.jpg)
ساعات القاني بحب الناس
وساعات بكون انسان حساس
وساعات بتوه والقاني غريب
وساعات بكون عديم الاحساس
... ....
ساعات بلقاني وحداني
وأعيش غريب وأنا في مكاني
وساعات بحس بدفا و أمان
وساعات بكون حد أناني
..... ........
ساعات بظلم وأدوس علي غيري
وساعات بميل للي في أيد غيري
وساعات بكون طماع وحقود
وساعات ما أملك بديه لغيري
....... . . . . . . .
لما أصحي ساعه بكون مبسوط
والقاني وسط الزحمه بفوت
وساعات بغني وتحلي الدنيا
وساعات بكون انسان مضغوط
....... ... ..
يمكن أكون حابب التغيير
وساعات بحس بنفسي كبير
وساعات بكون انسان متهور
وأخد قرار من غير تفكير
......... ........
نفسي بقي أعمل للجنه
وأروح مكان ما أتمني
يمكن الاقي هناك في ملاك
يقولي أأمر بس اتمني
يمكن
39 Comments:
ايييييه ده ..؟ اول كرسى تانى مره فى نفس اليوم
مره عند مها ودلوقتى عند وليد باشا ...
لالالالالالالالالالالا انا كده هاتغر
هههههههههههههههههههه
خلينا فى موضوعنا ...
بجد ياوليد ان وصفت التقلبات اللى بنعيشها كلنا
بس مش بنظهرها بره كلها مكتومه جوه ...
بجد بحب اوى بساطه تعبيرك وعفويتك فى حروفك ...
وعجبنى اخر كلماتك اوى ... بحب انا التفاؤل ده
ربنا يكرمك وتسلم ان شاء الله ...
... ;) ,,, ;) ...
ههههههههه ضحكت وافتكرت لما قلتلي لا حاولي تتغيري لما قلت لك اني لما بكووووووون وبكوووووووووون
بجد حلو قوي وصفك جبت الوصف في كل الأحوال
وبجد الله يديك دايما كل اللي بتتمناه وتحقق كل أمانيك ان شاء الله
سلامي لساره بالتوفيق
مش مشكلة تالت كرسي مش وحش بردو
ايه الحلاوة دي يا عم وليد بيه باشا
ههههههههههههههههههههه
بجد و الله قصيدة حلوة اوي معبرة و فعلا اي واحد بيعيش المشاعر دي و اكتر بجد
حب خيانة صداقة فوقان توهان خفة كسل طيبة شراسة تفضيل انانية حاجات كتير و الله
ربنا يخليك يا وليد و يسعد ايامك دايما يا رب انت و سارة البت دي فين صحيح ؟؟؟؟؟
على فكرة كل شوية بشوف صورتها و اقول يا بتختك يا عمنا
هههههههههههههههههههههههههههه
ابقى خليها تكلمني
و ايوة كده ابعد عن السياسة اصل السياسة بتجيب حساسة و فساسة في العظام
و ده مش كويس علشانك
ههههههههههههههههههههههههه
مع خالص تحياتي و تقديري
بداخل كل منا ملاك وشيطان يتصارعان وحسب من ينتصر فيهما تكون طبيعة الشخص
هذه المتناقضات التي ذكرتها توجد بداخل كل منا
كلنا نشترك معك في نفس الامنية (يعني حتى في الامنيات مش مهنيينك باساتر صدق عدوية لما قال زحمة يادنيا زحمة)
يارب يرزقنا الجنة جميعا ويعافينا ويعفوا عنا
تحياتي لك
كل مره على حال
هذا هو ابن ادم
نجحت في وصف مشاعرك
كن بخير :)
حلوه قوي ياوليد
عبرت فيها عن حالات بيمر بيها الناس
بس الحمدلله انا ما ببصش للي في ايد غيري ولا عندى الانانيه وظلم الغير ده
ههههههههه
بجد تعبيرات حلوه وبكلمات سهله وجمبله
بجد تسلم ايدك
و جون و جون وجون وجوووووووووووووووون
يا وليد يا جامد
غاده هانم
اتغري براحتك ده انتي ملكه جمال اليمن
بس ليه سؤال ازاي ربنا يكرمني واسلم
حد قالك وليد مسيحي ؟؟ظظظ
فررررريييييييييييييييييده
ايه فريده بتضحكي ليه ممنوع الضحك
ايه ذوقك ده يا بنتي اللي بيخليني ازيط واتغر يا فريده انا حسيت انك فيكي كل الصفات الوحشه دي فقلت احذرك
ههههههههههههههههههههههه
مها هانم زوجه كبير اليوران حماده باشا عزو
انا اديت ساره اميلك وسيفته ولما تدخلي ضفيه عندك
بقي السياسه بتجيب هشاشه
عميله صحيح
خواطر الشابه خالد
اموت واعرف انتي بتجيبي كلامنا منين اذا كان احنا مبنفهمش اغلب كلام المغرب العربي
انتي بقي بتفهميه ازاي؟؟؟؟؟؟؟؟
تكونيش مصريه وبتشتغلينا
طبعا جوا كل انسان الخير والشر وربنا يوفقنا ويفضل ضميرنا صاحي ويهزم الشر بداخلنا
اقصوصه
وبنت ادم والله يا اختي يا اقصوصه جواها نفس التناقض ده
مش الرجاله بس يعني
ها عشان متقولوش اننا وحشين وانتم كلكم ملايكه
أميييييييييييييييييييييره
تعرفي يا اميره ان سعاد حسني انا حبيتها عشان عملت اميره حبي أنا
كانت موزه الله يرحمها .........
كلامك ده معناه اني ابن كلب واطي ايه يا اميره
ده شعر مش كده متخديش كل حاجه عن تجربه شخصيه
مره هتحبسيني ومره تتهميني
.
أسيب التدوين وافضها سيره ولا ايه ارسيلك علي حال
شيرين هانم فرغلي
بالصلاه علي النبي عماد متعب الاهلاوي المكسح مش احسن مني
منا لازم اشوط في المقص واقطع الشبكه
.
يا سلام يا ابو تررررررريكه يا مجرم
ههههههههههههههههههههههههههه ...
والله ضحكتنى ياوليد ...
مسيحى ومسلم ايه بس ..؟
الغلط فى التشكيل بتاع الكلمه ... انا قصدى تسلم ايدك ان شاء الله >>>> بفتح اللام ...
وميرسى اوى على إطرائك ده ...
تسلم كمان مره >>> ماتنساش بفتح اللااااااام ههههههههههه
تحياتي ...
... ;) ,,, ;) ...
الله الله
انا قرأتها الصبح قبل ما اخرج
وقلت ايه البدع دي يا سيدي
ازاي صغت امنياتنا بشكل راقي كده؟
ازاي اتكلمت عن مزاجنا وكأنك مع كل واحد .. ومعايا انا بشكل خاص؟
لما أصحي ساعه بكون مبسوط والقاني وسط الزحمه بفوت وساعات بغني وتحلي الدنيا وساعات بكون انسان مضغوط
بس انا مش حابة التغيير
انا خلاص فرحانة ببلاويه الشخصية ومش متضايقة منها
تسلم ايدك
انتم لا تبذلون مجهود للتعرف على لهجات أخرى يساعدكم على هذا ان لهجتكم معروفة في كل العالم العربي فبتكسلوا تتعرفوا على لهجات تانية لكن مع ذلك انا معك ان لهجتنا صعبة
ياالله ياسيدي مساهمة مني في التقريب بين الثقافات حأبقى اعلق عندك بالمغربي وابقى قابلني لو فهمت حاجة دي طلاسم ياابني تلاقي الكلمة كل حروفها عليها سكون وبتتنطق بسرعة ده اللي بيصعبها
خواطر شابه
ابوس ايدك خليكي مصريه انا غلطان بلاش مغربي كفايه شباب مصر بتشرب حشيش مغربي مش لازم تتكلم كمان مغربي
الوزن مختل
لكن ده ميمنعش انها حلوة
ودمها خفيف (:
بانتظار الجديد
تحيتي
زعيمه الخيال دكتور ستيته
لالالا بلاوي ايه ده انتي عندك عفروتو نعمه
ولا ايه وبعدين صحيح يا ريت تجبيه معاكي يوم اللقاء بجد
ولا هتتخلصي منه هاتيه يقعد معايا واوعدك انه في خلال ساعه هيبقي مجلرم حرب قديم كمان
ميرام هانم
نورتي المدونه وبلوجر كله
بس ياريت تقوليلي انهي حته وزنها مختل مع مراعاه ان سيادتك لشعر الرباعيات العامي طريقه قراءه مختلف في خطف الحروف خلال النطق وتحقق توازن
نورتي يا ميرا وميرسي لذوقك
حلو أوى ومعبر بجد بمنتهى البساطة .. إستمر على كدة وبلاش إنفعالات ونرفزة
بصراحة لما بتكون متنرفز بدخل أقرا واجرى على طول بخاف أرد عليك
ام بوبه
خلاص العصبيه والنرفزه كانت هتقضي عليا فقلت اعقل ياواد واجوز البت ساره وعيشلك يومين
ربنا يخلي حبيبه ونشوفها دكتوره زي والدها مش هو دكتور صح؟؟؟؟؟
حلوه جدااااااااااااا بجد.
انا كمان سعات وسعات:))
وليد..
يانهار ابيض انا مش قصدى كده خاالص
انت فهمت كلامى غلط
انا عارفه انه شعر طبعا
انا ماخدتوش على انه تجربه شخصيه والله انا كنت بهزر والله
وبعدين ازاى تسيب التدوين يعنى
لما انت تسيبه مين يمتعنا باشعاره الجميله
انت مش متخيل قد ايه الكلام بجد جميل جداااا
وببقى مستنيه اى حاجه جديده تكتبها
بجد تسلم ايدك
ويارب دايما كده تمتعنا بكلامك الجميل
20 يناير، 2010 8:24 ص
تصدق الله يسامحك للدرجة دي واضح عليا اني فيا كل الصفات الوحشه دي .....
هههههههههههههه
هقول ايه معلشي محدش فينا بيعرف حد كويس من مجرد كلام
مع اني بردو مش هنكر نفسي انا .......... صح ولا ايه يا مها اهو انتي الوحيدة اللي تعرفيني من سنين وسنين
تسلم يا وليد وكل التوفيق
وليد...والله انت وصفت نفوسنا كلنا اللى ساعات بنخبيها أو هيه نفسها بتدارى عننا
فعلا محدش فينا ملاك علطول ولا حد شيطان علطول علشان احنا فى الآخر بشر ...بشر وبس..حب وكره ...عطاء وأنانية بس بتفرق التربية والبيئة والتعود وحاجات كتير تانية
جااااامد البوست ده يا وليد بالتوفيق دايما يارب
انا سكره المكسوفه امبارح
ههههههههههههههههه
أتمني يمكن الاقي هناك في ملاك يقولي أأمر بس اتمني يمكن
انا بتمنى الاقى ملاك يقولى كدا
وصفت احاسيس كتير بنمر بيها
تحياتى
الله حلو اوى يا وليد
حلو اوى انك طلعت اللى جوا كل حد فينا
مرة طيوبين وبنجب الناس ومرة شريرن وكارهين حتى نفسنا
حلو اوى كلامك
وعجبتنى اوى اوى الصورة اللى اخترتها للبوست
سلامى كتييييييييييير لسارة
شيما زينه بنت المنصوره
ربنا يخليكي لمصر يا شيمه يا بنتي صحيح كلنا هذا الرجل
أميره الاحلام
انا عارف اني مش قصدك انا بهرج
مجاملتك مجامله مصريين انتي بتزيطيني اكني صلاح جاهين مصريه مصريه
فريده
انا عارف ان انتي.......... صح طبعا وسلميلي علي مها عشان اليومين دول هي اوف اجازه يعني
شيماء
طبعا كلنا جوانا الخير والشر بس المشكله نسمع صوت مين الخير ولا الشر ربنا يستر
سكره المكسوفه اللي حسستني انها من ليبيا
ربنا يوفقك وتلاقي ملاك في الدنيا والجنه
نورتي المدونه والمناطق المحيطه
ريم هانم
ربنا يخليكي طبعا احنا بشر ووداخلنا نوازع وعرائز مختلفه بس مين يفعل الخير ويوقف الشر هو ده السؤال
وليد
-*-*-*
اول زياره وان شاء الله مش تكون الاخيره
قبل اى كلام الجمله اللى مكتوبه فى اعلى المدونه طبعا هى من اقوال على بن ابى طالب وهى جمله غايه فى الروعه
نيجى بقى للتعليق على البوست
تحفه بجد الكلام بيعبر عن واقع نعيش فيه ونحيا به
اسلوبك البسيط الممتع الشيق عارف السهل الممتنع اللى بنسمع عنه هو ده اسلوبك
تسلم الانامل الدهبيه التى خطت تلك الكلمات
تقبل ارق الامنيات بالسعاده الدائمه ان شاء الله
لولا وزهراء
ايه النور ده كله
الجمله دي فعلا من كلام سيدنا علي ابن ابي طالب رضي الله عنه كان عظيم وحكيم ومفكر ومبدع
مش عارف اقولك ايه علي شكرك اللي مش في محله خالص وحاسس انك بتشكري في حد تاني خالص
بجد نورتوني وان شاء الله تتكرر الزياره ولو تسمحولي اتشرف وادخل مدونتكم
يلا سلام
Post a Comment