ضحك وبكي

مواقف كتير في حياتي ضحكتني ومواقف كتير ابكتني
من المواقف اللي ضحكتني موقف حدث لي من يومين ......
.لي صديق وهو صديق عمر عنده محل دواجن
فقري انا وبصاحب كل الناس البيه صاحبي والفقري
المهم عديت عليه وانا راجع من مشوار علي العصرمن كام يوم
وكانت الناس اللي شغاله معاه بتنضف المحل وطبعا الميه اساسي
ومشغل معاه عيل متخلف يمسك خرطوم الميه اسمه صلاح
ومطرح ما ايده تودي الخرطوم شغال
تيجي بقي الميه علي سلك التلاجه تيجي علي تلاجه حفظ الفراخ
تيجي علي كفريه الكهربا مش قصته ...هي وظروفها وسبحان الله ربنا بيسترها
بكلم انا وهو وراح داخل صلاح علينا الحق يا معلم قاله فيه ايه ؟؟؟
قاله امك واقفه بتعيط علي اول السوق الظاهر ان موبايلها اتسرق تاني
قاله تعالي وريني بص....دي امي يا ابن الجزمه
امي لسه موبايلها مسروق من ساعه لحقت تتسرق تاني وراح ظارفه قفا..
رجعلي نكمل كلامنا..
.ليه هو جار تاجر في المحل اللي جمبه تخين وغبي ومدمن مخدرات
وشخصيه كده هلاميه لقيته بينده صاحبي وانا قاعد معاه
يا تامر يا معلم تامرالحقني فيه ايه يا معلم
قاله حاجه وقعت علي التنده وهتقطعها وتخرب الدنيا
تعالي جبتلك سلم خشب واطلع شوفها
قاله اطلع فين الحيطه مليانه ميه والواد صلاح الغبي
رش ميه علي الكفريه العمومي قاله يا عم اطلع
مش وقته الح علي صاحبي وطلع وهو طالع
قاله يا تامر يا ابني انا عايزك وانت طالع
تفتكر ان كل نفس ذائقه الموت
وقعت من الضحك طلع سلمتين كمان
قاله يا تامر اعرف حاجه تانيه يا ابني
قاله انهي هموت الله يخرب بيت امك انت والتنده بتاعتك
قاله محدش باقي علي وشها قاله وانت اللي يعرفك
ينسي وشها من ضهرها اساسا
هتموتني عشان تنده ومروحه يا ابن الجزمه
___________________________
ومن المواقف المبكيه
لي صديق كان يعمل في تحليل الانسجه لزراعه الاعضاء
وهو كميائي يتردد عليه الذين يتبرعون بكليتهم من اجل المال
ومن كثر ترددي عليه في فتره من الفترات
تعرفت علي شاب جاء ليتبرع بكليته بعد ان رأي الدنيا
وقد اسودت في عينيه ولم يجد شيئا يفعله من وجهه نظره
الا ان يتبرع بكليته لمن يدفع.....
شاب صعيدي يحمل دبلوم صنايع طويل عريض
يتمتع بثقافه وطريقه لكتابه والقاء الشعر
دمه خفيف بشكل بشع ويملك طريقه لالقاء النكته بشكل يبكيك ضحكا
تجعلك تستعجب كيف يحمل شخص هذا الفكر ويفعل الذي يقدم عليه
كانت له حجته واعذاره التي وان لم تقنعني ولكنها كانت
وللأمانه ظروف قهريه تجعل صاحب العقل يتحير اهو علي حق
ام لا شيء يستدعي القدوم علي فعله
فعلت معه الاعاجيب كي يرجع في قرار بيعه ولكن الحاح متطلباته الضروريه
كان حاجزا ان يقتنع سوي بوجهه نظره
اسبابه واعذاره تدعوك للصمت لانها من القوه التي تجعلها تخرج انسانا
عن حدود ثقافته وعشقه للحياه
حكي لي بعد ان وثق فيا وشعر بحب له ...عن حب عمره حنان
تلك الفتاه التي احبها وعشقها اراني صوره لها بنت من صعيد مصر
شديده الجمال وكان يهوي اغنيه جددت حبك ليه لأم كلثوم
لم اكن اعرفها قبل ذلك الوقت
وبمرور الايام وكثره تردده علي عياده صديقي وكثره ترددي انا ايضا مساء كل يوم
جمعنا حب من نوع غريب يمكن لوجود شيئا يجمعنا كحبه للشعر
او طيبته ورجولته وحكمته الله اعلم...
من ضمن اسباب قدومه علي تبرعه هو ان اهل والدته اكلو حقه في الورث
وكان وحيدها ةبعد موتها تزوج الاب من امراه قاسيه وكان والده ضعيف امامها
ولا يملك سوي ان يرضيها حتي وان كان ذلك علي حسابه محمد
كانوا بيعملوه زي الكلب الجربان ((علي حد تعبيره))
ومحمد لا يملك ما يتقدم به لحبيبه عمره
وكثره تردد العرسان عليها من القريه ومن خارجها
كنت اراه رغم كل ذلك قويا عنيدا لا يخاف لايمكن لشخص كهذا في خيالي
ان يبكي ...لا اتخيل هذا
تحدد يوم عمليه استصال كليته وزرعها في جسد امراه اخري
وذهبت لازوره واطمئن عليه بعد خروجه من غرفه العمليات
عندما راني احسست انه وجد شيء يتمني ان يراه
لن استطيع مهما طال بيا العمر ان انسي تلك النظره
تحدث معي وقال لي عايز اكلم حنان
كان ذلك في رابع ايام تبرعه ومازال جرحه لم يلتئم بعد..
جعلني من كلامه عن حنان اعشق حاله الحب التي يعيشها
قال لي ممكن اعمل تليفون من موبايلك بصديق عمري علي
اعطيته التليفون واتصل به
وسال عن احواله وظروفه وساله صديقه عن سر اختفاؤه
فقال لها في شغل في مصر وشهر وراجع
طمن حنان وقولها انا راجع بفلوس اتصرفت فيها وهجيلك واتقدملك واخطبك
رد عليه صديقه....محمد .... حنان اتكتب كتابها انهارده ودخلتها بكره
قال له ازاي قولي فهمني..وانهار وهو يكلمه من البكاء
قبلها لم اكن اتخيل ان هذا الانسان القوي يبكي لفراق اي امراه
ولكنني كنت مخطيء
انهار وهو يتحدث بشكل جعلني ابكي لضياع كل احلامه
التي تتمثل في حنان.....
صاحبه في المكالمه قاله انهم اجبروها علي الزواج من ابن عمك
لان الكل في القريه يتحدث عن علاقتكم وانت عارف كلام الصعايده
وقع التيلفون من يده وذهب في غيبوبه اسرعت لنداء اي طبيب
وضعوا له محاليل وادويه وكانيولا
ولكن بعد ايه...........
بعد ما حلم عمره اللي كان عايش عشانه راح وحته من جسمه ومن قلبه
راحت ومش هترجع
اتكسر وخرج من المستشفي شخص اخر.....رايته بعدها بخمس سنوات
صدفه ولكنه لم يكن محمد الفيومي الذي عرفته
اصبح شخص اخر قسوه الحياه والناس وعدم رحمه اهله به
ساقته لطريق لا يعلم عاقبته الا الله................ انتهت

17 Comments:

شيرين فرغلى said...

حرام عليك يا وليد وجعت قلبى الله يسامحك
الراجل ده حب اوى و بجد من كل كيانة بس للاسف الدنيا مش بتستنا حد فى لحظة واحده بتفصل دايما بين كل متناقضيين ... يعنى لو كان قدم يوم العملية يمكن كان لحق ...اولوكان قلهم كانت فرقت مش عارفة بس الواحد لما بيكون عايز حاجة اوى بيكون فلحظة ضعف تخليه يتنازل عن اى حاجة عشان يوصل لهدفةو بصراحة الراجل متاخرش بس برضة فى دايمالحظة فاصله فكل حاجة بس فالاخر نصيب ( فمفتاح سر كل عاطفة صادقة ان تدرك قيمتها فى حينها فالتوقيت المناسب هو الدقيقة الفاصله بين حياه قلب و مماته).

ShiMOo said...

مش عارفه ارد اقول ايه !!!
يمكن علشان انا مصدعه ومش مركزه مش لاقيه كلام ارد بيه
بس بجد كلامك يأثر في اي حد

أمل حمدي said...

ازيك يا وليد عامل ايه

الحكاية الاولانية دي صعبة جدا بس اصبحت واقعية جدا وما أكثرالشباب الذين يبيعون لحمهم الآن ليأكلوا بثمنه

حسبنا الله ونعم الوكيل

قصة مؤلمة لم تداويها القصة الثانية

تقديري لك يا وليد ولطرحك

دمت بكل الخير

NeVeN said...

ياه انت وجعت قلبى اوى يا وليد

الحكاية الاولى صعبة اوى والاصعب ان صديقك كان عامل كدة عشان حد بيحبه ولما يبيع جزء من جسمه عشانها ميلاقيهاش
انا زعلت :(:(

بس الحكاية التانية دمها خفيف وكل حاجة بس من صدمة الحكاسة الاولى مقدرتش اضحك


سلام

خواطر شابة said...

تدوينتك اليوم كالحياة فيها الحلو والمر
الحكاية الاولى رغم قساوتها لكن تعرف للاسف أصبحت معتادة ومكررة لدرجة اصابت مشاعرنا بالتبلد تجاه أمثالها الحكاية التانية كانت مطلوبة بعد الاولى لتغسل القلوب من الحزن الذي علق بها وفي النهاية هكذا هي الحياة يوم حلو ويوممر

كيكى عوووووو said...

بص انت قفلتنى بجد من اولى حكايه ومكملتش النص التانى
وانا اصلا بقالى يومين ربنا عالم الاخبار الى بسمعها
كنت حطيت الى يضحك الا ول ياشيخ
امشى بقى عااااااااا
عووووووووو

مهموهــــــة said...

وليـــــــد ...............

تعرف يا وليد بجد انا ليا حق ازعل و الله

تنسى مها كده ؟؟؟؟
مها يا وليد ؟؟
اللي اول واحدة علقت في المدونة دي ؟؟
ماشي يا وليد عموما انا مش هتكلم كتير

بس كده بجد انا زعلانة لان كل الكلام اللي كنت بتقوله عن الاخوة حسيت انه طار طار في خبر كان

عموما مش هقدر اقولك حاجة على الموقف المضحك لان الموقف المحزن تعبني اكتر و الله و غلب على الضحكة اللي ضحكتها في الاول

بجد ربنا يساعد محمد الفيومي ده لانه انسان راجل بجد بيضحي بكل غالي علشان حبيبته اللي ممكن تهون عليه كل هموم الحياة
بجد من قلبي بتمناله ربنا يعوض عليه و يسعد ايامه و ان شاء الله يعيش حياة كريمة و ربنا يكرمه بزوجة و اولاد يقدر يعيش معاهم بسعادة كبيرة

شكرا يا وليد على البوست الجميل ده

خالص تحياتي

لولا وزهراء said...

وليد
-*-*

هى دى الحياه ممكن تكون لحظه ضحك وساعه بكاء وممكن تكون لحظات من البكاء يتبعها ايام من الضحك
لكن رغم كل شئ الشمس تطلع كل يوم لتخبرنا ان هناك يوم جديد فى حياتنا وتخبرنا انها قد تكون اخر شمس تطلع علينا

ضحكت معاك وبكيت على حال محمد
ربنا يرحمنا
تسلم يا وليد ويسلم قلمك

المهم طمنى على اخبارك عامل ايه

زهراء

Lady E said...

طب خلي الكلام الكئيب الأول وبعدين قول الكلام المضحك مش العكس

معاك مناديل بقى ولا ايه ؟ ما انت لازم توزع مناديل بعد النص التاني من البوست وكمان أغنية فيروز

بالنسبة لتعليقك اللي مش هنشره :)

بجد احرجتني بكلامك ومش عارفة ارد واقول ايه
انت فعلا شخصية جميلة وكلامك أثبتي لي كده لأن مش سهل على أي حد انه يعتذر

شكرا يا وليد وربنا يكرمك ويسعد قلبك

سمع هوص (Abo 3li) said...

يعني سيدتك تضحكنا وبعد كده تعكنن علينا ياعم انت...

ياباشا في ناس بتبيع عيالها مش كليتها...

وفعلا احلي حاجة انك تصاحب الحرامي قبل الظابط...


تحياتي ياكبير

الطيــر العاشـق said...

وليد
حلو البوست بجد بس تعرف قلت اللي ضحك ضحكنا لحظات....
ولكن صديقك اللي فضل حبيبته عن حياته .. أثر فنا كلامك عنه بجد وان شاء الله ربنا يعوضه كل خير ويرزقه بحد يعوضه عن كل لحظة حزن مر بيها

كل تقديري

القدر و انا said...

وليد
رغم تناقض الجكايتين الكبير ..
الا انه يجمعهم طيبة الناس واحلامهم وبساطتهم
وجعنى قوى لما الانسان يخسر قلبه وكليته
فى لحظة
لما يخسر امله وفرحته اللى ممكن يهونوا عليه قطع حتة من جسمه لازم يتغير تماما
لازم تنتهى طيبته وتتحول
لازم يملأه السواد ومهما حصل لن تعود للنفس صفائها السابق
مهما كسب لن يعود اليه الامان
قبلى يتمزق لامثاله رغم لومى عليه ضعفه من البداية
اعانه الله وامثاله من المسروقين

esraa said...

موجعه بجد
:(

star in the sky said...

تصدق
بعد ما قريت الموقف التانى نسيت الاولانى ونسيت الضحك وكل حاجة

مش عارفة لو فى حب كده ولا ده اسمه ايه

هو الحب الاول بيكون هو فعلا الحب الاخير

بس الرضى الواقع وبالنصيب اكتر حاجة بتهون علينا كل حاجة بتحصل

اكييييد كان فى حل تانى غير استسلامه وضعفه

البنفسج الحزين said...

سبحان الله...يجهد الانسان نفسه ويسهر الليالي ليخطط ويرسم ولكن...قدر الله وما كتبه سبحانه هو الذي ينفذ ...
فعلا وتقدرون فتضحك الأقدار...

شريف(((الظل))) said...

مشعارف القصه بتاعت الي فضلت تسميه بمتبرع ولاكن انا افضل اسميه باسمه الحقيقي ((اللص)) الذي يبيع مالا يملك وعارف انها تسميه قاسيه ولاكن حقيقه المهم كان بيانتابني شعور انها قصه من الخيال وارجع وافوق على واقعنا واقول لنفسي ان اكيد في قصص اكتر من دي واشد منها
وانا رايي الشخصي ان اختنا حنان كانت محظوظه انها اتجوزت شخص تاني غير الشخص ده لانه اضعف من انه يكون كفيل بسترها،شخص كان اضعف من انه يواجه ظروفه، علطول جري وباع حاجه مش من حقه يتصرف فيها طب انا بسأل لو كانت حنان متجوزتش وحصل نصيب واتجوزها بالفلوس دي وعاشو وقابله ظروف بعدها ومقدرش يواجهها ياتر هيبيع ايه المره دي.......
انا شخصيا مستبعدش انه يعرضها هي شخصيا للبيع

وحسبي الله ونعم الوكيل بمن اوصلونا لهذه الدرجه

واقترح عليك في الموضوع التاني انك تخصصله مرات تانيه لاني انا من صداقتي ليك عارف انك عندك قصص دمها اخف بكتير من دي وياريت تعملها لانك اسلوبك جميل جدا وانا عشقت مدونتك بجد ياوليييييييييد

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل