يوميات مندوب مبيعات

بعد أن تركت العمل ف مجال السياحه عامدا متعمدا لاسباب وقناعات شخصيه التحقت بالعمل باحدي
شركات الصناعات الغذائيه حتي يتوفر البديل الافضل ...
لم اكن اعلم وانا شعبي المولد والنشأه والحياه
ان شعبيتي التي كنت أزعم انني احد ابنائها المخلصين اللي هرشين تيته الدنيا وفاهمين وعارفين مين
اللي حلب جاموسه الحج محمود مين الحج محمود ده ما علينا انها محض ادعاء مني كذبا
الي انا بدات رسميا العمل ..
بدأ يومي ف التاسعه صباحا كما تنص قواعد وقوانين الشركه ...
توجهت الي مخزن الشركه اسفل المكتب الاداري بعدما ضربت طبق الفول اللي يخلي الواحد ميفكرش ياكل
تاني وخصوصا اذا كان بيعاني من مرض النحافه زي حالاتي الا تاني يوم....
أتم العمال تحميل السياره ندهت علي السائق يلا يا عمنا نلحق يومنا يباركلك...
أنطلق الي منطقه لم اكن من سعداء الحظ بزيارتها قبل ذلك تندرج تحت لقب احد الاحياء العشوائيه..
ولانني ابن منطقه عشوائيه شعبيه رخوه فلم يتوارد الا ذهني تخيل مغاير لشكل تلك المنطقه
انها مثل منطقتي التي تربيت فيها وكما مناطق الشرابيه والزاويه وكل اخواتهم ف الرضاعه ...
دخل صديقي واذا به يتوغل وينتشر ومن شارع لحاره لزقاق وهووووووووب دخل مغاره
يخرب بيت ملامحك احنا فين ياض قالي اتقل وسيبني انا اتعامل ومتشتبكش مع الهدف
الا لحظه الحساب قولتله تمام يا ابن عمي .
ذهب الي محل بقاله تحت عقار يكاد يكون تهدم علي راس ساكنيه من ايام الظاهر بيبرس
وهو يتحدث مع صاحبته تلك السيده الشابه جميله المنظر والاسلوب ..
ذهبت ناحيه السياره لأحضر علبه سجائري واذا بسيده تأتي ناحيتي وبقوووووووووولك يا اخويا
خيير يا امه(من خضه صوتها)مش يا امي يعني
هتديني كرتونه عشان مبتجوش كتيرنواحينا ولا هتقولي خلصت
قولتلها وشرف خالتي لبني دنتي عشان رقه صوتك لو مفيش اخليه يسيبني رهن هنا
لحد ما يروح يجيبلك طلبك..
قالتلي فل علييييييك قدر تتقدر تكسب محبه الناس وراحت منزله كم العبايه وراحت مطلعالي
حساب حاجتها...
ولما لقيتني ببصلها باستغراب علي مكان فلوسها قالتلي مش احسن يا اخويا ما تقع مني
قلتلها اكيييييييييييييييييييييييييييييييييييييييييييد!!!
جاء صديقي وانطلقنا ناحيه جهه معلومه له مجهوله لي وأخذ يتوغل وف احد الأزقه الضيقه
وبتعليقاته المميته لي من الضحك وبخفه دم مخلياني مش مركز مع المكان
توقف رايت ست محلات بقاله متجاوره ف اقل من عشرين متر ازاي معرفش!!
نزل يشوف طلباتهم وانا عامل فيها اجنبي ومندهش
لقيت ست كبيره ف عمر جدتي سبعينيه بقولك يا استاذ قولتلها خير يا حجه
قالتلي انت تعرف البلاص ده من زمااان تقصد صديقي قولتلها ولا اعرفه
قالتلي عمتن رغم ان قرايب الاب بيكونو وحشين الواد البلاص ده ابني وحبيبي
وواد جدع ومسكته تهريج ولما ضحكت راحت قالبه الدفا عليا وزي ماقالتلي عنه الله يباركلها
مقصرتش قالت عليا زي اللي قالته عنه مساواه اصلها طلعت منوفيه وكلنا عارفين عدل كبير المنايفه..
واحنا بنتكلم مع خريفيه العمر دخلت عليه ست تبدو عليها اثار الخروج من معركه حاميه الوطيس
انا عايزه كذا كذا كذا وسابت الفلوس وهاتهملي يا ابني ينوبك صواب.
من الزحمه ولتفكير صديقي ف مشكله اسريه نسي المعلم ونسيت ومشينا وخرجنا بره المنطقه.
واذا بهاتفه يرن يا محمد انت منزلتش للحجه صابحه بضاعتها ليه؟؟؟
تعالي بسرعه احنا مش قدها
جاب وش العربيه مكان ضهرها وادي رجعه..
دخلنا ذلك المربع المتشابك الذي عندما دخلناه ف المره الاولي كان مزدحما ولكن
هذه المره رايت حشودا منتظره ذلك اللص الذي تجرا واخذ مال الحجه صابحه وفر هاربا
واول ما لمحوا السياره ووقفتنا عند باب الشارع الضيق وترجلنا
اذا بهم يريدون الفتك بصديقي وبي فين بضاعه الحجه
قولت بس لو سكت هنموت ثواااااااااااااااااني بس وصلوا ع النبي يا جدعان
حد يسرق أمه يا جدعان الراجل ف الزحمه نسي ثم دي اشكال تتسرق
قالولي اااااااااااااايه قولتلهم ايوه الاشكال اللي تتسرق دي اشكال هلس وشلح
انما انا بالصلاه ع النبي شايف حصنا عربي اصيله رجاله رجاله يعني وكلنا بننسي
وديلها البضاعه لحد عندها يا محمد وبوس دماغها مش زي ابنها ولا ايه يا جدعاااااااان...
خرجنا بالسياره واول ما طلعنا ع الاسفلت قولتله
اي جمب اركن نسجد شكر كنا هنموت يا ابن الجزمه بسبب نسيانك.
بفكر اكملها كتاب بنفس العنوان عن يومياتي ده لو ممتش يعني

16 Comments:

Lady E said...

ربنا يوفقك في شغلك الجديد وبجد وانت بتحكي متخيلة المشهد :)

" ثم دي اشكال تتسرق" كويس انك صلحت الجملة بسرعة

غير معرف said...

يخرب بيت فقر دمك مالكش حل والله
نها

Ramy said...

أدعيلى

انا كمان يا عم يجيلى أفراج من السياحة (:

مبرووك ع الشغل الجديد يا باشا

و بالتوفيق

(:

أعملها كتاب و احنا معاك (:(:

يوميات مندوب مبيعات

(:(:

فتاه من الصعيد said...

هههههههههههههههه

ربنا معاك

ان شاء الله تترقى وتروح الزمالك ... او حرس الحدود :))

تحياتي

Mahmood البطراوى said...

هههههههههههههههههههههههههههه


=)))

لسه ليك عمر يا وليد :D

كيــــــــــــارا said...

هههههههههههههههههههههههههههه

يالهوي ياوليد ايه المغامرات دي

اتاريك يعني يوم الجمعه اما شفتك كان باين عليك وانا اقول هو جراله ايه

ربنا معاااااااااااااك يارب

فتافيت said...

لا حمدلله على السلامة الاول
هههههههههههههههههههههههههه
كنتوا هاتروحوا في داهية لكن ربنا ستر

انا مش عارفة جيت هنا قبل كده ولا لا
بس بصراحة شوفت طريقة عصير الرومان
عجبتني دخلت لاقيتك زومل في بلوجسبوت واحد

فقولت اشوف مدونتك
حلوة ولذيذة.. زي عصير الرومان

مبروك الشغل الجديد
وربنا يوفقك

نهر الحب said...

ههههههههههه
حلوة عارف شيقة بس اصابتنى بالحزن على واقع مصرى مرير
زمان مكنيش فى عشوائيات بالكثافة دى ولا بالشكل دا
بس للاسف مصر ترجع للخلف

نهر الحب said...

ههههههههههه
حلوة عارف شيقة بس اصابتنى بالحزن على واقع مصرى مرير
زمان مكنيش فى عشوائيات بالكثافة دى ولا بالشكل دا
بس للاسف مصر ترجع للخلف

صيدلانيه طالعه نازله said...

هههههههههههههههههههههههههه
ملكش حل انت يا وليد
طب والله الوظيفه دى انت حتحقق فيها نجاح منقطع النظير
ربنا معاك يا ليدوووووو
و ياريت كل يوم بوست جديد
و الكتاب كده حيبقى ميه ميه
بس بالنص بقى
متنساش انى اللى كبرتها ى دماغك

ربنا معاك يا كابتن

Shaimaa said...

مبرووووووووووك على الشغل الجديد يا وليد انت راجل جدع وربنا هيوفقك ان شاء الله

Shaimaa said...

ابقى احكى لنا يا وليد صحيح عن يومياتك فرصة نعرف عيوب ومميزات كل مهنة

wasf_elahsas said...

هههههههه
ده علي طريق اضرب صحبك لو كانو كتير
مبروك الشغل الجديد
وسوري اني ما كنتش متابعة الايام ال فاتت
بس معرفش ايه ال فكرني فجاه كده
المهم كمل اليوميات ومبروك الشغل الجديد وربنا يوفقك فيه

هي وظروفها said...

نورتوني يا جماعه والف شكر لتعليقكم اللي مليان مجامله
ومن موقعي هذا احب افولكم بلوجر نور
بيكم
اخوكم وليد الدوغري

Sameh Ezzat - (خواطر خاطر) said...

ياباشا انتا كده تقدر تيجي تتقدم عشان تختطب خالتي وانتا رافع راسك لفوق دا انتا مستوظف اد الدينا..
بس
هوا انك تفضح الدنيا كده وتنقل للقارئ المسكين واقع الحاره الشعبيه الرقيقه ده انا اعتبره تشويه في سمعه البلد ياعم انتا ولا ايه..
بس تعرف يا وليد انتا عملت سرد وجرد في منتهي الروعه باسلوب خفة دمك اللي هلكتني من الضحك وانا بتخيل منظرك في المواقف دي.. ارفع لك القبع عليه ياريس..
بس اناعايزك تاخد بالك من نفسك وتشد الحزام واوعي تسألني تقولي احط بنزين 80 ولا 90 عشان مدايقش عليك..
....
الله يكون في عونك يا صديقي....

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل