كل سنه وانت طيب يا ريس + تسمحلي افضفضلك تاني

انهارده يا ريس انت تميت الأتنين وتمانين سنه
عايز اقولك وانت سيد العارفين ان اللي راح مش قد اللي جاي
وانه خلاص ان الاوان لالاستعداد لما هو باقي
يا ريس انا عارف ان في اليوم ده ممكن تسمعلي
ممكن مش بعيد اصلك بتبقي مبسوط وانا زمان
كنت لما بطلب طلب من ابويا حسن منته عارفه
كنت بختار الوقت ابنك بقي يا ريس
يا ريت تسمعلي ولا مره
بعتلك الرساله دي قبل كده تجاهلتها قولت
يا واد حسني ابوك قلبه كبير ابعتهاله
يمكن تاهت في مع زحمه مسئولياته
لو تسمح يا ريس
منتا برده زي أبويا
تسمحلي أفضفضلك
وأقولك عللي واجعني
وواجع أختي وأخويا
وأحكيلك علي حالنا
ده الهم هرا بدنا
دخلنا في الفين وعشره
وفي بلدي كأني حشره
غير مرغوب فيا خالص
مع اني حلمي بسيط
يادوبك حيطان وبيت
من البرد يلمني
وفي لقمه هنيه طعمه
مهياش مسرطنه
بس حسه في بير غويط
مخبيش عليك ياريس
الناس بقي حالها يصعب
علي كلاب السكك
ومسئولينا ياريس
قفلولنا كل السكك
الناس بقت ماشيه تايهه
بتكلم نفسها
تعرف ايه حلمها؟؟؟
في شقه تستر عيالها
والستر غايه أمالها
أظنه من حقها
الميه واتلوثت
وهمومنا اتكربست
وفاتوره الكهربا جايلنا أد ايه
والا العيش منتا عارف
أقولك ايه ولا ايه
فشل كلوي في كل بيت
الكانسر بقي شيء طبيعي
وأمراض الكبد سادت
والسكر فوق الطبيعي
ولا غلاء الأسعار
والدخل اللي مش مكفي
اقولك ايه يا ريس
برجع من شغلي مكفّي
الشعب نفسه ف فلوكه
تعبر لولاد ماريكا
يمكن هناك في حياه
ان شاء الله في كوستاريكا
مكدبش عليك ياريس
كان نفسي أبقي ايطالي
او حتي برتغالي
أهو منها أبقي عايش
وأعرف أعيش عيالي
شعبك مهموم ياريس
شعبك مطحون يا ريس
شعبك متهان يا ريس
شبابنا وأتغربت
من الفقر وأتكهربت
والفساد بقي للركب
والرشاوي بقت هدايا
والخراب زاد في البلد
وفوق ده كله كتير بلايا
شعبك قتله الحنين
وسنين جابت سنين
والحزن زود خزين
والكيل فاض من الألم
يمكن بكلمه منك
تتقال ولو عطف منك
تمحي ليالي الأنين
وترجع الأمل
أنا واحد من ولادك
مش عارف أجيب سكن
خايف لأكبر يا ريس
لا اكمل نص ديني
ولا أجيبلي حته عيل
يشيلني وقت المحن
نهايه القول يا ريس
واسف طولت عليك
هتتحاسب علينا
صدقني خايف عليك
ونسيت أقولك يا ريس
كل سنه وانت ريس

24 Comments:

أميرة الأحلام said...

صباح الخير ...
اه لو يسمعك ويحس بكلامك ده ويعمل حاجه كويسه واحده ف حياته يقابل بيها ربنا
ده انت لو هتكتب عن معاناه الشعب المصري مش هتكفيك دواوين
بنتمنى ييجى اليوم الي نلاقي فيه كل المشاكل او حتى جزء منها اتحل والحال اتصلح شويه بس ياترى هييجى اليوم ده
ولا هنفضل بس نحلم ونحلم
اهو ربنا قادر على كل شىء
بجد كلامك جميل جدا
والموضوع حلو قوي بس ميييييين يسمع
تحياتى

الوفية للأبـــد -- مها أحمد said...

يا سلام لو يقفشوك يا استاذ و نرتاح ؟؟؟!!!!!
هههههههههههههههههههههههههههههههههههه
انا ما اعرفكش
ههههههههههههههههههههههههههههههه
كلامك حلو اوي يا وليد و بجد محسوس و ملموس
بس مين يسمع و مين يصدق؟؟؟؟
المهم يا وليد
اليومين دول عمالين يتكلموا عن تغيير الريس و نجيب واحد جديد
المشكلة ان الناس بتتكلم من قهرها و مش فاهمين الفولة

انت عارف لو جه واحد جديد ؟؟؟
الناس فاكرين انه هيظبط البلد من جديد
بس الاصح انه فعلا هيظبطها بس لحسابه
على الاقل اللي اتعودنا عليه خلاص كل و مص دمنا و شبع
لكن الجديد لسة هيبقى عايز ياكل و يملى الكرش
فهمتوا بقى ليه ريسنا هو اللي لازم ياخدها؟؟؟؟؟؟
ربنا يعيننا يا رب و يسترها علينا
و لينا الجنة باذن الله
مع خالص تحياتي و تقديري يا وليد

هي وظروفها said...

مساء النور يا مس ايجيبت واجمل باشمهندسه ازيك يا ميرو
معرفش حسيت ان الفين وعشره زي الفين وحداشر ولن كل السنين شبه بعضها فلقتني بكتبها ان طبعا عارف انها تخاريف بس ايه يعني مهو لازم نحلم شكرا يا اميره علي كلامك وذوقك انا مليش اخوات بنات بس بجد انتي اخت وربنا يديم الموده والمعروف

هي وظروفها said...

بتبعيني يا مها وش كده وكمان جهرا جالك قلب اخص وبعدين و لو خدوني هقول ان انتي زعيمه القاعده وان انتي الملا محمد عمر بس مستخبيه في دور مها وتبقي حفله اخص عليكي اخص

أميرة الأحلام said...

بالعكس دى مش تخاريف ولا حاجه
انت عبرت فعلا عن الي احنا بنعانيه وعن الي بنحلم بيه للبلد
بس للاسف محدش بيسمع
ربنا يوفقك يارب
وانا يشرفنى يا وليد والله انك تكون اخويا
ربنايخليك
سلامى لساره كتير

ستيته حسب الله الحمش said...

بتقول له ها تتحاسب علينا؟
ان شاء الله يتحاسب
بتقول له خايف عليه
يشهد الله مش خايفة عليه

انت صغت آلامنا بشكل فوق الرائع
ياريت الكلام ده يتنشر في شيء اكبر من المدونات
يمكن يسمع او يشوف او يحس
بس ده لو بتكلم حي .. بيخاف آخرة

تحياتي

ghada mOhsen said...

بجد تسلم تسلم تسلم كمان مره ...
كلام نفس كل فرد من الشعب يقولوا ...
وفعلا ياريت توصل للريس .. عشان الشعب كله فايض بيه ..
فالاحسن انه يسمعه دلوقتى بدل ماتحصل ثوره بعد كده ...

بجد تسلم ان شاء الله وربنا يحقق احلامنا كلها بالخير ...
... ;) ,,, ;) ...

الشعب لابد له من شيما تشكمه said...

حلوه اوىىىىىىى والله.
فكرتنى باحمد حلمى فى اسف على الازعاج وهو بيكتب الخطاب للريس.
اقولك اكتبه واحنا نمصى عليه:))

تسلم ايدك بجد.

هي وظروفها said...

مدام مونا ستيته

مجيتك عندي نورتني وفعلا هاروح احاول اقابل ابراهيم عيسي ومجدي الجلاد وهحاول انشرها عند استعداد تمضي معانا عليها ولا هتفلسعي


غاده ربنا يخليكي ومش عارف اقولك ايه علي ذوقك وبجد فكرتك ممتازه وهتكون موضع تنفيذ ان شاء الله تحياتي ليكي


شيمااااااااااااا

بجد فكرتيني بشارع الضباب وكافتريا ميدو وقاعده كافتيرا السن

بس انا مش عارف ليه انتي بقيتي عميله مزدوجه شكلك بتسخنيني وفي النهايه هتعملي مش من هنا زي اختنا مها كده وهتبعيني ويلا ربنا يستر ومعلش ايضاح بسيط احمد حلمي انا مبحبوش خالص

بت خيخة وأي كلام said...

محتاج رايي فى ايه يا وليد

انا رايي معروف

ومش محتاج رايي فى حاجة زى دى
اعتقد ان اى حد هايقرالك من غير ما يعلق حتى بكلمة واحدة هيكون معروف رايه

الا بقى لو عايز رايي فى الاسلوب نفسه
لان المضمون متفقين عليه

الاسلوب كويس
ولو انى كنت افضل انى اسمعها منك شخصيا
لانى ممكن اكون بقراها بنغمة غير اللى انت تقصدها



سلام
اختك خيخة


ملحوظة
شيل تاكيد الكلمة علشان انا بزهق من الحركة دى

هي وظروفها said...

نورا

ان شاء الله في القاء المجمع للمدونين اللي جاي هسمعهالك باضافتها اللي طبعا شيلتها ليطلع عين امي ربنا يخليكي بس علي فكره علامات التأكيد انا مقللها خالص بالعكس المحتوي سايبه يأكد نفسه شكرااااا وتحياتي ليكي يا ام شريف

Tamer Nabil said...

ياريت يسمع ويحن على ملايين المصررين المعذبين فى الارض

كلام جميل

مع خالص تحياتى

هي وظروفها said...

تامر

أهلا بيك نورتني

والله يا تامر ان مسمعش وده المتوقع ففي مثل بيقول بتصريف اصبر علي الحاكم السو ييرحل يتجيلوا نصيبه تاخده وانا بصراحه اتمناله الاتنين شكرا لمرورك يا باشا

عـــــــ فريدة ــــاشقه بلا قلب said...

الله عليك لما بتعبر عن كل ده شعب بس علي رأي الكل ان الكلام ده بس بس لازم يكون هنا

المفروض فعلا يكون مسموع ومرفووووووع رايته

بالتوفيق ان شاء الله

هي وظروفها said...

فريييييييييييده ازيك انتي اللي مها كانت هتموتك من الحزن والله بتصعب عليا انصحك سيبك من مها خالص هههههههههه ربنا يرفع رايه الخير ويعم علي كل شبر في حبيبتنا مصر شكر لمرورك ونورتيني وياريت تكرري زيارتك كتير تحياتي ليكي

الوفية للأبـــد -- مها أحمد said...

هي فريدة جاتلك هنا ؟؟؟؟؟؟؟؟
يللا يا عم افتكر الجمايل دي
ههههههههههههههههههههههههههههه
اديني بجيبلك ناس اهو

بس يا ريت تفتكر

مع خالص تحياتي

هي وظروفها said...

هههههههههههههههههههههههه والله العظيم اول مبشوف اسمك بضحك ووالله معرف ليه انا شفت رد فريده افتكرت لما كسفتني عندك قعدت اضحك ربنا يخليكي بجد يا مها والله من غير مشوفك حاسس انك اختي بجد ربنا يديم المعروف

عــــــ فريدة ـــااااشقه بلا قلب said...

لا طبعا ماتفهمنيش غلط انا عمري طبعا ماأكسفك بس حبيت أعرفك ان أنا فعلا موووودي دايما مايل للحزن وحبيت أعرفك كمان ان مها فعلا دايما بتنصحني أن ابعد عن المووود ده بس هوه دايما غلاب عليا وفعلا انت لو عرفت مها في الواقع صدقني مش هتطبل ضحك لانها فعلا شخصيه مرحه وخلوووووقه جدا وأكتر الشخصيات اللي ممكن تعرفهم احتراما وفعلا نعم الاخت والصديقة ليا ولنااااس كتير
بالتوفيق ان شاء الله

Shaimaa said...

وليد كا بقالى كام يوم بحاول أدخل عندك ومكنتش عارفة خالص يمكن كان عيب عندى فى الجهاز
المهم....حلو أوى كلامك ..بتتكلم بلساننا كلنا بس نفسى أوى الكلام يتسمع مش بس من الريس من كل اللى حواليه وخصوصا "أ/ عماد الدين أديب" اللى كان فى العاشرة مساءا يوم رأس السنة واللى حسسنى ان احنا عايشين فى أمريكا ولا فرنسا مش فى مصر وبننكر الخير اللى احنا فيه
اسمع يا عمو أحمد عز انت كمان
بس ربنا يستر عليك

هي وظروفها said...

فريده

انا بهرج منا فاهم قصدك من الاول بس حبيت اهرج مع الغاليه ومعاكي وبعدين ابعتيلي لينك مدونتك لاني مش عايز تفتح عندي خالص مش عارف ايه

هي وظروفها said...

شيماء

مش عارف موضوع النت ده في ايه في برده كذا مدونه مش بتفتح معايا

وعماد الدين أديب اللي مش اديب ولا يعرف حاجه في حياته الا النفاق وهو ده زمانه المثالي كان هيلاقي فين حد يسمحله يبقي ملياردير بافلاي الوسخه اللي بيعملها وعاش الملك مات الملك وشيلني واشايلك وسبوبه واكل عيش ربنا ينتقم منهم جميعا

emymony said...

الله رائع ..سياسه مخفيه بذوق وحنيه واعتراض على الحكومه من غير اظهار للكره احييك على اسلوبك رائع بجد
هو دا حالنا وحال شبابنا اللى بيهربوا من المسئوليه وعايشين التهييس خايفين من الواقع والاحلام الضايعه.....

هي وظروفها said...

emy

جميل السجع في كلامك ضحكتيني مخفيه لا مش مخفيه دي الدنيا كلها عارفه اللي احنا عايشين فيه ربنا يخليكي وشكراااا علي ذوقك نورتيني يا ايمي

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل