التوقعات المرئيه للحكومه الذكيه

بما ان الأصل في الحكومه المصريه سوء الظن وبعدما تناقلت وكالات الأنباء خبر وفاه
حس (نيه) دعونا نتوقع ما سوف يحدث خلال الأيام القادمه من واقع معطيات سابقه وحاليه..

أتوقع....
بعد انتهاء مباره الأهلي وشبيبه القبائل الجزائري يوم الاحد القادم ان تترك سلطات الأمن
العنان لشباب الألتراس الأهلاوي لتكسير أتوبيس الفريق الجزائري وضرب جمورهم !!
لكي يتركو الشعب يفتخر ويتحدث لمده شهر علي الاقل عن انتصار واهم
علشان يبعدوا تركيز الناس عن قضيه استيراد غازنا من اسرائيل الشقيقه
والتعتيم علي قضيه كاميليا شحاته وقطع الكهرباء وسرقه لوحه فان خوخ ووووو...الخ!!!
والأعجب اننا كشعب الا من رحم ربي هننشغل وهنفرح بضربهم !!!!!!!!!!!!!!!!!!!!!
أتوقع .....
بعدما قام الحزب الوطني الديمقراطي((تحتها ميت خط اسود)) بجمع ما يزيد
عن 75 مليون جنيه من خلال دفع كل عضو يريد الترشح مبلغ 15 الفجنيه رسوم استماره المجمع الانتخابي
وقد قام خمسه الاف عضو بسحب تلك الاستماره ان تشهد الدوره البرلمانيه القادمه نصايب
واي شخص عنده بصيص من بصيره لسه موجوده سيعرف ان من يدفع ليترشح هيدخل مجلس الشعب
عشان ايه يخدم اهالي دايرته ويبقي ابن الدايره((عند ام شوكت))اصل ام ادهم عزلت من الخنقه
اكيد اللي دفع هيقول وديني منا معدي الدوره دي الا اما اخد حقي تالت ومتلّت!!!!!
وحقك عليا يا حكومه.......
ونشوف بقي غير نواب القمار والقروض والساعات والملاهي الليليه نواب من نوع جديد
تحت شعار((أنت تعيش والحزب الوطني يعيش يا حاج))

أتوقع
أن يصل التحقيق ف البلاغ المقدم من عدد من ابناء مصر المخلصين الي النائب العام للتحقيق
في قضيه تصدير الغاز لاختنا الكبري اسرائيل أنه هذا البلاغ هيتشد عليه السيفون
ويطلع ((نأبهم ونأبنا علي شونه))لأن سامح باشا فهمي متصرفش من دماغه وموقعش عقد صقفه
تصدير الغاز مع الجميل شاؤؤل موفاز بدون علم كبير الدهشنه ابسلولتي كان هو اللي مظبط الأمور
فكيف يترك الزعيم الملهم ذو الحكمه الا نهائيه احد رجاله المخلصين لادانته ومن ثم ادانه النظام كله
(عند ام رؤؤوف ))نسيت اقول ان ام شوكت ماتت من الحسره
علي العكس سوف يتم حفظ التحقيق وهنشتري غازنا بعشر اضعاف تمن تصديره

أتوقع
بعدما تدخلت الشقيقه اسرائيل من خلال مكتب مخابرتها ف العاصمه الأثيوبيه
بابلاغ السفاره المصريه بانه ف استطاعه اسرائيل التوسط بين مصر ودول حوض النيل
لحل مشكله حصه مصر من مياه النيل الخاصه بدولتنا((ههأووو)دولتنا ما علينا!!
وذلك نظير حصول اسرائل علي حصه من مياه النيل تقدر بميه مليار متر مكعب من مياه النيل.
أن يتحول عما قريب مصب نهر النيل علي الخريطه من البحر الأبيض المتوسط
الي ميناء ايلات من خلال مواسير تعبر البحر الحمر رأسا من سفاجا!!!
وأتوقع ان تعطينا اسرائيل بما عرف عنها من طيبه قلب وحسن جيره كميه لا تكفي لغسيل
مواعينا من مياه النيل وذلك مراعاه لمبدأارحموا عزيز قاره ذل
ابوس ايدك يا ريس كلوا الا مواعينا ابوس ايدك!!!!!


17 Comments:

حفيدة عرابى said...

انا اللى هاموت او هطفش مش ام ادهم ولا ام شوكت
فكرتنى والله بأمنيتى الغالية زمان انى اغسل المواعين فى الترعة
لما كنت اروح البلد كنت هموت واعمل زيهم
بس ماما حرمتنى من حلم عمرى:))
مش مكتوبالى ولا حتى من النيل شخصيا

كويس والله ان فى حد عارف ان تصعيد المشاكل مع الجزائر كان متعمد لان فى ناس لغاية دلوقت مستعدة لو اتفتح باب الجهاد تروح الجائر

شريف said...

انا مع قول حكيم العصر اخونا شعبولا انا بكره اسرائيل، ولاكني احترم الدوله دي جدا جدا جدا ، قبل ما تتهمني بالخيانه العظمى ياوليد اقصد من ناحية تمسكها بمبادئها واحترام عقيدتها لو لاحظت في اخر مشاكلها((محرقة غزه،واغتيال المبحوح،واسطول الحريه))وقفت ادام العالم كله وقدرت بعد كل مشكله منهم تتخطا نقدهم وتسكتهم وبالعكس تحول النقض الشفهي ده لدعم عملي من نفس الاشخاص الكانو بينتقدوها وده سر استمراريتهم وانا شايف اننا مستحيل نردع اعدائنا الا اما نرجع لعقيدتنا وزي ما سيدنا عمر ابن الخطاب قال (((قد كنا اذل قوم فأعزنا الله بالاسلام فأن ابتغينا العزه في غير الاسلام اذلنا الله)))هو ده الحل نرجع لدينا والله لانشوف دولنا دي هتوصل لايه وفي اقل من 15 سنه ووالله كتير واقولك ليه كتير ياعم وليد مين فينا ماسمعش بعهد خلافة عمر ابن عبد العزيز الراجل ده استلم الخلافه بعد موت الخليفه سليمان بن عبد الملك خدها دوله في مساحتها اضعاف الدول العربيه مجتمعه وكان الظلم منتشر فيها جدا وكان كلها اعراق وطوائف وديانات مختلفه وطبعا كلنا عارفين ازدهرت ازاي لدرجة انه كان بيخرج الفلوس من بيت المال للشباب المتجوزش والمشعرفين يسدو ديونهم وكان مبيلقيش حد محتاجها عارف مدة حكمه كانت اد ايه...........ناس قالت سنتين ونص وناس قالت سنتين الا ربع.
والله ما هيتعدل حالنا الا اذا رجعنا للطريق الصح ، ربنا يهدينا ويصلح حال امة محمد.

ستيتة حسب الله الحمش said...

ولأن الشقيقة الكبرى قلبها حونين
قررت تعلم ولادها من سن 10 سنوات
واخد بالك
اللغة العربية
ياترى محتاجينهم بعد 11 سنة او اقل يكونوا بيتكلموا عربي ليه؟
فعلا
برافو
علشان يحسنوا علاقتهم مع الجيران الأوغاد

يا مراكبي said...

للأسف التوقعات دي احتمال حدوثها عالي جدا ومنطقي جدا
:-(

والأمل في التغيير مازال قائم طبعا ولازم نسعي ليه .. لكن لا زال احتمالات حدوثه ضعيفة للأسف

:-(

اعقل مجنونه said...

اولا التوبك رائع جدا يا أستاذ وليد وعلشان كده عندى طلب عند حضرتك
يعنى بعد أذن حضرتك لو سمحت ليه إنى أنقل التوبك على نوت على الفيس علشان صحابى وطبعا هكتب أسم حضرتك وأسم المدونه واللينك
اتمن أن حضرتك توافق وهكون شكره جداولو رفضت دا حق حضرتك المطلق

مره تانيه أحب أحيك على التوبك الرائع

هي وظروفها said...

بما اني مش هعرف اعلق دلوقت علي كله احب اقول لاعقل مجنونه اتصرفي ف ابوست زي منتي عايزه المدونه مدونتك
رمضان كريم وكل سنه وانتي طيبه

اعقل مجنونه said...

مرسيى جدا لزوق حدرضك

دى مدونتى لو حبيت تشرفنى
http://kot-cha.blogspot.com/

اقصوصه said...

رمضان كريم

وكل عام وانتم بخير :)

دموع القمر said...

نوكومنت

دموع القمر said...

الو الو الو
حول هل تسمعنى
نزلت حلقه جديدة من قلوب بلامرسى
هستنى تعليقك

راجية الرحمه said...

بجد والله حال يحزن
تزوير واخدين عليه
سرقه و اتعمينا سرقه
مايه قاطعه والحمد لله موتنا من العطش -والله المايه عندنا مش بتيجى غير الصبح -والكهربا والحمد لله بفضل الله مضلمنها علينا كل يوم يقفلوا كابل شكل
ودى كمان ابسط حقوقنا
ده غير مرتبات الموظفين و الاسعار اللى فى الطالع
وكل ده ويقول من اجلكـ انت هو ايه اللى من اجلكـ انت اللى الاهى ربنا ينتقم منهم

كــركــبــة دمـــاغ ㋡ said...

انا اسفه جداااااااااااااااااااااااااااااااااااااا


لو حصل مني اي حجاه وحشه في اللقاء

بس اكيد والله العظيم من غير ما اقصد

وانا والله كنت فرحانه انش شوفتكم كلكم

حتى لو ما اتعاملتش معاكم اوي

بس كنت مبسوطه بوجودي وسطكم وابدا والله ما بصيت شذراً ولا حاجه

حقك عليا

انا بعتذر بشده بجد

كــركــبــة دمـــاغ ㋡ said...

لو حصل مني اي ( حاجه ) وحشه


-----

كنت فرحانه( اني ) شفتكم كلكم


^^^^

تصحيح بس للاغلاط

واسفه كمان عشان الكومنت مش ليه علاقه بالبوست

بس كان لازم اعتذر لاني فعلا اتصدمت اما قريت الكووومنت

حقيقي مكنش قصدي حاجه كده خالص

Shaimaa said...

والله ممكن تحصل التوقعات دى يا وليد ويمكن أسوأ كمان...

اتفرج بقة على مصر بعد رمضان.... فتة ولحمةوأمن وضرب واهانة ورشاوى ...
هنشوف العجب عشان الانتخابات
مش عارفة كل مدى بنروح للأسوأ ليه
ربنا يستر

المهم كل سنة وانت طيب ورمضان كريم

غير معرف said...

بوست دمه خفيف قوى
بجد استمتعت بقرايته ... وده لأول مرة
بس الغريبه انى دايما متابعاك ..
مع انك احيانا بترخم علي...
عموما احنا فى رمضان وانا قلبى كبيير
كل سنه وانت طيب
الغير معرفه اياها

Admin said...

اول مره بس مدونه زى العسل

مريم مر العمراوى said...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل