللي يرضيكي يا عمري
عن خوف مش عن حب لحد يقرا كلامي ويفهم غلط
وعارف اني بعد البوست ده
هتفهموا انا اقصد مين بالتلميح مش التصريح
وبما ان صحتي علي قدي زي منتو عارفين فمش هقول
واللي هيفكر يمد ايده هيزعل وانتو عارفين هشردكوا
كل اما افتكر يا معلم وهي بتسالك هو انت ارتبطت كام مره قبلي
يا فلان تقولها كتير حبيت مره واتنين وتلاته
وافتكر لما كنت اقولها ده معرفش في حياته غير امه
وكام خاله حتي عماته عندهم صرع وتوحد ونضحك
واحب في عيد جوازك التالت علي التوازي اهديلك انت وأم بنتك
كلمتين كتبتهملك ساعه رواقان خاليه من كل ما يعكر الصفو
واقولك كل عيد جواز وانت طيب ومش هقول اسمك بردو عشان
سر المهنه وانت عارف اخوك بير اسرار ولا اعظم طبيب نسا وولاده
واحب اهديلك كلمتين تقولهم لمراتك بس انت اللي تقولهم مش انا
كفايه انك صدعت امي بكلامك عن مميزاتها وقله عيوبها
واحب اقولك ربنا يديني ويرزقني ببنوته في اخلاق وطباع مراتك ولكن معلش
يا صديقي بما ان الجمال نسبي زي منت هارش
فمعلش سيبلي النسبيه وخد الكلمتين دول
مين اللي قال
ان الجمال
هو الدافع للحب
جمال الروح
جمال القلب
هواللي يتحب
جماك شيء مقبول
أما القلب مقدرش اقول
والخفه شيء مش معقول
دوقتيني معني الحب
اللي في قلبي من ناحيتك
ميقضهوش الكلام
اما الاحساس اللي مدفيني
فشيء فوق الغرام
زودني علي قلبي قلب
ياريت الناس
كل الناس
تعرف قصتي وياك
حب ووفا وكمان اخلاص

متحرمنيش من هواك

يا ابو قلب بالف قلب

35 Comments:

wasf_elahsas said...

اولا الجمال جمال الروح والدم مش بس الشكل
ولو لقيت واحدة روحها حلوة وشكلها عادي حتي لو شبح مع الوقت هتتعود علي شكلها وهتبقي احلي واحدة في عينك
في ناس تبقي زي القمر في الشكل لكن الدم لوح تلج
الكلمتين الاخرانيين دول زي العسل
ربنا يرزقك بال تريح قلبك وبالك وما تحيرك ولا تغيرك وتستاهلك
ربنا يوفقك
تحياتي

ستيتة حسب الله الحمش said...

فكرتني بحد قريب ليا
يوم فرحه اهله كانوا عاملين مناحة مستخسرين جماله وحلاوة امه في عروسته
لأننا ببساطة شعب مظهري ابن ستين تيت في بعض

المهم يا سيدي تروح الأيام وتيجي الأيام واقسم بالله العلي العظيم ما شفت ست في جمال روحها ومرحها واهتمامها ببيتها والمتعوس ابو عيون زايغة جوزها
وقايده له صوابعها شمع
مش علشان تثبت للبلهاء انها كويسة
نو
علشان فعلا فعلا هي كويسة
ربنا خالقها كده
ابتسامة لا تختفي ما شاء الله
حسن تدبير
الجمعية تديها الدرس مرة واحدة بس مش ممكن تنساه ابدا بل وتبدع في اضافات لازمة لقصقصة ريش المتعوس اللي عينه بتلف 180 درجة في الفمتوثانية
مش كئيبة ولا نكدية ولا غاوية دموع
ولادها طلعوا شبهها دمهم شربات وسبحان الله جمالهم بديع
واخر حاجة عملتها انها نزلت تشتغل بعد 12 سنة جواز علشان تعضد مجهودات المتعوس جوزها ويقدروا يكفوا ولادهم من مجاميعو

مين قال ان ده عشق الروح يا وليد
ده العشق الحقيقي بس اللي يفهم ويعرف
مش كل واحد لو مسك الألماظ يفهم فيه
الألماظ ليه ناسه
وإلا سعره يبقى بسعر الإزاز بتاع كريستال عصفور

كل عيد جواز وصاحبك يارب متهني وسعيد وربنا يبعد عنه العيون اللي عاملة زي مرصد حلوان دي كلها

عقبالك يا ابو الدوغري يا خويا

NISREENA said...

فيه مثل بيقولوه
الحب أعمى
يعني انت لما تحب حد مش تبص لا على شكله ولا على حاجة،،ممكن كتير يشوفوا حبيبيك مش حلو، لكن بنظرك هوا أحلى وأحسن واحد،، ومش بتلائي أي حد في الكون بشبهه
لأننا لما نحب، بنحب بأرواحنا،، بنحب روح،، مش جسد،، الجسد كام سنة ويتغير،، إنما الروح،، عمرها ما تتغير

مدونتك جميلة جداً
وربنا يوفقك
نسرينا

همس الاحباب said...

ههههههههههههه
انت شردة يا باشا
بس فعلا الجمال جمال الروح والعشرة الطيبة اهم سمات نجاح الحياة الزوجية
سيبك انت دمك عسل
بس عسل اسود طبعا
ههههههههههه
وحشنى يا مااان
تحياتى

برشومي ابو عليا said...

ابو الدهب حبيبي

بتشردني يا زميلي

ههههههههههههههههه

الكلب الصاوي لو قرا موضوعك هيموت من الضحك

زمانه بتظبط

تعرف يا كبير انا هخلي مورا تقرا موضوعك وتعذبك ومفيش اكل عندنا تاني
ومفيش دمي اتحرق وعايز سيجاره عشان سجايري خلصت

بص انا هقولك كلمتين ابرك من جرنان
عشان انت عارف اني بحبك اد ايه وربنا يديم المعروف بينا انا وانت والكام كلب
اللي نعرفهم
ربنا يرزقك بواحده بنت حلال ووتعملك بما يرضي الله وتكون زي مراتي بنت حلال وحنينه وعايزه تعيش

ومتخفش مش هجيب سيره ايات ولا نسرين ولا زينب ولا رشا ولا هقولها انت كنت بتعمل ايه خالص وانت اللي فتحتها علي نفسك بس اشوف وش اهلها واللي يحصل يحصل

نورا بتسلم عليك وبتقولك يا واد يا واد علي الاشعار سلام يا كبير

خواطر شابة said...

تعرف بداية الجمال نسبي والجميل في عيني يمكن ان لايكون كذلك في عينيك
ايضا بالتعود العين تألف الجمال يعني لو اتزوجت ملكة جمال بروح وحشة بعد شوية حتروح السكرة وتجي الفكرة وتكتشف انك تعودت على الشكل وعينيك ماعادتش تشوفو بنفس نظرة الانبهار الاولى

لولا وزهراء said...

وليدوووووووووووووو

مسا الفل والنور والهنا

البوست حلو اوى وطريقة كلامك وتريقتك على صاحبك لذيذه جدا جدا ....
الجمال شئ نسبى ولولا اختلاف الاذواف لبارت السلع
يعنى انا ممكن اشوف حد اقول عليه اموووووور وجميييييييل غيرى يشوفه يقول انه عاااااادى
سيبك انت م الاخر الجمال جمال الروح وخفة الدم بالذمه زينات صدقى مش كانت زى العسل رغم انها كانت بتطلع فى الافلام خدامه لكن سكره بجد ...
بص بقى اقول لك على سر ان اللجمال بالنسبه لى حاجه حاجه زى احمد عز الممثل طبعا مش بتاع الحديد يعنى يبقى حليوه كده وشفت انا نفسى حلوه ازاى

عسوووووووول اول يا ولييييد ربنا يكرمك ويفرح قلبك ويسعد ايامك وتشوف كل الخير فى حياتك ياااااااااارب

زهراء

ghada mOhsen said...

كل سنه وصديقك السري بألف خير ومتهني يااااارب مع حبيبته وأم ولادوا ..

عقبالك ياوليد باشا .. وتبقى تكتب لشريكة حياتك المستقبليه زي الكلام الحلو ده :) ...

طبعا مش عايزه اقولك إنك ضحكتني مووووت بأسلوب كلامك على صحابك شكلك بتعزهم أوي ..
ههههههههههههههههه ...

ربنا يرزقكم ببنات ذوي روح ملائكيه .. حينها سترسم روحها ملامحها .. فتصبح أجمل النساء ..

... ;) ,,, ;) ...

romansy said...

ايزيك يا وليد باشا اخبارك ايه يا سيدى
قالوها زمان عشق الروح مالوش اخر بس دلوقتى مش كتير اللى بياخد باله من النقطه دى كل الرجاله دلوقتى نفسها تتجوز هيفا او نانسى طفسين بقى
بس اقدر اقولك

الحب مش شكل ومظهر
الحب جوهر
الحب كلمه جميله اتقالت بالعيون
الحب دقه قلب تسمع ف السكون
الحب راحه يحسسها الحبيبن
الحب صدق مشاعر بين قلبين
الحب سعاده ما تنهى
مدام احسنت الاختيار
ويارب يكتر افراحك وعقبالك

re7ab.sale7 said...

امممممممممممممممم
نظرية رجولية بحته ....
احم احم قصدي يعني مش دايما برضه البنات بتفكر كدة ......
علي فكرة انا زعلانة منك يا وليد
اية التسيييح ده لصاحبك هي دي الصداقة , المهم يا سدي عايزة اقولك ان كل واحد فينا بيبص للجمال من منظور مختلف ومفيش اتنين زي بعض لكن يبقي الروح اللي بتشكل قبولنا للشخص او نفورنا منه وقابلت ناس كتير يتمتعوا بالجمال والوسامة لكني كنت اجد قلبي ينقبض ولا احبهم من اول لقاء وليس العكس صحيحا في كل الحالات ولكن الروح والجاذبية هما الفلرق هنا برغم اني لا احكم علي الناس من اول مرة
ويمكن كتبت اكتر من قصة علي هذا الاساس برغم اني منشرتش ولا واحدة علي مدونتي لكني قد انشرها قريبا ...والي ذلك الحين بتمني انك تقابل واحدة معلش يعني ...كدة يعني

سمع هوص (Abo 3li) said...

الحلاوة حلاوة الروح... راووووووووووووووح... هههههههههههه...
يبني ال حب اهبل... ساعة اما الواحد بيحب... بيشوف شيتا ماريا شاربوفا..

ربنا يرزقك بشيتا تكون بنت حلال وطيبة...

فتاه من الصعيد said...

ههههههههه

والله انا عارفه ان الرجاله سطحيين ... فلو في واحد كده يبقى عمله نادره :)

تحياتي

مهموهـــــــة said...

وليد ..............
عاش من شافك يا وليد بجد ليك وحشة و الله
بوست جميل اوي كالعادة يا وليد و الله
و ربنا يوفق و يسعد صديقك و مراته
و بجد الحب مش بالجمال ابدا
بالعكس فعلا اللي بيقول الجمال جمال الروح و القلب و العقل ما غلطتش

عقبال ما نفرح بيك يا وليد و بردو هاجي الفرح انا و احمد ان شاء الله بس انت تقولنا

ربنا يوفقك و يسعدك يا رب

خالص تحياتي و تقديري

صمت المشاعر said...

اتلجمال فعلا مش جمال الشكل لان الشكل ممكن في يوم من الايام ينتهي تحت اي سبب

اما جمال الروح شيء جميل بيبقي طبيعه جوا الانسان

كل سنه وصاحيك سعيد دائما مع زوجته

دمت بكل خير

re7ab.sale7 said...

مساء الورد وليد
علي فكرة انا كلمت غادة محسن امبارح وقالتلي علي موضوع مستشفي ابو الريش وتبرعات المدونين وبما اني من ضمن المدونين الجداد فإنشاء الله احاول اجي بس ادعيلي لاني هقدم رشوة لأختيني عشان يتحايلوا معايا لبابا عشان اعرف اجي وربنا يسهل لاني بجد نفسي اشوف امدونين اللي قريت مدوناتهم واعرف ناس اكتر

star in the sky said...

هههههههههههههههههههه

والله بجد بوست تحفة فنية كده
الجمال جمال الروح اللى مالية الشخص
مش جمال الشكل والمظهر
وممكن الجميلة تخليك تكره حياتك وفى نفس الوقت ممكن واحدة شكلها مقبول تخليك اسعد واحد بجد مش هزار
ده كله كلام نظرى بس اللى عرف النوعين بجد هيتاكد
وعلى فكرة ده مع كله مش بس الولاد والبنات بين الناس كلها
ممكن تعرف واحد يكرهك حياتك ويخليك تندم على معرفته وممكن العكس

هي وظروفها said...

وصف الاحساس

انتي جبتي الكلام من الشفخ الجواني وانا بأيد وجه نظرك بنسبه متين في الميه ان الشكل بالتعود بيصبح مالوف ومش محتاج الانسان غير لانسان يعامله بشكل وروح طيبه

تحياتي ليكي

هي وظروفها said...

ددكتوره ستيته
الله الله علي اثرائك لاي موضوع بموضيع هادفه وقيمه


تصدقي يا دكتوره

وانا بسمع مدحت صالح دلوقت محبتك جنون

اقدر اقولك

ان فعلا الفرق بين الالماظ والكريستال في رؤيه وتذوق من يمتلكه

تصدقي اذا قلتلك نفسي احس بشيء من دفيء العشق الحقيقي ده

ربنا يوعدنا ان شاء الله

شكرا قوي لاضافتك الجميله

هي وظروفها said...

نسررررررررررررررينا

مرحب بيكي في اول زياره

والله يا نسرين انا لما حبيت صادفت معايا في 3 مرات ورا بعض انهم يكونو حلوين وانا اللي طلعت في الاخر وحش

نصيب بقي

علي فكره انا اول حب حقيقي في حياتي كان اسمها نسرين

نورتي يا قمر

هي وظروفها said...

خالد ابو همس

حليب قلبي يا معلم

سيبك انت كلامك من الاخر وفي المقص الشمال يا معلم

الله يخليك المهم فيا من العسل شيء

اشوفك علي خير يوم الجمعه وابوس ايدك مترخمش عليا

ههههههههههههههههههه

بحبك يا جدع

هي وظروفها said...

برشومممممممممممممي

يا معلم

حبيبي ونورا في مقام امي وانا واطي وزباله

اوعي تجيب سيره الماضي بتاعي

انا اللي معرفتش في حياتي غير امي

ربنا يباركلك في نورا وعليا وسلملي علي ميرفت ودعاء قوي

واوعدك اني مش هاكل عندك تاني ولما اجيلك هعمل حسابي في السجاير

قشطه اجيبلك علبه معايا ولا ايه؟؟؟؟؟؟؟؟؟

هي وظروفها said...

خواطر شابه

وربنا عارف ان الجمال نسبي طبعا يا غاليه

بس الفكره ان النسبيه تختلف من لغيري

ومشكلتي يا نوجا اللي ال3 اللي حبتهم كانو حلوين فعشان كده نسبيتي صعبه اني اتجوز بنوته مقبوله عارف ان ده غلط بس

انا احب مراتي تكون حلوه لان عين اخوكي زايغه مش عارف طالع لمين مع ان ابويا بس هو اللي عينه كانت زايغه بس تاب وبقي يصلي

ههههههههههههههههه

وما ملكته الايدي زهدته النفس

هي وظروفها said...

زهرااااااااااء

ازيك يا بتول عامله ايه


مساء الشوق والسعاده

علي السكر الزياده واللي يشربها ساده

هيجيله اسهال مش قضيه يعني

الله الله مالك بقي بزينات هانم صدقي

كل اما افتكر يارب افرجها من عندك

والملوخيه

وكفااااااااااايه يارب متبسطهاش

اكتر من كده اموت من الضحك وبخصوص احمد عز

فانا شاب وبموت فيه لانه عسل مبالك ببنت زي القمر زيك اكيد لازم يبقي فتاه احلامها

علي فكره انا فتاه احلامي مديحه كامل ايه رايك في ذوقي؟؟؟؟

هي وظروفها said...

غاده يا غاده

وانتي طيبه وبصحه وسعاده وطيبه

ياااااااااااارب والله يا غاده نفسي اتجوز ربنا يتقبل دعاءك

اضحكي اضحكي محدش واخد منها حاجه

اللهم امين لكل دعائك وربنا يرزقك بالمثل يا غاده ونشوفك علي خير يوم الجمعه يا دودو

هي وظروفها said...

رومانسي

ازيك يا ابو حميد

عامل ايه يا معلم

لالالالا لسه فيه ناس بتعشق الروح يا معلم ولكن وجه نظر اخوك نعم الروح التي تمتاز بالقبول مع شكل بنوته يكون مقبول ولا اكدب واطلع خاين واخونها

اخوك عينه زايغه

ايه ياد اشعارك الجامده دي

تسلم وعقبالك منفرح فيك يا كعبم

هي وظروفها said...

رومانسي

ازيك يا ابو حميد

عامل ايه يا معلم

لالالالا لسه فيه ناس بتعشق الروح يا معلم ولكن وجه نظر اخوك نعم الروح التي تمتاز بالقبول مع شكل بنوته يكون مقبول ولا اكدب واطلع خاين واخونها

اخوك عينه زايغه

ايه ياد اشعارك الجامده دي

تسلم وعقبالك منفرح فيك يا كعبم

هي وظروفها said...

رحاب صالح

ايه في اعتراض انها نظريه رجوليه ولا اعتراض

متزعليش انا صحابي عارفين اني شرده وواخديني علي عيبي

والله يا رحاب انا عن نفسي بحب الحب نفسه وميفرقش معايا لا روح ولا جسد يفرق معايا روح حلوه وطاعه في الخير وحب للعيشه

بس مفيش مانه انها تبقي حلوه عشان عيني متزوغش عندك اعتراض ولا حاجه؟؟؟؟؟؟؟

ومستينك تنورينا يوم الجمعه واللي هتدفعيه لاخواتك هديهولك بس انتي تعالي

وسلميلي عليهم

ربنا يوفقك ويرزقكم بعرسان ولاد حلال

ومحترمين يااااااارب

هي وظروفها said...

ابو علي

ياد يا محمد مين ماريا شاربوفا

اوعي تكون اخت سماسم العالمه

عارفك فلاتي وعلاقاتك متشعبه

وعايز اخوك يتدبس في شيتا

اخص علي دي اخوه

هي وظروفها said...

فتاه من الصعيد

بنت بلدي الجميله


لا فيه رجاله مش سطحيين وفوقين ومقضيون

وبرشومي حبيبي راجل فعلا من الناس النادره ربنا يباركله هو مراته

هي وظروفها said...

فتاه من الصعيد

لالالالا ده احنا سطحيين ومسطحين وفوقين وفينا كل العبر

وتحياتي لكل الشباب النادره وخصوصا نادر جلال

هي وظروفها said...

مهااااااااااااااااااااااااااا


فينك يا مها

وبخصوص فرحي اللي معرفش هتكون مين فيه العروسه ولا مين العريس

احب اقولك انه يشرفني انك تيجي انتي واحمد بس من غير رقص

ربنا يبارك في حياتك وفي بيتك وفي احمك وسلمي عليه قوي

هي وظروفها said...

صمت المشاعر

اهلا بيكي في اول زياره

جمال الشكل معاكي انه مكمل لجمال الروح ويجعل الانسان اجمل بمراحل من ذي الوجه الواحد

ولكن هو فين جمال الروح لو لقيته ياريت تعرفيني عشان تعبت ومش لقيه خالص

وانتي طيبه

تحياتي ليكي

هي وظروفها said...

نجمه في السما

والله بخصوص اني اكره حياتي بسبب بنت جميله او دميمه فده مش في قاموسي خالص

انا عن نفسي بحب الحياه وهعيشها حتي لو لوحدي

اهم شيء ان ربنا يكون راضي عني مش حبيبتي

ومعاكي في نقطه

وهي ان الارواح جنود مجنده ما تعارف منها ائتلف وما تناكر منها اختلف

والسلام عليكم ورحمه الله وبركاته

мαησηα said...

يا وليد هو انت ناوى تفرج
زوجتك العزيزة على المدونة دى

طبعا لأ طيب انا اخدت كوبى وبست من كل الكلام اللى ف البوست هههههههه

يالهوتى عليكوا ده الرجالة دول عليهم حاجات الله يسامحكم الله يسامحكم

المهم عايزة اقولك انا كان ليا اتنين اصحاب شاب وبنوتة اختاروا بعض بس علشان يبقى شكلهم حلو وامور ف الكوشة
وكمان سبب ال ايه علشان يجيبوا عيال شكلهم حلو وشبه اللى بيطلعوا ف التليفزيون
وال ايه كمان علشان كل افراد
عائلته يقولوا ده فلان واخد بنت قمر وهى بردو اهلها يقولوا دى فلانة اتجوزت واحد قمر

الاتنين كانوا شكلهم يقرف ف الكوشة
حقيقى واقسم بالله وهو اتخانق معاها ع الكوشة يقولها ده منظر شوف انت الزوق بقه
تخيل عرايس بيتخانقوا يوم فرحهم ع الكوشة

المهم اتجوزوا وكان يوم اخبر هههههههه

جابوا عيال شكلهم بجد اللهم لا اعتراض

كلها خلقة ربنا

دلوقتى بعد 4 سنين جواز ابنهم قاموس شتايم

مدخلش حضانة ولا هيدخل

هو اشترى شقة ف القاهرة وقاعد فيها وسايبها قاعد كانه ما اتجوزش

ادى اللى اختار الجمال وادى اللى اختارت الجمال

صلى على النبى نصيبك هيصيبك يا وليد

وربنا يسترها معانا

ربنا يرزقك بالزوجة الصالحة اللى تعيشك ف الجنة دنيا واخرة

قول اميييييين

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل