قله الذوق والسخافه وصداقه الجنيه

مواقف قله الذوق والسخافه وصداقه المصلحه بتلعب دور

البطوله المطلقه عند بعضنا........

من نااس نعرفها أو منعرفهاش لناس نعرفها برده او منعرفهاش

ومن كتر ما كنت باكلم الفضولي اللي ادامي لو اعرفه طبعا عشان

ناقصه مشاكل قولت يا عم وانت مالك خليك في حالك انما يحصل

معايا .......(جمله اعتراضيه) الناس اكنهم مفطومين علي الفضول

ومواقفي معاه ياااااااااااااااااه كتير منها أيام الجامعه كنت باخد كورسات

وورد واكسل في معهد نظم ومعلومات القوات اللي كانت مسلحه ودلوقتي

بتنتج زيت وصابون المهم راجع ومعايا واحده زميلتي حيث الميكروباص

ومعايا بنت زميلتي وعند اشاره تريموف وكانت واقفه عدي جمبنا شاب راكب

السنه ومشغل كاظ حبيبي وممنوعه انتي يقوم الواد التباع قايل شايف يا اسطي

ابن أمه اللي جمبك عالم مرتاحه ومقضياها وراح سكت قلت ياد وانت مالك

شويه والعربيات اتحركت والشاب جه تاني جمبنا يقوم التباع قايل مهو مش تعبان فيها

ومعلي التسجيل علي اخره يا اسطي يا خسارتك يا امه اتحرق ددمي ورحت قايله

الا قولي يا كبير لو أمك لا مؤاخذه جابتلك عربيههتركبها ولا لأ قالي طبعا هركبها

قولتله وانا اوعدك لو امي جابتلي عربيه هكتب علي الازاز اللي ورا بالبنط العريض

أبن امه............

موقف تاني راجع أنا وخطيبتي من وسط البلد وركبنا المترو ووقفنا ولقيت جمبي واحد

مستني يتساخف علي حد و انا شايف بجمب عينه متنح عليها بصيتله عمل أهبل

شويه وامحه متنحلها أكنه هيغتصبها وانا اقول ياد بصله يمكن يحط في عين أمه حصوه ملح

ويشوف رجل الكنبه اللي جمبها وهو متنح والدنيا حلوه وانا بفكر اكلم هيقولي انا كلمتها يا أستاذ

طالما خايف عليها متركبها تاكس والكلام ده شويه ولقيته هيغتصبها بعنيه قولتله بقولك يا بيه

هي الانسه شبه بنت خالتك اللي هاجرت كندا واللي اللي فرحها كان في طنطا في ايه متحترم نفس أمك

وتبص ادامك ده انت ابن ( واحده مش نضيفه) صحيح وبقت خناقه........

ولا صداقه المصلحه واختراق الضاحيه من أي ناحيه وخصوصا في شغل السياحه

الللي ان شاء الله هسيبها قريب قولو امين .......

شغلانه مليانه ناس مش بني ادمين ولا عندهم فكره الا عن حاجه واحده باتفاق ضمني عجيب

الجنيه وفقط في وشك حبيبك وفي ضهرك اد ايه انت انسان وحش لالاسف اغلب مكاتب السياحه كده

وبيكرهو الخير لبعض بصوره غريبه الا من رحم ربي نبقي قاعدين في المكتب مع بعض واول ما حد

يقوم يشوف شغله او يعمل حاجه في منت يتحول لشخص واطي وحرامي ومش كويس وابن ستين كلب

ولو رجع تاني لاي سبب الموضوع يتغير في ثواني ويقولوله يا اخي ده احنا لو جبنا سيره فلوس مكتش هوبت

ناحيتنا سبحان الله بجد...

تغيب يوم يومين تعبان ولا حد يسأل في أهلك اكونش من كفار قريش لا والله ده مع الاغلب كده

ولا يتصلو ولا يعبروك وأول مترجع بوس وأحضان !!!!!!!!

واللي تستغربله أعتذارتهم اللي مراته كانت تعبانه ومن الشغل لعياده دكتور النسا

واللي جالو اسهال فظيع ومكنش بيخرج من الحمام واللي اتشغل بخناقه جيرانه مع بعض

وشقه جاره اللي ولعت يا عالم كل ده حصل أمال لو غبت شهر علي كده ممكن الهرم يتسرق والمطار يتحرق

وابن فلان تجيله زغطه ويتخنق .....

يا كل قليل الذوق ويا كل واطي ويا كل صاحب مصلحه وقبلتك توجد حيث يوجد الجنيه طز فيكم وفي أشكالكم

ومش هتخلوا الواحد يغير من اسلوبه ولا مبادؤه ان شاء الله عشان يجاري الجو و يعرف يعيش حياته بطريقتكم

ربنا ليهديكم لا يخدكم كتكو الأرف مليتو البلد

7 Comments:

مهموهة أحمد said...

هاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاها

يخرب عقلك موضوع حلو اووووووووووووووووووووووووووووي
و قال ايه ( انت ابن واحدة مش نضيفة ) هاهاهاها
ايه يا واد الادب في الشتيمة ده
ههههههههههههههههههههههههههههههههههههههه
لا بجد موضوع حلو اوي
و فعلا لا نغير ما بقوم حتى يغيروا ما بانفسهم

و دي صعبة اوي عند الشعب المصري انه يتغير
ربنا يعيننا و يهدينا جميعا يا رب

مع خالص تحياتي

هي وظروفها said...

هههههههههههههه الاخت مها طيب الله ثراها وجعل الجنه مستقرها ومأواها انتي فاهمه النت واحكام الرقابه التدوينيه الذاتيه منا مكتبتش انتباع الميكروباص شتم شتيمه فيها 80 جلده حد قذف مش ليا والله عرفك فضيحه وهتسيحيلي وبعدين ملكيش فيه هههههههههههههههه

أميرة الأحلام said...

كلامك ده نموذج مصغر للي بيعانيه الشعب المصري
الي مش عايز يغير اى حاجه في سلوكياته ابدا مهما مر الزمن
ومافيش اكتر من صحوبيه المصلحه دى لوحدها كفايه بقت منتشره بشكل غير عادى
موضوعك جميل جدا
ويارب يجي اليوم الي نشوف فيه بلدنا بتتغير

هي وظروفها said...

صباح الخير يا أميره ايه يا جدعان اصلي واروح الاقي مس ايجيبت بنفسها عندنا ينهار ابيض يا باشمهندسه بلدنا بتتدهور بينا واحنا ولا ملاهي السندباد مبسوطين وحمدين وشاكرين ربنا يخليك يا توت غنخ مبارك وتحكمنا لحد ما حفيدي محسن يشوفك ويشارك في دفنك منتا رمز يا حج اسف يا ريس

Dakr Bat said...

اهو عشان كل كلامك ده انا سبت البلد وهربت ايوه هربت وسبت اغلى ماعندى فيها هى اهلى لان بصراحة بلدى بالنسبه لى هى اهلى اما بالنسبه لمصر فاانا بحبها زى ماهى حبتنى يعنى زى ماحفظت على كرمتى وامنت مستقبلى واحترمتنى وحبتنى انا كمان حبتها اعتقد دلوقت عرفت انا بحب بلدى اد ايه عشان كده احب اقولك ان مش كل اللى بيهاجر ويطفش من البلد عشان الفلوس عشان ميجيش اليوم اللى يركب فيه مراتوا مترو او ميكروباص مش عشان دول عيب ولا حرام ابدا بس عشان البنى ادمين مبقوش بنى ادمين والنصب وقلت الادب والبلطجة بقى اسمها فهلوه ناس كتير بتفتكر ان اللى بيهاجر ده بيجى يقعود تحت شجرة وتنزل عليه فلوس بس الموضوع مش كده الموضوع اننا بنضمن لاهلنا واولادنا مستقبل افضل حتى لو كانوا عايشين فى مجتمع مش متدين فده هيكون الف مره من قلت الادب والفساد والبلطجه اللى موجوده فى مصر دلوقت.... ربنا يصلح الحال للجميع وينتقم من اللى غربونا عن اهلنا

هي وظروفها said...

dakr bat
كلامك صح انا ليه 3 صحابي بره ومرتبهم مش جامد بس بيقوليلي كفايه انك عايش في بلد عارف يعني ايه انسان ويعني ايه احترام تحياتي ليك ونورتني وحاولت ادخل مدونتك مش عارف لقيتها مبتفتحش ليه ربنا يرجعك لاهلك بكل خير وسلامه وبجد شرفني تعليقك

غير معرف said...

وليد
هو دا صاحبك اللى كان بنقابله مع رامى

محمد خفاجى